ລາວ, ໄທ ຮ່ວມມືປາບປາມການຄ້າມະນຸດ, ຊ່ອຍເຫຼືອຜູ້ເຄາະຮ້າຍ

ທ່ານ ໂຊຕິຣິນ ເກີດສົມ, ຮອງປະຫຼັດ ກະຊວງມະຫາດໄທ ຮັກສາການ ໃນຕໍາແໜ່ງ ເຈົ້າແຂວງແຂວງຊຽງຮາຍ ຂອງປະເທດໄທ ແລະ ພັນໂທ ປັນຍາ ແສງວິຈິດ, ຮອງຫົວໜ້າ ປກສ ແຂວງບໍ່ແກ້ວ ຂອງປະເທດລາວ, ຮ່ວມກັນ ເປີດກອງປະຊຸມ ວ່າ​ດ້ວຍ ປະຕິບັດການກົນໄກ ຄວາມຮ່ວມມື ຂ້າມພົມແດນ ໃນການປ້ອງກັນ ແລະ ປາບປາມ ການຄ້າມະນຸດ ແລະ ການຊ່ອຍເຫຼືອ ສົ່ງກັບຜູ້ເສຍຫາຍ ລະຫວ່າງແຂວງຊຽງຮາຍ ແລະ ແຂວງບໍ່ແກ້ວ ຢູ່ຫ້ອງປະຊຸມ ໂຮງແຮມເດອະຣິ ເວີຣີ ບາຍ ກະຕະຖານີຄອນເລັກຊັນ ເມືອງຊຽງຮາຍ.

ກ່ຽວກັບ ເລື່ອງນີ້ ເຈົ້າໜ້າທີ່ໄທ ທ່ານນຶ່ງກ່າວວ່າ ກອງປະຊຸມເທື່ອນີ້ ເນັ້ນໄປທີ່ ໜ່ວຍງານຊາຍແດນ ສາມາດ ປະສານງານ ແລະ ສົ່ງຕໍ່ຊ່ອຍເຫຼືອ ຜູ້ເສຍຫາຍ ໄດ້ທັນທີ ເພື່ອໃຫ້ຜູ້ເສຍຫາຍ ໄດ້ຮັບການຄຸ້ມຄອງ ແລະ ສົ່ງກັບສູ່ຄອບຄົວ ຢ່າງປອດໄພ ເຊິ່ງເປັນກອງປະຊຸມສໍາຄັນ ຍ້ອນມີຜູ້ແທນ ລະດັບແຂວງຂອງໄທ ແລະ ລາວ ເຂົ້າຮ່ວມ ກອງປະຊຸມ, ດັ່ງທ່ານກ່າວຕໍ່ ວິທຍຸ ເອເຊັຽ ເສຣີ ໃນວັນທີ່ 1 ພຶດສະຈິການີ້ວ່າ:

“ເຄີຍມີກໍລະນີ ຂອງຄົນລາວ ຖືກຫຼອກ ໄປເຮັດວຽກ ເປັນສະແກັມເມີ ຢູ່ພະມ້າ ແລ້ວຂໍຄວາມຊ່ອຍເຫລືອຈາກທາງການໄທ ບາດນີ້ໄທ ຈະມີຂັ້ນຕອນ ການຊ່ອຍເຫລືອແນວໃດ ລະຫວ່າງທາງ ທີ່ສົ່ງຄົນລາວກັບ ຈະສົ່ງກັບແນວໃດ ພໍຮອດລາວແລ້ວ ຜູ້ເສຍຫາຍ ໄດ້ຮັບການຊ່ອຍເຫລືອແນວໃດ ນີ້ແມ່ນຂອບການເຮັດວຽກເບື້ອງຕົ້ນ ສຸດທ້າຍແລ້ວ ການຖືກຕົວະ ໄປເຮັດວຽກ ເປັນສະແກັມເມີ ຈະຕ້ອງເບິ່ງຄືນວ່າ ເຂົ້າຄ່າຍການຄ້າມະນຸດ ຫລືບໍ່.”

