ປກສ ບໍ່ແກ້ວ ຍຶດຢາບ້າ ໄດ້ອີກ

ມະນີຈັນ
2018-11-02
Share
ຢາເສພຕິດ ທີ່ ໃຫ້ໂທດ
RFA/VD

ເຈົ້າໜ້າທີ່ປ້ອງກັນຄວາມສງົບ ແຂວງບໍ່ແກ້ວ ກວດພົບຢາບ້າ ທີ່ຊຸກເຊື່ອງໄວ້ໃນປ່າ ໄດ້ຕື່ມອີກ ກວ່າ 2 ລ້ານ ເມັດ ຢູ່ເຂດສາມຫລ່ຽມຄໍາ ພາຍຫລັງທີ່ສາມາດ ກວດຍຶດຢາບ້າໄດ້ 4 ລ້ານ ປາຍເມັດ ເມື່ອທ້າຍເດືອນຕຸລາ ຜ່ານມາ.

ພາຍໃນເດືອນຕຸລາເດືອນດຽວ ແຂວງບໍ່ແກ້ວ ກວດຍຶດຢາບ້າໄດ້ ເຖິງ 7 ລ້ານ ປາຍເມັດ ຢູ່ເມືອງຕົ້ນເຜິ້ງ ຊຶ່ງເຈົ້າໜ້າທີ່ປ້ອງກັນຄວາມສງົບ ແຂວງບໍ່ແກ້ວ ເວົ້າວ່າຍັງບໍ່ສາມາດ ໃຫ້ລາຍລະອຽດ ກ່ຽວກັບແຫລ່ງທີ່ມາຂອງຢາບ້ານັ້ນໄດ້ ຕ້ອງໄດ້ປະຊຸມ ຫາລື ກັບເຈົ້າໜ້າທີ່ຣະດັບສູງ ກ່ອນ:

"ອັນນີ້ບໍ່ຊ່າງໃຫ້ຄໍາຕອບ ເນາະອັນນີ້ໃຫ້ໄປບໍ່ໄດ້ເນາະ ອັນນີ້ມັນສິລົມໄປແບບນັ້ນບໍ່ໄດ້ ທາງຂັ້ນເທິງເພິ່ນກໍນໍາໃຫ້ແລ້ວ ເຂັ້ມງວດແຕ່ດົນມາ ແລ້ວ ມາຕການສະກັດກັ້ນຫັ້ນນະ ເພິ່ນກໍວາງແຜນຢູ່ແລ້ວ ມັນກໍຮັດກຸມຢູ່ແລ້ວ ວາງມາຕການຢູ່ແລ້ວ."

ການກວດຍຶດຢາບ້າຄັ້ງນີ້ ສືບເນື່ອງມາຈາກເຈົ້າໜ້າທີ່ ຍຶດຢາບ້າໄດ້ 4 ລ້ານ 3 ແສນເມັດໃນມື້ວັນທີ 4 ຕຸລາ ຢູ່ເຂດບ້ານສີເມືອງງາມ ເມືອງຕົ້ນເຜິ້ງ ຈຶ່ງໄດ້ຕິດຕາມ ກວດຄົ້ນຫາຈຸດອື່ນໆອີກ ທີ່ກຸ່ມຄ້າຢາເສບຕິດ ຊຸກເຊື່ອງໄວ້ ແລະ ໃນວັນທີ 18 ຕຸລາ ເຈົ້າໜ້າທີ່ກໍໄດ້ ກວດພົບ ຢາບ້າ ຢູ່ 6 ຈຸດ ຈໍານວນ 1 ລ້ານ 2 ແສນເມັດ ທີ່ຖືກຊຸກເຊື່ອງໄວ້ ຢູ່ດອນກາງ ແມ່ນໍ້າຂອງ ຣະຫວ່າງຊາຍແດນ ລາວ-ພະມ້າ. ແລະມື້ຕໍ່ມາ ກໍກວດຍຶດຢາບ້າໄດ້ ອີກ 870 ພັນເມັດ ທີ່ຖືກຊຸກເຊື່ອງໄວ້ໃນປ່າ ເຂດບ້ານສາມຫລ່ຽມຄໍາ ເມືອງຕົ້ນເຜິ້ງ.

ໃນຂນະນີ້ທາງເຈົ້າໜ້າທີ່ ກໍາລັງເລັ່ງຕິດຕາມ ພວກຄ້າຢາເສບຕິດ ທີ່ຍັງຫລົບໜີໄດ້ນັ້ນ ເພື່ອນໍາຕົວມາດໍາເນີນຄະດີ ຕາມກົດໝາຍ. ຢາເສບຕິດ ທີ່ຍຶດໄດ້ນັ້ນ ສ່ວນຫລາຍມາຈາກສາມຫລ່ຽມຄໍາ ເຂດເຊື່ອມຕໍ່ຊາຍແດນ 3 ປະເທດ ລາວ ໄທແລະພະມ້າ ຊຶ່ງ ເປັນເຂດ ທີ່ມີຂໍ້ຫຍູ້ງຍາກ ໃນການກວດກາ ແລະລາດຕະເວນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