2020 ທາງການ ປ່ອຍນັກໂທສ 970 ຄົນ
2020.11.24
ພິທີ ອະພັຍໂທດ ປ່ອຍໂຕນັກໂທສ ຈໍານວນ 970 ຄົນ ໃນທົ່ວປະເທດ ເນື່ອງໃນໂອກາດ ວັນຊາດທີ 2 ທັນວາ ຄົບຮອບ 45 ປີ. ນັກໂທສ ທີ່ຖືກປ່ອຍໂຕ ໃນເທື່ອນີ້ ສ່ວນຫຼາຍແມ່ນ ນັກໂທສ ຄະດີ ຢາເສບຕິດ.
Citizen journalist
ທາງການລາວ ໄດ້ຈັດພິທີ ອະພັຍໂທດ ປ່ອຍໂຕນັກໂທສ ຈໍານວນ 970 ຄົນໃນທົ່ວປະເທດ ເນື່ອງໃນໂອກາດ ວັນຊາດທີ 2 ທັນວາ ຄົບຮອບ 45 ປີ. ນັກໂທສ ທີ່ຖືກປ່ອຍໂຕ ໃນເທື່ອນີ້ ສ່ວນຫຼາຍແມ່ນ ນັກໂທສ ຄະດີຢາເສບຕິດ. ດັ່ງເຈົ້າໜ້າທີ່ ກົມຕໍາຣວດ ຄຸມຂັງດັດສ້າງ, ກະຊວງປ້ອງກັນຄວາມສງົບ ທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ 23 ພຶສຈິກາ ນີ້ວ່າ:
“ປ່ອຍຕົວ ຊ່ວງໂຄວິດເນາະ, ແຕ່ລະທິດແລ້ວນີ້ ຈະມີກົມຄຸມຂັງ ແລະ ດັດສ້າງ ນີ້ເນາະ ແລະ ກໍມີຕ່າງແຂວງນໍາ 18 ແຂວງ ທັງໝົດ 900 ປາຍ. ຄດີຢາເນາະ.”
ທ່ານກ່າວຕື່ມວ່າ ໃນສ່ວນຂອງນັກໂທສ ຄດີທາງການເມືອງນັ້ນ, ບໍ່ໄດ້ມີ ການປ່ອຍໂຕ ໃນມື້ນີ້ນໍາ ຍ້ອນຍັງມີການ ພິຈາຣະນາ ຢ່າງຣະອຽດ ອີກເທື່ອນຶ່ງ.
ເຈົ້າໜ້າທີ່ສູນກາງ ແນວລາວສ້າງຊາດ ທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນມື້ດຽວກັນ ນີ້ວ່າ ສໍາລັບ ການອະພັຍໂທສ ນັກໂທດໃນມື້ນັ້ນ ແມ່ນຈັດຂຶ້ນ ເປັນປະຈໍາ ທຸກປີ ຍ້ອນເປັນວັນຊາດ ທີ 2 ທັນວາ, ເຊິ່ງນັກໂທສ ສ່ວນຫຼາຍ ທີ່ໄດ້ຮັບການ ປ່ອຍໂຕນັ້ນ ກໍເປັນຄດີ ກ່ຽວກັບ ຢາເສບຕິດ ແລະ ລັກເລັກ ຂະໂມຍນ້ອຍ ທີ່ສໍານຶກຜິດແລ້ວ ຈຶ່ງມີການ ອະພັຍໂທສ, ແຕ່ຄດີ ກ່ຽວກັບການເມືອງ ທີ່ມີ ຄວາມຮ້າຍແຮງນັ້ນ ຈະຕ້ອງຖືກ ກັກຂັງຕໍ່ໄປ, ດັ່ງທ່ານກ່າວວ່າ:
“ແຕ່ລະປີ ຮອດວັນຊາດ ຊ່ວງທັນວາ ມີການນິຣະໂທສ ນັກໂທສຢາເສບຕິດ ລັກເລັກຂະໂມຍນ້ອຍ ທີ່ວ່າໄປ ປະຕັດແລ້ວ ຂະເຈົ້າມີການ ຕື່ນຕົວ ກໍມີການປ່ຽນແປງ ຄວາມຮູ້ສໍານຶກຜິດ ແລ້ວເພິ່ນກໍມີ ການນິຣະໂທສສະກັມໃຫ້. ເຣື່ອງນັກໂທສ ການເມືອງນີ້ ກໍຣະນີ ທີ່ຮ້າຍແຮງ ກໍຖືວ່າ ກໍຈະໄດ້ປະຕິບັດ ໄປດົນແດ່.”
