​ການຕັດສິນ ຜູ້ຕ້ອງຫາ ຢາເສບຕິດ ຣາຍໃຫຍ່ ຍັງມິດ

ອຸ່ນແກ້ວ
2019-12-30
Share
F-Sisouk ທ້າວ ສີສຸກ ດາວເຮືອງ ຜູ້ຕ້ອງຫາ ຄ້າຢາເສບຕິດ ຣາຍໃຫຍ່ ທີ່ຖືກຈັບແລ້ວ ມິດໄປເລີຍ ແລະ ເຊື່ອກັນວ່າ ເປັນເຄືອຂ່າຍຂອງ ທ້າວ ໄຊຊະນະ ແກ້ວພິມພາ
Citizen Journalist

ທ້າວ ໄຊ​ຊະ​ນະ ແກ້ວ​ພິມ​ພາ ນັກ​ຄ້າ​ຢາ​ເສບ​ຕິດ ​ຊາວ​ລາວ ທີ່​ຖືກເຈົ້າ​ໜ້າ​ທີ່ ​ຕຳຣວດໄທຍ  ຈັບໃນ​ວັນ​ທີ 19 ມົກ​ກະ​ຣາ 2017 ທີ່​ຜ່​ານ​ມາ ຢູ່​ສນາມ​ບິນ ​ສຸ​ວັນ​ນະ​ພູມ ​ຂອງ​ໄທຍ ໃນ​ຂໍ້​ຫາ ຄ້າ​ຢາ​ເສບ​ຕິດ. ນັບ​ແຕ່​ນັ້ນ​ ເປັນ​ຕົ້ນ​ມາ, ທ້າວ ໄຊ​ຊະ​ນະ ຖືກນໍ​າ​ມາ​ ຂຶ້ນ​ສານ ແລ້ວ 2 ຄັ້ງ:

ຄັ້ງ​ທີ 1 ໃນ​ວັນ​ທີ 20 ມີ​ນາ 2018, ສານ​ອາ​​ຍາ ​ຂອງ​ໄທຍ ໄດ້​ຕັດ​ສິນ ຈຳ​ຄຸ​ກ ​ຕລອດ​ຊີ​ວິຕ ທ້າວ ໄຊ​ຊະ​ນະ, ແຕ່​ຜູ້​ກ່ຽວ​ຂໍ​ຍື່ນ​ອຸ​ທອນ.

ຫຼ້າ​ສຸດ, ​ໃນ​ວັນ​ທີ 19 ທັນ​ວາ 2019, ສານ​​ອຸ​ທອນ ​ຂອງ​ໄທຍ ໄດ້​ຕັດ​ສິນ ​ທ້າວ ​ໄຊ​ຊະ​ນະ​  ຈຳ​ຄຸກ​ ຕລອດ​ຊີ​ວິຕ, ໂດຍ​ອີງ​ຕາມ​ ຄຳ​ຕັດ​ສິນ ​ຂອງ​ສານ​ຊັ້ນ​ຕົ້ນ.

ແຕ່​ສະ​ເພາະ ​ເຄືອ​ຂ່າຍ ​ທ້າວ ​ໄຊ​ຊະ​ນະ ຫຼາຍ​ຄົນ, ​ທີ່​ຖືກ​ຈັບ ​ຢູ່​ປະ​ເທດ​ລາວ ທັງ​ໝົດ ​ຍັງ​ບໍ່​ທັນ ​ໄດ້ຖືກ​ນຳ​ ຂຶ້ນ​ສານ​ ຕັດ​ສິນ​ຈັກ​ຄົນ, ເຖິງວ່າ ເຫຕ​ການ ​ຈະ​ຜ່ານ​ໄປ ຫຼາຍ​ກ່​ວາ 2 ປີ​ແລ້ວ.

