ເດັກນ້ອຍ ຂາດສານອາຫານ ຫຼຸດລົງ

ຈໍາປາທອງ
2021-09-16
Share
ເດັກນ້ອຍ ຂາດສານອາຫານ ຫຼຸດລົງ ພິທີປິດໂຄງການ ເຊື່ອມສານ ວຽກງານໂພສະນາການ, ນໍ້າ ແລະສຸຂອະນາມັຍ ຈັດຂຶ້ນ ໃນວັນທີ 7 ກັນຍາ 2021.
ພາບປະກອບ: ສະຖານທູດ ອາເມຣິກາ ປະຈໍາລາວ

ໃນໄລຍະ 5 ປີ ຄືແຕ່ເດືອນກຸມພາ 2017 ຫາເດືອນກັນຍາ 2021 ທີ່ໂຄງການເຊື່ອມສານ ວຽກງານໂພສະນາການ, ນໍ້າ ແລະສຸຂ ອະນາມັຍ ຂອງອົງການພັທນາ ລະຫວ່າງປະເທດ ຂອງສະຫະຣັຖອາເມຣິກາ ຫຼື USAID ແລະອົງການ Save the Children ຊ່ອຍເຫຼືອປະເທດລາວ ໃນການແກ້ໄຂບັນຫາ ການຂາດສານອາຫານຂອງເດັກນ້ອຍ ອາຍຸຕໍ່າກວ່າ 2 ປີ ຢູ່ແຂວງຄໍາມ່ວນ ແລະ ແຂວງສວັນນະເຂດ ໃຫ້ດີຂຶ້ນໃນອັດຕຣາ 33% ຂອງຈໍານວນເດັກນ້ອຍທັງໝົດ ທີ່ຂາດສານອາຫານໃນທົ່ວປະເທດ.

ໂຄງການດັ່ງກ່າວ ຈະສົ່ງເສີມໃຫ້ແມ່ຍິງທີ່ຖືພາມານ ໄປຝາກທ້ອງກັບທ່ານໝໍ ແລະຮັບຄໍາແນະນໍາ ໃນການກິນອາຫານໃຫ້ຄົບໝວດ ໝູ່ ແລະຊຸກຍູ້ໃຫ້ໄປເກີດລູກຢູ່ໂຮງໝໍ ຫຼືສຸຂສາລາ ແລະລ້ຽງລູກດ້ວຍນົມແມ່ ອີງຕາມຄໍາເວົ້າ ຂອງເຈົ້າໜ້າທີ່ປະສານງານ ຣະຫວ່າງ ລາວ ແລະ ສະຫະຣັຖອາເມຣິກາ ຂອງໂຄງການດັ່ງກ່າວ ຕໍ່ວິທຍຸເອເຊັຽເສຣີ ໃນມື້ວັນທີ 15 ກັນຍານີ້:

“ອັນ ເຮົາທັງມີອັນ ອາສາສມັກບ້ານເຂົ້າໄປໃຫ້ຂໍ້ມູນ ເນາະ ຫຼັງຈາກນັ້ນ ເຮົາກະໄປກະຕຸ້ນ ໃຫ້ເຂົາເຈົ້າໄປສຸກສາລາ ທ່ານໝໍກໍຈະ ເປັນຜູ້ອົບຮົມຊ່ວຍວ່າສິ ເອີ ເຈົ້າຕ້ອງປະຕິບັດໂຕແນວນີ້ເດ໋ ເຈົ້າຕ້ອງກິນເຂົ້າຫຼາຍຂຶ້ນ ຊ່ວງທີ່ເຈົ້າຖືພາມິຫຍັງຈັ່ງຊີ້ນ່າ ຫຼັງຈາກລູກ ອອກຈາກຊ່ອງຄອດແລ້ວ ກໍຄືໃຫ້ມານອນຢູ່ໂຕແມ່ ແລ້ວກໍໄປກິນນົມແມ່ເອງ ຈັ່ງຊີ້ນ່າ ສິແນະນໍາໃຫ້ເຂົາເຈົ້າ ຕ້ອງລ້ຽງລູກ ດ້ວຍ ນໍ້ານົມ ຈົນຮອດ 6 ເດືອນ ພາວະຂາດສານອາຫານຂອງເດັກອາຍຸ 1 ພັນວັນກໍດີຂຶ້ນ.”

