ອີກ 6 ຄົນ ຕິດເຊື້ອໂຄວິດ-19 ຢູ່ລາວ

ສຸພັດຕາ
2021-04-22
Share
ອີກ 6 ຄົນ ຕິດເຊື້ອໂຄວິດ-19 ຢູ່ລາວ ພິທີຖແລງຂ່າວ ຂອງ ຄະນະສະເພາະກິດ ຄວບຄຸມ ໂຄວິດ-19 ປະຈໍາວັນທີ 22 ເມສາ 2021 ກ່ຽວກັບ ອີກ 6 ກໍຣະນີຕິດເຊື້ອ ໂຄວິດ-19
LNTV

ທາງການລາວ ກວດພົບຜູ້ຕິດໂຄວິດ-19 ເພີ່ມອີກ 6 ຄົນ ຈາກການເກັບຕົວຢ່າງ ຈໍານວນ 758 ຄົນ ຈາກ ຄົນທີ່ມາກວດຫາເຊື້ອ ໂຄວິດ-19 ຂອງ ມື້ວັນທີ່ 21 ເມສາ 2021. 6 ຄົນ ທີ່ຕິດໂຄວິດ-19 ໃໝ່ນີ້ ແມ່ນເປັນຄົນລາວ ໃນນັ້ນ ເປັນເພດຍິງ 2 ຄົນ ແລະ ເພດຊາຍ 4 ຄົນ. ທັງ 6 ຄົນ ດັ່ງກ່າວນີ້ ແມ່ນໄດ້ສົ່ງໂຕໄປປິ່ນປົວ ຕິດຕາມອາການຢູ່ໂຮງໝໍ ທີ່ທາງການ ກໍານົດໝົດແລ້ວ, ດັ່ງ ດຣ ພູທອນ ເມືອງປາກ ຮອງຣັຖມົນຕຣີ ກະຊວງສາທາຣະນະສຸຂ ແລະ ຕາງໜ້າຄະນະສະເພາະກິຈ ປ້ອງກັນຄວບຄຸມ ໂຄວິດ-19 ກ່າວໃນພິທີ ຖແລງຂ່າວ ປະຈໍາວັນທີ 22 ເມສາ 2021 ນີ້ ຕອນນຶ່ງວ່າ:

“ຄືສະເພາະມື້ນີ້ ທົ່ວປະເທດຂອງພວກເຮົານີ້ ກວດໄດ້ ພົບໄດ້ແລ້ວມີຜົລບວກ 6 ຄົນ ໃນນີ້ ຢູ່ນະຄອນຫຼວງວຽງຈັນ 4 ຄົນ ແລະ 1 ຄົນ ຢູ່ແຂວງບໍ່ແກ້ວແລ້ວອີກ 1 ຄົນ ຢູ່ແຂວງສວັນນະເຂດ ອັນນັ້ນ ແມ່ນແຮງງານລາວ ທີ່ກັບມາຕາມດ່ານທີ່ເປັນທາງການ.”

ທ່ານກ່າວຕື່ມວ່າ ສໍາລັບຜູ້ຕິດໂຄວິດ-19 ໃນນະຄອນຫຼວງວຽງຈັນ ຈໍານວນ 4 ຄົນນັ້ນ ແມ່ນເປັນກຸ່ມສ່ຽງ ທີ່ໄດ້ຮັບເຊື້ອມາຈາກ ສະຖານທີ່ບັນເທີງ ແລະອີກ 1 ຄົນ ໃນແຂວງບໍ່ແກ້ວ ຍັງຢູ່ຣະຫວ່າງການສືບສວນ ວ່າໄດ້ຮັບເຊື້ອມາຈາກ ສະຖານທີ່ໃດ, ສ່ວນ ຜູ້ຕິດໂຄວິດ-19 ນຶ່ງຄົນ ຢູ່ແຂວງສວັນນະເຂດ ນັ້ນແມ່ນເປັນຄົນງານລາວ ທີ່ເດີນທາງມາຈາກ ປະເທດໄທຍ ແບບຖືກຕ້ອງ.

ແລະຕັ້ງແຕ່ ມີການເປີດສູນກວດເຊື້ອໂຄວິດ-19 ເພີ່ມອີກ 4 ແຫ່ງ ໃນມື້ວັນທີ 21 ເມສາ 2021 ນີ້ ກໍມີຄົນເຂົ້າມາ ກວດຫາເຊື້ອ ໂຄວິດ-19 ເປັນຈໍານວນຫຼາຍພັນຄົນຕໍ່ມື້ ທັງຢູ່ໃນສູນກວດ ນະຄອນຫຼວງວຽງຈັນ ແລະ ສູນກວດປະຈໍາແຂວງຕ່າງໆ ເຊິ່ງຍັງຕ້ອງ ລໍຖ້າຜົລກວດຫາເຊື້ອ ຈຶ່ງຮ້ອງຮຽກໃຫ້ປະຊາຊົນ ງົດເດີນທາງໄປຊຸມແຊວກັນ ໃນໄລຍະນີ້.

