ເດັກນ້ອຍແມ່ຍິງ 4 ຄົນ ຖືກຊ່ອຍເຫຼືອ ຈາກການຄ້າມະນຸດ ຢູ່ແຂວງໄຊຍະບູຣີ

ຜແນກສະກັດກັ້ນ ແລະຕ້ານການຄ້າມະນຸດ ແຂວງໄຊຍະບູຣີ ໄດ້ຊ່ອຍເຫລືອ ເດັກນ້ອຍແມ່ຍິງລາວ ອາຍຸ 17 ປີ ຈໍານວນ 4 ຄົນ ໃນຕົ້ນເດືອນກຸມພາ ທີ່ຜ່ານມາ ຊຶ່ງພວກເຂົາເຈົ້າໄປເຮັດວຽກ ຢູ່ຮ້ານອາຫານຂອງຄົນລາວແຫ່ງນຶ່ງ ທີ່ເມືອງປາກລາຍ ແຂວງໄຊຍະບູຣີ ໂດຍບໍ່ໄດ້ຮັບເງິນຄ່າແຮງງານ ແລະຖືກບັງຄັບໃຫ້ຂາຍບໍຣິການທາງເພດ ແຕ່ເດືອນກໍຣະກະດາ 2023 ຈົນຮອດວັນທີ 5 ກຸມພາ 2024 ນີ້.

ກ່ຽວກັບເຣື່ອງທີ່ວ່ານີ້ ເຈົ້າໜ້າທີ່ ທີ່ກ່ຽວຂ້ອງ ແຂວງໄຊຍະບູຣີ ນາງນຶ່ງ ເວົ້າຕໍ່ວິທຍຸເອເຊັຍເສຣີ ໃນມື້ວັນທີ 1 ມີນານີ້ວ່າ:

“ຄົນບໍ່ແກ້ວກັບຄົນ ຫລວງພະບາງ 17 ປີແບບວ່າ ເຂົາເຈົ້າມາຫລີ້ນມາທ່ຽວ ມາຊອກວຽກເຮັດນີ້ແຫລະ ເຂົາເຈົ້າມາສະໝັກເອງເຂົາເຈົ້າມາເຮັດເອງ. ແລ້ວມັນມາຖືກຮ້ານທີ່ວ່າຂາຍບໍລິການທາງເພດຫັ້ນ ຄືແນວນັ້ນຫັ້ນແຫລະ ຄືເຫັນຂ່າວຫັ້ນແຫລະ. ມີຜູ້ນຶ່ງກໍວ່າລ້າງຖ້ວຍອິຫຍັງນີ້ນ່າ. ເຂົາເຈົ້າກໍບໍ່ໄດ້ເຮັດວຽກ.”

ນາງເວົ້າຕື່ມວ່າ ພາຍຫລັງທີ່ຕໍາຣວດແຂວງໄຊຍະບູຣີ ໄດ້ຊ່ອຍເຫລືອເດັກນ້ອຍ ແມ່ຍິງທັງ 4 ຄົນນັ້ນແລ້ວ ກໍໄດ້ສົ່ງພວກເຂົາເຈົ້າ ໄປຢູ່ໃນການດູແລ ຂອງສະຫະພັນແມ່ຍິງ ແຂວງໄຊຍະບູຣີ ເພື່ອຟື້ນຟູຈິດໃຈ ແລະສຶກສາອົບຮົມ ບໍ່ໃຫ້ພວກເຂົາເຈົ້າຫລົງເຊື່ອ ຄໍາຕົວະຍົວະ ຂອງຂະບວນການຄ້າມະນຸດຕື່ມອີກ ແລະໄດ້ມີການສືບສວນ ສອບສວນ ກໍຣະນີດັ່ງກ່າວ.

