ລັດຖະບານກຳປູເຈຍ ຖອນໂຕຈາກຂໍ້ຕົກລົງ ໂຄງການເຂດສາມຫຼ່ຽມ ກຳປູເຈຍ-ລາວ-ຫວຽດນາມ

ລັດຖະບານ ກໍາປູເຈຍ ໄດ້ຂໍຖອນໂຕ ອອກຈາກຂໍ້ຕົກລົງ ເຂດສາມຫ່ລຽມພັດທະນາ ກໍາປູເຈຍ-ລາວ-ຫວຽດນາມ ຫລື CLV ຍ້ອນ ມີບັນຫາທາງດ້ານການເມືອງພາຍໃນປະເທດ ຢ່າງລະອຽດອ່ອນ ຈຶ່ງຂໍຖອນຕົວອອກຈາກ ຂໍ້ຕົກລົງດັ່ງກ່າວນີ້ ໂດຍໄດ້ແຈ້ງ ໃຫ້ທາງລັດຖະບານລາວ ແລະ ລັດຖະບານຫວຽດນາມ ຮັບຮູ້ແລ້ວ, ດັ່ງເຈົ້າໜ້າທີ່ລາວ ທ່ານນຶ່ງ ທີ່ຮູ້ ແລະ ຕິດຕາມກ່ຽວກັບການເມືອງ ຂອງປະເທດກໍາປູເຈຍ ກ່າວຕໍ່ວິທຍຸ ເອເຊັຍເສຣີ ໃນວັນທີ 23 ກັນຍາ ນີ້ວ່າ:

“ແຈ້ງການ ໄປຫາ ກະຊວງການຕ່າງປະເທລາວ ເພາະວ່າ ໄດ້ຍິນວ່າ ທາງການກໍາປູເຈຍ ມີບັນຫາເລື້ອງພັກ ຝ່າຍຄ້ານເພິ່ນ ເອົາບັນຫາດັ່ງກ່າວໂຈມຕີລັດຖະບານ ຫັ້ນນ່າ ມີແຕ່ຖອນໂຕຈາກ CLV ແຫລະ ອັນອື່ນໆ ກະຍັງຄືເກົ່າຢູ່.” 

ທ່ານກ່າວຕື່ມວ່າ ສໍາລັບການຖອນຕົວ ຂອງ ລັດຖະບານ ກໍາປູເຈຍ ໃນເທື່ອນີ້ ຈະມີຜົນກະທົບຂໍ້ຕົກລົງດັ່ງກ່າວ ຫລືບໍ່ນັ້ນ ທ່ານເອງກໍຍັງບໍ່ສາມາດຕີລາຄາ ຫລື ຄາດເດົາໄດ້ ມີແຕ່ຕ້ອງໄດ້ຕິດຕາມເພີ່ມຕື່ມ ແຕ່ກໍບໍ່ແນ່ໃຈຄືກັນວ່າ ຫລັງຈາກລັດຖະບານ ກໍາປູເຈຍ ມີການແກ້ໄຂ ບັນຫາເລື້ອງການເມືອງໄດ້ແລ້ວ ກໍອາດກັບມາຮ່ວມຢູ່ ໃນຂໍ້ຕົກລົງ ເຂດສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ ຄືເກົ່າກໍໄດ້.

ກ່ອນໜ້ານີ້ ເມື່ອວັນທີ 20 ກັນຍາ ທີ່ຜ່ານມາ ທ່ານສົມເດັດ ເຕໂຊ ຮຸນເຊນ ປະເທດກໍາປູເຈຍໄດ້ກ່າວ ຜ່ານຖະແຫລ່ງການ ຜ່ານທາງສື່ສັງຄົມອອນລາຍ ຂອງທ່ານວ່າ:

“ຜ່ານມາ ການປືກສາກັບທ່ານ ຮຸນ ມາແນັດ ນາຍຍົກ ລັດຖະມົນຕຣີ ກໍາປູເຈຍແລ້ວ ທ່ານໄດ້ຕັດສິນໃຈ ຂໍຖອນຕົວອອກຈາກ ຂໍ້ຕົກລົງເຂດສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ ຕັ້ງແຕ່ວັນທີ 20 ກັນຍາ ນີ້ເປັນຕົ້ນໄປ, ເຊິ່ງທີ່ຜ່ານມາ ກຸ່ມຕໍ່ຕ້ານລັດຖະບານ ໄດ້ໃຊ້ຂໍ້ຕົກລົງ ດັ່ງກ່າວນີ້ ເປັນເຄື່ອງມືໃນການໂຈມຕີ ລັດຖະບານ ກໍາປູເຈຍ ຕາມປະຕິບັດການ ທີ່ເອີ້ນວ່າ “ການກໍ່ຈະລາຈົນ 18 ສິງຫາ” ເຮັດໃຫ້ປະຊາຊົນ ເກີດຄວາມສັບສົນ ຕໍ່ ລັດຖະບານ ແຕ່ ລັດຖະບານ ກໍາປູເຈຍ ກໍຍັງຮ່ວມມືປົກກະຕິ ກັບ ອາຊຽນ ແລະ ພັນທະມິດອື່ນໆ ທົ່ວໂລກ.”

