ຄົນລາວ 19 ຄົນ ເຫຍື່ອການຄ້າມະນຸດ ຢູ່ປະເທດມຽນມາ ຂໍໃຫ້ທາງການໄທຊ່ອຍເຫຼືອ

ຄົນລາວ ຍັງອີກ 19 ຄົນ ທີ່ຖືກຕົວະຍົວະ ໄປເຮັດວຽກເປັນສະແກມເມີ້ ຖືກທຸບຕີ ຖືກທໍລະມານ ຢູ່ເມືອງມີເມຍວະດີ ປະເທດມຽນມາ ຕ້ອງການການຊ່ອຍເຫຼືອ ອີງຕາມການລາຍງານ ຂອງເຄືອຂ່າຍພາກປະຊາສັງຄົມ ເພື່ອຊ່ອຍເຫຼືອເຫຍື່ອຄ້າມະນຸ ດ ຫຼື Civil Society Network for Victim Assistance in Human Trafficking.

ກ່ຽວກັບເລື່ອງນີ້ ເຈົ້າໜ້າທີ່ຄະນະກໍາມະການ ສິດທິມະນຸດສະຍະຊົນ ແຫ່ງຊາດໄທ ກ່າວວ່າ ໄດ້ຮັບເລື່ອງຮ້ອງຮຽນ ຈາກພາກສ່ວນດັ່ງກ່າວແລ້ວ ແລະນໍາເຂົ້າສູ່ຂັ້ນຕອນການຫາລື ໂດຍຄາດວ່າ ບໍ່ກາຍ 2-3 ອາທິດ ກໍ່ຈະນໍາສູ່ທີ່ປະຊຸມ ເພື່ອປະສານງານນໍາໜ່ວຍງານຕ່າງໆຂອງໄທ ໃຫ້ການຊ່ອຍເຫຼືອຕໍ່ໄປ, ຕາມຄວາມເວົ້າ ຂອງເຈົ້າໜ້າທີ່ຄະນະກໍາມະການ ສິດທິມະນຸດສະຍະຊົນ ແຫ່ງຊາດໄທ ນາງໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 31 ຕຸລາ ນີ້ວ່າ:

“ບໍ່ໜ້າຈະເກີນພາຍໃນ 2-3 ອາທິດນີ້ ທີ່ເລື້ອງນີ້ ຈະຖືກສົ່ງເຂົ້າກອງປະຊຸມ ເພື່ອກັ່ນກອງ ຮັບເລື່ອງຮ້ອງຮຽນ ຫຼັງຈາກນັ້ນ ກໍ່ຈະມີມະຕິໃນກອງປະຊຸມ ວ່າ ໃຫ້ປະສານງານ ຫຼື ຊ່ອຍເຫຼືອຜູ້ຖືກເຄາະຮ້າຍຢ່າງໃດ ຫາກເປັນເລື່ອງດ່ວນ ເລື່ອງສໍາຄັນ ກ່ຽວກັບຊີວິດ ອັນຕະລາຍຕໍ່ຮ່າງກາຍ ກໍ່ຈະມີການດໍາເນີນທີ່ໄວ ເລື່ອງນີ້ ເບິ່ງຈາກຊື່ເລື່ອງ ແມ່ນໄວ.”

ເຊິ່ງເມື່ອປະມານວັນທີ 28 ຕຸລາ 2024 ທີ່ຜ່ານມາ ເຄືອຂ່າຍພາກປະຊາສັງຄົມ ເພື່ອຊ່ອຍເຫຼືອເຫຍື່ອຄ້າມະນຸດດັ່ງກ່າວ ໄດ້ສົ່ງຈົດໝາຍ ເຖິງນາຍົກລັດຖະມົນຕີໄທ ລວມທັງ ສົ່ງເຖິງ ກະຊວງກະລາໂຫມ ຂອງໄທ, ກະຊວງການຕ່າງປະເທດ ຂອງໄທ ແລະຄະນະກໍາມະການ ສິດທິມະນຸດສະຍະຊົນ ແຫ່ງຊາດໄທ ເພື່ອຮຽກຮ້ອງໃຫ້ຊ່ອຍເຫຼືອເຫຍື່ອຄ້າມະນຸດ ດັ່ງກ່າວ ໂດຍເຫຍື່ອທັງໝົດ ຍັງຄົງຖືກຜູ້ຄຸມຄົນຈີນ ທໍາຮ້າຍຮ່າງກາຍ ເປັນຕົ້ນ ທຸບຕີດ້ວຍໄມ້, ຊ໊ອດດ້ວຍໄຟຟ້າ, ຂັງໃນຄຸກມືດ ແລະເອົາເຊືອກມັດແຂນ ຄັນວ່າເຫຍື່ອທັງໝົດ ເຮັດວຽກບໍ່ໄດ້ຕາມເປົ້າໝາຍ ຫຼືຈັບໄດ້ວ່າ ເຫຍື່ອມີແຜນຈະຫຼົບໜີ.