ນາງກ່າວຕື່ມວ່າ ໂຄງການເຊື່ອມສານ ວຽກງານໂພສະນາການ, ນໍ້າ ແລະສຸຂອະນາມັຍ ແມ່ນໃຫ້ຄວາມສໍາຄັນເປັນພິເສດກັບແມ່ ທີ່ມີລູກໃນໄລຍະ 1000 ມື້ທໍາອິດ ຫຼື 2 ປີ 9 ເດືອນຫຼັງເກີດລູກ ເພື່ອໃຫ້ທັງແມ່ແລະລູກນ້ອຍ ມີໂພສະນາການທີ່ດີ ໂດຍສະເພາະ ຢູ່ເມືອງພີນ ແລະເມືອງອາດສະພັງທອງ ແຂວງສວັນນະເຂດ ແລະຢູ່ເມືອງໄຊພູທອງ, ເມືອງມະຫາໄຊ ແລະ ເມືອງຍົມມະລາດ ແຂວງຄໍາມ່ວນ.

ກ່ຽວກັບເຣື່ອງນີ້ ເຈົ້າໜ້າທີ່ຫ້ອງການ ສາທາຣະນະສຸຂ ເມືອງອາດສະພັງທອງ ເວົ້າວ່າ 5 ປີ ທີ່ຜ່ານມາ ອັດຕຣາການຂາດ ສານ ອາຫານ ຂອງເດັກນ້ອຍອາຍຸຕໍ່າກວ່າ 5 ປີ ຫຼຸດລົງຫຼາຍ ຄືຈາກທີ່ມີ 600 ຄົນໃນປີ 2017 ມາມີ 270 ປາຍຄົນໃນປີນີ້. ໃນຈໍານວນ ທີ່ຂາດສານອາຫານນັ້ນ ສ່ວນໃຫຍ່ເປັນເດັກນ້ອຍ ອາຍຸກາຍ 1000 ມື້ຂຶ້ນໄປ ເນື່ອງຈາກວ່າ ເດັກນ້ອຍອາຍຸ 1000 ມື້ລົງມາ ມີ ເຈົ້າໜ້າທີ່ ທີ່ມີຄວາມຮູ້ດ້ານໂພສະນາການດີ ຊ່ອຍເຮັດໃຫ້ບໍ່ຂາດສານອາຫານຫຼາຍ.

ແລະອັດຕຣາການເກີດລູກຢູ່ເຮືອນກໍຫຼຸດລົງ, ປີ 2017 ຢູ່ເມືອງນີ້ ມີການເກີດລູກຢູ່ເຮືອນ 30 ປາຍກໍຣະນີ ແຕ່ມາປີນີ້ ມີ 26 ກໍຣະນີ ແລະການຂາດສານອາຫານຂອງແມ່ຖືພາມານ ກໍຫຼຸດລົງຫຼາຍ ຍ້ອນວຽກງານໂພສະນາການ ທີ່ທາງອົງການຈັດຕັ້ງສາກົລ ໄດ້ເຂົ້າມາ ສນັບສນູນຊ່ອຍເຫຼືອ, ດັ່ງທີ່ນາງກ່າວວ່າ:

“ແຕ່ວ່າໂດຍລວມແລ້ວ ເຂົາກໍໃຫ້ກິນນົມແມ່ ເຣື່ອງຄະລໍາອາຫານມິຫຍັງກໍ ມັນກໍຫຼຸດລົງ ເຂົາກໍໄດ້ຄວາມຮູ້ຫຼາຍ ແມ່ນຕັ້ງແຕ່ເຣື່ອງ ການແນະນໍາ ການເຮັດຈັ່ງໃດ ເຮົາຈຶ່ງມີຜັກມີອິຫຍັງຕ່າງໆ ບໍຣິໂພກ. ໂຕເຣື່ອງທີ 2 ມາເພິ່ນກໍຈະເວົ້າເນັ້ນໃສ່ ເຣື່ອງ ແມ່ຍິງ ມາກວດທ້ອງ ມາອິຫຍັງຫັ້ນ.”

