ຄົນໄທຍ 2 ຄົນ ຖືກຈັບຂໍ້ຫາ ຊ່ອຍຍິງລາວ ຂາຍບໍຣິການ ທາງເພດ

ວັນທີ 14 ຕຸລາ 2022 ກອງບັງຄັບການ ກວດຄົນເຂົ້າເມືອງ 4 ສົມທົບກັບ ຊຸດສືບສວນ-ສອບສວນສະຖານີຕຳຣວດ ພູທອນ ເມືອງທ່າບໍ່ ແຂວງໜອງຄາຍ ປະເທດໄທຍ ເຂົ້າຈັບກຸມຜູ້ຖືກກ່າວຫາ ຄົນໄທຍ 2 ຄົນ ໃນຂໍ້ຫາຮ່ວມກັນນຳພາ ໃຫ້ທີ່ພັກ ເຊື່ອງຊ້ອນ ຫລືຊ່ອຍເຫຼືອ ສາວຊາວລາວ ອາຍຸກາຍ 18 ປີ ແລະ ອາຍຸຕໍ່າກ່ວາ 18 ປີ ທີ່ເຂົ້າປະເທດໄທຍ ແບບຜິດກົດໝາຽ ເພື່ອໃຫ້ສາວຊາວລາວ ແລະເດັກຍິງລາວ ພົ້ນຈາກການຖືກຈັບ. ໂດຍເຈົ້າ ໜ້າທີ່ຕຳຣວດໄທຍ ຊ່ອຍສາວຊາວລາວ ໄດ້ 2 ຄົນ ແລະ ຊ່ອຍເດັກຍິງລາວໄດ້ 2 ຄົນ ພາຍຫລັງພວກເຂົາເຈົ້າ ຂ້າມຊາຍແດນລາວ-ໄທຍ ໂດຍໃຊ້ຊ່ອງທາງທັມມະຊາຕໃນແຂວງເລີຍ ປະເທດໄທຍ ເພື່ອຂາຍບໍຣິການ ທາງເພດ ຢູ່ໄທຍ.

ດັ່ງເຈົ້າໜ້າທີ່ ສະຖານີຕຳຣວດ ພູທອນ ເມືອງທ່າບໍ່ ແຂວງໜອງຄາຍ ກ່າວຕໍ່ວິທຍຸ ເອເຊັຽເສຣີ ໃນວັນທີ  19 ຕຸລາ ນີ້ວ່າ:

“ກໍມີການຂຍາຍຜົລວ່າ ຍິງສາວລາວ ແລະເດັກຍິງລາວ ເຂົ້າມາ ມີການຄ້າປະເວນີ, ມີການບໍຣິການ ທາງເພດ ອີ່ຫຍັງແລ້ວ 4 ຄົນ ອາຍຸຫລາຍກ່ວາ 18 ປີ 2 ຄົນ ແລະ ກໍຕໍ່າກ່ວາ 18 ປີ 2 ຄົນ. ໂດຍກ່ອນທີ່ພວກເຂົາເຈົ້າ ຈະມາຮ້ານຂາຍບໍຣິການ ທາງເພດ ກໍມີຄົນໄທຍ ໄປຮັບໂຕ ມາຈາກປະເທດລາວລັກສະນະ ເຂົາເຈົ້າຂ້າມມາ ແລ້ວຂ້າມໄປລົງ ບ່ອນພັກແຫ່ງນຶ່ງ ແຕ່ບ່ອນນີ້ ໄປຮັບມາ ລັກສະນະເປັນການຊ່ອຍເຫລືອ ເຊື່ອງອຳ ເພື່ອໃຫ້ຄົນຕ່າງດ້າວ ທີ່ເຂົ້າມາໃນ ຣາຊອານາຈັກໄທຍ ຜິດກົດໝາຽ ພົ້ນຈາກການຈັບກຸມ.”

