ຄົນຈີນ ໃຊ້ອາວຸດດາບ ຂູ່ຟັນ ຜູ້ຮ່ວມງານຄົນລາວ

ອຸ່ນແກ້ວ
2021.12.16
Share on WhatsApp
Share on WhatsApp
ຄົນຈີນ ໃຊ້ອາວຸດດາບ ຂູ່ຟັນ ຜູ້ຮ່ວມງານຄົນລາວ ຄົນງານຈີນ ໃຊ້ດາບ ຂູ່ຟັນ ຄູ່ຮ່ວມງານ ຄົນລາວ ເມືອງໂພນໂຮງ ແຂວງ ວຽງຈັນ ເດືອນ ທັນວາ 2021.
ນັກຂ່າວ ພົລເມືອງ

ໃນ​ອາ​ທິດນີ້, ຄົນ​ງານ​ຈີນ​ຜູ່​ນຶ່ງ ທີ່​ເຮັດ​ວຽກ​ຢູ່​ບໍ​ຣິ​ສັດ ຮັບ​ເໝົາ​ຕິດ​ຕັ້ງ​ສາຍ​ໄຟ​ຟ້າ ຕາມ​ແລວ​ທາງ​ຣົ​ຖ​ໄຟ​ລາວ-ຈີນ ຢູ​ເຂດ​ບ້ານ​ນາ​ເລົາ ຫຼັກ 52 ເມືອງ​ໂພນ​ໂຮງ ແຂວງວຽງ​ຈັນ ໄດ້ໃຊ້​ດາບຂູ່​ຈະ​ຟັນ​ຄົນ​ງານ​ລາວທີ່​ເຮັດ​ວຽກ​ນຳ​ກັນ. ສາ​ເຫດ ​ຍ້ອນ​ວ່າ ຄົນ​ງານ​ຈີນ​ຄົນ​ດັ່ງ​ກ່າວ ດື່ມ​ເຫຼົ້າ​ເມົາຈົນ​ຂາດ​ສະ​ຕິ ແລະ ມັກ​ຫາ​ເຣື່ອງ ຫຼື ດູ​ຖູກ​ຄົນ​ງານລາວ ຊຶ່ງຊາວ​ບ້ານ​ທີ່​ເຫັນ​ເຫດ​ການ ໄດ້​ຖ່າຍ​ວີ​ດິ​ໂອ ​ເຫດ​ການ​ດັ່ງ​ກ່າວ​ໄວ້ ແລະ ໄດ້​ເຜີຍ​ແຜ່​ອອກ​ທາງ​ສື່​ສັງ​ຄົມ​ອອນ​ລາຍນ໌. ຊາວ​ບ້ານ​ທີ່​ເຫັນ​ເຫດ​ການ ໄດ້​ກ່າວ​ຕໍ່ວິທຍຸ​ເອ​ເຊັຽ​ເສ​ຣີ ໃນ​ວັນ​ທີ 16 ທັນ​ວາ ວ່າ:

ຈີນຫັ້ນລາວມັກເມົາເຫຼົ້າ ໂວຍວາຍ ເປັນຄົນແບບຂ້ອນຂ້າງຢຽບຢາມ ດູຖູກຄົນຫັ້ນນ່າ ເມົາມາແລ້ວ ເວົ້າສຽງດັງອີ່ຫຍັງຫັ້ນນ່າ ໂວຍວາຍແລ້ວ ຜູ້ນັ້ນຫ້າມ ຜູ້ນີ້ຫ້າມກະບໍ່ໄດ້ນ່າ ກໍເລີຍໄປຖືມີດອອກມາ ຊິຟັນຊິຕີຂະເຈົ້າຫັ້ນນ່າ.”

