ທ.ອະງຸ່ນ ລາວຄຣິສຕຽນ ຖືກປ່ອຍແລ້ວ

ສຸພັດຕາ
2020-04-29
ອີແມວລ໌
ຄໍາເຫັນ
Share
ພິມ
ຖ່າຍຮູບເມື່ອ: ເດືອນຕຸລາ 2019, ທ້າວອະງຸ່ນ ພາຍຫຼັງທີ່ຖືກປ່ອຍໂຕ ພົ້ນໂທສ ຂໍ້ຫາໄປທຳຣາຍປ່າໄມ້ ແຕ່ຊາວບ້ານເຊື່ອວ່າ ແຮງຈູງໃຈ ມາຈາກ ການເຊື່ອຖືສາສນາເຍຊູ ຂອງທ້າວອະງຸ່ນ ຫຼາຍກວ່າ
ຖ່າຍຮູບເມື່ອ: ເດືອນຕຸລາ 2019, ທ້າວອະງຸ່ນ ພາຍຫຼັງທີ່ຖືກປ່ອຍໂຕ ພົ້ນໂທສ ຂໍ້ຫາໄປທຳຣາຍປ່າໄມ້ ແຕ່ຊາວບ້ານເຊື່ອວ່າ ແຮງຈູງໃຈ ມາຈາກ ການເຊື່ອຖືສາສນາເຍຊູ ຂອງທ້າວອະງຸ່ນ ຫຼາຍກວ່າ
ຖ່າຍຮູບໂດຍ: ຊາວບ້ານ ບ້ານສົບບອນ

ທ້າວ ອະງຸ່ນ ຊາວລາວຄຣິສຕຽນ ຢູ່ບ້ານສົບບອນ ເມືອງພີນ ແຂວງສວັນນະເຂດ ຖືກເຈົ້າໜ້າທີ່ທ້ອງຖິ່ນຈັບເມື່ອວັນທີ 11 ມີນາ ປີ 2019 ທີ່ຜ່ານມານັ້ນ ຖືກປ່ອຍໂຕແລ້ວ ເມື່ອເດືອນສິງຫາ ໃນປີດຽວກັນ, ເຊິ່ງ ວິທຍຸເອເຊັຽເສຣີ ຫາກໍໄດ້ຮັບຂ່າວ ຈາກພີ່ນ້ອງຊາວລາວຄຣິສຕຽນ ໃນແຂວງຄຳມ່ວນ ຜູ້ຂໍສງວນຊື່ແລະສຽງທ່ານນຶ່ງ ໄດ້ຢືນຢັນ ໃນວັນທີ 20 ເມສາ ທີ່ຜ່ານມານີ້ວ່າ:

“ປ່ອຍແລ້ວ ປ່ອຍຫັ້ນແຕ່ເດືອນ 8 ເດືອນ 9 ນີ້ແຫຼະ ຊ່ວງນ້ຳຖ້ວມຫັ້ນ ອອກມາຈາກຄຸກຫັ້ນກະແບບວ່າ ຖືກຄຸກຫັ້ນກະເສັຽຄ່າຄຸກກະໝົດ 6 ລ້ານກີບ.”

ທ່ານກ່າວຕື່ມວ່າ ພາຍຫຼັງທີ່ຖືກປ່ອຍໂຕ ທ້າວ ອະງຸ່ນ ກໍກັບຄືນມາສູ່ຄອບຄົວ ດ້ວຍຄວາມອົບອຸ່ນອີກຄັ້ງ, ແຕ່ຊີວິຕຂອງຄອບຄົວກໍຕ້ອງໄດ້ ເຣີ່ມຕົ້ນນັບນຶ່ງໃໝ່ ເນື່ອງຈາກໃນໄລຍະ ທີ່ລາວຖືກຂັງຄຸກນັ້ນ ຜູ້ເປັນເມັຽກໍຕ້ອງໄດ້ເຮັດວຽກ ແລະ ລ້ຽງລູກຕາມລຳພັງ.

