ລາວ ຂຍາຍສັກຢາປ້ອງກັນ ໂຄວິດ

ມະນີຈັນ
2021-04-02
Share
ລາວ ຂຍາຍສັກຢາປ້ອງກັນ ໂຄວິດ ສປປ ລາວ ໄດ້ຮັບ ໂຄວິດ-19 ວັກຊິນ ເພີ່ມຈາກອົງການ ອະນາມັຍໂລກ.
ນັກຂ່າວພົລເມືອງ

ທາງການລາວ ເຣີ່ມສັກຢາປ້ອງກັນ ໂຄວິດ-19 ແອສຕຣາເຊເນກາ ທີ່ໄດ້ຈາກໂຄງການ COVAX Facility ໃຫ້ກຸ່ມຜູ້ສູງອາຍຸ 60 ປີ ຂຶ້ນໄປ ແລະ ຜູ້ມີໂຣຄປະຈໍາໂຕ ແລະ ພະນັກງານ ແພດ-ໝໍ, ເຈົ້າໜ້າທີ່ດ່ານ, ເຈົ້າໜ້າທີ່ສະຖານກັກກັນ ທີ່ມີບັນຫາເຣື່ອງສຸຂພາບ, ອີງຕາມຄໍາເວົ້າຂອງ ເຈົ້າໜ້າທີ່ກະຊວງສາທາຣະນະສຸຂ ໃນມື້ວັນທີ 1 ເມສາ 2021.

ການສັກຢາປ້ອງກັນ ໂຄວິດ-19 ເຣີ່ມໃນວັນທີ 2 ເມສານີ້ ຢູ່ໂຮງໝໍສູນກາງ, ໂຮງໝໍແຂວງ ແລະ ໂຮງໝໍເມືອງ ຍ້ອນວັກຊິນ ຊິໂນຟາມ ທີ່ໄດ້ມາຈາກຈີນ ບໍ່ສາມາດ ສັກໃຫ້ກຸ່ມດັ່ງກ່າວໄດ້ ແຕ່ວັກຊິນແອສຕຣາເຊເນກາ ສັກໄດ້. ດຣ. ພອນປະເສີດ ອຸນາພົງ, ຫົວໜ້າ ກົມອະນາມັຍ ແລະສົ່ງ ເສີມສຸຂພາບ ກະຊວງສາທາຣະນະສຸຂ, ກ່າວໃນມື້ຖແລງຂ່າວ ວັນທີ 1 ເມສານີ້ວ່າ:

“ແອສຕຣາເຊເນກາ ຈະໄດ້ຈັດຕັ້ງປະຕິບັດ ສັກຢູ່ໃນມື້ອື່ນນີ້ ໃຫ້ກັບກຸ່ມຄົນມີອາຍຸສູງ ຜູ້ທີ່ມີພຍາດປະຈໍາໂຕ ໃນໄລຍະຜ່ານມາຫັ້ນ ເຫັນວ່າ ບໍ່ສາມາດສັກ ຊິໂນຟາມໄດ້ ມັນມີຈໍາກັດ ຢູ່ບ່ອນວ່າ 18-60 ປີ ເພາະສະນັ້ນ ແອສຕຣາເຊເນກາ ນີ້ສາມາດ ສັກໃຫ້ກັບ ຄົນທີ່ອາຍຸ ກາຍ 60 ປີ ກະໄດ້ ຜູ້ມີພຍາດ ປະຈໍາຕົວສັກກະໄດ້.”

ນອກຈາກນີ້, ຫ້ອງວ່າການ ສໍານັກງານນາຍົກຣັຖມົນຕຣີ ຍັງໄດ້ອອກແຈ້ງການ ວັນທີ 30 ມີນາ 2021 ເຖິງກະຊວງສາທາຣະນະສຸຂ ໃຫ້ຈັດຕັ້ງປະຕິບັດ ການຂຍາຍການສັກຢາ ປ້ອງກັນ ໂຄວິດ-19 ໃຫ້ພະນັກງານ ຣັຖກອນ ຢູ່ກະຊວງທະບວງກົມ ທ້ອງຖິ່ນ ແຕ່ລະຂັ້ນ ພະນັກງານ ສະຖານທູດ ພ້ອມກັບຄອບຄົວ ແລະ ຫົວໜ່ວຍ ທຸຣະກິຈ ທີ່ມີຄວາມສ່ຽງ. ຄົນຕ່າງປະເທດ ທີ່ເຮັດວຽກ ຢູ່ລາວ ທີ່ມີຄວາມສ່ຽງ ກໍສາມາດສັກຢາ ປ້ອງກັນໂຄວິດ-19 ໄດ້ ແຕ່ຕ້ອງມີ ເອກສານ ຢັ້ງຢືນນໍາດ້ວຍ.