ມາເບິ່ງພູມີສາດ ຂອງແຂວງຊຽງຮາຍ ແລະ ແຂວງບໍ່ແກ້ວແລ້ວນັ້ນ ພົບວ່າ ທັງ 2 ແຂວງເປັນແຂວງ ທີ່ມີຊາຍແດນ ຕິດຈອດ ກັບປະເທດພະມ້າ ຂະນະທີ່ ຜູ້ປົກຄອງ ຂອງຜູ້ຖືກເຄາະຮ້າຍ ຢູ່ແຂວງຫຼວງນໍ້າທາ ເຄີຍໃຫ້ ສໍາພາດຕໍ່ ວິທຍຸ ເອເຊັຽ ເສຣີ ເຖິງການຊ່ອຍເຫຼືອ ຂອງເຈົ້າໜ້າທີ່ລາວ ແລະ ໄທ ຫຼັງຈາກລູກຂອງຕົນເອງ ຖືກນາຍ ບໍລິສັດສະແກມເມີຈີນ ປ່ອຍໂຕອອກມາ ຈາກຄາສິໂນໂກຊາຍ ຢູ່ປະເທດພະມ້າວ່າ:

“ຂະເຈົ້າອອກມາ ຢູ່ອັນນ່າ ຂ້າມມາຂ້າມມາ ຈາກແມ່ນໍ້າເມີຍ ເຂົ້າໄປຫາແຂວງຕາກ ເມືອງແມ່ສອດ (ປະເທດໄທ) ນີ້ ໄດ້ຈ້າງຄົນເຂົາ ນີ້ແຫຼະ ມາສົ່ງ (ຈ້າງຄົນມຽນມາ) ຂ້າມເຮືອຫັ້ນລະ ແມ່ນ 2,000 ບາດ ລະມາເສຍ ໃຫ້ທາງເຈົ້າໜ້າທີ່ ຫັ້ນເນາະ (ເຈົ້າໜ້າທີ່ໄທ) 5,000 ບາດ ບວກລວມແລ້ວ ເປັນ 7,000 ບາດ.”

ສ່ວນຜູ້ປົກຄອງ ຂອງຜູ້ຖືກເຄາະຮ້າຍ ຢູ່ແຂວງຫຼວງນໍ້າທາ ອີກທ່ານນຶ່ງ ກ່າວວ່າ ເຈົ້າໜ້າທີ່ ແຂວງຕາກ ປະເທດໄທ ເຄີຍສົ່ງລູກຕົນເອງ ກັບປະເທດລາວ ຫຼັງຈາກ ຕົກເປັນເຫຍື່ອ ຢູ່ພະມ້າແລ້ວ ແລະເຊື່ອວ່າ ເຈົ້າໜ້າທີ່ໄທ ຈະຊ່ອຍເຫຼືອ ເຫຍື່ອຄ້າມະນຸດ ທີ່ຍັງບໍ່ໄດ້ຮັບ ການຊ່ອຍເຫຼືອ ຢູ່ປະເທດພະມ້າ ດັ່ງທ່ານກ່າວວ່າ:

“ເຈົ້າໜ້າທີ່ໄທຊ່ອຍເຫຼືອ ໂອ້ ຊ່ວຍເຫຼືອ ຄົນລາວນ່າ ເຈົ້າໜ້າທີ່ໄທ ຈະບໍ່ມີແຕ່ ຮຽກຮ້ອງເອົາເງິນ ຄ່າຫຍັງທັງໝົດ ມາຮອດລາວຫັ້ນ ມາເອີ້ນ ຮຽກຮ້ອງເອົາ ຜູ້ນຶ່ງ 2 ລ້ານ (ກີບ) ພຸ້ນນ່າ ເຈົ້າໜ້າທີ່ ເພິ່ນຊ່ວຍໄດ້ ເພີ່ນກໍຊ່ວຍຢູ່ ໄທນ່າ.”

ປັດຈຸບັນ ຍັງມີຄົນລາວອີກ 19 ຄົນ ທີ່ຖືກຕົວະ ໄປເຮັດວຽກເປັນສະແກມເມີ ຢູ່ເມືອງມີເມຍວະດີ ປະເທດພະມ້າ ແລ້ວຖືກ ຜູ້ຄຸມຈີນ ທໍາຮ້າຍຮ່າງກາຍ ເປັນຕົ້ນ ທຸບຕີດ້ວຍໄມ້, ຊອ໊ດດ້ວຍໄຟຟ້າ, ຂັງໃນຄຸກມືດ ແລະ ເອົາເຊືອກມັດແຂນ ຍັງລໍຖ້າ ການຊ່ອຍເຫຼືອຢູ່, ອີງຕາມລາຍງານ ຂອງເຄືອຂ່າຍພາກປະຊາສັງຄົມ ເພື່ອຊ່ວຍເຫຼືອ ເຫຍື່ອຄ້າມະນຸດ.