ໃນ​ຂະ​ນະ​ທີ່​ຄົນ​ງານ​ລາວ ​ທີ່​ເຫັນ​ເຫດ​ການ​ຜູ່​ນຶ່ງ ທີ່​ຂໍ​ສງວນ​ຊື່ແລະສຽງ ໄດ້​ກ່າວ​ວ່າ “ຄົນ​ງານ​ຈີນ​ຄົນ​ດັ່ງ​ກ່າວ ມັກ​ຂົ່ມ​ຂູ່ ຄົນ​ງານ​ລາວ​ຫຼາຍ​ເທື່ອ ເນື່ອງ​ຈາກ ເຂົາ​ເຈົ້າ​ມັກ​ດື່ມເຫຼົ້າ​ຫຼາຍ ແລະກໍ​ມັກ​ທ້າ​ທາຍ​ໃສ່​ຄົນ​ງານ​ລາວ ລວມ​ທັງ​ຂູ່​ຈະ​ຕີ​ຄົນ​ງານ​ລາວ​ຢູ່​ເລື້ອຍໆ ຫຼັງ​ຈາກ​ເຫດ​ການ​ດັ່ງ​ກ່າວ ຫົວ​ໜ້າ​ຄົນ​ງານ​ຈີນ ກໍ​ໄດ້​ໂທ​ຕິດ​ຕໍ່​ມາ​ຂໍ​ໂທດ​ ຄົນ​ງານ​ລາວ​ທີ່​ເປັນ​ຄູ່​ກໍ​ລະ​ນີ ພ້ອມ​ທັງ​ບອກວ່າ ຈະ​ລົງ​ໂທດ​ຄົນ​ງານ​ຈີນ ​ທີ່​ເຮັດ​ບໍ່​ເໝາະ​ສົມ ແຕ່​ວ່າ ຜ່ານ​ໄປ​ຫຼາຍມື້, ຄົນ​ງານ​ລາວ ກໍ​ຍັງ​ເຫັນ​ຄົນ​ງານ​ຈີນ​ ຄົນ​ດັ່ງ​ກ່າວ ເຮັດ​ວຽກ​ຢູ່​ປົກ​ຕິ ບໍ່​ໄດ້​ຖືກ​ສັ່ງ​ພັກ​ງານ​ແຕ່​ຢ່າງ​ໃດ ຊຶ່ງ​ຄົນ​ງານ​ລາວ​ຫຼາຍ​ຄົນ ກໍ​ຢ້ານ​ວ່າ ເຂົາ​ເຈ້າ​ຈະ​ເມົາ​ເຫຼົ້າ ແລ້ວ​ອາ​ຈ​ລົງ​ມືທຳ​ຮ້າຍ​ຄົນ​ລາວ​ຈົນ​ເຖິງ​ຂັ້ນ​ເສັຽ​ຊີ​ວິດ ຖ້າບໍ່​ມີ​ການ​ແກ້​ໄຂ​.”

ຄົນ​ງານ​ລາວ ທ່ານນີ້ ກ່າວ​ຕື່ມ​ວ່າ ສຳ​ລັບ​ຄົນ​ງານ​ຈີນ​ດັ່ງ​ກ່າວ ແມ່ນ​ຄົນ​ງານ​ທີ່​ຂຶ້ນ​ກັບ​ບໍ​ຣິ​ສັດຮັບ​ເໝົາ ຕິດ​ຕັ້ງ​ສາຍ​ໄຟ​ຟ້າ​ຊື່ໆ ບໍ່​ໄດ້​ກ່ຽວ​ຂ້ອງ ຫຼື ຂຶ້ນ​ກັບ​ຜູ້​ຮັບເໝົາຂອງ​ໂຄງ​ການ ​ທາງ​ຣົ​ຖ​ໄຟ​ລາວ-ຈີນ ແຕ່​ຢ່າງ​ໃດ.ຢູ່​ເຂດ​ດັ່ງ​ກ່າວ ສ່ວນ​ຫຼາຍ​ຈະ​ມີ​ຄົນ​ທີ່​ເປັນ​ຫົວ​ໜ້າ​ຄຸມ​ງານ​ ແຕ່ກໍ​ມີ​ຄົນ​ງານ​ຈີນ​ຈຳ​ນວນ​ນຶ່ງ​ ເຮັດ​ວຽກ​ຮ່ວມ​ກັບ​ຄົນ​ງານ​ລາວ. ຊາວ​ບ້ານ​ທີ່​ຢູ່​ໃກ້​ຄຽງ ໄດ້​ກ່າວ​ວ່າ:

ຄົນຈີນຢູ່ຫັ້ນຫວະ ມີແຕ່ຫົວໜ້າເຂົານ່າ ບ່ອນໂຄງການຣົໄຟລາວ-ຈີນ ຄົນຈີນກັບຄົນລາວ.”

