ແມ່​ຍິງ​ລາວ 2 ຄົນ ຖືກ​ຕົວະ​ຮັບ​ຈ້າງ​ຖື​ພາ ຢູ່​ຈີນ

ມະນີຈັນ
2019-11-25
ອີແມວລ໌
ຄໍາເຫັນ
Share
ພິມ
ດ່ານ​ສາ​ກົນ​ບໍ່​ເຕັນ ແຂວງຫຼວງ​ນ້ຳ​ທາ, ເຊິ່ງ​ເປັນ​ຊາຍ​ແດນ​ລາວ-ຈີນ ທີ່​ມັກ​ມີ​ແມ່​ຍິງ​ລາວ ຕົກ​ເປັນ​ເຫ​ຍື່ອ​ການ​ຄ້າ​ມະນຸດ​ໄປຈີນ ແລ້ວ​ຂ້າມ​ດ່ານ​ຊາຍ​ແດນ​ແຫ່ງນີ້ (ຖ່າຍ​ເມື່ອ​ເດືອນພຶ​ສ​ພາ ປີ 2019)
ດ່ານ​ສາ​ກົນ​ບໍ່​ເຕັນ ແຂວງຫຼວງ​ນ້ຳ​ທາ, ເຊິ່ງ​ເປັນ​ຊາຍ​ແດນ​ລາວ-ຈີນ ທີ່​ມັກ​ມີ​ແມ່​ຍິງ​ລາວ ຕົກ​ເປັນ​ເຫ​ຍື່ອ​ການ​ຄ້າ​ມະນຸດ​ໄປຈີນ ແລ້ວ​ຂ້າມ​ດ່ານ​ຊາຍ​ແດນ​ແຫ່ງນີ້ (ຖ່າຍ​ເມື່ອ​ເດືອນພຶ​ສ​ພາ ປີ 2019)
RFA

ແມ່ຍິງລາວຈໍານວນບໍ່ໜ້ອຍ ຖືກຕົວະຍົວະຫຼອກລວງ ໄປເຮັດວຽກຢູ່ຈີນ ຫຼືແຕ່ງດອງກັບຜູ້ຊາຍຈີນ ແລ້ວພາໄປຢູ່ຈີນ, ໂດຍໃຫ້ຄວາມຫວັງວ່າ ຈະມີວຽກ​ເຮັດງ່າຍ, ໄດ້​ເງິນ​ດີ ແລະ ​ມີຊີວິດການເປັນຢູ່ດີ. ແຕ່ເມື່ອໄປຮອດຈີນແລ້ວ, ຊໍ້າພັດຖືກບັງຄັບໃຫ້ເຮັດວຽກໜັກ ຖືກກັກຂັງ ຖືກຂາຍເຂົ້າຊ່ອງໂສເພນີ, ຖືກຂາຍໃຫ້ຜູ້ຊາຍອາຍຸສູງ ຮວມທັງໃຫ້ຮັບຈ້າງ ຖືພາ-ອອກລູກໃຫ້ກໍມີ.