ເວົ້າເຖິງແຈ້ງການ ຂອງຫ້ອງວ່າການ ສໍານັກງານນາຍົກຣັຖມົນຕຣີ ທີ່ວ່ານັ້ນ ດຣ. ພອນປະເສີດ ອຸນາພົງ ກ່າວວ່າ:

“ຫ້ອງການສໍານັກງານ ນາຍົກຣັຖມົນຕຣີ ອອກແຈ້ງການ ເລຂທີ 304 ມາຫາທາງກະຊວງ ສາທາຣະນະສຸຂ ເພື່ອໃຫ້ມີການຂຍາຍ ການສັກຢາ ໂຄວິດນີ້ ໃຫ້ແກ່ພະນັກງານຣັຖກອນ ຢູ່ສໍານັກງານ, ອົງການ, ກະຊວງ, ທະບວງກົມ, ອົງການທ້ອງຖິ່ນ ແຕ່ລະຂັ້ນ, ພະນັກ ງານສະຖານທູດ, ອົງການຈັດຕັ້ງສາກົລ ພ້ອມດ້ວຍຄອບຄົວ ແລະ ບາງຫົວໜ່ວຍທຸຣະກິຈ ທີ່ມີຄວາມສ່ຽງ.”

ກະຊວງສາທາຣະນະສຸຂ ຣາຍງານວ່າ ວັກຊິນ ທີ່ໄດ້ຮັບຈາກ ຊິໂນຟາມ 3 ແສນໂດສນັ້ນ ໄດ້ແຈກຢາຍ ໄປໃຫ້ທັງໝົດ 18 ແຂວງ, ສັກໃຫ້ 95,893 ຄົນ ແລະ ສັກຄົບ 2 ເຂັມແລ້ວ 14,096 ຄົນ. ສ່ວນທີ່ຍັງບໍ່ໄດ້ສັກ ເຂັມທີ 2 ເຈົ້າໜ້າທີ່ ຫຼາຍແຂວງ ກໍຈະເຣີ່ມສັກ ໃນເດືອນເມສານີ້.

ມາເຖິງປັດຈຸບັນ, ປະເທດລາວ ໄດ້ຮັບ ວັກຊິນໂຄວິດ-19 ຈໍານວນ 1,235,000 ໂດສ ໃນຕົ້ນປີ 2021 ນີ້ຄື:
2,000 ໂດສ ຈາກຊິໂນຟາມ ຂອງຈີນ ເມື່ອຕົ້ນເດືອນ ມົກຣາ.
300,000 ໂດສ ຈາກຊິໂນຟາມຂອງຈີນ ໃນວັນທີ 8 ກຸມພາ.
1,000 ໂດສ ຂອງ ສ​ປຸດ​ນິກ ວ. (SPUTNIK V) ຂອງຣັດເຊັຽ ໃນຕົ້ນເດືອນ ມົກຣາ.
132,000 ໂດສ ແອສຕຣາເຊນເນກາ ຈາກໂຄງການ COVAX Facility ອົງການອະນາມັຍໂລກ ໃນວັນທີ 20 ມິນາ.
800.000 ໂດສ ຈາກຊິໂນຟາມຂອງຈີນ ໃນວັນທີ 31 ມິນາ.

ເຈົ້າໜ້າທີ່ ສາທາຣະນະສຸຂ ແຂວງຫຼວງພຣະບາງ ຜູ້ຂໍສງວນຊື່ ແລະຕໍາແໜ່ງ ກ່າວຕໍ່ ວິ​ທ​ຍຸ ເອ​ເຊັຽ ເສ​ຣີ (RFA) ໃນມື້ວັນທີ 2 ເມສາ ນີ້ວ່າ ໃນອາທິດໜ້າ ຈະເຣີ່ມສັກຢາ ປ້ອງກັນໂຄວິດ-19 ເຂັມທີ 2 ຊຶ່ງແຂວງ ຫຼວງພຣະບາງ ຕ້ອງສັກໃຫ້ຄົບ 6,800 ຄົນ ຕາມຈໍານວນວັກຊິນ ທີ່ໄດ້ຮັບ, ແຕ່ຍັງບໍ່ໄດ້ສັກໃຫ້ກຸ່ມຄົນ ທີ່ມີໂຣຄປະຈໍາໂຕ ແລະ ຜູ້ມີອາຍຸ 60 ປີຂຶ້ນໄປ ຍ້ອນວັກຊິນຊິໂນຟາມ ຂອງຈີນບໍ່ຮອງຮັບ:

“ກຸ່ມທີ່ຫຼາຍກວ່າ 60 ປີ ຜູ້ທີ່ມີພຍາດຊໍາເຮື້ອ ເດັກອາຍຸຕໍ່າກວ່າ 18 ແມ່ນຈະບໍ່ໄດ້ຮັບການສັກ ເພາະວ່າ ຜົລຂ້າງຄຽງ ມັນອາຈເກີດ ຂຶ້ນໄດ້ ມັນຢູ່ໃນຂໍ້ຫ້າມ ຂອງວັກຊິນ ຊິໂນຟາມນີ້ ເພິ່ນຈະບໍ່ໃຫ້ສັກເນາະ ໂຕນີ້ ມັນກໍຂຶ້ນຢູ່ຂໍ້ກໍານົດ ຂອງສູນກາງເນາະ ຈະເຣີ່ມ ສັກເມື່ອໃດ.”

ທີ່ແຂວງຈໍາປາສັກ ເຈົ້າໜ້າທີ່ ສາທາຣະນະສຸຂແຂວງ ທ່ານນຶ່ງ ກ່າວວ່າ ປັດຈຸບັນ ມີແຕ່ວັກຊິນ ຈາກຊິໂນຟາມ ຂອງຈີນ ທີ່ທາງການ ແຈກຢາຍມາ ໃຫ້ສະເພາະ ກຸ່ມເປົ້າໝາຍ, ປະຊາຊົນທົ່ວໄປ ຍັງບໍ່ໄດ້ສັກ:

“ກຸ່ມເປົ້າໝາຍ ທີ່ຣັຖບານ ທີ່ເພິ່ນແຈ້ງມາ ໝູ່ເຮົາກໍຈັດຕັ້ງປະຕິບັດຕາມຫັ້ນ ແຕ່ວ່າ ສັກໃຫ້ປະຊາຊົນທົ່ວໄປ ຖາມວ່າ ຈະສັກມື້ໃດ ບ່ອນໃດບໍ່ຮູ້ ໝູ່ເຮົາກະລໍຖ້ານະໂຍບາຍ ກະຊວງສາທາຣະນະສຸຂ ຫຼາຍພາກສ່ວນ ກໍຢາກສັກຫັ້ນແຫຼະ ຄົນທົ່ວໄປ ກະຢາກສັກ ຫັ້ນ ແຫຼະ.”

ຄົນຂັບຣົດແທັກຊີ ຜູ້ນຶ່ງ ເວົ້າຕໍ່ ວິ​ທ​ຍຸ ເອ​ເຊັຽ ເສ​ຣີ (RFA) ໃນມື້ດຽວກັນ ນີ້ວ່າ ຍັງບໍ່ເຫັນແຈ້ງການ ມາວ່າ ໃຫ້ໄປສັກຢາປ້ອງກັນ ໂຄວິດ-19. ແຕ່ໃນ ຄວາມຮູ້ສຶກຂອງຕົນ ຖ້າໃຫ້ໄປສັກ ກໍຍັງບໍ່ກ້າໄປສັກ ຍ້ອນຢ້ານມີ ຜົລຂ້າງຄຽງ. ແຕ່ຫາກເຖິງເວລາແທ້ໆ ເຖິງຈະຢ້ານ ກໍຕ້ອງໄດ້ ໄປສັກ:

“ເພິ່ນຍັງເຂົ້າບໍ່ເຖິງເທື່ອ ເພິ່ນກໍຍັງສັກຢູ່ ແຕ່ສະເພາະ ນັກທຸຣະກິຈອິຫຍັງສູງໆ ກວ່າເຮົາພຸ້ນແຫຼະ. ເຂົາກໍສັກໂຕນັ້ນ ມາກ່ອນ ຍັງບໍ່ຮອດ ພວກເຮົາ ມັນກໍຕ້ອງໄດ້ສັກຢູ່ແລ້ວ. ແຕ່ເຮົາ ກໍຍັງຢ້ານຢູ່ ທຸກຄົນ ກໍຍັງກັງວົນຢູ່ແຫຼະ ວ່າມັນຈະມີຄວາມປອດພັຍບໍ່ ເວລາສັກ ໄປແລ້ວມັນຈະບໍ່ມີຜົລຫຍັງບໍ໋.”