ພະ​ນັກ​ງານ​ ບຳ​ນານ​ ທ່ານ​ນຶ່ງ ກໍເວົ້າ​ວ່າ ​ທາງ​ການ​ລາວ ​ຄົງ​ຈະ​ບໍ່​ນຳ​ເອົາ ​ກຸ່ມ​ຄົນ​ ທີ່​ເຄື່ອ​ຂ່າຍ ​ຂອງ​ທ້າວ​ ໄຊ​ຊະ​ນະ ​ມາ​ຂຶ້ນ​ສານ, ແຕ່​ຈະ​ໃຫ້​ ເຣື່ອງ​ດັ່ງ​ກ່າວ ​ມິດ​ງຽບ​ໄປ​ເອງ.

ສຽງ1:

ກ​ານ​ຈັບ​ກຸ​ມ ​ກຸ່ມ​ຄ້າ​ ຢາ​ເສບ​ຕິ​ດ ​ດັ່ງ​ກ່າວ​ ເປັນ​ພຽງ​ແຕ່​ ຮູບ​ການ ເພື່ອບໍ່​ໃຫ້ ​ສັງ​ຄົມວິ​ພາກ ວິ​ຈານ ເທົ່າ​ນັ້ນ, ດັ່ງ​ປະ​ຊາ​ຊົນ ທ່ານນຶ່ງ ທ່ານ​ກ່າວ​ຕື່ມ​ອີກວ່າ:

ສຽງ2:

“ຄັນ ຄັນຊາຄວາມຄຶດຂອງເຮົານີ້ແມ່ນ ຈັບເປັນຮູບການຊື່ໆນ່າ ເພື່ອບໍ່ຢາກໃຫ້ ເພື່ອບໍ່ໃຫ້ສັງຄົມສົງໄສວ່າ ຜູ້ນັ້ນ ພໍ່ຄ້າລາຍໃຫຍ່ ຜູ້ນີ້ ພໍຄ້າລາຍໃຫຍ່ຄືບໍ່ເຫັນຈັບ ປານນັ້ນຊິເຮັດສົງຄາມກັບຢາເສບຕິດ.”

ນອກ​ຈາກນີ້, ພະ​ນັກ​ງານ ​ຣັ​ຖກອນ ທ່ານນຶ່ງ ​ກໍ​ໃຫ້ເຫຕ​ຜົລ ​ວ່າ ການ​ດຳ​ເນີນ​ ຄ​ດີ​ຄ້າ​ຢາ​ເສບ​ຕິດ ​ຢູ່​ປະ​ເທດ​ລາວ ຈະ​ດົນ ​ເປັນ​ພິ​ເສດ, ດັ່ງ ທ່ານ ກ່າວ​ວ່າ:

ສຽງ3:

ເອ​ເຊັຽ​ເສ​ຣີ ໄດ້​ຕິດ​ຕໍ່ ຂໍ​ສັມ​ພາດ ທ່ານ ພົນ​ຈັດ​ຕະ​ວາ ຕຳ​ຣວດ ທອງ​ເຫຼັກ ມັງ​ໜໍ່​ເມກ ເພື່ອຖາມ​ເຖິງ ຄວາມ​ຄືບ​ໜ້າ​ ການ​ດຳ​ເນີນ​ຄດີ ກຸ່ມ​ຄ້າ​ ຢາ​ເສບ​ຕິດ ​ດັ່ງ​ກ່າວ, ແຕ່ທ່ານ ປະ​ຕິ​ເສດ ທີ່​ຈະ​ໃຫ້ ​ຄຳ​ເຫັນ​ ໃນ​ເຣື່ອງນີ້.

