ຜູ້ເສັຽເງິນໃຫ້ ເຈ້ທິບ ອາຈບໍ່ມີຫວັງ ໄດ້ເງິນຄືນ

ໄຊຍາ
2022.09.30
Share on WhatsApp
Share on WhatsApp
ຜູ້ເສັຽເງິນໃຫ້ ເຈ້ທິບ ອາຈບໍ່ມີຫວັງ ໄດ້ເງິນຄືນ ນາງ ພອນທິບ ໄຊປັນຍາ (ຮູບຊ້າຍມື) ຜູ້ຕ້ອງຫາ ໃນຄະດີ ສໍ້ໂກງຊັພ ພົລເມືອງ ຫລາຍກວ່າ 5,000 ຄົນ ຖືກຕໍາຣວດໄທຍ ນຳໄປສືບສວນ-ສອບສວນ, ວັນທີ 29 ກໍຣະກະດາ 2022.
ຮູບພາບ: Daily News Today

ເຈ້ທິບ ຫຼື ຍານາງ ພອນທິບ, ທ້າວ ອະນຸສິດ ແລະ ພັກພວກຮວມກັນ 7 ຄົນ ຖືກເຈົ້າໜ້າທີ່ ຕຳຣວດເສຖກິຈ ກົມໃຫຍ່ຕຳຣວດ ກະຊວງປ້ອງກັນ ຄວາມສງົບ ຕັ້ງຂໍ້ຫາສໍ້ໂກງຊັພ. ໃນຂະນະທີ່ຜູ້ເສັຽຫາຍ ຄາດວ່າ ອາຈບໍ່ໄດ້ເງິນຄືນ ເພາະຕຳຣວດ ຍັງບໍ່ໄດ້ກ່າວເຖິງຊັພສິນ ຂອງກຸ່ມຕົ້ມຕຸນນີ້ວ່າ ມີເທົ່າໃດ ເອົາໄປໄວ້ໃສ ພາຍຫຼັງທີ່ດຳເນີນຄະດີແລ້ວ ຈະເອົາເງິນຄືນໃຫ້ ຜູ້ເສັຽຫາຍແນວໃດ ມີພຽງແຕ່ຕັ້ງຂໍ້ຫາດຳເນີນຄະດີຕໍ່ກັບກຸ່ມນີ້.

ດັ່ງຜູ້ຮູ້ກ່ຽວ ກັບຄະດີດັ່ງກ່າວ ໄດ້ອອກມາເຕືອນ ໄປຍັງຜູ້ເສັຽຫາຍ ໃນຄະດີ ເຈ້ທິບວ່າມີໂອກາດໜ້ອຍ ທີ່ຈະໄດ້ເງິນຄືນ. ເພາະຜ່ານມາ ກໍມີຫຼາຍຄະດີ ທີ່ມີລັກສະນະຄ້າຍຄືກັນ ເມື່ອສານຕັດສິນແລ້ວ ກໍມິດງຽບໄປ ຜູ້ເສັຽຫາຍບໍ່ໄດ້ຮັບເງິນຄືນ.

ດັ່ງຜູ້ຮູ້ທີ່ຂໍສງວນຊື່ ແລະສຽງ ໄດ້ໃຫ້ຄຳເຫັນເຣື່ອງຄະດີ ດັ່ງກ່າວ ຕໍ່ວິທຍຸ ເອເຊັຽເສຣີ ເມື່ອວັນທີ 20 ກັນຍາ ຜ່ານມາວ່າ:

ຖ້າເຈ້ທິບ ຕິດຄຸກໄປ ສານຊິຕັດສິນ ຕ້ອງມີວັນວ່າ ຕັດສິນຈາກຄະດີແພ່ງ ສໍ້ໂກງຈະເປັນອາຍາໄດ້ ບ້ານເຮົາປ່ຽນງ່າຍໆ. ເຈ້ທິບອາຈຕິດຄຸກ 5 ປີ ຫຼື 10 ປີ ທີ່ຈະອອກມາ ລະກາໃຊ້ເງິນເກົ່າ ຄັນເຈ້ທິບມີວົງເງິນ ມີຫຼັກຊັພ ມີຣົຖມີເຮືອນຍຶດຊັພ ຂາຍທອດຕລາດ ລະກາແບ່ງໃຫ້ເຈົ້າທຸກ ແຕ່ຜ່ານບໍ່ເຫັນຄະດີ ແບບນີ້ຜ່ານມາຂໍໃຊ້ເດືອນລະ 400,000 -500,000 ແລະ 1000,000​-2000,000 ລະກາແລ້ວ ແຕ່ສູ່ມື້ນີ້ກະຊວງຍຸຕິທັມ ເຂົາຊິປະຕິບັດຫວາ ເຂົາຕ້ອງຕາມຍຶດຊັພ ເພາະສະນັ້ນຍຶດບໍ່ໄດ້ ມັນມີໂອກາດໃຊ້ເງິນສອງມາ ຜູ້ທີ່ເສັຽຫາຍມີໂອກາດ ບໍ່ໄດ້ເງິນ.

ທ່ານໄດ້ກ່າວຕື່ມວ່າກໍຄືຮູ້ໆ ກັນດີພາຍຫຼັງທີ່ສານຕັດສິນແລ້ວ ຜູ້ກະທັມຜິດກໍຄືເຈ້ທິບ, ສາມີ ແລະ ພັກພວກ ກໍຖືກຂັງຄຸກປະມານ 10 ປີ ຫາ 15 ປີ ຈາກນັ້ນກໍອອກຈາກຄຸກ ມາໃຊ້ເງິນ ທີ່ມີຜູ້ເອົາມາລົງທຶນເປັນຈຳນວນຫຼາຍ ໂດຍທີ່ຜູ້ເສັຽຫາຍ ບໍ່ໄດ້ເງິນກັບຄືນມາ ເພາະບໍ່ຮູ້ວ່າ ເງິນຈຳນວນດັ່ງກ່າວ ຢູ່ໃສແດ່ເພາະເຈົ້າໜ້າທີ່ ບໍ່ໄດ້ແຈ້ງເຣື່ອງຊັພສິນ ມີແຕ່ຕັ້ງຂໍ້ຫາວ່າ ສໍ້ໂກງຊັພພົລ ເມືອງເທົ່ານັ້ນ.

ການລົງທຶນ ໃນເທື່ອນີ້ ມີຄົນຫຼົງເຊື່ອ ໃນພາບລັກຂອງເຈ້ທິບ ເພາະຜູ້ກ່ຽວ ໄດ້ສ້າງພາບ ຜ່ານສື່ສັງຄົມອ໋ອນລາຍນ໌ ໂດຍອ້າງວ່າ ມີຫຼາຍທຸຣະກິຈ ໂດຍສະເພາະ ແມ່ນທຸຣະກິຈ ຮ້ານເຄື່ອງຂາຍເພັດຊຶ່ງເປັນຈຸດນຶ່ງ ທີ່ດຶງດູດເຮັດໃຫ້ ຫຼາຍຄົນຍອມໂອນເງິນ ເຂົ້າບັນຊີ ຂອງ ເຈ້ທິບ ຕາມຄຳໂຄສະນາ ສວນເຊື່ອ.

ດັ່ງຜູ້ເສັຽຫາຍ ທີ່ຂໍສງວນຊື່ ແລະສຽງໄດ້ກ່າວເຖິງກົນໂກງວ່າ:

ຫຼີ້ນຫວຍອັນ 50,000,000 ແລ້ວລະພໍດີຈົບແລ້ວ ລະຈົບສາຍນັ້ນພໍດີ ເອົາເງິນໄປຝາກນຳລາວ ເດືອນແຣກ ຝາກນຳລາວຫັ້ນແຫຼະ ມາເດືອນທີ 2 ເຣີ່ມມີບັນຫາ ແລ້ວ່າມື້ນີ້ວົງເງິນເຕັມ ໃຫ້ແຕ່ດອກວັນທີ 29 ໂຕນເລີຍ.