ສ່ວນມາຕການປິດເມືອງ ແລະພື້ນທີ່ສ່ຽງນັ້ນ ແມ່ນໃຫ້ອີງຕາມແຈ້ງການ ຂອງຄະນະສະເພາະກິຈ ປ້ອງກັນຄວບຄຸມໂຄວິດ-19 ປິດ ສະເພາະພື້ນທີ່ສ່ຽງ ເຊັ່ນ: ຮ້ານນວດ, ຮ້ານບັນເທີີງ, ຮ້ານອາຫານ, ຮ້ານກິນດື່ມ ແລະການຂົນສົ່ງສາທາຣະນະ ຣະຫວ່າງແຂວງ ສ່ວນໂຮງງານອຸດສາຫະກັມ ແລະ ບໍຣິສັດຂນາດໃຫຍ່ ແມ່ນຍັງໃຫ້ເປີດ ປົກກະຕິ, ແຕ່ຕ້ອງມີມາຕການ ທີ່ເຂັ້ມງວດ ໃນການເຝົ້າ ຣະວັງ ແລະ ປະຕິບັດຕາມ ການເວັ້ນໄລຍະຫ່າງ ເນື່ອງຈາກ ຫາກສັ່ງປິດ ອາຈກະທົບຕໍ່ຣະບົບເສຖກິຈ ຢ່າງຮຸນແຮງ, ດັ່ງເຈົ້າໜ້າທີ່ ຄະນະສະເພາະກິຈ ປ້ອງກັນຄວບຄຸມໂຄວິດ-19 ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ກະມີແຕ່ວ່າ ພວກເຮົາກະຕ້ອງໄດ້ ຮັກສາມາຕການ ຕາມຣະບຽບທີ່ວ່າ ຄະນະສະເພາະກິຈແຈ້ງ, ແຕ່ວ່າຣາຍຣະອຽດ ພວກເຮົາ ຈະມີແຈ້ງການໃຫ້ຕື່ມ ກະຢາກໃຫ້ທາງໂຮງງານ ກະຣະມັດຣະວັງ, ເພາະວ່າ ຈໍາກັດແລະຄວບຄຸມ ການເຂົ້າອອກໂຮງງານ ຫັ້ນເນາະ.”

ພາຍຫຼັງທີ່ມີຜູ້ຕິດໂຄວິດ-19 ເພີ່ມເປັນຈໍານວນຫຼາຍ ກໍເຮັດໃຫ້ຊາວລາວ ໃນນະຄອນຫຼວງວຽງຈັນ ຕື່ນ ແລະວິຕົກກັງວົນໃຈຫຼາຍ ຍ້ອນຢ້ານເຊື້ອໂຄວິດ-19 ຈະແຜ່ຣະບາດຫຼາຍ ຂຶ້ນຕື່ມ ຫຼາຍຄົນກໍອອກໄປຊື້ອາຫານການກິນ, ເຄື່ອງໃຊ້ປະຈໍາວັນ ແລະເຂົ້າສານ ມາໄວ້ ໃນຣະຫວ່າງທີ່ທາງການລາວ ປະກາດປິດເມືອງ, ດັ່ງຊາວນະຄອນຫຼວງວຽງຈັນ ຜູ້ນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວ ກັນນີ້ວ່າ:

“ຄົນກະແມ່ນກຽມສະບຽງອາຫານ ກັກໂຕຢູ່ເຮືອນໃຜເຮືອນມັນ ຕິດຫຼາຍໂພດ ເພາະຜ່ານມາມັນບໍ່ເຄີຍເດ້ເນາະ, ມີແຕ່ຈໍານວນໜ້ອຍ ບາດນີ້ ມາຂຶ້ນໄວມາຫຼາຍບາດດຽວນິ່ ບ້ານທີ່ມີ ຄົນໄປຕິດມາ ລະແມ່ນບ້ານນັ້ນ ກະໃຫ້ປິດ ບໍ່ໃຫ້ເຂົ້າ ໃຫ້ບໍ່ອອກ.”

ຊາວນະຄອນຫຼວງວຽງຈັນ ອີກຄົນນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ຫຼັງຈາກເຊື້ອໂຄວິດ-19 ໄດ້ຣະບາດໃນຫຼາຍພື້ນທີ່ ເຮັດໃຫ້ຄົນໃນນະຄອນຫຼວງວຽງຈັນ ພາກັນ ຕື່ນໂຕ ແລະ ຣະມັດຣະວັງໂຕເອງ ຫຼາຍຂຶ້ນ:

“ເຮົາກະປິດໜ້າ ປິດດັງຢູ່ ກະຣະວັງລະວ້າ, ຕື່ນຫັ້ນແຫຼ້ວ ເຂົ້າຈັ່ງປິດເມືອງໝົດແລະ, ເມືອງນ້ອຍມັນໄປຄາວດຽວ ມັນກະໄປທົ່ວທີບ ແຫຼະ.”