ແລະເຈົ້າໜ້າທີ່ຫ້ອງການ ສາທາຣະນະສຸຂເມືອງພີນ ກໍກ່າວວ່າ 5 ປີ ທີ່ຜ່ານມາ ສະຫະຣັຖອາເມຣິກາ ໄດ້ຊ່ອຍໃຫ້ເດັກນ້ອຍ ອາຍຸ ຕໍ່າກວ່າ 5 ປີ ຂາດສານອາຫານຫຼຸດລົງແທ້, ແຕ່ຍັງບໍ່ສາມາດຣະບຸເປັນຕົວເລຂໄດ້ຄັກແນ່ ວ່າຍັງມີຈໍານວນເທົ່າໃດກັນແທ້ ຍ້ອນວ່າ ກິຈກໍາຂອງໂຄງການສະຫະຣັຖອາເມຣິກາ ຈະເນັ້ນໃສ່ການປ່ຽນພືດຕິກໍາຂອງແມ່ ໃຫ້ລ້ຽງລູກດ້ວຍນົມແມ່, ບໍ່ໃຫ້ມີພຶດຕິກໍາຄືແຕ່ກ່ອນ ທີ່ມັກຫຍໍ້າເຂົ້າໝົກລ້ຽງລູກ, ເຮັດໃຫ້ລູກນ້ອຍ ທີ່ມີອາຍຸ 1000 ມື້ລົງມາ ສ່ຽງຕໍ່ການຂາດສານອາຫານ. ທັງແມ່ ແລະ ລູກນ້ອຍ ຕ້ອງ ໄດ້ຮັບສານອາຫານ ໃຫ້ຖືກຕາມຫຼັກໂພສະນາການ ດັ່ງທີ່ນາງກ່າວວ່າ:

“ແມ່ຍິງຖືພາຫັ້ນເນາະ ເພິ່ນກໍຈະເນັ້ນໜັກກວ່າ ໃນເວລາຖືພາແມ່ມານ ຄວນກິນຫຍັງ ລະໂຕໃດບໍ່ຄວນກິນ ເວລາໄປເກີດລູກອີກ ແລ້ວແມ່ຫັ້ນ ຄວນກິນອາຫານໃຫ້ຫຼາກຫຼາຍ ແລະກໍຄວນປ້ອນນົມໃຫ້ເດັກຈົນຮອດ 6 ເດືອນ ແລະກໍບໍ່ໃຫ້ຫຍໍ້າເຂົ້າ ໝົກເຂົ້າຫຍັງ ຫຼັງຈາກນັ້ນ ຈັ່ງໃຫ້ອາຫານເສີມ ຕາມທ້ອງຖິ່ນທີ່ເຮົາມີ ໂຕຢ່າງ ກົບ ປາ ກົບຂຽດ ມິຫຍັງໄຂ່ເຂັ່ຽນີ້ແຫຼະ ແລະກໍໃຫ້ໄປສັກຢຸກສັກຢາ ຕາມກໍານົດເວລາ.”

