ພໍ່ແມ່ຂອງເດັກນ້ອຍ ທີ່ຖືກຄ້າມະນຸສ ໄປກາສິໂນຈີນ ໃນພະມ້າ

ມາຮອດປັດຈຸບັນ ບັນດາພໍ່ແມ່ຜູ້ປົກຄອງ ຂອງເດັກນ້ອຍ ແຂວງຫຼວງນໍ້າທາ ຈໍານວນ 28 ຄົນ ທີ່ລູກເຕົ້າ ຍັງຕິດຄ້າງ ຢູ່ໂຮງກາສິໂນ ຂອງຈີນ ຢູ່ເມືອງເມັຍວະດີ ປະເທດພະມ້າ ຍັງສືບຕໍ່ ຮ້ອງຮຽນຂໍການຊ່ອຍເຫຼືອ ຈາກທາງການລາວ ແລະ ພາກສ່ວນທີ່ກ່ຽວຂ້ອງນັ້ນຢູ່ ເນື່ອງຈາກໄດ້ຮູ້ຂ່າວຈາກພວກລູກ ທີ່ຢູ່ປະເທດພະມ້າ ບອກໃຫ້ຮູ້ວ່າ ມີແຕ່ທາງການເທົ່ານັ້ນ ທີ່ຈະຊ່ອຍໃຫ້ພວກເດັກນ້ອຍເຫຼົ່ານັ້ນ ສາມາດອອກມາຈາກສະຖານທີ່ດັ່ງກ່າວ ນັ້ນໄດ້.

ດັ່ງຜູ້ເປັນແມ່ ຜູ້ທີ່ 1 ທີ່ມີລູກຊາຍຖືກເຄາະຮ້າຍ ໄດ້ກ່າວຕໍ່ວິທຍຸ ເອເຊັຽ ເສຣີ ໃນວັນທີ 27 ມິຖຸນາ 2023 ນີ້ວ່າ:

“ໂທຫາລູກແຕ່ລະຄົນ ພັດເວົ້າວ່າ ຄັນຣັຖບານເພິ່ນບໍ່ຊ່ວຍອອກມາ ຄືຊິບໍ່ໄດ້ອອກມາແຫຼະແມ່ເອີ່ຍເນາະ ແລ້ວດຽວນີ້ໃຫ້ເລັ່ງລັດ ນໍາຣັຖບານເພິ່ນເບິ່ງ ທັງຕໍາຣວດເພິ່ນ ທັງສະຖານທູດເພິ່ນ ມີການຊ່ວຍເຫຼືອບໍ່ ຫຼືວ່າບໍ່ມີບໍ ເຮົາກະຢາກໃຫ້ຄໍາຕອບນ່າ ເປັນແນວນີ້ຫັ້ນນ່າ ເຮົາກະຊິເຮັດຈັ່ງໃດ ກໍເຮົາສຸດຄວາມທີ່ພຍາຍາມແລ້ວ  ຄືວ່າແຫຼະ ໂທຫາເຂົາກະບໍ່ຮັບໂທຣະສັບ ບາດນີ້ຮັບໂທຣະສັບເນີ ກະຍັງເວົ້າວ່າ ເອີ່ ເປັນແນວໃດ ກະຫາກຊິເລັ່ງຊິແລ່ນຫັ້ນແຫຼະ ເຮົາກະໄປຕາມຂັ້ນຕອນ ວ່າໄປແບບນີ້ຫັ້ນ ແມ່ກໍເຫຼືອໃຈ.”

ນາງກ່າວອີກວ່າ ເຈົ້າໜ້າທີ່ທີ່ກ່ຽວຂ້ອງ ຍັງຕ້ອງການຂໍ້ມູນຂອງພວກເດັກນ້ອຍ ບໍ່ວ່າຈະເປັນ ຮູບຖ່າຍ ແລະ ຣາຍຊື່ ເຊິ່ງພວກພໍ່ແມ່ຜູ້ປົກຄອງກໍວ່າ ໄດ້ສົ່ງໄປໃຫ້ທາງການຫຼາຍຄັ້ງແລ້ວ.