ຜູ້ເສັຽຫາຍ ໄດ້ກ່າວຕື່ມວ່າ ຍ້ອນເຫັນວ່າທຸຣະກິຈ ຂອງນາງຖືວ່າ ໜ້າເຊື່ອຖື ທີ່ສຳຄັນຍັງໃຫ້ຜົລຕອບແທນ ດ້ວຍດອກເບັ້ຽສູງເຖິງ 30% ໄລຍະຝາກໃໝ່ໆ ກໍໄດ້ແຕ່ພໍຕົກມາ ລະຫວ່າງຕົ້ນເດືອນມີນາ ປີ 2022 ບໍ່ໄດ້ດອກເບັ້ຽ ຊຶ່ງຜູ້ເສັຽຫາຍຫຼາຍຄົນ ກໍເຂົ້າໄປທວງຖາມເອົາເງິນ ຕົ້ນຄືນແຕ່ ເຈ້ທິບໃຫ້ເຫດຜົລວ່າ ຫວຍມັນເຕັມບໍ່ສາມາດຈ່າຍໄດ້ ຈົນໃນທີ່ສຸດໃນເດືອນພຶສພາ ເຈ້ທິບ ພ້ອມດ້ວຍຜົວ ທ້າວ ອະນຸສິດ ກໍລັກຂ້າມໄປລີ້ຢູ່ ບາງກອກ ປະເທດໄທຍ.

ອີງໃສ່ຜູ້ເສັຽຫາຍ ທີ່ຂໍປິດບັງໂຕຕົນ ໄດ້ລະບຸວ່າ ດ້ວຍຮູບການແອບອ້າງ ເປັນແມ່ຫວຍ ດ້ວຍການລະດົມເງິນ ມາລົງທຶນນຳຜູ້ກ່ຽວ ໂດຍໃຫ້ດອກເບັ້ຽສູງ ກວ່າທນາຄານ 30% ຕໍ່ເດືອນ ແລະ ຝາກເບື້ອງຕົ້ນຂັ້ນຕໍ່າ ປະມານ 30 ລ້ານກີບຂຶ້ນໄປ. ຖ້າບຸກຄົນໃດສົນໃຈ ແມ່ນໃຫ້ໂອນເຂົ້າບັນຊີ ຂອງ ຍານາງພອນທິບ ມີທັງໝົດ 3 ບັນຊີ ຄືເງິນກີບ, ເງິນບາທ ແລະ ເງິນໂດລ້າຣ໌ ໂດຍອອກຊື່ ລາຢາ ຂາຍເພັດພອຍວັດຸຖຸມີຄ່າ.

ຫຼັງຈາກນັ້ນ ມີຄົນຈຳນວນຫຼາຍ ທີ່ເຂົ້າຫວຍ ແລະ ໂອນເງິນເຂົ້າບັນຊີ, ພາຍຫຼັງມີຄົນ ມາເຂົ້າຫວຍໃນເບື້ອງຕົ້ນ ຍານາງ ພອນທິບ ໄດ້ໂອນເງິນດອກໃຫ້ ແກ່ລູກຫວຍ ໂດຍເອົາເງິນຕົ້ນທຶນ ທີ່ມີຜູ້ຄົນນຳມາເຂົ້າຫວຍ ໂອນໃຫ້, ຕໍ່ມາບໍ່ມີຄົນມາ ເຂົ້າຫວຍ ຈຶ່ງບໍ່ສາມາດຈ່າຍ ດອກໃຫ້ລູຫວຍໄດ້. ມາຮອດໄລຍະເດືອນພຶສພາ ລູກຫວຍຈຳນວນນຶ່ງ ໄດ້ໄປຂໍຖອນເງິນທຶນ ຄືນແຕ່ຜູ້ກ່ຽວ ບໍ່ສາມາດຈ່າຍເງິນ ໃຫ້ແກ່ລູກຫວຍໄດ້ ພ້ອມທັງລົບໜີ ອອກຈາກປະເທດລາວ ໄປຢູ່ປະເທດໄທຍ ປະມານນຶ່ງເດືອນ ເຈົ້າໜ້າທີ່ຕຳຣວດໄທຍ ກໍຈັບໄດ້ ແລະສົ່ງໂຕ ກັບມາປະເທດລາວ ມາດຳເນີນຄະດີໃນທີ່ສຸດ.