ເຖີງ​ຢ່າງ​ໃດ ​ກໍ​ຕາມ, ທ່ານ ລອງ​ລຸນ​ ສີ​ສຸ​ລິດ, ນາ​ຍົກ​ຣັ​ຖ​ມົນ​ຕ​ຣີ ໄດ້​ກ່າວ​ ຢູ່​ໃນ ​ກອງ​ປະ​ຊຸມ ​ສມັຍ​ສາ​ມັນ​ ເທື່ອ​ທີ 5 ຂອງ​ສະ​ພາ​ແຫ່ງ​ຊາຕ ​ຊຸດ​ທີ 8 ໃນ​ວັນ​ທີ 8 ມິ​ຖຸ​ນາ 2018 ຜ່ານ​ມາ ວ່າ:

ສຽງ4:

“ຂ້າພະເຈົ້າໄດ້ນີແລ້ວ ຣັບາສືບຕໍ່ ຢ່າງເອົາໃຈໃສ່ ເປັນພິເສດ. ຜູ້ທີ່ ຈັບມາແລ້ວ ຕ້ອງເອົາຂຶ້ນານ, ຕ້ອງເອົາໄປສືບສວນ ສອບສວນ. ຂ້າພະເຈົ້າ ກະຖາມໄປ ເລື້ອຍໆວ່າ ເອົາໄປຂຶ້ນລະບໍ? ເອົາໄປສອບສວນລະບໍ? ຣາຍໃຫຍ່ ຍັງບໍ່ທັນເຫັນ, ແຕ່ຄິດວ່າຈະເຫັນ ບັນດາຫົວໂປ່ໂຕການ ຫຼົ່ານີ້ ຂຶ້ນຕັດສິນ. ຂ້າພະເຈົ້າ ​​ກະໄດ້ມອບ ໃຫ້ບັນດາ ສະຫາຍທີ່ມີຄວາມຮັບຜິດຊອບ ໄປຈັດຕັ້ງ ປະຕິບັດ. ລະມີບັນຫາຍັງ ຣາຍງານ.”

ໃນ​ວັນ​ທີ 15 ກຸມ​ພາ 2017, ທ່ານ ພົນ​ຈັດ​ຕະ​ວາ ຕຳ​ຣວດ ທອງ​ເຫຼັກ ມັງ​ໜໍ່​ເມກ, ເອກ​ອະ​ທິ​ບໍ​ດີ ​ກົມ​ໃຫ​ຍ່​ຕຳຣວດ, ກະ​ຊວງ​ປ້ອງ​ກັນ ​ຄວາ​ມ​ສງົບ​ ໄດ້​ຖແລງ​ຂ່າວ ​ການ​ຈັບ ​ກຸ່​ມ​ຄ້າ​  ຢາ​ເສບ​ຕິດ​ ຣາຍ​ໃຫ​ຍ່ຫຼາຍກຸ່ມ.

ກຸ່ມທີ 1: ​ໃນ​ວັນ​ທີ 16/09/2016 ​ເຈົ້າໜ້າທີ່ ​ຕຳ​ຣວດ ​ໄດ້​ຈັບ​ຕົວ ​ຄື: ທ້າວ ກິ​ນ້ອຍ ຜາ​ໄຊ ຫຼື  (​ແອນ້ອຍ ຫຼື ນ້ອຍ​ອາກາດ), ອາຍຸ 34 ປີ ​ເຊື້ອ​ຊາດ-​ສັນຊາດ​ລາວ, ຢູ່​ບ້ານ​ອາກາດ,  ເມືອງ​ສີ​ໂຄດ​ຕະບອງ ນະຄອນຫຼວງ​ວຽງຈັນ, ພ້ອມ​ດ້ວຍ​ ພັກ​ພວກ ​ຈຳນວນ 16 ຄົນ​ ຍິງ 04 ຄົນ.

ກຸ່ມ​ທີ 2: ​ໃນ​ວັນ​ທີ 11/12/2016 ​ເຈົ້າໜ້າທີ່ ​ໄດ້​ຈັບ​ຕົວ (ຄູ່​ຜົວ-​ເມັຽ) ຄື: ທ້າວ ຫວາດ ພິລາ​ບັນ, ອາຍຸ 41 ປີ, ​ເຊື້ອ​ຊາດ-​ສັນຊາດລາວ ​ແລະ ນາງ ​ແກ້ວ ພິລາ​ບັນ ຫລື (ກິ່ວ), ອາຍຸ 39 ປີ ​ເຊື້ອ​ຊາດ-​ສັນຊາດ ລາວ ຢູ່​ແຂວງ​ບໍ່​ແກ້ວ.