“ກະຄືວ່າຫັ້ນແຫຼະ ຜ່ານມາກໍແລ່ນໆຢູ່ ລະມາໂຈະຊ້ວງນຶ່ງຫັ້ນ ບາດນີ້ເຮັດໄປເຮັດມາ ສົ່ງຮູບສົ່ງຣາຍຊື່ ນີິ່ບໍ່ຈັກກີ່ເທື່ອເລີຍ ແມ່ນຍາມໃດກໍຕ້ອງການຣາຍຊື່ ລະກະຕ້ອງການຮູບ ກໍສົ່ງໃຫ້ ສົ່ງແລ້ວສົ່ງອີກ ອັນໂທຣະສັບແມ່ນີ້ ຈົນຄວາມຈໍານິ່ເຕັມແຕ່ຮູບ ກັບອັນຣາຍຊື່ເດັກນ້ອຍນິ່ ແມ່ນ ຢາກໄດ້ທີ່ຢູ່ກໍສົ່ງໃຫ້ເໝິດແລ້ວ ລະຈັກຊິເຮັດຈັ່ງໃດ ມີແຕ່ວ່າ ລໍຖ້າລໍຖ້າໆ ຕາມຂັ້ນຕອນ 3 ເດືອນຫາ 6 ເດືອນ, 6 ເດືອນຫາ 9 ເດືອນ, 9 ເດືອນ ຫາ ປີນຶ່ງ ດຽວນີ້ ເຮັດໄປເຮັດມາກະຍັງແຕ່ 2-3 ເດືອນນຶ່ງ ຊິຮອດປີແລ້ວ ເຮັດໄປເຮັດມາ ຄືວ່າບໍ່ມີຫຍັງຄືບໜ້າ.”

ໃນຂະນະດຽວກັນ ແມ່ຂອງເດັກນ້ອຍຊາຍ ຄົນທີ 2 ກໍກ່າວ ກ່ຽວກັບເຣື່ອງ ການສົ່ງຂໍ້ມູນຕ່າງໆອີກ ຕາມທີ່ເຈົ້າໜ້າທີ່ຕ້ອງການ ນີ້ວ່າ:

“ຄັນວ່າ ແລ່ນໃຫ້ພວກພໍພວກແມ່ ມັນກະອາຈມີຢູ່ໃນຄອມຫັ້ນ ມັນກໍອາຈມີຢູ່ໃນ ກົ້ງໂຕ່ນໃຫຍ່ຫັ້ນ ມັນກໍອາຈມີຢູ່ໃນຕູ້ຫັ້ນ ດຽວນີ້ຫັ້ນ ຊິເຣີ່ມ 1 ໄປຮອດ 10 ອີກ ບອກວ່າ ໃຫ້ເກັບຮູບເດັກນ້ອຍຫັ້ນ ກະໄດ້ເກັບໄປໃຫ້ແລ້ວ ບໍ່ຂັດບໍ່ຂ້ອງ ເກັບໄປເທື່ອໃດ ກະບໍ່ຂັດບໍ່ຂ້ອງ ກໍເກັບໄປໃຫ້ແລ້ວ ເກັບຜ່ານມາລະເອົາໄປຖິ້ມຢູ່ໃສ ຄັນວ່າແລ່ນໃຫ້ ມັນກະຊິມີຢູ່ໃນຫັ້ນ ຫຼືວ່າຜ່ານມາ ບໍ່ແລ່ນນ່າ ຫຼືວ່າ ເກັບເອົາໄປຖິ້ມແທ້ຫວາ ພວກພໍ່ພວກແມ່ກໍຢາກຮູ້ອັນນີ້ນ່າ ດຽວນີ້ ກໍເຣີ່ມ ນັບ 1 ໄປຮອດ 10 ອີກ ເຣີ່ມບອກໃຫ້ເກັບອີກ ກ໋ອບອິຫຍັງໄປ ບໍ່ຂັດບໍ່ຂ້ອງ ກະກ໋ອບໄປຕື່ມດຽວນີ້ຫັ້ນນ່າ ຫຼືວ່າພວກພໍ່ພວກແມ່ ແລ່ນບໍ່ຖືກກັນຫວາ ມັນມີຫຼາຍບ່ອນຫວາ ອັນທີ່ວ່າລູກໄດ້ຖືກ (ເຄາະຮ້າຍ)ຫັ້ນນ່າ.”