ກ່ຽວ​ກັບ​ເຫດ​ການນີ້ ວິທຍຸເອ​ເຊັຽ​ເສ​ຣີ ໄດ້​ຕິດ​ຕໍ່​ຫາ​ຫ້ອງ​ການ ປ​ກ​ສ ເມືອງ​ໂພນ​ໂຮງ ແລະ ຫ້ອງ​ການ​ແຮງ​ງານ ແລະ ສວັສດີ​ການ​ສັງ​ຄົມ ເມືອງ​ໂພ​ນ​ໂຮງ ເພື່ອ​ຖາມ​ຣາຍ​ລະ​ອຽດ​ເພີ່ມ​ຕື່ມ ແຕ່​ເຈົ້າ​ໜ້າ​ທີ່​ກ່ຽວ​ຂ້ອງ ກ່າວ​ພຽງ​ແຕ່​ວ່າ ຍັງ​ບໍ່​ທັນ​ໄດ້​ຮັບ​ຣາຍ​ງານ​ຈາກ​ພາກ​ສ່ວນ​ໃດ ຈຶ່ງ​ຍັງ​ບໍ່​ສາ​ມາດ​ອອກ​ຄຳ​ເຫັນ​ແນວ​ໃດ​ໄດ້.

ຄົນ​ງານ​ຈີນ​​ຈຳ​ນວນບໍ່​ໜ້ອຍ ທີ່​ເຮັດ​ວຽກ​ຢູ່​ທາງ​ຣົ​ຖ​ໄຟ ​ມັກ​ພາ​ກັນ​ດື່ມ​ເຫຼົ້າເມົາ ​ຫຼັງ​ຈາກ​ເລີກວຽກ ແລະໃນ​ເວ​ລາ​ເມົາ​ ​ມັກ​ເວົ້າໃຫ້​ຄົນ​ງານ​ລາວ. ຄົນ​ງານ​ລາວ​ທີ່​ເຄີຍ​ເຮັດ​ວຽກ​ ກໍ່​ສ້າງ​ທາງ​ຣົ​ຖ​ໄຟ​ ລາວ-ຈີນ ໄດ້​ກ່າວ​ວ່າ:  

ເບິ່ງແລ້ວ ເຂົາບໍ່ມັກຄົນລາວແນວໃດ ແບບວ່າ ຄືບໍ່ມັກຄົນລາວແນວໃດ ແບບວ່າ ຄືດູຖູກແບບນີ້ນ່າ ຢາກເຮັດແບບນີ້ໃສ່ນ່າ ບໍ່ຮູ້ສາເຫດຄືກັນ ຂ້ອຍເຄີຮັບວຽກ ແລ້ວຂ້ອຍເຄີຍເຫັນຫຼາຍຄົນ ຫຼາຍບ່ອນ ບາງຄົນແລ້ວ ຄົນດີເຂົາກໍດີແທ້.”

ເຫດ​ການ​ດັ່ງ​ກ່າວ ເຮັດ​ຄົນ​ລາວ​ເຫັນແລ້ວ​ຮັບບໍ່​ໄດ້. ເຈົ້າ​ໜ້າ​ທີ່​ລາວ​ທ່ານ​ນຶ່ງ ໄດ້​ກ່າວ​ວ່າ:

ອັນນັ້ນກະເຫັນຢູ່ ບາງເທື່ອນີ້ກະຕີຄົນລາວແລ້ວ ກະຊິບໍ່ດີແລ້ວ ຄັນເຮັດແນວນັ້ນ ເນາະ ຕ່າງຊາດກັນເດ້ເນາະ ກະຊິຜິດແຫຼະເນາະ ຄົນຄືກັນເນາະ ຄົນເປັນຄົນປະເທດໃຫຍ່ ເພິ່ນມາດູຖູກເຮົາກໍບໍ່ໄດ້.”