ແລະ ຫຼ້າສຸດນີ້, ກໍມີແມ່​​ຍິງ​ລາວ 2 ຄົນ, ຜູ້ນຶ່ງ​ ອາຍຸ 17 ປີ ຈາກບ້ານທົ່ງ, ເມືອງປາກຊັນ ແຂວງບໍຣິຄໍາໄຊ ແລະ ອີກຜູ້ນຶ່ງ ອາຍຸ 22 ປີ ຈາກບ້ານທົ່ງຫົວເມືອງເໜືອ, ນະຄອນໄກສອນພົມວິຫານ ແຂວງສະຫວັນນະເຂດ ທີ່​ໄດ້​ຖືກ​ຕົວະຍົວະ​ໄປ. ແຕ່​ກໍ​ຍັງ​ໂຊກ​ດີ ທີ່ພວກນາງ ມີ​ໂອ​ກາດ​ໄດ້​ໄປ​ພົບ​ເຈົ້າ​ໜ້າ​ທີ່​ຕຳ​ຣວດ​ຈີນ ​ແລະ​ ໄດ້​ຮັບ​ການ​ຊ່ອຍ​ເຫຼືອ ເພື່ອໃຫ້ໄດ້ກັບຄືນບ້ານເກີດ ພາຍ​ຫຼັງ​ຖືກ​ຕົວະ​ໄປ​ເຮັດ​ວຽກ​ຢູ່​ຈີນ, ແຕ່​ພັດຖືກ​ຍົວະ​ໃຫ້​ຮັບ​ຈ້າງ​ຖືພາ, ​ເຊິ່ງຂະນະນີ້ ຢູ່ໃນຄວາມດູແລຂອງຕໍາຣວດຈີນ, ອີງ​ຕາມ​ຄວາມເວົ້າ​​ຂອງ​ນັກສຶກ​ສາ​ລາວ ຂັ້ນ​ປະ​ຣິນ​ຍາ​ໂທ ທີ່​ເມືອງ​ເຫີ​ໜານ, ເຊິ່ງ​ໄດ້​ຮັບ​ຣາຍ​ງານ​ຈາກ​ຕຳ​ຣວດຈີນ ຕໍ່ RFA ​ໃນ​ມື້​ວັນ​ທີ 14 ພຶ​ສ​ຈິ​ກາ​ ນີ້:

ເຂົາຣາຍງານມາບອກວ່າ ເດັກນ້ອຍ 2 ຄົນນີ້ ຖືກຕົວະ​​ໃຫ້ໄປເຮັດວຽກ, ແຕ່ວ່າໄປຮອດແລ້ວ ໃຫ້ໄປຮັບຈ້າງຖືພາ​, ຊີ້ໜາ ອຸ້ມທ້ອງ ຊີ້​ນ່າ. ຢູ່ເຫີໜານ ຢູ່ຈີນພຸ້ນນາ.”

ອີງຕາມຄວາມເວົ້າຂອງ​ເຈົ້າ​ໜ້າ​ທີ່​ຕຳ​ຣວດ​ລາວ ​ທ່ານ​ນຶ່ງ, ​ຕຳ​ຣວດ​ເມືອງ​ເຫີ​ໜານ​ຂອງ​ຈີນ  ໄດ້​ຕິດ​ຕໍ່​ມາ​ຫາຕຳ​ຣວດ​ລາວ ແລະ​ ບອກວ່າ ເຈົ້າ​ໜ້າ​ທີ່​ຕຳ​ຣວດ​ເຫີ​ໜານ​ ໄດ້​ຮັບ​ເຣື້ອງ ແລະ​ ຮັບ​ປາກ​ແມ່​ຍິງ 2 ຄົນ​ນັ້ນວ່າ ​ຈະ​ຊ່ອຍ​ເຫຼືອ, ເຊິ່ງ​ຂະ​ນະ​ນີ້ ​ຢູ່​ໃນ​ຣະຫວ່າງ​ການ​ປະ​ກອບ​ເອກະ​ສານ ກ່ອນທີ່​ຈະ​ສົ່ງພວກ​ນາງ​ກັບ​ຄືນ​ມາ​ລາວ ແລະ ​ທັງ​ເວົ້າ​ວ່າ ພວກ​ນາງ​ປອດພັຍດີ.

ແລະ ​ຜູ້​ເປັນ​ແມ່ ​ຂອງ​ແມ່​ຍິງ​ອາ​ຍຸ 17 ປີ ທີ່ບໍ່​ໄດ້​ຕິດ​ຕໍ່​ກັບ​ລູກ​ສາວ​ຂອງ​ຕົນ​ມາ​ໄດ້ 4 ເດືອນ​ແລ້ວ​ນັ້ນ, ກໍເປັນ​ຫ່ວງ​ລູກ​ຫຼາຍ ບໍ່ຮູ້ວ່າລູກໄປ​ໃສ.