ຕໍ່ມາ ຮອດວັນທີ 21 ກຸມພາທີ່ຜ່ານມາ ເຈົ້າໜ້າທີ່ຜແນກສະກັດກັ້ນ ແລະຕ້ານການຄ້າມະນຸດ ແຂວງໄຊຍະບູຣີ ກໍໄດ້ມອບ ເດັກນ້ອຍແມ່ຍິງ 3 ຄົນ ທີ່ໄດ້ຮັບເຄາະຮ້າຍ ຈາກການຄ້າມະນຸດນັ້ນ ໃຫ້ເຈົ້າໜ້າທີ່ຜແນກສະກັດກັ້ນ ແລະຕ້ານການຄ້າມະນຸດ ແຂວງຫລວງພຣະບາງ ແລະໃຫ້ເຈົ້າໜ້າທີ່ຜແນກ ສະກັດກັ້ນ ແລະຕ້ານການຄ້າມະນຸດ ແຂວງບໍ່ແກ້ວ 1 ຄົນ.

ຫລັງຈາກນັ້ນ ເຈົ້າໜ້າທີ່ ກໍໄດ້ມອບພວກນາງ ໃຫ້ທາງຄອບຄົວໄປແລ້ວ ດັ່ງທີ່ເຈົ້າໜ້າທີ່ ທີ່ກ່ຽວຂ້ອງ ແຂວງບໍ່ແກ້ວ ນາງນຶ່ງເວົ້າຕໍ່ວິທຍຸເອເຊັຍເສຣີ ໃນມື້ດຽວກັນນັ້ນວ່າ:

“ອັນອ້າຍນ້ອງເຂົາເຈົ້າ ເຂົ້າຮ່ວມ ເຈົ້າ ບໍ່ໄດ້ເອົາມາເຂົ້າສູນ  ສູນໃຫ້ຄໍາປຶກສາ ແລະປົກປ້ອງແມ່ຍິງ ເດັກນ້ອຍແຂວງ. ມີແຕ່ວ່າເຂົາເຈົ້າປະເມີນຄອບຄົວ ແລ້ວກໍທາງນັ້ນ ເຂົາເຈົ້າກໍມອບໃຫ້ພໍ່ແມ່ເລີຍ.”

ກ່ອນໜ້າ ທີ່ເຈົ້າໜ້າທີ່ຜແນກສະກັດກັ້ນ ແລະຕ້ານການຄ້າມະນຸດ ແຂວງໄຊຍະບູຣີ ຈະຮູ້ເຣື່ອງ ແລະເຂົ້າໄປຊ່ອຍເຫລືອພວກເຂົາເຈົ້າ ທີ່ຖືກເຄາະຮ້າຍຈາກການຄ້າມະນຸດ ແມ່ນພວກເດັກນ້ອຍແມ່ຍິງທັງ 4 ຄົນນັ້ນ ໄດ້ຕິດຕໍ່ໄປຫາພໍ່ແມ່ ໃຫ້ໄປແຈ້ງຄວາມ ຕໍ່ເຈົ້າໜ້າທີ່ຕໍາຣວດ ແລະຂໍຄວາມຊ່ອຍເຫລືອນໍາເພິ່ນ. ເມື່ອຮູ້ເຣື່ອງແລ້ວ ເຈົ້າໜ້າທີ່ກໍໄດ້ໄປກວດຄົ້ນ ຮ້ານອາຫານດັ່ງກ່າວ ແລະພົບວ່າ ມັນມີມູນຄວາມຈິງແທ້ ແລະໄດ້ກັກໂຕ ເຈົ້າຂອງຮ້ານ ທີ່ເປັນຄົນລາວ, ມີການສອບສວນ ເພື່ອດໍາດນີນຄະດີ ຕາມລະບຽບກົດໝາຍ.

ດັ່ງເຈົ້າໜ້າທີ່ ທີ່ກ່ຽວຂ້ອງ ແຂວງໄຊຍະບູຣີ ນາງດຽວກັນນັ້ນ ກ່າວວ່າ:

“ສົ່ງຄືນພໍ່ແມ່ໝົດແລ້ວເດ້ ພໍ່ແມ່ເພິ່ນມາເອົາແລ້ວກໍອັນນ່າ. ອໍານາດການປົກຄອງບ້ານທີ່ເຂົາເຈົ້າຢູ່ມາເອົາ ແລ້ວກໍທາງຈັດຕັ້ງ. ທາງອໍານາດການປົກຄອງ ເຂົາໄດ້ກວດ ໄດ້ກວດແລ້ວກໍແຈ້ງຄວາມຈັບເຈົ້າຂອງຮ້ານ ແລ້ວກໍດໍາເນີນຄະດີ, ແຕ່ວ່າຄະດີຍັງບໍ່ແລ້ວເທື່ອ. ມີແຕ່ຊ່ວຍເຫລືອເດັກໄວ້ແລ້ວ.”

