ລັດຖະບານ ຫຼຸດພະນັກງານລົງ ຂະນະທີ່ຫຼາຍກົມກອງ ຕ້ອງການພະນັກງານຫຼາຍຂຶ້ນ

ຫຼາຍຂະແໜງການ ຍັງຕ້ອງການພະນັກງານ-ລັດຖະກອນ ເຂົ້າມາຊ່ອຍພັດທະນາວຽກງານ ເປັນຈໍານວນຫຼາຍ ໂດຍສະເພາະ ຢູ່ເຂດບ້ານ ແລະເມືອງທຸກຍາກ, ຫ່າງໄກສອກຫຼີກ ທີ່ຍັງຂາດການພັດທະນາ ໃນຫຼາຍໆດ້ານ ແຕ່ລັດຖະບານລາວ ຂາດເຂີນງົບປະມານ ຈຶ່ງມີຄວາມຈໍາເປັນ ທີ່ຈະຫຼຸດຈໍານວນພະນັກງານ-ລັດຖະກອນ ຈາກ 2.4% ໃຫ້ເຫຼືອພຽງ 1.8% ຂອງຈໍານວນພົນລະເມືອງລາວ ທັງໝົດ ປະມານ 7 ລ້ານ 7 ແສນປາຍຄົນ ເພື່ອຫຼຸດຜ່ອນພາລະ ຄ່າໃຊ້ຈ່າຍຂອງລັດຖະບານ.

ແຕ່ເຈົ້າໜ້າທີ່ພະແນກສາທາລະນະສຸກ ແຂວງໄຊຍະບູລີ ກ່າວວ່່າ ບໍ່ເຫັນດີຕໍ່ມາດຕະການດັ່ງກ່າວ ເວົ້າສະເພາະ ຂະແໜງສາທາລະນະສຸກ ໃນແຂວງໄຊຍະບູລີ ກະຍັງຕ້ອງການພະນັກງານ-ລັດຖະກອນເປັນຈໍານວນຫຼາຍ 100 ຄົນ ເຂົ້າມາຊ່ອຍພັດທະນາວຽກງານ ດ້ານສາທາລະນະສຸກ ໃນເຂດບ້ານ ແລະເມືອງທຸກຍາກ, ດັ່ງເຈົ້າໜ້າທີ່ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 16 ກັນຍາ ນີ້ວ່າ:

“ຕ້ອງການເພາະວ່າ ມັນຍັງຂາດຫຼາຍໜ່ວຍງານຢູ່ ຢູ່ໂຮງໝໍນ້ອຍ ຢູ່ສຸກສາລາແຕ່ລະແຫ່ງນີ້ ຂາດໝົດ (ລັດຖະກອນ) ອາສາໝັກນີ້ກະອອກໄປ ເຖິງ 4-5 ຄົນແລ້ວເດ້.”

ທ່ານກ່າວອີກວ່າ ໃນໄລຍະ 1-2 ປີມານີ້ ມີພະນັກງານ-ລັດຖະກອນ ໂຍກຍ້າຍໄປເຮັດວຽກຢູ່ຂະແໜງການອື່ນ ເປັນຈໍານວນຫຼາຍ ຂະນະທີ່ ອາສາສະໝັກ ຂອງພະແນກສາທາລະນະສຸກ ກະພາກັນລາອອກຈາກວຽກ ເພາະບໍ່ມີລາຍໄດ້ພຽງພໍ ໃນການດໍາລົງຊີວິດປະຈໍາວັນ ຈຶ່ງພາກັນອອກໄປຫາເຮັດວຽກອື່ນທົດແທນ ເຊັ່ນ ໄປເປັນພະນັກງານບໍລິສັດເອກກະຊົນ, ຄ້າຂາຍ ແລະທໍາການກະເສດ.

ການຂາດພະນັກງານ-ລັດຖະກອນ ທາງດ້ານສາທາລະນະສຸກ ໂດຍສະເພາະ ໃນເຂດບ້ານ ແລະເມືອງທຸກຍາກ ໄດ້ຮັບຜົນກະທົບຢ່າງໜັກ ເພາະຈະເຮັດໃຫ້ ແຜນພັດທະນາດ້ານສາທາລະນະສຸກ ເກີດຄວາມຊັກຊ້າ.