“ນຶກວ່າໄປເຮັດວຽກຢູ່ວຽງນີ້, ຕໍ່ມາໄດ້ຍິນຂ່າວວ່າ ເຂົາເຈົ້າເອົາລົງ face ​ນ່າ, ໄປຢູ່ເມືອງຈີນພຸ້ນຫຼະ, ອູ້ມທ້ອງໃຫ້ເຂົາວ່າຊັ້ນ. ລູກກໍຕັ້ງແຕ່ມື້ຫັ້ນ ລູກນ່າ ບໍ່ໄດ້ຕິດຕໍ່ມາເລີຍ ຕັ້ງແຕ່ມື້ນັ້ນ, ຫ່ວງແທ້ ທຸກມື້ນີ້ຄິດຮອດນະ.”

ສຳ​ລັບ​ຜູ້​ເປັນ​ແມ່​ຂອງ​ແມ່​ຍິງ​ອາ​ຍຸ 22 ປີ​ນັ້ນ, ​ກໍ​ເວົ້າ​ວ່າ ຕິດ​ຕໍ່​ຫາ​ລູກ​ສາວບໍ່​ໄດ້ 2 ເດືອນ​ແລ້ວ. ຕໍ່​ມາ​ລູກ​ສາວ​ຂອງ​ຕົນ​​ໄດ້ໂທ​ຣະ​ສັບ ຈາກ​ຈີນ​ ມາ​ບອກວ່າ ໄປ​ເຮັດ​ວຽກ​ເກັບ​ໝາກ​ສາ​ລີ​ຢູ່​ຈີນ ໄດ້​ເງິນບໍ່​ຫຼາຍ, 1 ລ້ານ 2 ລ້ານ​ກີບ, ໄດ້​ຝາກ​ເງິນ​ທາງ​ທ​ນາ​ຄານ ມາ​ໃຫ້​ພໍ່​ແມ່ ເອົາ​ໄວ້​ປິ່ນ​ປົວ​ພະ​ຍາດ, ແຕ່​ພໍ່​ແມ່ກໍ​ຖອນ​ເງິນ​ອອກບໍ່​ໄດ້ ເພາະ​ບັນ​ຊີ​ເງິນ​ຝາກ​ ເປັນ​ຊື່​ຂອງ​ລູກ​ສາວ. ເຖິງ​ຢ່າງ​ໃດ​ກໍຍັງ​ຄຶດ​​ນຳ​ລູກ​ສາວຢູ່ ດັ່ງ​ທີ່​ນາງ​ກ່າວ​ວ່າ:

ທໍາອິດຫັ້ນລູກເວົ້າວ່າ ໄປເຮັດວຽກ. ຄັນລູກໄດ້ວຽກແລ້ວ ຊິໂທມາຫາແມ່ ລະໂທມາຫາແມ່ ລະລູກວ່າ ແມ່ເອີ໊ຍ ລູກໄດ້ວຽກແລ້ວ, ວຽກຫຍັງ? ໂອ໊ຍ, ໄປເກັບສາລີ ເຮົາຊິບໍ່ໄດ້ຫຼາຍດອກ, ໝ້ອງລ້ານ ລ້ານປາຍ ກະບໍ່ໄດ້ຍິນຂ່າວເລີຍ ກໍເທື່ອໄດ້ຍິນຂ່າວວັ່ງ 2-3 ມື້ນີ້.”

​ນາງ​ເວົ້າ​ວ່າ ເມື່ອເຫັນຮູບລູກສາວ ໃນເຟສບຸກຂອງນັກສຶກສາປຣິ​ນຍາໂທ ​ທີ່​ວ່າ ຖືກ​ຕົວະໄປຈີນ ແລະ ຖືກຄົນຈີນຍົວະໃຫ້ຮັບຈ້າງຖືພາ ອອກລູກໃຫ້ເຂົາຄື​ແນວ​ນັ້ນ​ແລ້ວ, ​ຍິ່ງເຮັດໃຫ້​ຕົນເປັນຫ່ວງລູກສາວຫຼາຍ​ຂຶ້ນ.