ພາຍຫລັງທີ່ ເຈົ້າໜ້າທີ່ກວດພົບວ່າ ຮ້ານອາຫານຄົນລາວແຫ່ງດັ່ງກ່າວ ມີການບັງຄັບໃຫ້ເດັກນ້ອຍແມ່ຍິງ ບໍຣິການທາງເພດ ທາງການເມືອງປາກລາຍ ກໍໄດ້ມີການແຕ່ງຕັ້ງ ຄະນະກໍາມະການ ເພື່ອສະກັດກັ້ນ ແລະຕ້ານການຄ້າມະນຸດຂຶ້ນ ເພື່ອປົກປ້ອງ ຄຸ້ມຄອງ ຕ້ານປະກົດການອັນບໍ່ດີ ເປັນຕົ້ນການບັງຄັບເດັກ ນ້ອຍແມ່ຍິງ ໃຫ້ບໍຣິການທາງເພດ, ການຄ້າມະນຸດ ຢູ່ຮ້ານອາຫານ ແລະຮ້ານບັນເທີງຕ່າງໆ.

ດັ່ງຄະນະກໍາມະການດັ່ງກ່າວ ທ່ານນຶ່ງເວົ້າວ່າ:

“ຮ້ານບັນເທິງເຮົານີ້ມີເນາະ ເອົາເດັກນ້ອຍທີ່ບໍ່ແມ່ນ ແຕ່ເດັກນ້ອຍດອກ ອາຍຸທີ່ຫລຸດ 18 ປີ ຕາມກົດໝາຍ, ຕາມນິຕິກໍາ. ເມື່ອຕົ້ນເດືອນນີ້ເພິ່ນກໍແຕ່ງຕັ້ງ ໂດຍສະເພາະແມ່ນທ່ານເຈົ້າເມືອງຫັ້ນແຫລະ. ເພິ່ນກໍແຕ່ງຕັ້ງກໍາມະການເນາະ. ຄຸ້ມຄອງເວົ້າເລື່ອງຕ້ານປາກົດການຫຍໍ້ທໍ້. ຮ້ານບັນເທິງໂດຍສະເພາະແມ່ນຄະນະຄຸ້ມຄອງທຸລະກິດ ການທ່ອງທ່ຽວຂອງເມືອງ ແລ້ວກໍຄ້າມະນຸດ ສົ່ງເສີມຄວາມກ້າວໜ້າຂອງແມ່ຍິງ ເຂົາເຈົ້າກໍໄດ້ລົງກວດກາກໍຖືວ່າ ໄດ້ເຮັດເປັນປົກກະຕິ. ຊ່ວງນີ້ ກໍຖືວ່າຜ່ານການເຮັດມາ ກໍຖືວ່າມິດງຽບໄປ.”

ເມື່ອກ່ອນໜ້ານີ້ ໃນມື້ວັນທີ 28 ພຶສຈິກາ 2023 ກອງບັນຊາການຕໍາຣວດ ປ້ອງກັນຄວາມສງົບ ເມືອງປາກຊັນ ແຂວງບໍຣິຄໍາໄຊ ໄດ້ກວດພົບຮ້ານກິນດື່ມ ທີ່ມີການຄ້າປະເວນີແອບແຟງ ຢູ່ເທສບານເມືອງປາກຊັນ ຈໍານວນ 15 ຮ້ານ ທີ່ມີສາວບໍຣິການທາງເພດ ທັງໝົດ 32 ຄົນ. ເຈົ້າໜ້າທີ່ໄດ້ນໍາໂຕຜູ້ເປັນເຈົ້າຂອງຮ້ານ ແລະສາວບໍຣິການ ມາສຶກສາອົບຮົມ ແລະເຮັດບົດບັນທຶກ ບໍ່ໃຫ້ເຈົ້າຂອງຮ້ານເຮັດການຄ້າປະເວນີ ພ້ອມທັງໃຫ້ນໍາສົ່ງ ສາວບໍຣິການທັງໝົດ ຄືນໃຫ້ຄອບຄົວຂອງພວກເຂົາເຈົ້າ.