ວິທຍຸເອເຊັຽເສຣີ ໄດ້ສອບຖາມໄປຍັງ ກະຊວງປ້ອງກັນຄວາມສະຫງົບ ຂອງລາວ ເພື່ອສອບຖາມກ່ຽວກັບເລື່ອງນີ້ ເຈົ້າໜ້າທີ່ທີ່ກ່ຽວຂ້ອງ ນາງໜຶ່ງກ່າວວ່າ ຍັງບໍ່ທັນຮັບຮູ້ ເລື່ອງທີ່ພົນລະເມືອງລາວ 19 ຄົນ ຂໍຄວາມຊ່ອຍເຫຼືອຈາກທາງການໄທເທື່ອ, ດັ່ງນາງ ຕອບຜ່ານຂໍ້ຄວາມວ່າ:

“ຊິໄດ້ກວດເບິ່ງ ກັບໂຕເລກ ທີ່ປະສານໄປກ່ອນຫນ້ານີ້, ແຕ່ວ່າ ຍັງບໍ່ເຫັນທາງການໄທ ແຈ້ງມານະເຈົ້າ.”

ທາງດ້ານຜູ້ປົກຄອງໃນລາວ ທີ່ເຄີຍມີລູກຕົກເປັນເຫຍື່ອຄ້າມະນຸດ ຢູ່ປະເທດມຽນມາ ກ່າວວ່າ ທີ່ຜ່ານມາ ໂຕເອງກໍ່ເຄີຍແລ່ນເອກະສານ ໄປຍັງເຈົ້າໜ້າທີ່ໄທ ແຕ່ເລື່ອງກໍ່ບໍ່ຄືບໜ້າ ແຕ່ໂຕເອງຄິດວ່າ ການສົ່ງຈົດໝາຍ ຂໍຄວາມຊ່ອຍເຫຼືອເທື່ອນີ້ ຈະຊ່ອຍເຫຍື່ອຄ້າມະນຸດ 19 ຄົນນີ້ໄດ້ ຄັນເຈົ້າໜ້າທີ່ໄທ ເຂົ້າເຖິງບໍລິສັດຈີນ ແລະທະຫານກະຫຼ່ຽງ ໃນມຽນມາ, ດັ່ງນາງກ່າວວ່າ:

“ແມ່ກະໃຫ້ກໍາລັງໃຈ ແນວໃດກໍ່ໃຫ້ອົດທົນ ສູ້ຊົນ ຫັກຊິໄດ້ກັບມາແຫຼະ ລູກເຮົານ່າ ກໍ່ ແມ່ກໍ່ບໍ່ຮູ້ນ່າ ເພິ່ນຊິຊ່ອຍໄດ້ ຫຼືວ່າຊ່ວຍບໍ່ໄດ້ ຄັນເພິ່ນເຂົ້າເຖິງ ກໍ່ອາດຈະຊ່ອຍໄດ້ ຄັນເພິ່ນເຂົ້າບໍ່ເຖິງ ແລ້ວຜ່ານມານີ້ ພວກແມ່ແລ່ນ ເພິ່ນມັກຕອບເຮົາເວົ້າວ່າ ອັນນີ້ ບໍ່ແມ່ນໜ້າທີ່ ຂອງເຈົ້າໜ້າທີ່ໄທເດີ້ ອັນນີ້ເປັນເຈົ້າໜ້າທີ່ ຂອງລາວ.”

ຕັ້ງແຕ່ເດືອນສິງຫາ ປີ 2022 ມີເຫຍື່ອຄ້າມະນຸດ ຊາວລາວ ອາຍຸລະຫວ່າງ 14-30 ປີ ທັງໝົດ 45 ຄົນ ເຊິ່ງສ່ວນໃຫຍ່ ເປັນຜູ້ຊາຍຈາກແຂວງຫຼວງນໍ້າທາ ຖືກຕົວະໄປເຮັດວຽກຕອບແຊັດ ຫຼື ຄໍເຊັນເຕີ້ ຢູ່ກາສິໂນໂກຊາຍ ເມືອງເມຍວະດີ ປະເທດມຽນມາ ແລ້ວມາຮອດວັນທີ 15 ເດືອນພຶດສະພາ ປີ 2024 ມີ 14 ຄົນ ທີ່ຖືກປ່ອຍໂຕກັບມາລາວ ສ່ວນທີ່ເຫຼືອ ແມ່່ນຖືກຮຽກຄ່າໄຖ່ ແລະປ່ອຍໂຕກັບປະເທດລາວ ເມື່ອທາງຄອບຄົວ ໄດ້ຈ່າຍຄ່າໄຖ່ໃຫ້ສໍາເລັດແລ້ວ.