ແ​ຕ່​ເຖິງ​ຢ່າງ​ໃດ​ກໍ​ຕາມ, ເປັນທີ່ຄາດກັນວ່າ ແມ່ຍິງລາວຜູ້ເຄາະຮ້າຍ 2 ຄົນທີ່​ວ່າ​ນັ້ນ ອາຈໄດ້ກັບຄືນມາລາວ ໃນອີກບໍ່ດົນນີ້. ທາງ RFA ໄດ້​ພະຍາຍາມຕິດ​ຕໍ່​ຖາມ​ໄປ​ຍັ​ງ ສະຖານກົງສູນລາວ ແລະ ສະຖານທູຕລາວ ປະຈໍາປະ​ເທດຈີນ, ແຕ່ບໍ່ມີຄົນຮັບສາຍ.

ນີ້ເປັນ​ກໍ​ຣະ​ນີ​ທຳ​ອິດ ທີ່ວ່າ ແມ່ຍິງລາວ ຖືກຕົວະໄປເຮັດວຽກ ແລ້ວ​ຍົວະ​ໃຫ້ຖືພາ ອອກລູກໃຫ້ຄົນອື່ນຢູ່ຈີນ, ເຊິ່ງແຕກ​ຕ່າງໄປຈາກທີ່ຜ່ານມາ ທີ່ແມ່​ຍິງ​ລາວ ຖືກຕົວະໄປແຕ່ງດອງ, ຕົວະໄປເຮັດວຽກໜັກ.

ຕົວຢ່າງກໍຣະນີເດັກນ້ອຍແມ່ຍິງລາວເຜົ່າມົ້ງ 3 ຄົນ ຢູ່ເມືອງວຽງພູຄາ ແຂວງຫລວງນໍ້າທາ, ເຊິ່ງຜູ້ນຶ່ງຢູ່ບ້ານພູລັນເໜືອ ແລະ 2 ຄົນຢູ່ບ້ານທ່າຫຼວງ ທີ່ໄປເຮັດວຽກຢູ່ສວນກ້ວຍ ແລະ​ ສວນໝາກໂມຂອງຈີນ ແລ້ວຖືກຄົນຈີນ ທີ່ເຮັດວຽກຢູ່ບ່ອນດຽວກັນນັ້ນ, ຕົວະວ່າຈະພາໄປສ້າງຄອບຄົວ, ເປັນຜົວເມັຽ ແລະ ເຮັດວຽກຢູ່ຈີນ, ໂດຍ​ທີ່ຝ່າຍຊາຍ ໄດ້ມາສູ່ຂໍນຳ​ພໍ່​ແມ່ ຮອດເຮືອນ ຕາມປະເພນີ ແລະ ໃຫ້ເງິນຄ່າດອງປະມານ 30 ພັນຢັວນ. ຍ້ອນຄອບຄົວ​ຂອງພວກນາງທຸກຍາກ, ພໍ່​ແມ່ຈຶ່ງຕົກ​ລົງ ໃຫ້ພວກນາງໄປ, ໂດຍຫວັງວ່າ ເມື່ອລູກໄປຢູ່ຈີນ​ແລ້ວ  ຈະມີເງິນສົ່ງມາໃຫ້ທາງບ້ານ ພໍ​ໄດ້​ຢູ່​ໄດ້​ກິນ.