ແລະຊາວບ້ານ ຄົນນຶ່ງ ກໍເວົ້າວ່າ ທາງການກໍເຣີ່ມໄດ້ຮັບ ວັກຊິນຫຼາຍຂຶ້ນແລ້ວ ປະຊາຊົນທົ່ວໄປ ກໍຍັງລໍຖ້າຢູ່ວ່າ ເມື່ອໃດຈະໄດ້ ໄປສັກຢາປ້ອງກັນ ໂຄວິດ-19 ເພາະຢາກປ້ອງກັນຕົນເອງ:

“ກະດີໃຈຢູ່ຫັ້ນແຫຼະເນາະ ຄັນວ່າມີຢາໂຕນີ້ມາ ຍັງບໍ່ທັນໄດ້ຮັບເທື່ອ ກະຫຼາຍຄົນ ຢາກສັກຢູ່ເນາະ ໂຕນີ້ຫັ້ນນ່າ ກໍຢາກປ້ອງກັນ ໄວ້ຫັ້ນນ່າ.”

ກ່ຽວກັບ ມາຕການປ້ອງກັນ ການຣະບາດຂອງໂຄວິດ-19 ຢູ່ລາວ ແຕ່ເດືອນເມສາ ຫາເດືອນພຶສພາ 2021, ດຣ. ພູທອນ ເມືອງປາກ, ຮອງຣັຖມົນຕຣີ ກະຊວງສາທາຣະນະສຸຂ, ກ່າວວ່າ ຍັງໃຫ້ສືບຕໍ່ ປະຕິບັດ ຄືສອງເດືອນຜ່ານມາ:

“ສືບຕໍ່ປະຕິບັດ ມາຕການຜ່ອນຜັນ ກໍຄືມາຕການຄວບຄຸມ ແລະ ສະກັດກັ້ນແລະແກ້ໄຂ ການຣະບາດຂອງ ໂຄວິດ-19 ຄືກັນກັບ ໄດ້ປະຕິບັດ ໃນເດືອນ ກຸມພາ ແລະມິນາ 2021 ຜ່ານມາ.”

ແລະກໍບໍ່ອະນຸຍາດ ໃຫ້ຈັດງານສະ​ແດງ​ດົນຕ​ຣີ (concert), ງານຣາຕຣີສະໂມສອນ ແລະ ງານສເລີມສລອງ ຕ່າງໆ ທີ່ຈັດເປັນງານໃຫຍ່ ໃຫ້ສລອງ ຢູ່ເຮືອນ ພາຍໃນຄອບຄົວ ຂອງໃຜລາວ.

ສໍາລັບງານດອງ ກໍໃຫ້ຈັດແບບກະທັດຮັດ ແລະປະຢັດມັທຍັດ ຕາມຮີດຄອງປະເພນີ ອັນດີງາມຂອງລາວ. ດ່ານສາກົລຕ່າງໆ ທາງ ການລາວ ກໍຍັງບໍ່ມີແຜນ ວ່າ ຈະເປີດເທື່ອ ຍັງໃຊ້ມາຕການ ປ້ອງກັນຄືເກົ່າ. ຕາມດ່ານຕ່າງໆ ກໍບໍ່ໃຫ້ຄົນທົ່ວໄປ ເດີນທາງເຂົ້າ-ອອກ ຍົກເວັ້ນຣົດຂົນສົ່ງສິນຄ້າ.

ແລະຜູ້ທີ່ ຈະເຂົ້າມາລາວໄດ້ ກໍຕ້ອງມີວຽກງານ ກ່ຽວຂ້ອງພາຍໃນລາວ ດ້ານວິຊາການ ແລະ ມີໜັງສືຖືກຕ້ອງ ມີໃບຮັບຮອງ ຈາກ ແພດ ແລະ ໝໍ.

ຕາມສະຖານບໍຣິການ ຮ້ານອາຫານ ຕ້ອງປະຕິບັດ ມາຕການຄືເກົ່າ ຕ້ອງມີເຄື່ອງແທກ ອຸນຫະພູມ ອານາມັຍສະຖານທີ່ ຮັກສາ ໄລຍະຫ່າງ ລ້າງມືດ້ວຍສະບູ ຫຼືເຈວລ້າງມື ໃຊ້ຜ້າອັດປາກ ອັດດັງ.

ແລະໃນໄລຍະບຸນປີໃໝ່ ກໍໃຫ້ປະຕິບັດ ຕາມແຈ້ງການທີ່ກໍານົດອອກໄປ. ມາເຖິງປັດຈຸບັນ ລາວ ມີຜູ້ຕິດໂຄວິດ-19 ທັງໝົດ 49 ຄົນ, ໃນນັ້ນ 3 ຄົນ ຍັງປິ່ນປົວ ຢູ່ໂຮງໝໍ ທີ່ນະຄອນຫຼວງວຽງຈັນ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