ອີງຕາມແຫຼ່ງຂ່າວ ທີ່ໜ້າເຊື່ອຖືໄດ້ ທີ່ແຂວງສວັນນະເຂດ ຜູ້ຂໍສງວນຊື່ ແລະສຽງທ່ານນຶ່ງ ໄດ້ກ່າວຕໍ່ວິທຍຸເອເຊັຽເສຣີໃນວັນທີ 29 ເມສາ ນີ້ວ່າ:

“ໃນຣະຫວ່າງທີ່ ທ້າວ ອະງຸ່ນ ຖືກຂັງຄຸກ ທີ່ຄຸກຄຸມຂັງຊົ່ວຄາວ ປກສ ເມືອງພີນ ນັ້ນ, ທ້າວ ອະງຸ່ນ ໄດ້ຖືກເຈົ້າໜ້າທີ່ທ້ອງຖິ່ນໃຊ້ຝາມືຕົບ ກະແຕ້ຫູ ຈົນເລືອດໄຫຼອອກແຮງ ແລະ ເກີດການອັບເສບ. ບໍ່ພຽງແຕ່ ເທົ່ານັ້ນ, ລາວຍັງຖືກເອົາໄຟຟ້າຊ໊ອດ ເພື່ອບີບບັງຄັບໃຫ້ປະລະ ການເຊື່ອຖືສາສນາເຍຊູ ຈົນເຮັດໃຫ້ລາວ ສະຫຼົບຕາຍຄືນ ເປັນເວລາ 1 ມື້.”

ອີງຕາມຂໍ້ມູນຈາກ “ຄຳສັ່ງປ່ອຍໂຕຈຸບໂທສ ສະບັບເລຂທີ 08 ອຍກ ເຂດ 3 ແຂວງສວັນນະເຂດລົງວັນທີ 26 ສິງຫາ 2019” ໄດ້ຣະບຸ ວ່າທ້າວ ອະງຸ່ນ ອາຍຸ 28 ປີ, ອາຊີພຊາວນາ ເປັນປະຊາຊົນ ບ້ານສົບບອນ, ເມືອງພີນ ແຂວງສວັນນະເຂດ ຖືກເຈົ້າໜ້າທີ່ທ້ອງຖິ່ນຈັບ ໃນຂໍ້ຫາທຳຣາຍປ່າໄມ້ ແລະ ຖືກສານຕັດສິນ ຈຳຄຸກເປັນເວລາ 1 ປີ ແລະ ທ້າວ ອະງຸ່ນ ປະຕິບັດໂທສໄດ້ 05 ເດືອນ ກັບ 15 ມື້. ສ່ວນຈຳນວນໂທສທີ່ເຫຼືອ ແມ່ນໃຫ້ພາກໂທສໄວ້ກ່ອນ ຈຶ່ງໄດ້ປ່ອຍໂຕ ຄືນສູ່ຄອບຄົວ.

ເມື່ອວັນທີ 23 ເມສາ ຜ່ານມາ ເອເຊັຽເສຣີ ໄດ້ຕິດຕໍ່ສອບຖາມ ໄປຍັງຫ້ອງການ ສູນກາງແນວລາວສ້າງຊາຕ ປະຈຳແຂວງສວັນນະເຂດ ຊຶ່ງເຈົ້າໜ້າທີ່ກ່ຽວຂ້ອງ ໄດ້ຢືນຢັນວ່າການຈັບ ທ້າວ ອະງຸ່ນ ບໍ່ກ່ຽວຂ້ອງ ກັບການເຊື່ອຖືສາສນາ ແຕ່ຜູ້ກ່ຽວອາຈຜິດເຣື້ອງລັກລອບຕັດໄມ້.

ເຖິງຢ່າງໃດກໍຕາມ, ພີ່ນ້ອງຂອງ ທ້າວ ອະງຸ່ນ ໄດ້ກ່າວຕໍ່ວິທຍຸເອເຊັຽເສຣີ ເມື່ອປີກາຍວ່າ ການທີ່ເຈົ້າໜ້າທີ່ທ້ອງຖິ່ນຈັບ ທ້າວ ອະງຸ່ນ ໄປ ຂັງຄຸກ ອາຈມີແຮງຈູງໃຈ ມາຈາກເຣື່ອງສາສນາ ຫຼາຍກວ່າເຣື່ອງການ ໄປຕັດໄມ້ທຳຣາຍປ່າ.

ເຕັມຫນ້າ