ໝູ່ຂອງຄົນງານລາວຂໍໃຫ້ ກົດດັນ ທາງການ

ອະວາຣີ
2017.03.06
F-embassy ວັນທີ 31 ສິງຫາ 2016 ຜູ້ຕາງໜ້າ ຂະບວນການ ຊາວໜຸ່ມລາວ ເພື່ອ ສິດທິມະນຸດ ທີ່ເຮັດວຽກ ຢູ່ປະເທດໄທ ໄດ້ຍື່ນໜັງສືໃຫ້ ເຈົ້າໜ້າທີ່ ສະຖານທູດລາວ ທີ່ບາງກອກ ປະເທສໄທ
RFA

ໝູ່ເພື່ອນຂອງຄົນງານລາວ ສາມຄົນ ທີ່ຖືກກັກຂັງ ຍ້ອນຂຽນຂໍ້ຄວາມຕຳນິຕິຕຽນ ຣັຖບານລາວ ຜ່ານທາງເຟສບຸກ ຮຽກຮ້ອງໃຫ້ ທາງການ ລາວ ປ່ອຍຕົວ ຄົນງານທັງສາມ ແລະ ຂໍຮ້ອງໃຫ້ ສະຫະປະຊາຊາດ ກົດດັນ ຣັຖບານລາວ ໃຫ້ປ່ອຍຕົວ ຄົນງານ ທັງສາມ ເຊັ່ນກັນ. ດ່ັງ ຄົນງານ ຜູ້ນຶ່ງທີ່ເປັນໝູ່ ໃກ້ຊິດຂອງ ຄົນງານ ທີ່ຖືກກັກຂັງ ທັງສາມ ກ່າວກັບ ວິທຍຸ ເອເຊັຽເສຣີ ຂອງພວກເຮົາ ໃນວານນີ້ວ່າ:

“ຂ້າພະເຈົ້າ ຢາກຮຽກຮ້ອງ ໃຫ້ຣັຖບານ ປ່ອຍໂຕ ທັງສາມຄົນ ໃຫ້ເປັນອິສຣະ ເພາະວ່າ ທັງສາມຄົນ ບໍ່ສົມຄວນ ທີ່ຈະຖືກຈັບ ພຽງແຕ່ມີ ຄວາມເຫັນ ທີ່ແຕກຕ່າງ ກັບ ຣັຖບານລາວ ໂດຍທີ່ບໍ່ມີ ຄວາມຮຸນແຮງ ອີຫຍັງ. ພວກເຮົາ ຢູ່ໃນປະເທດໄທນີ້ ຈະມີຈັດກິຈກັມ ຍື່ນໜັງສື ຮຽກຮ້ອງໃຫ້ ອົງການ ສະຫະປະຊາຊາດ ຊ່ອຍກົດດັນ ຣັຖບານລາວ ໃຫ້ປ່ອຍໂຕ ໝູ່ເຮົາທັງສາມ ຄົນນັ້ນ”.

ສ່ວນພໍ່ແມ່ພີ່ນ້ອງ ຂອງຄົນງານທັງສາມ ດົນໆກໍໄປຢ້ຽມຢາມ ແລະ ສົ່ງອາຫານໄປໃຫ້ລູກ ຂອງພວກເຂົາ ຢູ່ຄຸກໃນ ນະຄອນຫຼວງວຽງຈັນ ຢູ່. ພີ່ນ້ອງໃກ້ຊິດ ຂອງຄົນງານ ຜູ້ນຶ່ງ ກ່າວກັບ ນັກຂ່າວ ວິທຍຸ ເອເຊັຽເສຣີ ເມື່ອອາທິດ ແລ້ວວ່າ:

“ພໍ່ແມ່ພວກເຂົາ ກໍຢາກໄປຢຽມລູກ ເລື້ອຍໆຢູ່ ແຕ່ບໍ່ມີເງິນ ເພື່ອເດີນທາງ ແລະປະກອບ ເອກກະສານ. ອີກຢ່າງນຶ່ງ ຖ້າໄປຢ້ຽມ ພວກເຂົາ ກໍບໍ່ໄດ້ຂ່າວ ຄືບໜ້າຫຍັງ ກ່ຽວກັບ ການດຳເນີນ ຄະດີເລີຍ ເຈົ້າໜ້າທີ່ ເພິ່ນມີແຕ່ ບອກວ່າ ໃຫ້ລໍຖ້າ ໃຫ້ລໍຖ້າ ມັນແມ່ນ ຄະດີ ການເມືອງ ມັນຂື້ນກັບ ທາງຂັ້ນເທິງ ເພິ່ນເປັນຜູ້ ຕັດສິນ”.

ພີ່ນ້ອງຄົນນັ້ນຈົ່ມວ່າ:

“ພໍ່ແມ່ພີ່ນ້ອງຜູ້ໃດ ກໍອຸກອັ່ງ ບໍ່ຮູ້ຈະຊ່ວຍລູກ ຂອງຕົນແນວໃດ ໄປຢາມລູກເທື່ອໃດ ກໍມີແຕ່ຂໍຮ້ອງໃຫ້ ເຈົ້າໜ້າທີ່ ພິຈາຣະນາ ຕັດສິນ ຄະດີ ໃຫ້ໄວໆແດ່.”

ທາງການລາວ ຈັບແລະກັກຂັງ ຄົນງານລາວ ສາມຄົນຄື: ທ້າວ ສຸການ ໃຈທັດ, ທ້າວ ສົມພອນ ພິມມະສອນ ແລະ ນາງຫລອດຄຳ ທັມມະວົງ ເປັນເວລາ ນຶ່ງປີແລ້ວ ເພາະພວກເຂົາ ຂຽນໂຈມຕີ ຣັຖບານ ຜ່ານທາງ ສື່ສັງຄົມອອນລາຍ ແຕ່ຈົນເຖິງ ປັດຈຸບັນ ເຈົ້າໜ້າທີ່ ທາງການ ກໍຍັງບໍ່ທັນ ພິຈາຣະນາ ຕັດສິນຄະດີ ພວກເຂົາເທື່ອ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.