ກຸ່ມ​ທີ 3: ​ໃນ​ວັນ​ທີ 10/01/2017 ​ເຈົ້າໜ້າທີ່​ ໄດ້​ຈັບ​ຕົວ ​ຄື: ທ້າວ ຄອນ​ປະສົງ ສຸກ​ກະ​ເສີມ ຫຼື (ຊຽງ​ເທີ), ອາຍຸ 47 ປີ ​ເຊື້ອ​ຊາດ-​ສັນຊາດ​ລາວ, ຢູ່​ນະຄອນຫຼວງ​ວຽງຈັນ, ພ້ອມ​ດ້ວຍ​ ພັກ​ພວກ 3 ຄົນ, ​ເຊິ່ງ​ເປັນ​ຜູ້​ຄ້າ-ຂາຍ​ ຢາ​ເສບ​ຕິດ ​ຣາຍ​ໃຫຍ່.

ກຸ່ມ​ທີ 4​: ໃນ​ວັນ​ທີ 20 ມົກ​ກະ​ຣາ 2017, ເຈົ້າ​ໜ້າ​ທີ່ ​ຕຳ​ຣວດ ໄດ້​ຈັບ​ຕົວ ກຸ່ມເຄືອ​ຂ່າຍ ຂອງທ້າວ ​ໄຊຊະນະ ​ແກ້ວ​ພິມ​ພາ 5 ຄົນ ທີ່​ຖືກ​ຈັບ​ຕົວ ຢູ່​ແຂວງ​ຄຳ​ມ່ວນ ແລະ ນະ​ຄອນ​ຫຼວງວຽງ​ຈັນ.

ກຸ່ມ​ທີ 5 ຖືກ​ຈັບ​ຕົວ ​ໃນ​ວັນ​ທີ 24/01/2017 ຄື: ທ້າວ ຄອນ​ໄທ ​ໂຄດ​ສົມບັດ ຫລື (ສິ້ວ), ບ້ານ​ຫຼັກ​ເມືອງ, ​ເມືອງ​ສອງ​ຄອນ, ​ແຂວງ​ສວັນ​ນະ​​ເຂດ, ພ້ອມ​ດ້ວຍ​ ພັກ​ພວກ ​ອີກ 2 ຄົນ.

ນອ​ກ​ຈາກນີ້, ໃນ​ວັນ​ທີ 1 ເມ​ສາ 2017, ເຈົ້າ​ໜ້າ​ທີ່ ​ຕຳ​ຣວດ​ລາວ ກໍ​ສາ​ມາດ ​ຈັບ​ຕົວ ທ້າວ ສີ​ສຸກ ດາວ​ເຮືອງ ຢູ່​ແຂວງ​ຫຼວງ​ພຣະ​ບາງ, ເຊິ່ງ​ເປັນ ຜູ້​ຕ້ອງ​ຫາ​ ຄ້າ​ຢາ​ເສ​ບ​ຕິດ ​ຣາຍ​ໃຫ​ຍ່​ ຂອງ​ລາວ ອີກ​ຄົນນຶ່ງ.

ທັງ​ໝົດ ມີ​ປະ​ມານ 30 ຄົນ ທີ່​ຖືກ ​ເຈົ້າ​ໜ້າ​ທີ່ ​ຕຳ​ຣວດຈັບ, ແຕ່ກຸ່ມດັ່ງ​ກ່າວ ຍັງບໍ່​ໄດ້ ​ຖືກ​ນໍາ​ມາ ​ຂຶ້​ນ​ສານ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