ເມື່ອເຫດການດັ່ງກ່າວ ເກີດຂຶ້ນ ຜູ້ເສັຽຫາຍຈຳນວນຫຼາຍ ໄດ້ເຂົ້າໄປແຈ້ງຄວາມເສັຽຫາຍທີ່ ກົມຕຳຣວດເສຖກິຈ ກະຊວງປ້ອງກັນຄວາມສງົບ ຈາກນັ້ນເຈົ້າໜ້າທີ່ ຕຳຣວດລາວ ກໍໄດ້ປະສານງານ ໄປຍັງເຈົ້າໜ້າທີ່ຕຳຣວດ ຂອງໄທຍ ຈົນມາຮອດວັນທີ 29 ກໍຣະກະດາ ຈຶ່ງສາມາດຈັບໂຕ ຍານາງ ພອນທິບ ຫຼື ເຈ້ທິບ ພ້ອມດ້ວຍ ທ້າວ ອະນຸສິດ ຜູ້ເປັນສາມີ ຢູ່ໂຮງແຮມແຫ່ງນຶ່ງ ໃນບາງກອກປະເທດໄທຍ ແລະ ຕຳຣວດໄທຍ ໄດ້ນຳມາມອບ ໃຫ້ຕຳຣວດລາວ ໃນວັນທີ 31 ກໍຣະກະດາ ຜ່ານມາ ເພື່ອມາດຳເນີນ ຄະດີໃນປະເທດລາວ.

ຄວາມຄືບໜ້າ ຂອງການສືບສວນ-ສອບສວນ ເພື່ອຫາຫຼັກຖານ ເພີ່ມຕື່ມ ພາຍຫຼັງທີ່ພວກກ່ຽວ ທັງສອງໄດ້ປະຕິເສດ ໃນການໃຫ້ການຕໍ່ ເຈົ້າໜ້າຕຳຣວດໄທຍ. ໂດຍເມື່ອວັນ 19 ກັນຍາ ຜ່ານມາ ສື່ຂອງ ກະຊວງ ປ້ອງກັນຄວາມສງົບ ໄດ້ຣາຍງານ ການຖແລງຂ່າວ ຂອງ ພັນເອກ ບຸນລ້ອມ ໄຊຍະວົງ ຫົວໜ້າ ກົມຕຳຣວດເສຖກິຈ ກົມໃຫຍ່ ກະຊວງປ້ອງກັນ ຄວາມສງົບ ເມື່ອວັນທີ 19 ກັນຍາ 2022 ໂດຍມີບາງຕອນ ສຳຄັນທ່ານໄດ້ຖແລງວ່າ:

ມາຮອດວັນທີ 30 ເດືອນ 6 ປີ 2022 ກົມຕຳຣວດເສຖກິຈ ພວກເຮົາກໍໄດ້ມີການ ຮັບການແຈ້ງຄວາມ ຜູ້ຖືກເສັຽຫາຍ ມາຮອດປັດຈຸບັນນີ້ ມີຜູ້ເສັຽຫາຍຢູ່ 1,680 ຄົນ ວ່ານາງພອນທິບ ແລະ ທ້າວອະນຸສິດ ໄດ້ສໍ້ໂກງ ແລະພວກກ່ຽວ ເອົາໂຕລົບໜີ ອອກຈາກ ສປປ ລາວ ໄປປະເທດໄທຍ ໃນວັນທີ 29 ເດືອນ 6 ປີ 2022 ຕໍ່ກັບເຫດການດັ່ງກ່າວນີ້ ພວກເຮົາກົມຕຳຣວດ ເສຖກິຈ ກໍໄດ້ເປີດການ ສືບສວນ-ສອບສວນ ໃສ່ນາງພອນທິບ ໄຊປັນຍາ ແລະ ທ້າວ ອະນຸສິດ ພຸທວົງ ໃນຂໍ້ຫາສໍ້ໂກງຊັພ ຂອງພົລເມືອງ.