ທາງດ້ານເຈົ້າໜ້າທີ່ ພະແນກສຶກສາທິການ ແລະກິລາ ແຂວງສະຫວັນນະເຂດ ກ່າວວ່າ ຫາກລັດຖະບານລາວ ຈະຫຼຸດຈໍານວນພະນັກງານ-ລັດຖະກອນລົງ ຫຼື ໃຫ້ໂກຕ້າ ລັດຖະກອນໜ້ອຍລົງ ກະຄວນຈະຫຼຸດ ພະນັກງານ-ລັດຖະກອນ ສາຍບໍລິຫານ.

ສ່ວນຈໍານວນພະນັກງານ-ລັດຖະກອນ ສາຍປະຕິບັດ ເຊັ່ນ ຄູສອນໜັງສື ໂດຍສະເພາະ ຄູສອນ ໃນເຂດບ້ານ ແລະເມືອງທຸກຍາກ ແມ່ນບໍ່ຄວນຫຼຸດ ເພາະຫຼາຍພື້ນທີ່ ຍັງຕ້ອງການຄູສອນເປັນຈໍານວນຫຼາຍ ເພື່ອພັດທະນາດ້ານການສຶກສາ ໃຫ້ມີປະສິດທິພາບສູງສຸດ ຫາກຈໍານວນຄູສອນ ບໍ່ພຽງພໍ ຈະສົ່ງຜົນກະທົບຢ່າງໜັກ ຕໍ່ລະບົບການຮຽນ-ການສອນ, ດັ່ງເຈົ້າໜ້າທີ່ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ຄູກະ ມັນກະ ບໍ່ຢາກພຽງພໍຫັ້ນແລ້ວເນາະ ແຕ່ລະປີກະດີ ຄືປີນີ້ກະເພິ່ນໃຫ້ ອາສາຕື່ມ ກະເປັນພາລາກອນ ຖ້າວ່າ ເພິ່ນຢຸດ (ໂກຕ້າ) ມັນກະຈະມິຜົນກະທົບ ຫັ້ນແລ້ວເນາະ.”

ທາງດ້ານ ເຈົ້າໜ້າທີ່ກະຊວງພາຍໃນ ກ່າວວ່າ ລັດຖະບານລາວ ມີຄວາມຈໍາເປັນທີ່ສຸດ ໃນການຫຼຸດຈໍານວນພະນັກງານ-ລັດຖະກອນລົງ ຈາກ 2.4% ໃຫ້ເຫຼືອ 1.8% ຂອງຈໍານວນພົນລະເມືອງ ຈຶ່ງຈະສາມາດຫຼຸດຜ່ອນພາລະ ຄ່າໃຊ້ຈ່າຍຂອງລັດຖະບານ ຕໍ່ລາຍຈ່າຍບໍລິຫານ ແລະເງິນເດືອນພະນັກງານ-ລັດຖະກອນລົງໄດ້.

ໃນປີ 2024 ນີ້ ທົ່ວປະເທດລາວ ມີຈໍານວນພະນັກງານ-ລັດຖະກອນ ທັງໝົດ 172,341 ຄົນ ຫາກກໍານົດໃຫ້ເຫຼືອ 1.8% ຂອງຈໍານວນພົນລະເມືອງ ຈະເຮັດໃຫ້ພະນັກງານ-ລັດຖະກອນຫາຍໄປ 3,103 ຄົນ ແລະຈະເຫຼືອ ພະນັກງານ-ລັດຖະກອນ ທົ່ວປະເທດ ພຽງ 169,238 ຄົນ.

ສ່ວນເລື່ອງ ທີ່ລັດຖະບານ ຈະຫຼຸດຈໍານວນພະນັກງານ-ລັດຖະກອນ ໃນຂະແໜງການໃດນັ້ນ ຫຼື ຈະຫຼຸດຈໍານວນໂກຕ້າ ຂອງພະນັກງານ-ລັດຖະກອນ ຫຼາຍ-ໜ້ອຍເທົ່າໃດນັ້ນ ຍັງໃນຂັ້ນຕອນການພິຈາລະນາ, ດັ່ງເຈົ້າໜ້າທີ່ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ໂຕເລກລັດຖະກອນໃໝ່ນີ້ຫັ້ນ ກະມີແຕ່ເພິ່ນ ຕົກລົງໃນກອງປະຊຸມລັດຖະບານເນາະ ສ່ວນລາຍລະອຽດ ຊິໃຫ້ພາກສ່ວນໃດຫັ້ນ ຍັງບໍ່ທັນຕົກລົງເທື່ອເຈົ້າ ເພາະວ່າດຽວນີ້ ເພິ່ນເລີ່ມອັນນ່າເອົາພະນັກງານປ່ຽນແທນ ບໍ່ໄດ້ (ໂກຕ້າ) ໄດ້ເພີ່ມ.”