ກ່ອນໜ້ານີ້ ເຈົ້າໜ້າທີ່ຕຳຣວດ ໄດ້ຈັບກຸມພໍ່ເລົ້າ ແລະຜູ້ຮ່ວມຂະບວນການ ໄປແລ້ວ ແລະ ວັນທີ 14 ຕຸລາ ທີ່ຜ່ານມານີ້ ກໍຈັບຜູ້ທີ່ນຳພາ ຊຶ່ງເປັນຄົນຮ່ວມຂະບວນການ ເຮັດໃຫ້ປັດຈຸບັນ ແມ່ຍິງລາວທີ່ອາຍຸກາຍ 18 ປີ ຖືກສົ່ງກັບປະເທດແລ້ວ ພາຍຫລັງດຳເນີນຄະດີ ກັບພໍ່ເລົ້າແລ້ວ. ສ່ວນເດັກຍິງ ທີ່ອາຍຸຕໍ່າກ່ວາ 18 ປີ ຍັງຢູ່ໃນຂະບວນການ ຢຽວຢາຈິຕໃຈ ມີບ່ອນພັກ ແລະຢູ່ພາຍໃຕ້ ການເບິ່ງແຍງ ຂອງເຈົ້າໜ້າທີ່ ທີ່ກ່ຽວຂ້ອງ ຂອງໄທຍ ຢູ່ແຂວງນະຄອນຣາຊສີມາ ປະເທດໄທຍ ແລະ ຍັງລໍຖ້າ ສົ່ງກັບປະເທດລາວ ໃນໄວໆ ນີ້.

ດັ່ງເຈົ້າໜ້າທີ່ ທີ່ກ່ຽວ ຂ້ອງແຂວງນະຄອນຣາຊສີມາ ກ່າວໃນມື້ດຽວກັນນີ້ວ່າ:

“ດຳເນີນຄະດີ ກັບກຸ້ຄ້າປະເວນີແລ້ວ ກໍຜັກດັນແມ່ຍິງສາວລາວ ອາຍຸກາຍ 18 ປີ ໄປປະເທດລາວ 2 ຄົນ, ໂດຍບໍ່ໄດ້ດຳເນີນຄະດີ ອີ່ຫຍັງກັບລາວ (ເຂົາເຈົ້າ). ສ່ວນແມ່ຍິງສາວລາວອີກ 2 ຄົນ ຕໍ່າກ່ວາ 18 ປີ ເປັນເດັກເຍົາວະຊົນ ຢູ່ບ້ານພັກ ນະຄອນຣາຊສີມາ.”

ວັນທີ 18 ຕຸລາ 2022 ສຳນັກຂ່າວລາວ ໄດ້ເຜີຍແຜ່ຂ່າວ ຕຳຣວດໄທຍຈັບແກ້ງ ຄ້າມະນຸສ ລັກລອບພາຍິງສາວລາວ ຂາຍບໍຣິການທາງເພດ ພາຍຫລັງທີ່ຂ່າວນີ້ ຖືກເຜີຍແຜ່ ລົງສື່ສັງຄົມ ອ໋ອນລາຍນ໌ ກໍມີປະຊາຊົນລາວ ເຂົ້າມາສະແດງຄວາມເຫັນ ຫລາກຫລາຍ. ນຶ່ງໃນນັ້ນ ພວກເຂົາເຈົ້າ ເປັນຫ່ວງຍິງສາວລາວ ຕົກເປັນເຫຍື່ອ ການຄ້າມະນຸສ ໃນຮູບແບບຕ່າງໆ ຈຶ່ງຢາກໃຫ້ ຍິງສາວລາວ ແລະເດັກຍິງ ຕັດສິນໃຈດີໆ ກ່ອນຈະໄປເຮັດວຽກ ຢູ່ປະເທດໄທຍ ແລະຢາກໃຫ້ ອອກໄປແບບຖືກກົດໝາຽ.