ທ່ານໄດ້ກ່າວຕື່ມວ່າ ຜ່ານການສອບສວນ ຍານາງ ພອນທິບ ອາຍຸ 30 ປີ ແລະ ທ້າວ ອະນຸສິດ ອາຍຸ 34 ປີ ຊຶ່ງເປັນສາມີ ພັລຍາ  ທັງສອງຢູ່ ບ້ານຫົວຂົວ ເມືອງໄຊເສດຖາ ນະຄອນຫຼວງວຽງຈັນໄດ້ຮັບສາຣະພາບວ່າ ໄດ້ມີການໂຄສະນາ ແລະເຄື່ອນໄຫວ ສໍ້ໂກງຊັພ ແທ້ປັດຈຸບັນ ມີຜູ້ເສັຽຫາຍ ເຂົ້າມາແຈ້ງຄວາມ ຕໍ່ເຈົ້າໜ້າທີ່ທັງໝົດ 1,680 ຄົນ ຮວມມູນຄ່າ ຄວາມເສັຽຫາຍ ທັງໝົດ 335,035.48 ຕື້ກີບ, ເງິນບາທ 305,106.537 ບາທ, ເງິນໂດລ້າຣ໌ 7,811,665 ໂດລ້າຣ໌.

ມາເຖິງປັດຈຸບັນ ເຈົ້າໜ້າທີ່ຕຳຣວດ ໄດ້ຍຶດ ແລະອາຍັດຊັພສິນ ທີ່ໄດ້ຈາກການກະທຳຜິດ ເປັນຕົ້ນແມ່ນ ເຮືອນ, ຣົຖ, ທີ່ດິນ ແລະ ເຄື່ອງປະດັບ ຄ້າຍຄືເພັດຈຳນວນຫຼາຍ ລາຍການ, ສ່ວນພັກພວກທີ່ຮ່ວມຂະບວນການ ດຽວກັນ ທາງເຈົ້າໜ້າທີ່ ຈັບມາດຳເນີນຄະດີ ໄດ້ເພີ່ມອີກ 5 ຄົນຄື, ນາງ ສຸພິນທາ ອາຍຸ 28 ປີ ຢູ່ບ້ານຫ້ວຍຫົງ ເມືອງຈັນທະບູຣີ, ນາງ ສຸພາວັນ ອາຍຸ 27 ປີ ຢູ່ບ້ານດົງໂພນເລົ່າ ເມືອງຫາດຊາຍຟອງ, ທ້າວ ສົມພິດ ອາຍຸ 26 ປີ ແລະ ຍານາງໄຂ່ມຸກ ທັງສອງພັກເຊົາ ຢູ່ບ້ານໂພນຕ້ອງສະຫວາດ ເມືອງຈັນທະບູຣີ ແລະ ນາງ ມີນາ ອາຍຸ 33 ປີ ຢູ່ບ້ານໜອງດ້ວງທົ່ງ ເມືອງສີໂຄດຕະບອງ ທັງໝົດ ຢູ່ໃນນະຄອນຫຼວງວຽງຈັນ.