ແຕ່ແລ້ວ, ກໍບໍ່ເປັນຄື​ດັ່ງ​ວ່າ ຜົວຈີນໃຫ້ພວກນາງຢູ່ແຕ່ໃນເຮືອນ ເປັນ​ເວ​ລາ 2 ປີປາຍ. ແຕ່​ໃນ​ມື້ນຶ່ງ, ພວກນາງໄດ້ຍິນ​ວ່າ ຜູ້ເປັນຜົວຈະຂາຍພວກນາງ ໄປເປັນເມັຽຂອງຄົນເຖົ້າຈີນ. ເມື່ອ​ເຫັນ​ທ່າບໍ່​ດີ​ຄື​ແນວນັ້ນ, ພວກນາງກໍຢ້ານ ຈຶ່ງຫາ​ວິ​ທີ​ໜີ​ໄປ, ໂດຍຕົວະຜູ້ເປັນຜົວວ່າ ມາ​ເຫິງ​ແລ້ວ ຢາ​ກ​ກັບ​ເມືອຢາມພໍ່ແມ່ ພີ່ນ້ອງຢູ່ລາວ. ຜູ້​ເປັນຜົວຫຼົງ​ເຊື່ອ ຈຶ່ງປ່ອຍໃຫ້ພວກນາງຂີ່ຣົດໂດຍສານຈີນ-ລາວ ຜ່ານດ່ານຊາຍ​ແດນ ບໍ່ຫານ-ບໍ່ເຕັນ, ແຂວງຫຼວງນໍ້າທາ. ​ເມື່ອກັບ​ມາ​ຮອດຄອບຄົວ​ແລ້ວ ກໍບໍ່​ຕິດຕໍ່ໄປຫາຜົວຈີນ​ເລີຍ, ອີງຕາມຄວາມເວົ້າຂອງເຈົ້າໜ້າທີ່ຕໍາຣວດ ປກສ ແຂວງຫຼວງນໍ້າທາ ຕໍ່ RFA ເມື່ອວັນທີ 12 ພຶສຈິການີ້.

2 ປີແລ້ວ ເອົາກັນກໍບໍ່ມີເອກສານ ຢູ່ແຕ່ໃນເຮືອນ ບໍ່ໄດ້ໄປອອກນອກອອກນາຊໍ້າ ຢູ່ຈີນນະ ມີລູກນໍາກັນແລ້ວບາດນີ້ ຜົວກໍໄປຕິດຕໍ່ເຖົ້າແກ່ ມາຊື້ຕໍ່ຫັ້ນນ່າ ຂາຍໃຫ້ຜູ້ທີ 2 ຕື່ມ ຄືສິຮູ້ພາສາຈີນ ໄດ້ຍິນກໍເສັຽຫລັກ ເພິ່ນກໍໄດ້ເມືອສົ່ງ ມາຢາມພີ່ນ້ອງກ່ອນ ເປັນແນວໃດແລ້ວຈະໄດ້ກັບເມືອວ່າຊັ້ນນ່າ.”

ເວົ້າເຣື້ອງການຕົວະຍົວະ ​ຫລອກລວງແມ່ຍິງລາວໄປ​ຈີນຂອງຜູ້ຊາຍຈີນ ແມ່ນ​ມີ​ຫຼາຍໆ​ກໍ​ຣະ​ນີ. ຫາກເບິ່ງຄືນຫຼັງໄປຮອດເດືອນກັນຍາ ​ທີ່​ຫາ​ກໍ​ຜ່ານ​ມາ​ນີ້, ກໍມີເດັກ​ນ້ອຍແມ່ຍິງລາວ ອາຍຸ 16 ປີ ຢູ່ເມືອງຄໍາ ແຂວງຊຽງຂວາງ ຖືກນາຍໜ້າຄົນລາວ ຕົວະວ່າ ຈະພາໄປຮຽນໜັງສືຕໍ່ຢູ່ຈີນ. ແຕ່ເມື່ອໄປ​ຮອດແລ້ວ, ກໍຖືກບັງ​ຄັບ​ໃຫ້ບໍຣິການທາງເພດ ແບບບໍ່ໃຫ້ຢູ່ໃຫ້ເຊົາ. ແຕ່ນາງກໍຂ້ອນຂ້າງໂຊກດີ ​ທີ່ມີເຈົ້າໜ້າທີ່ຕໍາຣວດລາວ ເຂົ້າໄປໃຊ້ບໍຣິການ ຢູ່ຮ້ານຈີນ ທີ່ນາງເຮັດວຽກຢູ່. ພໍນາງ​ຮູ້ ນາງ​ກໍ​ຖືໂອກາດ ຂໍຄວາມຊ່ອຍເຫຼືອ ຈາກເຈົ້າໜ້າທີ່ຄົນດັ່ງກ່າວ ແລະເຈົ້າໜ້າທີ່ລາວຜູ້​ນັ້ນ ກໍຖືໂອກາດພານາງອອກມາ, ພາຂີ່ຣົດກັບຄືນມາລາວ, ອີງຕາມຄວາມເວົ້າຂອງເຈົ້າໜ້າທີ່ ອໍານາດການປົກຄອງບ້ານຄັງເຄາະ ຕໍ່ RFA ໃນມື້ວັນທີ 26 ກັນຍາຜ່ານມາ.

