ເດັກນ້ອຍລາວ 14 ປີ ຖືກບັງຄັບ ຢູ່ໄທ

ເດັກນ້ອຍຜູ້ຍິງລາວ ອາຍຸ 14 ປີ ເປັນຄົນນະຄອນປາກເຊ ແຂວງຈຳປາສັກ ຖືກນາຍຈ້າງໄທ ຂົ່ມຂູ່ບັງຄັບ ໃຊ້ແຮງງານ, ທຳຮ້າຍຮ່າງກາຍ ແລະ ທໍຣະມານ, ໃຊ້ສາກກະເບືອຕີໜ້າ ໄດ້ຮັບບາດເຈັບສາຫັດ, ໃຊ້ມີດຕັດແທງຕາມແຂນຂາ ແລະຕົນໂຕ ໂດຍ ທີ່ບໍ່ເຄີຍໄດ້ຮັບການ ປິ່ນປົວ.

ປັດຈຸບັນ ຕຳຣວດໄທ ຈັບຜູ້ເປັນນາຍຈ້າງ ໄດ້ແລ້ວ -ຕາມຄຳເວົ້າຂອງ ເຈົ້າໜ້າທີ່ຕຳຣວດ ກວດຄົນເຂົ້າເມືອງໄທ ຕໍ່ວິທຍຸເອເຊັຽເສຣີ ໃນ ມື້ວັນທີ 20 ສິງຫາ ນີ້:

"ທ່ານກ່າວວ່າ ເຂົາມັກທຳຮ້າຍ ເອົາແນວຕັດຫຍ້າ ປັກຕາມຮ່າງກາຍ ແລະ ໃບໜ້າຂອງຜູ້ຍິງ ທີ່ເຂົ້າມາທາງຊ່ອງເມັກ ລັກເຂົ້າເມືອງມາ ໂດຍມີຄົນລາວແຖວນີ້ ໄປຊັກຈູງເອົາມາ ແຕ່ວ່າ ຕອນທີ່ມາມີຄົນລາວພາມາ ຊຶ່ງເຮົາຕາມສືບຈັບສອງຄົນນີ້."

ທ່ານກ່າວຕື່ມວ່າ ເມື່ອຍິງລາວຄົນດັ່ງກ່າວ ທົນບໍ່ໄຫວຕໍ່ການທໍຣະມານ ນາງຈຶ່ງຫລົບໜີອອກຈາກເຮືອນ ຕອນທີ່ນາຍຈ້າງບໍ່ຢູ່ ແລະໄດ້ໄປພົບ ກັບຜູ້ຊາຍ ເຖົ້າຄົນນຶ່ງ ທີ່ວ່າຈະພາໄປຢູ່ເຮືອນນຳ, ເມື່ອນາງໄປຢູ່ນຳແລ້ວ ກໍລໍ້ລວງຕ່າງໆນາໆ ຈົນນາງຫລົງເຊື່ອ.

ຈາກນັ້ນກໍຂົ່ມຂືນ ກະທຳຊຳເລົາ ຈົນຊາວບ້ານໃກ້ຄຽງ ເຫັນແລ້ວຈຶ່ງຊ່ອຍເຫລືອ ແລະພານາງໄປພົບຕຳຣວດ ກວດຄົນເຂົ້າເມືອງ ແຂວງ ສະໝຸດປະການ ໃນມື້ວັນທີ 8 ສິງຫາ ດັ່ງທີ່ທ່ານກ່າວວ່າ:

"ທ່ານກ່າວວ່າ ນາງໜີຈາກນາຍຈ້າງຄົນທຳອິດ ມາພົບຄົນທີສອງ ກໍຄືວ່າຈະໃຈດີ ຮັບໄປລ້ຽງດູ ແຕ່ກໍເອົາໄປຂົ່ມຂືນ ກະທຳຊຳເລົາຕໍ່. ນາຍຈ້າງແລະຊາຍເຖົ້າຄົນນັ້ນ ຢູ່ໃນຄຸກ. ແຕ່ຄົນທີ່ທຳຮ້າຍຮ່າງກາຍ ປະຕິເສດ ຂໍ້ກ່າວຫາ. ສ່ວນຜູ້ທີ່ຂົ່ມຂືນ ຮັບສາລະພາບ."

ແມ່ຍິງລາວຄົນດັ່ງກ່າວ ຖືກຄົນລາວດ້ວຍກັນ ລັກພາມາໄທ ທາງດ່ານຊ່ອງເມັກ-ວັງເຕົ່າ ແຂວງອຸບົນ ທີ່ຢູ່ຕິດກັບແຂວງຈຳປາສັກ ຊຶ່ງ ຕຳຣວດຕິດຕາມ ມາດຳເນີນຄະດີ ຍ້ອນເປັນການກະທຳຜິດ ຖານຄ້າມະນຸດ.

ປັດຈຸບັນ ແມ່ຍິງລາວຄົນນີ້ ຢູ່ໃນຄວາມດູແລ ຂອງສະຖານຄຸ້ມຄອງ ແລະ ພັທນາອາຊີບ ບ້ານເກດຕະການ ແຂວງນົນທະບູລີ ຂອງໄທ ເພື່ອບຳບັດປິ່ນປົວ ແລະຟື້ນຟູຈິດໃຈ. ຫລັງຈາກນັ້ນກໍຈະສົ່ງກັບປະເທດລາວ.

ສຳລັບນາຍຈ້າງ ຖືກຕັ້ງຂໍ້ຫາຄ້າມະນຸດ, ທາລຸນ ກະທຳຊຳເລົາ  ກັກຂັງໜ່ວງນ່ຽວ ຄອບຄອງຄົນຕ່າງດ້າວ ທີ່ບໍ່ມີໃບອະນຸຍາດ ເຮັດວຽກ ແລະ ໃຫ້ທີ່ພັກອາສັຍ. ສ່ວນຊາຍເຖົ້າໄທ ຖືກດຳເນີນຄະດີໃນຂໍ້ຫາຫລອກລວງ ກັກຂັງ ໜ່ວງໜ່ຽວ ແລະຂົ່ມຂືນ.