ທ່ານໄດ້ກ່າວຕື່ມວ່າ ຄະດີນີ້ໃນເບື້ອງຕົ້ນ ກົມຕຳຣວດເສຖກິຈ ໄດ້ຮັບແຈ້ງຄວາມ ຈາກຜູ້ເສັຽຫາຍ ຈຳນວນນຶ່ງວ່າ ຍານາງ ພອນທິບ ໄດ້ສໍ້ໂກງຊັພ ຂອງຜູ້ກ່ຽວ ແລ້ວເອົາໂຕລົບໜີ ອອກຈາກປະເທດລາວ  ໄປປະເທດໄທຍ ໃນວັນທີ 29 ມິຖຸນາ 2022 ຈາກນັ້ນ ກົມຕຳຣວດເສຖິຈ ໄດ້ປະສານສົມທົບ ກັບເຈົ້າໜ້າທີ່ຕຳຣວດໄທຍ ຊ່ອຍຕິດຕາມ ແລະຈັບໂຕຜູ້ກ່ຽວ. ຈົນຮອດວັນທີ 29 ກໍຣະກະດາ ຈຶ່ງສາມາດຈັບໂຕ ຍານາງ ພອນທິບ ແລະ ທ້າວ ອະນຸສິດ ສາມີ ພັລຍາ ແລະ ມອບໃຫ້ເຈົ້າໜ້າທີ່ ຕຳຣວດລາວ ໃນວັນທີ 31 ກໍຣະກະດາ ເພື່ອມາດຳເນີນຄະດີ ໃນປະເທດລາວ.

ສຳລັບຄະດີນີ້ ຖືວ່າຕຳຣວດເສຖກິຈ ປະຕິບັດການ ໄດ້ໄວແຕ່ຍັງມີຈຸດນຶ່ງ ທີ່ສຳຄັນ ພາກສ່ວນກ່ຽວຂ້ອງຍັງບໍ່ໄດ້ຣາຍງານ ເຖິງຊັພສິນ ທີ່ສັງຄົມໃຫ້ຄວາມສົນໃຈ ທີ່ສຸດ ເພາະນັ້ນມັນໝາຍເຖິງ ຜູ້ເສັຽຫາຍຈະໄດ້ເງິນຄືນ ຫຼືບໍ່ ເພາະເງິນ ຈຳນວນດັ່ງກ່າວນັ້ນ ເປັນຈຳນວນຫຼາຍ ແນ່ນອນວ່າ ຕ້ອງກວດຫາ ທີ່ມາມັນໄດ້ ແຕ່ໃນເມື່ອຕຳຣວດ ຍັງບໍ່ເປີດເຜີຍ ຊັພສິນດັ່ງກ່າວ ວ່າມັນຢູ່ໃສກັນແທ້ ກໍເຮັດໃຫ້ຄະດີນີ້ ຍັງບໍ່ສົມບູນ ອີງຕາມອະດີຕ ພນັກງານກົດໝາຽ ເວົ້າກ່ຽວກັບຄະດີ ເຈ້ທິບ ເມື່ອວັນທີ 23 ກັນຍາ ຜ່ານມາ.

ສຳລັບ ຄະດີເຈ້ທິບ ແມ່ນນຶ່ງໃນຄະດີ ຫວຍຕ່ອງໂສ້ ໂດຍມີຜົລຕອບແທນ ດອກເບັ້ຽສູງ ເປັນແຮງຈຸງໃຈຄືກັນ ກັບຄະດີ ຂອງບໍຣິສັດ ພີເອັສ ກໍມີລັກສະນະລະດົມທຶນ ເຂົ້າມາເພື່ອສ້າງທຸຣະກິຈ ຈົນໃນທີ່ສຸດກໍບໍ່ສາມາດ ຈ່າຍດອກເບັ້ຽ ນຳມາເຊິ່ງການລົ້ມ ລະລາຍ ແລະສານປະຊາຊົນ ນະຄອນຫຼວງວຽງຈັນ ກໍໄດ້ຕັດສິນຄະດີ ບໍຣິສັດ ພີເອັສ ເມື່ອວັນທີ 21 ພຶສຈິກາ 2018 ໂດຍຕັດສິນ ຈຳຄຸກ ຍານາງ ສຸກນາລີ ເທບສີເມືອງ ປະທານບໍຣິສັດ ພີເອັສ ແລະ ທ້າວ ປໍເຮີ້ ພ້ອມດ້ວຍພັກພວກ ໂດຍ ຍານາງ ສຸກນາລີ ແລະ ທ້າຍ ປໍເຮີ້ ຖືກຈຳຄຸກ 15 ປີ ປັບໃໝເງິນ 2,856 ລ້ານກີບ. ໃນຂໍ້ຫາຕ້ານ ສປປ ລາວ, ເຕົ້າໂຮມກຸ່ມຄົນ ເພື່ອສ້າງຄວາມປັ່ນປ່ວນ, ສໍ້ໂກງຊັພພົລເມືອງ, ຊື້-ຂາຍ ອາວຸດເສິກ ຜິດກົດໝາຽ, ຄອບຄອງອາວັຍຍະວະ ສັດປ່າຫວງຫ້າມ ແລະ ຟອກເງິນ.