ຂະນະທີ່ ແມ່ຂອງເດັກນ້ອຍຊາຍ ຄົນທີ 3 ກໍກ່າວວ່າ:

“ຫຼືວ່າ ເພິ່ນບໍ່ທໍາງານ ບໍ່ເຮັດວຽກ ບໍ່ເດີນໃຫ້ເຮົາຫວາ ອັນເຣື່ອງບັນຈັ່ງຢູ່ຄືເກົ່າ ມັນຄືວ່າບໍ່ກ້າວໜ້າ ຄືວ່າ ບໍ່ເດີນຫັັ້ນນ່າ ເຂົາເຮັດແນວໃດ ເຂົາບໍ່ເດີນໃຫ້ເຮົາຕິ ມັນຈັ່ງຢູ່ບ່ອນເກົ່າ ມັນຫາກະຮອດມື້ວານນີ້ ອັນໃບ ວ່າຈໍ້າກາ ຮອດສະຖານທູດພະມ້າຫັ້ນນ່າ ຄວາມຈິງແລ້ວ ມັນຮອດແຕ່ປີແລ້ວພຸ້ນແລ້ວ ໃບໂຕນັ້ນຫັ້ນນ່າ ມັນຫຍັງຈັ່ງວ່າ ມານັບ 1 ອີກ ທັ້ງໆທີ່ມັນຮອດແຕ່ປີແລ້ວພຸ້ນແລ້ວ ອັນໃບໂຕນັ້ນນ່າ ລະເປັນຫຍັງຈຶ່ງວ່າ ຫາກະຮອດມື້ວານຕອນແລງ ເຂົາບໍ່ເຮັດວຽກຫວາ ເຂົາຫາກະເຮັດນີ້ຕິ ຈັ່ງວ່າຮອດຫັ້ນນ່າ ເຂົາກະເລັ່ງໃຫ້ເຮົາແດ່ເນາະ ເດັກນ້ອຍຢູ່ໃນຫັ້ນ ກະຈັກຊິເປັນແນວໃດ ຈັກຜູ້ຕາຍຢູ່ຍັງ ຄັນເປັນຕາຍ ມັນກະຊິຕາຍໄປແລ້ວເນາະ ບໍ່ຕາຍກະທໍລະມານ ຄືວ່າຫັ້ນແຫຼະ ເຮັດວຽກບໍ່ໄດ້ເນີ ກໍເຂົາຕີ ເຮັດວຽກໄດ້ເນີ້ ກໍພົ້ນໄປ ຄືແມ່ວ່າ ກັບລູກວ່າກັບລູກນີ້ແຫຼະ ວ່າ ອັນອີ່ແມ່ບອກວ່າ ຊັ້ນລູກກະເຮັດໃຫ້ເຂົາ ບໍ່ຕ້ອງເຮັດໄດ້ເດ້ ຮອດ 3 ເດືອນ ລະໃຫ້ເຂົາປ່ອຍລູກອອກມາ ໂອ້ຍແມ່ເອີ້ຍ ເຮັດບໍ່ໄດ້ ລູກທົນເຈັບທົນປວດບໍ່ໄດ້ ພວກທີ່ເຂົາເຮັດບໍ່ໄດ້ນິ່ ເຂົາເອົາໄປຂັງໄວ້ ຂັງໄວ້ລະກໍ ເຂົ້ານໍ້າກະບໍ່ໃຫ້ກິນອິ່ນ ກິນເຕັມເນາະ ລະກະຮອດໂມງເຂົາຕີ ລະເຂົາເອົາອອກມາຕີຫັ້ນ ພວກຢູ່ໃນຫັ້ນນ່າ ພວກທີ່ເຮັດບໍ່ໄດ້ຫັ້ນນ່າລູກ ແມ່ກະສົງສານເຂົາເນາະ.”