ລາວສູງຫັ້ນ ຕົວະໄປຮຽນນັ້ນແຫລະ ເປັນຜູ້ເອົາສົ່ງຂາຍໃຫ້ຄົນຈີນ ເອົາອອກມາເລີຍນະ ສູ້ບໍ່ໄຫວຫັ້ນນ່າ ໂອ໊ ແບບທາຣຸນຫັ້ນນະ ແບບວ່າຮັບແຂກຫລາຍຄົນຫັ້ນແຫລະ ທໍາຮ້າຍຜູ້ຍິງຫັ້ນແຫລະ ຕົວະໄປເຮັດແນວນັ້ນ ເລີຍນະ. ໂສເພຮີເນາະ ຕໍາຣວດລາວເຮົາກໍໄປຫລີ້ນເດ໊ ກໍສວຍໂອ ກາດເອົາອອກມາ.”

ພໍກັບມາເຖິງລາວແລ້ວ, ​ກໍພານາງໄປຣາຍງານຕໍ່ເຈົ້າໜ້າທີ່ທາງການ. ຫຼັງຈາກນັ້ນ, ເຈົ້າໜ້າທີ່ກໍຕິດຕາມຫາ​ນາຍ​ໜ້າ 2 ຄົນ, ແຕ່ຈັບໄດ້​ຜູ້​ນຶ່ງ ເປັນຄົນລາວ. ສ່ວນວ່າອີກຜູ້ນຶ່ງ ທີ່ເປັນຄົນຈີນ ຍັງຕິດຕາມຫາຕົວຢູ່.

ທີ່ເວົ້າມານັ້ນ, ແມ່ນກໍຣະນີໂຊກດີ ຂອງແມ່ຍິງລາວ ທີ່ມີໂອກາດໄດ້ດີ້ນຮົນ ຫາທາງເພື່ອເຮັດໃຫ້ພວກຕົນ ໄດ້​ຫຼຸດພົ້ນ​ອອກຈາກ​ການຖືກກົດຂີ່, ບັງຄັບ, ຂູ່ເຂັນ ແລະ ໄດ້ກັບຄືນມາຫາຄອບຄົວ ພໍ່ແມ່ຢູ່ທາງເມືອງລາວ. ແຕ່ກໍຍັງບໍ່ຮູ້ວ່າ ຍັງມີແມ່ຍິງລາວອີກຫຼາຍໜ້ອຍ​ສ່ຳໃດ ທີ່ມີຊີວິດຢູ່ຄື​ກັນກັບ (ຕາຍທັງເປັນ) ຢູ່ຈີນ.

ອີງຕາມຣາຍງານຕໍ່ກອງປະຊຸມ ຕ້ານການຄ້າມະນຸດ ຢູ່ນະຄອນຫຼວງວຽງຈັນ ເມື່ອເດືອນຕຸລາ 2018, ມີແມ່ຍິງລາວຢ່າງໜ້ອຍ 3 ພັນຄົນ ຖືກຕົວະຍົວະໄປຈີນ. ໃນນັ້ນ, ຊ່ອຍກັບຄືນລາວໄດ້ 600 ຄົນ.

ເຕັມຫນ້າ