ຂະນະທີ່ຊາວບ້ານ ທ່ານນຶ່ງ ກ່າວກ່ຽວກັບ ການປ່ອຍໂຕ ນັກໂທສນັ້ນວ່າ ທ່່ານບໍ່ຄ່ອຍ ຮູ້ຣາຍຣະອຽດ ປານໃດ, ແຕ່ຄິດວ່າ ໜ້າຈະເປັນຄດີ ທີ່ບໍ່ຮ້າຍແຮງປານໃດ. ແຕ່ສ່ວນຄດີ ທາງການເມືອງ ທີ່ເຫັນວ່າ ຍັງບໍ່ຖືກປ່ອຍໂຕ ກໍຄົງຈະແມ່ນ ນາງ ໝວຍ, ດັ່ງທີ່ທ່ານກ່າວວ່າ:
“ເຄີຍໄດ້ຍິນຂ່າວຜ່ານໆ, ແຕ່ເຮົາ ກໍບໍ່ຮູ້ດອກວ່າ ໃຜເປັນໃຜ. ຕອນປ່ອຍຕົວອອກມາ ແຕ່ໜ້າຊິເປັນ ຄົນບໍ່ຮ້າຍແຮງຕີ໊. ເຣື່ອງຄດີການເມືອງ ທີ່ເຫັນວ່າ ຍັງບໍ່ໄດ້ປ່ອຍ ກໍນາງໝວຍ, ຫັ່ນແຫຼະ.”
ອີງຕາມການຣາຍງານຂ່າວ ຂອງໂທຣະພາບ ປ້ອງກັນຄວາມສງົບ ເມື່ອວັນທີ 19 ພຶສຈິກາ 2020 ນີ້ວ່າ ກົມຕໍາຣວດ ຄຸມຂັງດັດສ້າງ, ກະຊວງປ້ອງກັນຄວາມສງົບ ນະຄອນຫຼວງວຽງຈັນ ໄດ້ຈັດພິທີ ອະພັຍໂທດ ປ່ອຍໂຕນັກໂທສ ທີ່ປະພຶດດີ ຈໍານວນ 970 ຄົນ ໃນທົ່ວປະເທດ ເມື່ອວັນທີ 18 ພຶສຈິກາ ຜ່ານມາ ທີ່ຄ້າຍຄຸມຂັງດັດສ້າງ ຕານປ່ຽວ ແຂວງວຽຈັນ ເນື່ອງໃນໂອກາດ ວັນຊາດທີ 2 ທັນວາ ຄົບຮອບ 45 ປີ, ນັບແຕ່ປີ 1975 ຫາວັນທີ 2 ທັນວາ ປີ 2020 ນີ້.
ໃນວັນທີ 18 ມິຖຸນາ 2020 ທີ່ຜ່ານມານີ້, ທີ່ຄ້າຍຄຸມຂັງດັດສ້າງ ປກສ ແຂວງຫຼວງນໍ້າທາ ສານປະຊາຊົນ ຂັ້ນຕົ້ນ ແຂວງຫຼວງນໍ້າທາ ໄດ້ຕັດສິນນັກໂທສ ກ່ອນກໍານົດ 22 ຄົນ, ໃນນັ້ນ ມີໂທສຄດີຢາເສບຕິດ 17 ຄົນ, ຄດີສົມຮູ້ຮ່ວມຄິດ ການປອມແປງເງິນ 3 ຄົນ, ຄດີຂົ່ມຂືນ ກະທໍາຊຳເຣົາ 1 ຄົນ ແລະ ຄດີທໍາຮ້າຍຮ່າງກາຍ 1 ຄົນ, ເຊິ່ງທັງໝົດ ໄດ້ຮັບການ ສຶກສາອົບຮົມ ກວດກາເຫັນວ່າ ມີຄວາມຮັບຮູ້ ແລະ ເຂົ້າໃຈ ຕໍ່ແນວທາງ ຂອງພັກ ແລະ ຣະບຽບກົດໝາຍ ຂອງຣັຖ ຢ່າງເລິກເຊິ່ງ.
ປັດຈຸບັນ, ຢູ່ລາວ ມີນັກໂທສ ທີ່ຖືກຄດີ ທາງການເມືອງ ແລ້ວຍັງຢູ່ໃນຄຸກ ອີກຫຼາຍຄົນ ເປັນຕົ້ນ ຍານາງ ຮ່ວາຍເຮືອງ ໄຊຍະບູລີ ຫຼືຍານາງ ໝວຍ ທີ່ຖືກຈັບ ເມື່ອປີ 2019 ໃນຂໍ້ກ່າວຫາ ໂຄສະນາ ຕໍ່ຕ້ານ ສປປລາວ ແລະ ທ້າວ ເພັດພູທອນ ພິລາຈັນ, ເປັນນຶ່ງໃນຈໍານວນ ຄົນງານລາວ ທີ່ເຮັດວຽກ ຢູ່ປະເທດໄທຍ ເຄີຍໄປຮຽກຮ້ອງ ເຣື່ອງບັນຫາ ສິດທິມະນຸດ ແລະ ປະຊາທິປະຕັຍ ໃນລາວ ຢູ່ຕໍ່ໜ້າ ສະຖານທູຕລາວ ຢູ່ບາງກອກ ຖືກຈັບຢູ່ລາວ ເມື່ອປີ 2019 ໃນຂໍ້ຫາ ລັກຣົດ, ແຕ່ບັນດາອົງການ ດ້ານສິດທິມະນຸດ ເຊື່ອວ່າ ລາວອາຈຖືກຈັບ ໃນຂໍ້ຫາ ກ່ຽວກັບການເມືອງ.
