ຜົລກະທົບ ຈາກໂຮງງານຈີນ ຈູດຂີ້ເຫຍື້ອ

ມະນີຈັນ
2020-02-11
ອີແມວລ໌
ຄໍາເຫັນ
Share
ພິມ
ສະຖານທີ່ ຈູດຂີ້ເຫຍື້ອ ທີ່ຜູ້ປະກອບການ ແປຮູບຂິ້ເຫຍື້ອ ຊາວຈີນ ເຊົ່າດິນ ຢູ່ເຂດບ້ານ ນາທ່ອນ ເມືອງນາຊາຍທອງ ນະຄອນຫຼວງວຽງຈັນ.
ສະຖານທີ່ ຈູດຂີ້ເຫຍື້ອ ທີ່ຜູ້ປະກອບການ ແປຮູບຂິ້ເຫຍື້ອ ຊາວຈີນ ເຊົ່າດິນ ຢູ່ເຂດບ້ານ ນາທ່ອນ ເມືອງນາຊາຍທອງ ນະຄອນຫຼວງວຽງຈັນ.
ນັກຂ່າວ ພົລເມືອງ

ປະຊາຊົນ 100 ປາຍຄອບຄົວ ຢູ່ບ້ານ ນາທ່ອນ ເມືອງນາຊາຍທອງ ນະຄອນຫຼວງ ວຽງຈັນ ໄດ້ຮັບຜົລກະທົບ ຢ່າງໜັກ ຫລັງຈາກ ຜູ້ປະກອບການ ແປຮູບ ຂີ້ເຫຍື້ອ ຊາວຈີນ ມາເຊົ່າດິນ ຢູ່ເຂດບ້ານ ນາທ່ອນ ຈູດຂີ້ເຫຍື້ອ ມື້ນຶ່ງຢ່າງຫຼວງຫຼາຍ ສົ່ງກິ່ນຂິວ ເກີດເປັນມົລພິດ ທາງອາກາດ ຢ່າງຮຸນແຮງ. ຊາວບ້ານ ຈຶ່ງຢາກຮຽກຮ້ອງ ໃຫ້ພາກສ່ວນ ທີ່ກ່ຽວຂ້ອງ ຊ່ອຍແກ້ໄຂ ຢ່າງຮີບດ່ວນ, ດັ່ງຊາວ ບ້ານນາທ່ອນ ທ່ານນຶ່ງ ກ່າວຕໍ່ ອາ​ຣ ​ແອັ​ຟ ເອ (RFA) ໃນມື້ວັນທີ່ 10 ກຸມພານີ້ວ່າ:

“ຂິວໃດ໋ ແບບເຂົາເຈົ້າ ເກາະຂີ້ເຫຍຶ້ອໄປຈູດ ເຂົາເຈົ້າ ຈູດກາງຄືນຫັ້ນ ຄືປ່າໄມ້ແຖວນັ້ນເນາະ ປ່າຢາງ ປ່າຫຍັງ ເຂົາເຈົ້າມັນສູງ ກໍຍັງເຫັນ ແປວໄຟ ມັນຂິວ ກໍຢາກໃຫ້ຊ່ອຍໄປແກ້ໄຂ ໃຫ້ແຫຼະ ພວກຊາວບ້ານນະ ເຂົາເຈົ້າ ຢູ່ນາທ່ອນນີ້ ເຂົາເຈົ້າ ກໍຈົ່ມ ວ່າໂຮງງານນີ້ ກະທົບຫຼາຍ.”

ທ່ານກ່າວຕື່ມວ່າ ຜູ້ປະກອບການ ມັກຈູດຂີ້ເຫຍຶ້ອ ໝົດມື້ ທັງກາງເວັນ ແລະ ກາງຄືນ ຈູດອາທິດລະ 2-3 ເທື່ອ ຫຼື ເກືອບທຸກມື້ກໍມີ ຂຶ້ນຢູ່ກັບ ວ່າ ມີການນໍາຂີ້ເຫຍື້ອ ເຂົ້າມາຫຼາຍໜ້ອຍປານໃດ. ພ້ອມດຽວກັນນີ້ ຊາວບ້ານອີກທ່ານນຶ່ງ ກໍກ່າວວ່າ ນອກຈາກ ກິ່ນຂິວແລ້ວ ການຈູດເຜົາ ຂີ້ເຫຍື້ອ ຂອງໂຮງງານຈີນນັ້ນ ກໍຍັງສົ່ງຜົລສະທ້ອນ ຕໍ່ສິ່ງແວດລ້ອມ ໂດຍສະເພາະ ສວນໝາກໄມ້ ຂອງຊາວບ້ານ:

“ສະພາບການນີ້ ກໍຍໍາແຍ່ຂນາດໃດ໋ ທີ່ເຂົາຈູດນີ້ ມັນບໍ່ແມ່ນໜ້ອຍເນາະ ເຂົາຂົນມາ 2-3ມື້ ຈູດເທື່ອນຶ່ງນະ ບາງທີກໍຈູດທຸກມື້ ພວກຖົງຢາງ ປລາສຕິກ ອິຫຍັງ ເວລາຈູດມານີ້ ໂອ້ຍຈັກຂິວ ຈັກເໝັນ ອັນທີ່ບໍ່ດີ ມັນມາສູ່ເຮົາ ຫລາຍຢ່າງ ພວກແມງວັນ ກໍບໍ່ເຄີຍມີ ແຕ່ດຽວນີ້ຫັ້ນ ໂອ້ຍ ບໍ່ໄດ້ກິນເຂົ້າແລ້ວ ນໍາຄວາມເດືອດຮ້ອນ ມາສູ່ປະຊາຊົນຫຼາຍ ບໍ່ຢາກໃຫ້ ເຂົາມາຈູດ ບໍ່ຢາກໃຫ້ເຂົາມາຖິ້ມແຫຼະ ກະທົບສວນໄມ້ ສິ່ງແວດລ້ອມ.”

ຕໍ່ບັນຫາ ດັ່ງກ່າວ ທາງ ອາ​ຣ ​ແອັ​ຟ ເອ (RFA) ໄດ້ຕິດຕໍ່ໄປຫາ ເຈົ້າໜ້າທີ່ ທີ່ກ່ຽວຂ້ອງ ເມືອງນາຊາຍທອງ ໄດ້ຮັບຄໍາຕອບ ພຽງສັ້ນໆວ່າ ກໍາລັງຄົ້ນຄວ້າ ກັນຢູ່.

ອີງຕາມຂໍ້ມູນ ຈາກຊາວບ້ານ, ຜູ້ປະກອບການ ແປຮູບ ຂີ້ເຫຍື້ອ ໄດ້ມາເຊົ່າທີ່ດິນ ຊາວບ້ານເຂດນີ້ ຕັ້ງແຕ່ ເດືອນກັນຍາ ປີ 2019 ໂດຍບອກ ໃນເບື້ອງຕົ້ນ ວ່າ ຈະຈູດຂີ້ເຫຍື້ອ ພຽງແຕ່ 2 ເດືອນ ແຕ່ເວລາ ຜ່ານໄປ ເກືອບ 6 ເດືອນແລ້ວ ການຈູດຂີ້ເຫຍື້ອ ຍັງດໍາເນີນ ຢູ່ຕໍ່ໄປ ຈົນເທົ່າ ຮອດມື້ນີ້.

ເຕັມຫນ້າ