ສາລະວັນ ເດັກຂາດສານອາຫານ 60%

ສິດນີ້
2019-02-26
ອີແມວລ໌
ຄໍາເຫັນ
Share
ພິມ
ເດັກນ້ອຍລາວ ຕາມເຂດຊົນນະບົດ ໃນແຂວງພາກໃຕ້ຂອງ ສປປ ລາວ
ເດັກນ້ອຍລາວ ຕາມເຂດຊົນນະບົດ ໃນແຂວງພາກໃຕ້ຂອງ ສປປ ລາວ
RFA/OK

ແຂວງສາລະວັນ ມີເດັກນ້ອຍ ອາຍຸຕ່ຳກວ່າ 5 ປີ ຂາດສານອາຫານ ສະພາບຮ່າງກາຍ ຈ່ອຍຜອມ ແລະ ຕ່ຳເຕັ້ຽ ປະມານ 60%, ສາເຫດ ແມ່ນມາຈາກ ການຂາດອາຫານ ພໍ່ແມ່ ບໍ່ມີຄວາມຮູ້ ທາງດ້ານໂພຊນາການ ໃນການລ້ຽງລູກ, ດັ່ງຄຳເວົ້າ ຂອງເຈົ້າໜ້າທີ່ ສາທາຣະນະສຸຂ ແຂວງສາລະວັນ ທ່ານນຶ່ງ ໃນມື້ວັນທີ 26 ກຸມພາ ນີ້ວ່າ:

“ປະເມີນ ທົ່ວແຂວງນີ້ ເດັກຂາດສານອາຫານ ຢູ່ສາລະວັນ ເຕັ້ຽນັ້ນ ຫລາຍຢູ່ຫັ້ນແຫຼັວ ຮວມເຖິງ ນ້ຳຫນັກ ບໍ່ໄດ້ມາຕຖານ ເດັກຈ່ອຍຫັ້ນແຫລະ ນັບຕັ້ງແຕ່ ຖືພາ ພຸ້ນແຫລະ ແມ່ກໍກິນອາຫານ ບໍ່ພຽງພໍ ແລະ ເກີດມາເດັກກິນເຂົ້າເລີຍ ທັມມະດາ ກິນນົມແມ່ ຢ່າງດຽວຮອດ 6 ເດືອນ, ຂະເຈົ້າ ບໍ່ໄດ້ມີຄວາມຮູ້ ຄວາມເຂົ້າໃຈ ໃນການລ້ຽງເດັກ.”

ທ່ານກ່າວຕື່ມວ່າ ໃນການແກ້ໄຂ ບັນຫາດັ່ງກ່າວ ໃນປັດຈຸບັນ ເຈົ້າໜ້າ​ທີ່ ໄດ້ລົງໄປ ໃຫ້ການຊ່ອຍເຫຼືອ ເດັກນ້ອຍ ໃນເຂດຊົນນະບົດ ແຕ່ລະ 3 ເດືອນ ເພື່ອສິດສອນ ໃຫ້ພໍ່ແມ່ຮູ້ ແລະ ເຂົ້າໃຈ ໃນການລ້ຽງລູກ ໃຫ້ຖືກຫລັກ ໂພຊນາການ ເປັນຕົ້ນ ການຄົວ​ກິນອາຫານ ປະສົມກັບ ທາດໄວຕາມິນ ໃຫ້ເດັກນ້ອຍກິນ ໃນຍາມນ້ອຍ ແລະ ການສັກວັກຊີນ ເພື່ອປ້ອງກັນພຍາດນຳອີກ:

“3 ເດືອນ ເຮົາໄປ ສັກວັກຊີນ ແລະ ກໍຊັ່ງນ້ຳຫນັກ ສ່ວນສູງ ແລະ ກໍຕົ້ມເຂົ້າປຽກ ໃຫ້ເດັກນ້ອຍຫັ້ນແຫລະ ອາຫານເສີມດຽວນີ້ ໃຫ້ໄວຕາມິນ ເກືອແຮ່ທາດນຳ ໃຫ້ຂະເຈົ້າປະສົມເຂົ້າປຽກ ໃສ່ໄວຕາມິນເກືອແຮ່ທາດເລີຍ ແຕ່ເຮົາ ກໍບໍ່ມີຫລາຍຢູ່ນີ້.”

ທ່ານກ່າວຕໍ່ໄປວ່າ ນອກຈາກນີ້ ກໍຍັງມີທີມງານແພດເຄື່ອນທີ່ ລົງໄປໃຫ້ ຄຳແນະນຳ ໃຫ້ຄວາມຮູ້ ແກ່ແມ່ຍິງຖືພາ ແລະ ແມ່ຍິງທົ່ວໄປ ໃນເຂດຊົນນະບົດ ໃຫ້ຮັກສາສຸຂພາບ ຕົນເອງ ໃນເວລາຖືພາ ດ້ວຍການກິນອາຫານ ຄົບໝູ່ ແລະ ຖືກຫຼັກສຸ​ຂອານາມັຍ ແຕ່ບັນຫາ ມີຢູ່ວ່າ ອາຫານບໍ່ພຽງພໍ ໃນເຂດຊົນນະບົດ ໃນທຸກມື້ນີ້.

ເຕັມຫນ້າ