ດັ່ງຊາວໜຸ່ມລາວ ຈາກແຂວງ ຫລວງພຣະບາງກ່າວ ໃນມື້ດຽວກັນວ່າ:

“ເຣື່ອງອອກນອກປະເທດນີ້ ຄືວ່າອອກໄດ້ຢູ່ແລ້ວ ເຮົາຄິດຕາມໃຈ ຂອງເຮົານ່າວ່າ ຢາກໄປຫາເງິນ ຫາຄຳ ຢູ່ຕ່າງປະເທດນ່າ ຢາກໃຫ້ອັນວັຍລຸ້ນລາວເນາະ ທີ່ວ່າຈະອອກອັນນອກ ປະເທດນີ້ ຢາກໃຫ້ອອກແບບ ຖືກກົດໝາຽວ່າຊັ້ນສາ ມີບັດມີໃບຄົບຖ້ວນ ໄປຫາເງິນ ຫາຄຳ ໝົດກຳນົດ ແລ້ວກໍໄດ້ກັບມາ ປະເທດຊາຕ ຄືເກົ່າແນວນັ້ນ.”

ການລົງໂຄສະນາ ກ່ຽວກັບຜົລຮ້າຍ ຂອງການຄ້າມະນຸສ, ຮູບແບບການຄ້າມະນຸສ, ກຸ່ມສ່ຽງທີ່ຈະຕົກເປັນເຫຍື່ອ ການຄ້າມະນຸສ ແລະອື່ນໆ ຈະມີໜ່ວຍງານຍຸຕິທັມ ແລະ ປກສ ເປັນເຈົ້າການ ໃນການຈັດຕັ້ງປະຕິບັດ ວຽກງານດັ່ງກ່າວນີ້. ສ່ວນຫ້ອງການແມ່ຍິງ ຈະລົງໂຄສະນາ ກໍຕໍ່ເມື່ອໜ່ວຍງານ ສາທາຣະນະສຸຂ ລົງໄປສັກວັກຊິນ ໃຫ້ເດັກກໍໄດ້ເອົາໂຄສະນານີ້ ໄປປະກາດໃຫ້ປະຊາຊົນ ລະວັງໂຕ ບໍ່ໃຫ້ຕົກເປັນເຫຍື່ອ ການຄ້າມະນຸສ.

ດັ່ງເຈົ້າໜ້າທີ່ ສະຫະພັນແມ່ຍິງ ເມືອງບໍຣິຄັນ ແຂວງບໍຣິຄຳໄຊ ກ່າວໃນມື້ດຽວກັນນີ້ວ່າ:

“ຄັນວ່າມີທຶນ ທີ່ລົງສະເພາະແຕ່ໄທເຮົາ ກໍຫຍຸ້ງຍາກ ທາງດ້ານງົບປະມານ ມີແຕ່ວ່າໄທເຮົາ ລົງວຽກແມ່ຍິງໄທເຮົາ ແລ້ວກໍເວົ້າເລີຍ ພາກສ່ວນຕຳຣວດບໍ່ ພາກສ່ວນຍຸຕິທັມບໍ່ ນີ້ເຂົາກໍເວົ້າ.”

ທົ່ວປະເທດລາວ ຈະຍັງພົບເຫັນ ແມ່ຍິງລາວ ແລະເດັກຍິງລາວ ໄປຂາຍບໍຣິການ ທາງເພດ ຢູ່ໄທຍ ທັງແບບສມັກໃຈ ໄປເຮັດວຽກ ຮ້ານອາຫານ ແຕ່ພໍໄປຮອດໄທຍ ພັດຖືກບັງຄັບ ໃຫ້ຂາຍບໍຣິການ ທາງເພດກໍມີ ແລະທັງແບບສມັກໃຈ ໄປຂາຍບໍຣິການ ທາງເພດ ແຕ່ເຮັດວຽກແລ້ວ ຖືກນາຍຈ້າງກົດຂີ່ ເງິນເດືອນຈຶ່ງຕົກເປັນເຫຍື່ອ ການຄ້າມະນຸສ ກໍມີ. ບໍ່ວ່າກໍຣະນີໃດ ພວກເຂົາເຈົ້າ ຕົກເປັນເຫຍື່ອ ການມະນຸສ ກໍມີຕົ້ນຕໍ ແລະສາເຫດ ມາຈາກຄວາມທຸກຍາກ ເນື່ອງຈາກປະເທດລາວ ບໍ່ມີວຽກໃຫ້ເຂົາເຈົ້າ ໄດ້ຫາລ້ຽງຊີພເພື່ອໂຕເອງ ແລະຄອບຄົວ.