ເຈົ້າໜ້າທີ່ປະສານງານ ຣະຫວ່າງລາວ-ສະຫະຣັຖອາເມຣິກາ ໃນໂຄງການດັ່ງກ່າວຜູ້ດຽວກັນນັ້ນ ເວົ້າຕື່ມອີກວ່າ ໂຄງການເຊື່ອມສານ ວຽກງານໂພສະນາການ, ນໍ້າ ແລະສຸຂອະນາມັຍນີ້ ຈະບໍ່ໄດ້ຊ່ອຍເມືອງ ແລະແຂວງດັ່ງກ່າວນັ້ນອີກ ຍ້ອນເຫັນວ່າ ເມືອງແລະແຂວງ ທີ່ວ່ານັ້ນ ສາມາດສືບຕໍ່ວຽກງານນີ້ໄດ້ດ້ວຍຕົນເອງ ແລະໄດ້ຈັດພິທີປິດໂຄງການນີ້ ໃນມື້ວັນທີ 7 ກັນຍາ 2021 ຍ້ອນບົດບັນທຶກ ຄວາມເຂົ້າໃຈກັນ ໝົດກໍານົດ:

“ມັນສິ້ນສຸດກໍານົດທີ່ເຮົາ ໄດ້ເຊັນ MOU ກັນແລ້ວ ສີ້ນສຸດເດືອນນີ້ແຫຼະ ວັນທີ 30 ເດືອນ 9 ເປັນມື້ສີ້ນສຸດສັນຍາ ບໍ່ໄດ້ຕໍ່ເຈົ້າ ມັນນ່າຈະເປັນໂຄງການໃໝ່ມາ ແຕ່ວ່າໂຄງການເກົ່າ ທີ່ເປັນຊື່ນີ້ຫັ້ນນ່າ ຈະບໍ່ມີແລ້ວ.”

ອີງຕາມຄໍາເວົ້າ ຂອງເຈົ້າໜ້າທີ່ທ່ານນີ້ ໂຄງການທີ່ທາງອົງການຈັດຕັ້ງສາກົລ ຊ່ອຍເຫຼືອດ້ານໂພສະນາການ ໄດ້ຊ່ອຍຊາວບ້ານ 200,000 ຄົນໃນ 500 ບ້ານ ຊຶ່ງໃນນັ້ນມີແມ່ມານ ແລະແມ່ທີ່ມີລູກ ອາຍຸຕໍ່າກວ່າ 1,000 ມື້ ຈໍານວນ 14,000 ຄົນ ໄດ້ຮັບ ຄໍາແນະນໍາ ເຣື່ອງການເບິ່ງແຍງຕົວເອງ ແລະລູກນ້ອຍ ບໍ່ໃຫ້ຂາດສານອາຫານ.

ແຕ່ເຖິງຢ່າງໃດກໍຕາມ ເຈົ້າໜ້າທີ່ຫ້ອງການສາທາຣະນະສຸຂ ເມືອງພີນ ແລະເມືອງອາດສະພັງທອງ ແຂວງສວັນນະເຂດ ກໍເວົ້າວ່າ ໄດ້ມີແຜນທີ່ຈະສືບຕໍ່ວຽກງານໂພສະນາການຕໍ່ໄປ ໂດຍໃຊ້ງົບປະມານຂອງແຂວງ ຫຼືເມືອງ ຕາມເງື່ອນໄຂ ທີ່ຈະສາມາດເຮັດໄດ້ ຍ້ອນເຫັນວ່າ ວຽກງານດັ່ງກ່າວ ມີຄວາມສໍາຄັນ ໃນການປັບປຸງສຸຂພາບ ແລະການເປັນຢູ່ຂອງປະຊາຊົນໃຫ້ດີຂຶ້ນ.

ແລະເຈົ້າໜ້າທີ່ອົງການ USAID ແລະອົງການ Save the Children ໄດ້ຊ່ອຍຝຶກອົບຮົມ ເຈົ້າໜ້າທີ່ສາທາຣະນະສຸຂ ແຂວງ ຄໍາມ່ວນ ແລະ ແຂວງສວັນນະເຂດ ທັງໝົດ 330 ຄົນ ໃຫ້ມີປະສົບການ ແລະຄວາມຮູ້ ເພື່ອຖ່າຍທອດໃຫ້ຊຸມຊົນຕໍ່ໄປ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