ສ່ວນເຣື່ອງຜ້າອັດປາກອັດດັງ ແລະ ເຈວລ້າງມື້ນັ້ນ ຍັງມີຂາຍພຽງພໍ ບໍ່ໄດ້ຂາດຕລາດ ໂດຍຣາຄາຂາຍຜ້າອັດປາກອັດດັງ ນັ້ນຢູ່ທີ່ 15-20 ພັນກີບຕໍ່ກ່ອງ, ເຈວລ້າງມື້ ຣາຄາ 90-110 ກີບຕໍ່ລິດ ເຊິ່ງເຈົ້າຂອງຮ້ານຂາຍຢາ ແຫ່ງນຶ່ງ ໃນນະຄອນຫຼວງວຽງຈັນ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ທາງຮ້ານຂອງເຮົາ ປັດຈຸບັນນີ້ ຜ້າອັດປາກເຮົາມີຢູ່ ສ່ວນວ່າ ເຈວ ອາລກໍຮໍ ນີ້ເຮົາມີໜ້ອຍນຶ່ງ ເຮົາມີຫຼອດນ້ອຍ ເພາະວ່າເຮົາຂາຍ ຢູ່ຕລອດເນາະ.”

ແລະ ເຈົ້າຂອງຮ້ານຂາຍຢາ ໃນນະຄອນຫຼວງວຽງຈັນ ອີກແຫ່ງນຶ່ງ ກໍກ່າວຕໍ່ວິທຍຸເອເຊັຽເສຣີວ່າ ຫຼັງຈາກພົບຜູ້ຕິດໂຄວິດ-19 ເພີ່ມ ຂຶ້ນທັງຫ້ອງການຣັຖບານ, ບໍຣິສັດເອກກະຊົນ ແລະ ປະຊາຊົນທົ່ວໄປ ພາກັນມາຊື້ຜ້າອັດປາກອັດດັງ ແລະເຈວລ້າງມື ເປັນຈໍານວນ ຫຼາຍ:

“ຄັນຖາມວ່າ ຫຼາຍບໍ ກະຫຼາຍຢູ່ ເພາະວ່າ ຫ້ອງລ້າຫ້ອງການ ເພິ່ນກະຊື້ ໂຄງການຫຍັງ ເພິ່ນກະຊື້ໄວ້ໃຊ້ຫັ້ນນ່າ ເພາະວ່າລູກຄ້າ ຂະເຈົ້າມາຕລອດ ບາງຄົນກະ 4 ກັບ 5 ກັບ ຊິນ່າ.”

ສໍາລັບເຊື້ອ ໂຄວິດ-19 ທີ່ຣະບາດໃນປະເທດລາວ ແມ່ນເປັນສາຍພັນອັງກິດ ທີ່ຄາດວ່າ ຈະມາຈາກປະເທດໄທຍ ຜ່ານກຸ່ມຄົນທີ່ ລັກລອບເຂົ້າປະເທດລາວ ແບບບໍ່ຖືກຕ້ອງ ເຊື້ອໂຄວິດ-19 ສາຍພັນອັງກິດ ສາມາດແຜ່ຣະບາດໄດ້ໄວ ຫາກໃກ້ຊິດ ແລະສັມຜັດ ກັບຜູ້ທີ່ຕິດເຊື້ອ ເຊິ່ງປັດຈຸບັນ ທາງການລາວ ໄດ້ມີມາຕການທີ່ເຂັ້ມງວດ ເພື່ອສະກັດກັ້ນ ແລະ ປ້ອງກັນ ບໍ່ໃຫ້ເຊື້ອໂຄວິດ-19 ສາຍພັນນີ້ ແຜ່ຣະບາດໄປໃນຫຼາຍແຂວງ ຂອງລາວ.

ປະເທດລາວ ມີການເກັບຕົວຢ່າງ ກວດວິເຄາະຫາເຊື້ອໂຄວິດ-19 ນັບແຕ່ເດືອນ ມົກຣາ ປີ 2020 ຈົນມາຮອດປັດຈຸບັນ ມີທັງໝົດ 150,159 ຄົນ, ໃນນັ້ນ ກວດພົບຜູ້ຕິດ ໂຄວິດ-19 ສະສົມ 94 ຄົນ ປິ່ນປົວເຊົາ ແລ້ວ 49 ຄົນ ກໍາລັງປິ່ນປົວຢູ່ ໂຮງໝໍ 45 ຄົນ ແລະທົ່ວປະເທດລາວ ມີສູນກັກບໍຣິເວນ ທັງໝົດ 47 ສູນ ແລະມີຜູ້ກັກບໍຣິເວນທັງໝົດ 3,407 ຄົນ ທຸກຄົນແມ່ນໄດ້ ເກັບຕົວຢ່າງ ມາກວດຫາເຊື້ອໂຄວິດ-19 ແລ້ວ, ແຕ່ບໍ່ພົບເຊື້ອ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