ສ່ວນເຣື່ອງຊັພສິນ ທີ່ຈະສົ່ງຄືນປະຊາຊົນນັ້ນ ຜ່ານມາສາມປີແລ້ວ ຍັງບໍ່ມີຄວາມຄືບໜ້າໃດໆ ທີ່ສຳຄັນຍັງບໍ່ມີ ພາກສ່ວນໃດ ອອກຊີ້ແຈງ ເຖິງເຣື່ອງດັ່ງກ່າວ ຊຶ່ງຍັງມິດງຽບຢູ່. ສ່ວນຜູ້ເສັຽຫາຍຫຼາຍຄົນ ກໍຄົງຍອມຮັບ ສະພາບຄວາມເປັນຈິງວ່າ ບໍ່ໄດ້ເງິນຄືນແນ່ນອນແລ້ວ. ນອກຈາກນີ້ ກໍຍັງມີຄະດີຄ້າຍຄືກັນ ເຊັ່ນ ຫວຍແມັກກີ້, ອາຊ້ຽນເຟສ ລະດົມທຶນກໍ່ສ້າງ ແລະ ດຣີມລີ້ງ ບໍຣິສັດ ທີ່ອ້າງວ່າເປັນ ບໍຣິສັດ ດີຈີຕອລ ລັກສະນະຄືຮຸ້ນ ໂດຍມີເກນກຳໄລ ການຂຶ້ນລົງຂອງກຣາຟ ບໍຣິສັດໃນແຕ່ລະວັນ. ບໍຣິສັດທີ່ກ່າວມານີ້ ລ້ວນແລ້ວແຕ່ ລະດົມທຶນ ເຂົ້າມາ, ຈາກນັ້ນບໍຣິສັດ ກໍລົ້ມລະລາຍ ແລະ ຖືກຈັບ ຈຳຄຸກ ສຸດທ້າຍຜູ້ເສັຽຫາຍ ກໍບໍ່ໄດ້ເງິນຄືນ.

ຄະດີເຈ້ທິບ ກໍເປັນບົດພິສູດ ຂອງຕຳຣວດ ເສຖກິຈລາວວ່າ ຈະປວັດຊໍ້າຮອຍ ຄືກັບຄະດີສໍ້ໂກງ ຊັພພົລເມືອງ ທີ່ຜ່ານມາ ຍັງບໍ່ທັນມີຄຳຕອບ. ປັດຈຸບັນ ກໍມີແຕ່ພຽງ ການສືບສວນ-ສອບສວນ ແລະ ຕັ້ງຂໍ້ຫາ ສໍ້ໂກງຊັພພົລເມືອງ ສ່ວນການຟ້ອງຂຶ້ນສານ ຍັງຈະມີຫຼາຍຂໍ້ຫາ ທີ່ຕາມມາ ແຕ່ເຣື່ອງເງິນຍັງ ບໍ່ມີຄຳຕອບ, ອ້າງອີງ ຈາກຜູ້ເສັຽຫາຍ ທີ່ສອບຖາມ ຕຳຣວດ ທີ່ຕອບຜ່ານ ເຟສບຸກຂອງ ວິທຍຸ ເອເຊັຽເສຣີ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.