ກ່ອນ​ໜ້າ​ນີ ກໍ​ເຄີຍ​ເກີດ​ເຫດ​ການຄົນ​ຈີນ ທຳ​ຮ້າຍ​ຮ່າງ​ກາຍ​ຄົນ​ງານ​ລາວ ເປັນ​ຕົ້ນ ໃນ​ວັນ​ທີ 22 ພຶ​ສ​ຈິ​ກາ 2021 ທີ່​ຜ່ານ​ມາ ຄົນ​ງານ​ລາວ​ຈຳ​ນວນນຶ່ງ ທີ່​ເຮັດ​ວຽກ​ຢູ່​ໂຄງ​ການ ກໍ່​ສ້າງ​ທາງ​ຣົ​ຖ​ໄຟ​ ລາວ-ຈີນ ຢູ່ເຂດ ​ບ້ານ​ທ່າ​ນາ​ແລ້ງ-ບ້ານ​ດົງ​ໂພນ​ແຮ່ ເມືອງ​ຫາດ​ຊາຍ​ຟອງ ນະ​ຄອນ​ຫຼວງວຽງ​ຈັນ ຖືກ​ນາຍ​ຈ້າງ​ຈີນ​ທຳ​ຮ້າຍ​ຮ່າງ​ກາຍ ຍ້ອນບໍ່​ພໍ​ໃຈ​ທີ່​ຄົນ​ງານ​ລາວ ພາ​ກັນ​ຢຸດ​ເຮັດ​ວຽກ​ ແລ້ວ​ໄປ​ທວງ​ເງິນ​ຄ່າ​ແຮງ​ງານ ​ນຳ​ນາຍ​ຈ້າງ​ຈີນ. ອີກ​ເຫດ​ການ​ນຶ່ງ​ ກໍ​ຄື ໃນ​ວັນ​ທີ 30 ຕຸ​ລາ 2021 ທີ່​ຜ່ານ​ມາ, ຫົວ​ໜ້າ​ຄົນ​ຈີນ ແລະ ຜູ້​ຄຸມ​ງານ​ອີກ 10 ຄົນ ທີ່​ເຮັດ​ວຽກ​ຢູ່​ສວນ​ກ້ວຍ​ຈີນ ຢູ່​ເຂດ​ບ້ານ​ທ່​າ​ເຮືອ ແລະ ບ້ານ​ຫາ​ດືນ ເມືອງ​ບໍ​ລິ​ຄັນ ແຂວງ ​ບໍ​ລິ​ຄຳ​ໄຊ ພາ​ກັນ​ຖື​ໄມ້​ຄ້ອນ ແລະມີດ​-ພ້າ ເຂົ້າ​ໄປ​ຂູ່​ພໍ່​ຄ້າ-ແມ່​ຄ້າຄົນ​ລາວ ທີ່​ຂາຍ​ເຄື່ອງ​ຢູ່​ຕໍ່​ໜ້າ​ສວນ​ກ້ວຍດັ່ງ​ກ່າວ ຍ້ອນບໍ່​ພໍ​ໃຈ​ທີ່​ຄົນ​ລາວ​ມາ​ຕັ້ງ​ຮ້ານ​ຂາຍ​ເຄື່ອງ ​ຢູ່​ຕໍ່​ໜ້າ​ສວນ​ກ້ວຍ ແລະບໍ່​ຢາກ​ໃຫ້​ຄົນ​ງານ ​ຢູ່​ໃນ​ສວນ​ກ້ວຍອອກ​ມາ​ຊື້​ເຄື່ອງ​ນຳ​ ​ພໍ່​ຄ້າ-ແມ່​ຄ້າ ຄົນ​ລາວ ແລະຄົນ​ຈີນ​ຕ້ອງ​ການ​ໃຫ້​ຄົນ​ງານ​ລາວ ຊື້​ເຄື່ອງ​ຄົນ​ຈີນ ຢູ່​ສ​ະເພາະ​ໃນ​ສວນ​ກ້ວຍເທົ່າ​ນັ້ນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