ແມ່ຂອງເດັກນ້ອຍຊາຍ ຄົນນີ້ຍັງເລົ່າແບບເສົ້າໆ ໃຫ້ວິທຍຸ ເອເຊັຽ ເສຣີ ຟັງ ຕອນທີ່ໄດ້ລົມກັບລູກຊາຍ ນັ້ນວ່າ:

“ລູກຊາຍຫັ້ນນ່າ ໄດ້ໂທມາຫາແມ່ ກໍຖາມແມ່ຄືເກົ່າຫັ້ນແຫຼະ ວ່າ ແມ່ເອີ້ຍເປັນແນວໃດເດ້ ລົມແມ່ແດ່ ກະໄຫ້ແດ່ ວ່າມື້ໃດ ເຈົ້າໜ້າທີ່ ຈັ່ງຊິມາຊ່ວຍລູກ ອັນລູກກະຈິເຮັດບໍ່ໄດ້ແລ້ວ ເຮັດວຽກຫັັ້ນນ່າ ຫາລູກຄ້າກະຍາກ ລະແມ່ກະວ່າ ບໍ່ຮູ້ລູກເອີ່ຍ ຈັກມື້ໃດ ຈັ່ງຈິມີຄໍາຕອບໃຫ້ລູກ ກໍມີແຕ່ລໍຖ້າ ທາງສະຖານທູດ ເພິ່ນກະວ່າ ລໍຖ້າເດີ້ ອີ່ແມ່ກະໄດ້ເວົ້າ ໄດ້ລົມກັບລູກແບບນີ້ ລະຊິໃຫ້ແມ່ຕອບລູກແນວໃດ ແລ້ວອັນລູກຫັ້ນລະເວົ້າວ່າ ມີຊື່ (ຜູ້ນຶ່ງ) ທີ່ວ່າຢູ່ນໍ້າແງ້ນຫັ້ນ ເຮັດວຽກບໍ່ໄດ້ 3 ເດືອນແລ້ວ ເຂົາຈິປ່ອຍອອກ ທ້າຍເດືອນນີ້ ເຂົາຈິປ່ອຍອອກວ່າຊັ້ນ ອ້າວຊັ້ນລູກເດ້ຊັ້ນ ເຂົາຄືບໍ່ປ່ອຍລູກ ລູກວ່າ ບໍ່ຮູ້ ເປັນຫຍັງເຂົາຈັ່ງບໍ່ປ່ອຍເນາະ ເຂົາຢາກເອົາໄວ້ ໃຊ້ແຮງງານຫັ້ນນ່າ ລະຖ້າວ່າ ຄັນເຂົາຊິປ່ອຍລູກ ຄັນເຂົາໃຫ້ໄຖ່ ແມ່ກໍຊິຊອກໄຖ່ເອົາລູກ ເຮັດແນວໃດ ແມ່ກະບອກວ່າ ຖ້າແຕ່ທາງສະຖານທູດຢ່າງດຽວ ທີ່ວ່າຈະຊ່ວຍລູກໄດ້ຫັ້ນນ່າ.”

ຜູ້ເປັນພໍ່ອີກຄົນນຶ່ງ ທີີ່ມີລູກຊາຍຖືກເຄາະຮ້າຍ ກາຍເປັນທາດ ຢູ່ປະເທດພະມ້າ ກໍຢາກຝາກຄໍາຮ້ອງຮຽນນີ້ ເຖິງທາງການລາວ ແລະພາກສ່ວນທີ່ກ່ຽວຂ້ອງ ວ່າ:

“ຜູ້ປົກຄອງແຕ່ລະຄົນ ແຕ່ລະຄົນນີ້ນ່າເນາະ ກໍຂໍກັບຣັຖບານ ຮ້ອງຂໍຄວາມຊ່ວຍເຫຼືອ ຈາກທາງການລາວນີ້ນ່າ ແນວໃດກະຂໍໃຫ້ຂະເຈົ້ານີ້ ເອົາໃຈໃສ່ຮີບຮ້ອນໜ້ອຍນຶ່ງ ເພາະວ່າຈັກໜ້ອຍນີ້ ເຂົາເອົາອອກມານີ້ ເດືອນ 10 ເດືອນ 11 ນີ້ ຕາມລູກຊາຍໂທມາ ຊິໄດ້ອອກຈໍານວນນຶ່ງ ໂດຍການໄຖ່ໂຕ ແຕ່ລາຄາທໍ່ໃດນີ້ ບໍ່ຮູ້ ແຕ່ຈັກໜ່ອຍ ເຂົາເອົາອອກມານີ້ ເຮົາບໍ່ມີເງິນນີ້ ເຂົາເຮັດທຸບຕີທໍຣະມານຫຍຸ້ງໃດ໋ ລະດຽວນີ້ ຈິດໃຈກໍຢາກໃຫ້ຂະເຈົ້າເລັ່ງລັດໜ້ອຍນຶ່ງ ຂໍຄວາມພຍາຍາມເພີ່ມຕື່ມອີກ ຂໍແທ້ໆ ໃຫ້ເຂົາ ລະແມ່ນຊ່ວຍເຫຼືອໄວໆ ຊ່ວງໄລຍະທີ່ວ່າ ທາງບໍຣິສັດ ຍັງບໍ່ໄດ້ເອົາເຂົາອອກມາ ດ້ວຍການເສັຍຄ່າໄຖ່ໂຕ.”

ສໍາລັບແມ່ ຂອງເດັກນ້ອຍຊາຍຄົນທີ 5 ທີ່ຂາດການຕິດຕໍ່ກັບລູກ ມາຕັ້ງແຕ່ຊ່ວງກຸດຈີນ ກໍໄດ້ເວົ້າເຖິງການລໍຖ້າຟັງຂ່າວຄືບໜ້າ ເຣື່ອງການຊ່ອຍເຫຼືອຂອງພວກລູກ ຈາກທາງການລາວ ແລະ ພາກສ່ວນທີ່ກ່ຽວຂ້ອງ ນັ້ນວ່າ:

“ເບິ່ງຕ່າງປະເທດເພິ່ນຊ່ອຍ ມີແຕ່ຄົນ 2 ຄົນ ເພິ່ນກະຊ່ອຍໄດ້ໄວ ອັນນີ້ ເປັນ 20-30 ຄົນ ຄືວ່າ ຍາມໃດກະຕາມຂັ້ນຕອນ ຕາມຂັ້ນຕອນຢູ່ ພໍ່ແມ່ກະຮ້ອນໃຈເນາະ ລູກຕິດຢູ່ໃນຫັ້ນກໍຫຼາຍເດືອນ ຫຼາຍມື້ຫຼາຍເວັນໄປກໍ ພໍ່ແມ່ກໍເປັນຫ່ວງ ເຈົ້າໜ້າທີ່ເພິ່ນແລ່ນຮອດໃສແລ້ວ ແລ້ວພໍ່ແມ່ເພິ່ນຢາກຮູ້ຂ່າວຮູ້ຄາວ.”

ນາງກ່າວອີກວ່າ ໃນອີກບໍ່ດົນນີ້ ບັນດາພວກພໍ່ແມ່ຜູ້ປົກຄອງ ຢູ່ແຂວງຫຼວງນໍ້າທາ ຈະເດີນທາງໄປວຽງຈັນ ເພື່ອໄປທວງຖາມເຣື່ອງການຊ່ອຍເຫຼືອ ຂອງພວກລູກເຕົ້າ ທີ່ຍັງຕິດຄ້າງ ຢູ່ພະມ້າ.

“ແມ່ນແລ້ວໆ ຄັນຫາເງິນໄດ້ ກໍຊິລວມໂຕກັນ ໄດ້ລົງໄປເບິ່ງ (ໄປນະຄອນຫຼວງວຽງຈັນ) ໄປຫາເຈົ້າໜ້າທີ່ເພິ່ນ ທາງການເພິ່ນຊິຊ່ອຍເຫຼືອແບບໃດເນາະ ພໍ່ແມ່ກະແລ່ນໄປດົນຫຼາຍເດືອນແລ້ວ ຄືວ່າ ຍາມໃດກໍໂທຖາມ ກະຄືວ່າ ຍາມໃດກະຕາມຂັ້ນຕອນ ຕາມຂັ້ນຕອນຢູ່ ບາດເດັກນ້ອຍຢູ່ໃນຫັ້ນ ລູກເຂົາບາງຄົນໂທມາໄດ້ ເຂົາກະວ່າ ໃຜເຮັດບໍ່ໄດ້ເຂົາກໍຍັງຕີ ຍັງລົງໂທດຢູ່ ເຮົາກະລູກຊາຍ ກະບໍ່ໂທ ບໍ່ແຊັດມາຫຍັງ ບໍ່ສົ່ງຂ່າວຄາວ ບໍ່ຮູ້ຂ່າວຮູ້ຄາວຫຍັງເລີຍນ່າ.”

