ເຂື່ອນຈະກະທົບສິ່ງແວດລ້ອມ: IRN

ສຸພັດຕາ
2019-04-04
ອີແມວລ໌
ຄໍາເຫັນ
Share
ພິມ
ດຣ. ດາວວົງ ພອນແກ້ວ ຫົວໜ້າກົມນະໂຍບາຍ ແລະ ແຜນພລັງງານ ກະຊວງພລັງງານ ແລະບໍ່ແຮ່ ສປປ ລາວ
ດຣ. ດາວວົງ ພອນແກ້ວ ຫົວໜ້າກົມນະໂຍບາຍ ແລະ ແຜນພລັງງານ ກະຊວງພລັງງານ ແລະບໍ່ແຮ່ ສປປ ລາວ
RFA/PN

ອົງການແມ່ນໍ້າສາກົນ ຣາຍງານຜົນສຶກສາ ໂດຍຄນະກັມມາທິການ ແມ່ນໍ້າຂອງສາກົນ ຫຼື MRC ໃນວັນທີ 3 ເມສາ ທີ່ສລຸບວ່າການສ້າງ ເຂື່ອນໄຟຟ້າຂນາດໃຫຍ່ທັງ 9 ແຫ່ງ ໃສ່ແມ່ນໍ້າຂອງ ແລະອີກ 120 ແຫ່ງ ໃສ່ລໍານໍ້າສາຂາ ທີ່ ສປປລາວ ມີແຜນສ້າງ ໄປຮອດປີ 2040 ນັ້ນ. ຈະສົ່ງຜົນກະທົບຢ່າງຫຼວງຫຼາຍ ຕໍ່ສິ່ງແວດລ້ອມ, ຝຸງປາ ແລະປະຊາຊົນ.

ຜົນການສຶກສານີ້ເຣີ້ມໃນປີ 2012 – 2017 ໄດ້ສລຸບວ່າການສ້າງເຂື່ອນ 129 ແຫ່ງໃສ່ແມ່ນໍ້າຂອງ ແລະລໍານໍ້າສາຂາຈະເຮັດໃຫ້ປະຣິມານ ຝຸ່ນຕົມ ທີ່ຊ່ອຍເພີ້ມແຮ່ທາດທີ່ມີປະໂຫຍດ ຕໍ່ການເຮັດການກະສິກັມ, ການປະມົງ ແລະຄຸນນະພາບ ຂອງນໍ້າຫຼຸດລົງ 97,1%, ທັງຍັງເປັນ ອຸປສັກຕໍ່ການອົພຍົບ ຂອງປະຊາກອນປານໍ້າຂອງ ໃຫ້ຫຼຸດລົງ 35-40% ພາຍໃນ ປີ 2020 ແລະຫຼຸດຕື່ມອີກເຖິງ 40-80% ໃນປີ 2040, ຊຶ່ງສົ່ງຜົນເສັຍຫາຍ ຕໍ່ຣະບົບເສຖກິຈ ດ້ານການປະມົງຂອງໄທ 55%, ລາວ 50%, ກັມພູຊາ 35% ແລະວຽດນາມ 30% ຄິດເປັນເງິນ ຫຼາຍຕື້ໂດລ່າ ສະຫະຣັຖ.

ກ່ຽວກັບເຣື່ອງທີ່ວ່ານີ້ ທ່ານ ດາວົງ ພອນແກ້ວ ອະທິບໍດີ ກະຊວງພລັງງານແລະບໍ່ແຮ່ ຂອງລາວ ຍັງບໍ່ມີຄໍາເຫັນຫຍັງ ຕໍ່ແຈ້ງການດັ່ງກ່າວ ນັ້ນເທື່ອ, ດັ່ງທ່ານກ່າວຕໍ່ ວິທຍຸເອເຊັຍເສຣີ ໃນວັນທີ່ 4 ເມສາ ນີ້ວ່າ:

“ໂອ້ອັນນີ້ນິ່ ຄືຊິບໍ່ມີຄໍາເຫັນຫຍັງໄດ້ເທື່ອເດີ້, ເພາະວ່າມັນເປັນເຣື່ອງເກົ່າ ແລ້ວພວກເຮົາບໍ່ສາມາດໃຫ້ຄໍາເຫັນໄດ້, ໃຫ້ຂະເຈົ້າຣາຍງານໂລດ, ພວກເຮົາບໍ່ມີຄໍາເຫັນຫຍັງເດີ້, ເພາະວ່າ ບໍ່ມີບົດຣາຍງານຫຍັງ, ເຮົາບໍ່ຮູ້, ບໍ່ຮູ້ຫຍັງນະ, ບໍ່ຮູ້ເຣື້ອງໃດ໋.”

ຕາມແຜນ ໂຄງການສ້າງເຂື່ອນໃສ່ແມ່ນໍ້າຂອງ ທັງ 9 ແຫ່ງໃນລາວ, ປັດຈຸບັນ ສ້າງໄປແລ້ວ 2 ແຫ່ງ ຄືເຂື່ອນໄຊຍະບູລີ ທີ່ກໍາລັງຈະເປີດ ຜລິດ ໄຟຟ້າໃນປີນີ້ ແລະ ເຂື່ອນດອນສະໂຮງ, ເມືອງໂຂງ, ແຂວງຈໍາປາສັກ ທີ່ເລັ່ງກໍ່ສ້າງໃຫ້ສໍາເຣັດໃນປີ 2020, ໃນຂນະທີ່ ເຂື່ອນ ປາກແບງ, ຢູ່ແຂວງອຸດົມໄຊ ແລະເຂື່ອນປາກລາຍ ຢູ່ແຂວງໄຊຍະບູລີ ນັ້ນຍັງລໍຖ້າຣັຖບານ ອະນຸມັດຢູ່, ແຕ່ວ່າໃນຕົວຈິງ ພັດມີການສ້າງ ຖນົນຫົນທາງ ເຂົ້າຫາເຂດທີ່ຈະສ້າງເຂື່ອນນັ້ນແລ້ວ.

ເຕັມຫນ້າ