ດັ່ງເຈົ້າໜ້າທີ່ ສະຫະພັນແມ່ຍິງ ເມືອງບໍຣິຄັນ ແຂວງບໍຣິຄຳໄຊ ຜູ້ດຽວກັນກ່າວວ່າ:

“ບ້ານທີ່ເຂົາໝໍ່ຊາຍແດນ ເຂົາກໍໄປເຮັດວຽກຫັ້ນນ່າ ຫາເງິນ ຫາຄຳ ຢູ່ພຸ້ນນ່າ ບາງຄົນກໍໄປຖືກຕ້ອງ ບາງຄົນກໍໄປບໍ່ຖືກຕ້ອງຫັ້ນນ່າ ມັນບໍ່ມີໂຮງຈັກໂຮງງານຫລາຍບໍ່ ຄືຢູ່ໄທຍ, ຢູ່ໄທຍມັນມີໂຮງຈັກ ໂຮງງານຫລາຍ ມັນເປັນປະເທດທີ່ວ່າ ຈຳນວນຄົນຫລາຍເດ້ ຢູ່ລາວແລ້ວມັນໜ້ອຍເນາະ 6-7 ລ້ານຄົນສ່ວນຫລາຍ ກໍຊາວໄຮ ຊາວນານີ້ ກໍພໍໄດ້ຢູ່ ໄດ້ກິນ ມັນບໍ່ມີໂຮງຈັກ ໂຮງງານ.

ການຈັບຜູ້ຖືກກ່າວຫາ ຄົນໄທຍ 2 ຄົນນີ້ ຖືວ່າເປັນການຈັບ ຈາກການສືບສວນ ສອບສວນ ຂຍາຍຜົລຄະດີ ຄ້າມະນຸສ ໃນເຂດ ສະຖານີຕຳຣວດ ພູທອນ ເມືອງທ່າບໍ່ ແຂວງໜອງຄາຍ ພາຍຫລັງຈາກ ຜູ້ຖືກກ່າວຫາ ລົບໜີການແຈ້ງຈັບ ຕາມໝາຽສານ ແຂວງໜອງຄາຍ ເລຂທີ 145-146/2022 ລົງວັນທີ 29 ກັນຍາ 2022 ໂດຍໃນຣາຍລະອຽດ ຄະດີຄືຜູ້ຖືກກ່າວຫາ 2 ຄົນ ມີໜ້າທີ່ ຮັບສາວລາວ ແລະເດັກຍິງລາວ ຊຶ່ງຈະລັກລອບ ຂ້າມຊາຍແດນ ລາວ-ໄທຍ ຜ່ານຊ່ອງທາງທັມມະຊາຕ ແຂວງເລີຍ ໂດຍທຸກຄັ້ງທີ່ມີການລັກລອບ ເຂົ້າປະເທດ ຜູ້ຖືກກ່າວຫາທັງ 2 ຄົນ ຈະຂັບຣົຖ ແລະນຳສາວລາວ ແລະເດັກຍິງລາວເຊື່ອງໄວ້ ທີ່ເມືອງທ່າບໍ່ ຕາມເສັ້ນທາງ ຄ້າມະນຸສ ທີ່ກຳນົດໄວ້. ທາງເຈົ້າໜ້າທີ່ ຕຳຣວດໄທຍ ຄາດວ່າຈະຍັງຄົງມີ ຜູ້ກ່ຽວຂ້ອງອີກ ຊຶ່ງເຈົ້າໜ້າທີ່ ຈະມີການສືບສວນ-ສອບສວນ ຂຍາຍຜົລຕໍ່ໄປ.