ໃນຂະນະ ທີ່ທ່ານ ຮຸນ ມາແນັດ ນາຍຍົກ ລັດຖະມົນຕີ ກໍາປູເຈຍ ໄດ້ກ່າວ ເມື່ວັນທີ 5 ກັນຍາ 2024 ວ່າ ທາງການກໍາປູເຈຍ ສາມາດຈັບກຸມລັດຖະບານ ຕາມປະຕິບັດການທີ່ເອີ້ນວ່າ “ການກໍ່ຈາລາຈົນ 18 ສິງຫາ” ໄດ້ທັງໝົດ 66 ຄົນ ແຕ່ກໍໄດ້ປ່ອຍຕົວໄປແລ້ວ 57 ຄົນ ຍັງເຫລືອແຕ່ 9 ຄົນ ທີ່ສົ່ງໃຫ້ສານຕັດສິນໂທດ.

ສ່ວນຫລາຍກະຊວງ ຂອງ ລັດຖະບານລາວ ທີ່ກ່ຽວຂ້ອງກັບຂໍ້ຕົກລົງ ເຂດສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ ເປັນຕົ້ນ ກະຊວງແຜນການ ແລະ ການລົງທຶນ ກໍບໍ່ໄດ້ຮັບແຈ້ງການດັ່ງກ່າວ ຢ່າງເປັນທາງການເທື່ອ ຈຶ່ງຍັງບໍ່ທັນຮູ້ຄັກແນ່ ກ່ຽວກັບ ແຜນການໃນຕໍ່ໜ້າ ຂອງຂໍ້ຕົກລົງດັ່ງກ່າວນີ້ວ່າ ຈະມີການປ່ຽນແປງແນວໃດ ຫລືບໍ່, ດັ່ງ ເຈົ້າໜ້າທີ່ກະຊວງແຜນການ ແລະ ການລົງທຶນ ທ່ານນຶ່ງ ກ່າວວ່າ:

“ໂອ ອັນນີ້ເຮົາບໍ່ຮູ້ຄືກັນເດີ ເຈົ້າ ອັນນີ້ເຮົາບໍ່ໄດ້ຮັບຮູ້ເດີ້ ໄດ້ຍິນຂ່າວຊື່ໆ ແຕ່ວ່າຍັງບໍ່ເຫັນເອກກະສານ ຫຍັງເທື່ອ ເຈົ້າ ບໍ່ແນ່ໃຈຄືກັນ ລອງລົບກວນໂທຫາຜະແນກທີ່ກ່ຽວຂ້ອງເດີ້.” 

ທາງດ້ານເຈົ້າໜ້າທີ່ລາວ ຢູ່ແຂວງຈໍາປາສັກ, ອັດຕະປື, ສາລະວັນ ແລະ ເຊກອງ ທີ່ເຮັດວຽກຢູ່ຄະນະຂໍ້ຕົກລົງເຂດ ສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ ສ່ວນໃຫຍ່ກໍບໍ່ສາມາດ ອອກຄໍາເຫັນໄດ້ຢ່າງຄັກແນ່ ກ່ຽວກັບການທີ່ ລັດຖະບານກໍາປູເຈຍ ຂໍຖອນຕົວອອກຈາກຂໍ້ຕົກລົງ ດັ່ງກ່າວນີ້ ມີແຕ່ຕິດຕາມຂ່າວ ຄວາມເຄືືອນໄຫວ ເທົ່ານັ້ນ, ເນື່ອງຈາກ ເປັນວຽກຂອງພາກສ່ວນ ຮ່ວມມື ລະຫວ່າງປະເທດ, ດັ່ງ ເຈົ້າໜ້າທີ່ແຂວງຈໍາປາສັກ ທ່ານນຶ່ງ ກ່າວວ່າ:

“ໂຕນີ້ໃນແຜນພັດທະນາເສດຖະກິດນີ້ ເຮົາກໍຢູ່ໃນຄະນະຫ້ອງການ ເພາະວ່າເຮົາບໍ່ໄດ້ປະຊຸມນໍາເພີ່ນ ມີແຕ່ເຈົ້າເມືອງ ຮອງເຈົ້າເມືອງເພີ່ນະຊຸມ ເຮົາບໍ່ໄດ້ຮູ້ ເພາະວ່າ ບໍ່ໄດ້ປະຊຸມຮ່ວມກັບດ້ານ ລະຫວ່າງປະເທດ.”