ເຈົ້າໜ້າທີ່ທະນາຄານ ພັດທະນາອາຊີ ຫຼື ADB ປະຈໍາລາວ ກ່າວວ່າ ປະເທດລາວ ກໍາລັງພະເຊີນກັບຜົນກະທົບ ແລະຄວາມທ້າທາຍ ທາງເສດຖະກິດ-ການເງິນ ອັນເນື່ອງຈາກພາລະໜີ້ສິນທີ່ບໍ່ໝັ້ນຄົງ ຈົນສົ່ງຜົນກະທົບ ຕໍ່ຄວາມໝັ້ນຄົງ ຂອງສະບຽງອາຫານ, ໂພຊະນາການ ແລະແຜນພັດທະນາເສດຖະກິດ-ສັງຄົມ ຂອງປະເທດ ທັງໃນໄລຍະສັ້ນ ແລະໄລຍະຍາວ, ດັ່ງເຈົ້າໜ້າທີ່ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ມັນກະມີຜົນກະທົບ ຫຼາຍຢູ່ ການເປັນຢູ່ຂອງພະນັກງານນີ້ ມັນກະບໍ່ກຸ້ມກິນເດ້ເນາະ ຫຼາຍຄົນກະອອກວຽກເດ້ ມັນກະເປັນບັນຫາຫຼາຍ ເພິ່ນ (ລັດຖະກອນ) ກະຕ້ອງຮັດກຸມແນວນີ້ ພໍໃຈບໍ່ພໍໃຈ ມັນກະຕ້ອງໄດ້ຈໍາເປັນ.”

ທ່ານກ່າວອີກວ່າ ລັດຖະບານລາວ ຕ້ອງວາງຮາກຖານ ທາງດ້ານເສດຖະກິດ ໃຫ້ດີຂຶ້ນກວ່າເກົ່າ ໂດຍສະເພາະ ການຫຼຸດຜ່ອນໜີ້ສິນສາທະລະນະ ຫຼຸດຜ່ອນການກູ້ຢືມ ແລະເຄັ່ງຮ້ອນ ເພື່ອຍົກລະດັບ ການພັດທະນາປະເທດໃນທຸກໆດ້ານ ໂດຍສະເພາະ ການພັດທະນາ ບຸກຄະລາກອນຂອງປະເທດ ໃຫ້ມີປະສິດທິພາບ ແລະພຽງພໍ ຕໍ່ການເຮັດວຽກ ເຊິ່ງເປັນເລື່ອງສໍາຄັນທີ່ສຸດ.

ເມື່ອເດືອນມີນາ 2024 ທີີ່ຜ່ານມາ ກະຊວງພາຍໃນ ໄດ້ລາຍງານໃຫ້ຮູ້ວ່າ ນັບຕັ້ງແຕ່ປີ 2021 ເປັນຕົ້ນມາ ລັດຖະບານລາວ ໄດ້ຄົ້ນຄວ້ານະໂຍບາຍ ທີ່ຈະຫຼຸດຜ່ອນຈໍານວນພະນັກງານ-ລັດຖະກອນ ໃຫ້ມີຄວາມກະທັດຮັດ, ຄ່ອງໂຕ ແລະມີປະສິດທິພາບສູງກວ່າເກົ່າ ດ້ວຍການຫຼຸດໂກຕ້າລັດຖະກອນ ໃຫ້ໜ້ອຍລົງໃນແຕ່ລະປີ.

ໂດຍໃນປີ 2021 ລັດຖະບານ ອະນຸມັດລັດຖະກອນໃໝ່ ຈໍານວນ 1,600 ຄົນ ໃນປີ 2022 ຈໍານວນ 1,300 ຄົນ ແລະໃນປີ 2023 ຈໍານວນ 800 ຄົນ.