ກ່ຽວກັບເຣື່ອງນີ້ ເອເຊັຽເສຣີ ໄດ້ຕິດຕໍ່ໄປຍັງ ເຈົ້າໜ້າທີ່ທີ່ກ່ຽວຂ້ອງ ຢູ່ນະຄອນຫຼວງວຽງຈັນ ເພື່ອຖາມ ເຣື່ອງຄວາມຄືບໜ້າ ຂອງການຊ່ອຍເຫຼືອເດັກນ້ອຍລາວ ທີ່ຍັງຕິດຄ້າງ ຢູ່ພະມ້າ ເຊິ່ງເຈົ້າໜ້າທີ່ທີ່ກ່ຽວຂ້ອງ ທ່ານນຶ່ງ ບອກໃຫ້ຮູ້ວ່າ ຜແນກກ່ຽວຂ້ອງ ໄດ້ສົ່ງໜັງສືສເນີໃຫ້ກົງສູນ ກະຊວງການຕ່າງປະເທດແລ້ວ.

ນອກຈາກນີ້ (ນັກຂ່າວ) ວິທຍຸ ເອເຊັຽ ເສຣີ ກໍຍັງໄດ້ຕິດຕໍ່ໄປຍັງ ສະຖານທູດລາວ ປະຈໍາປະເທດພະມ້າ ເຊິ່ງເຈົ້າໜ້າທີ່ ຢູ່ສະຖານທູດທ່ານນຶ່ງ ໄດ້ກ່າວເຖິງເຣື່ອງຂໍ້ມູນຕ່າງໆ ຂອງເດັກນ້ອຍ ທີ່ຍັງຕິດຄ້າງຢູ່ພະມ້າ ທີ່ທ່ານໄດ້ຮັບ ຈາກທາງການລາວ ນັ້ນວ່າ:

“ສົ່ງມາ. ສົ່ງຂໍ້ມູນບໍ່ຄົບ ແມ່ນແຫຼະ ເພາະວ່າ ມີແຕ່ຈົດໝາຍ ລະຊື່ນ່າ ບໍ່ຮູ້ທີ່ຢູ່. ບາງຄົນຫັ້ນນ່າ ຍັງປະສານຂໍ້ມູນອີກຢູ່ນໍາເພິ່ນຢູ່. ບາດນີ້ ພໍ່ແມ່ຜູ້ປົກຄອງ ເອົາແຕ່ສໍາເນົາ ອັນສັມມະໂນຄົວໃຫ້ ມີແຕ່ພາສາລາວເບິດ ລະພວກເຮົາຫຍຸ້ງຍາກ ຍັງຊິແປຢູ່ ຈັກຊື່ຈັ່ງໃດຈັ່ງໃດ ຊື່ແທ້ຊື່ຫຍັງ ເປັນພາສາອັງກອກ ອັງກິດຫັ້ນນ່າ.”

ເຖິງຢ່າງໃດກໍດີ ບັນດາພໍ່ແມ່ຜູ້ຄອງ ຂອງເດັກນ້ອຍ ຢູ່ແຂວງຫຼວງນໍ້າທາ ກໍຫາລືກັນວ່າ ໃນມໍ່ໆນີ້ ຈະມາໂຮມໂຕກັນ ແລະ ເດີນທາງໄປນະຄອນຫຼວງວຽງຈັນ ເພື່ອຮ້ອງຮຽນ ຂໍການຊ່ອຍເຫຼືອ ຈາກທາງການລາວ ແລະ ທຸກພາກສ່ວນທີ່ກ່ຽວຂ້ອງ ອີກຄັ້ງນຶ່ງ. ສະບາຍດີ