ເຖິງຢ່າງໃດກະຕາມ ອະດິດເຈົ້າໜ້າທີ່ລາວ ທ່ານນຶ່ງ ກ່າວວ່າ ເຖິງແມ່ນວ່າ ປະເທດກໍາປູເຈຍ ໄດ້ຖອນຕົວອອກຈາກຂໍ້ຕົກລົງ ເຂດ ສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ ແລ້ວກໍຕາມ ແຕ່ກໍເຊື່ອວ່າຍັງມີການສືບຕໍ່ຮ່ວມມື ແລະ ພົວພັນ ກັບ ລັດຖະບານລາວ ໃນຫລາຍດ້ານຢູ່ຄືເກົ່າ ໃນຖານະ ປະເທດເພື່ອນບ້ານ ແຕ່ອາດມີການປ່ຽນແປງ ໃນບາງດ້ານ ໄປຕາມຍຸກສະໄໝຊື່ໆ ດັ່ງ ທ່ານກ່າວວ່າ:

“ເອີ ມັນກະຊິຄ່ອຍປັບປຸງກັນໄປຫັ້ນແຫລະ ເພາະຈັ່ງໃດ ພວກເຮົາກະຢູ່ໃນກຸ່ມອາຊຽນນໍາກັນ ກະຊິຄ່ອຍເວົ້າກັນແຫລະ ການພັດທະນາສາມຫລ່ຽມເດ້ ຈັ່ງໃດເຮົາກະປັບປຸງກັນ ຄືກັນກັບລາວ ກັບ ຫວຽດນາມ ມັນກະເຄີຍເຮັດວຽກນໍາກັນ ແຕ່ໃດມາ ເດ້.” 

ສໍາລັບຂໍ້ຕົກລົງ ເຂດສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ CLV ໄດ້ເລີ້ມກໍ່ຕັ້ງຂຶ້ນເມື່ອ ປີ 1999 ມີເນື້ອທີ່ທັງໝົດ 144,341 ກິໂລແມັດມົນທົນ ໃນພື້ນທີ່ 13 ແຂວງຂອງ 3 ປະເທດ, ຢູ່ລາວ ປະກອບດ້ວຍ 4 ແຂວງ ຄື ຈໍາປາສັກ, ສາລະວັນ, ອັດຕະປື ແລະ ເຊກອງ, ຄວາມຮ່ວມມື ໃນແຜນການດັ່ງກ່າວປະກອບດ້ວຍ ດ້ານຮັກສາຄວາມປອດພັຍ-ການທູດ, ດ້ານການຂົນສົ່ງ-ໂດຍສານ, ອຸດສາຫະກັມ, ການກະເສດ, ການລົງທຶນ, ການປົກປ້ອງສິ່ງແວດລ້ອມ. 

ກ່ອນໜ້ານີ້ ເມື່ອວັນທີ 1 ມີນາ 2024 ຢູ່ແຂວງອັດຕະປື ໄດ້ຈັດກອງປະຊຸມ ຄະນະກໍາມະການ ປະສານງານຮ່ວມ ເຂດສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ ຄັ້ງທີ 13 ໂດຍມີຄະນະຈາກ 3 ປະເທດເຂົ້າຮ່ວມ ໂດຍໄດ້ພິຈະລະນາ ບັນຫາສໍາຄັນຕ່າງໆ ຂອງຂອບການຮ່ວມມື CLV ເຊິ່ງມີເປົ້າໝາຍຮ່ວມກັນ ເພື່ອເປັນເວທີສໍາຄັນ ໃນການຊຸກຍູ້ພັດທະນາ ແລະ ຫລຸດຜ່ອນຄວາມທຸກຍາກ ຂອງເຂດ ສາມຫລ່ຽມພັດທະນາ ແລະໃນທ້າຍປີນີ້ ກໍຈະມີການຈັດກອງປະຊຸມສຸດຍອດ CLV ຄັ້ງທີ 12 ຢູ່ປະເທດກໍາປູເຈຍ ແຕ່ກໍໄດ້ຖືກຍົກເລີກໄປແລ້ວ ຈາກການຂໍຖອນຕົວ ຂອງກໍາປູເຈຍ.