ຊາວບ້ານຢຶບ ທີ່ຖືກຂັງ ປ່ວຍໜັກ

ອຸ່ນແກ້ວ ສຸກສະຫວັນ
2019-02-01
ອີແມວລ໌
ຄໍາເຫັນ
Share
ພິມ
ຊາວບ້ານຢຶບ ເມືອງທ່າແຕງ ແຂວງເຊກອງ ຮູບຖ່າຍ ວັນທີ 10 ຕຸລາ 2011
ຊາວບ້ານຢຶບ ເມືອງທ່າແຕງ ແຂວງເຊກອງ ຮູບຖ່າຍ ວັນທີ 10 ຕຸລາ 2011
RFA

ຊາວບ້ານຢຶບ, ເມືອງທ່າແຕງ ແຂວງເຊກອງ 15 ຄົນ, ທີ່ຖືກເຈົ້າໜ້າທີ່ ທາງການແຂວງເຊກອງ ຈັບຂັງຄຸກ ຍ້ອນຂໍ້ຂັດແຍ່ງທີ່ດິນ, ກັບ ບໍຣິສັດຢາງພາຣາວຽດນາມ ໃນເດືອນ ກໍຣະກະດາ 2017 ທີ່ຜ່ານມາ. ໃນນັ້ນມີຜູ້ເສັຽຊີວິດ 1 ຄົນ ແລະຖືກປ່ອຍຕົວ 4 ຄົນ, ແລະຍັງເຫຼືອ 10 ຄົນ ທີ່ຍັງຖືກຂັງຄຸກຢູ່.

ຂ່າວຫລ້າສຸດ, ຊາວບ້ານທ່ານນຶ່ງ ຜູ້ທີ່ບໍ່ປະສົງອອກຊື່ ແລະສຽງ ໄດ້ກ່າວຕໍ່ເອເຊັຍເສຣີ ວ່າ:

"ຊາວບ້ານ 2 ຄົນ, ໃນຈຳນວນ 10 ຄົນ, ທີ່ຍັງຖືກຂັງຄຸກຢູ່ນັ້ນ ຄື: ທ້າວ ສຸວັນ ແລະ ທ້າວ ໃນ ມີອາການເຈັບເປັນ ຫລື ມີບັນຫາ ດ້ານສຸຂພາບ."

ຊາວບ້ານທ່ານນີ້ ໄດ້ກ່າວຕື່ມອີກວ່າ:

"ທ້າວ ສຸວັນ ມີອາການບົວຕາມໂຕ ໄຂ່ຕາມແຂນ ແລະຂາ ໃນຂນະທີ່ ທ້າວ ໃນ ມີອາການຖ່າຍອອກເລືອດ ຈົນເຈົ້າໜ້າທີ່ ຕ້ອງພາ ລາວ ໄປໂຮງໝໍ."

ອົງການຈັດຕັ້ງດ້ານສິດທິມະນຸດ, ໄດ້ສະແດງຄວາມເປັນຫ່ວງຕໍ່ການຈັບຕົວຊາວບ້ານຢຶບ, ແລະຮຽກຮ້ອງໃຫ້ທາງການລາວປ່ອຍຕົວ.

ຍານາງ ວະນິດາ ເທພສຸວັນ ປະທານຂະບວນການ ລາວ ເພື່ອສິດທິມະນຸດ ທີ່ຕັ້ງຢູ່ປາຣີ ປະເທດຝຣັ່ງ ໄດ້ກ່າວຕໍ່ເອເຊັຍເສຣີ ວ່າ:

"ຂໍໃຫ້ ຣັຖບານ ສປປ ລາວ, ປ່ອຍຕົວຢ່າງຮີບດ່ວນ ໂດຍບໍ່ມີເງື່ອນໄຂ, ຊາວບ້ານທີ່ບໍຣິສຸດ, ເຂົາເຈົ້າຖືກຈັບຂັງຄຸກມາດົນແລ້ວ. ພວກເຮົາ ຂໍສະແດງຄວາມເສັຽໃຈ ຢ່າງສຸດຊຶ້ງອີກເທື່ອນຶ່ງ, ຕໍ່ກັບການເສັຽຊີວິດ ຂອງຊາວບ້ານຄົນນຶ່ງ ຢູ່ໃນຄຸກ."

ຍານາງ ກ່າວຕື່ມອີກວ່າ:

"ສ່ວນຊາວບ້ານຜູ້ທີ່ຍັງຖືກຂັງຄຸກຢູ່ນັ້ນ,ກໍ່ມີບັນຫາສຸຂພາບ ຍ້ອນຂາດອາຫານແດ່, ແລະ ບໍ່ໄດ້ຮັບການປິ່ນປົວ, ຖືກກັກຂັງຢູ່ໃນຄຸກມືດ ຊຶ່ງເຂົາເຈົ້າ ອາດຈະເສັຽຊີວິດໄດ້ ທຸກຍາມ."

ກ່ຽວກັບເລື້ອງນີ້ ເຈົ້າໜ້າທີ່ທາງການລາວ, ກໍໃຫ້ເຫດຜົນວ່າ ມີພຽງຊາວບ້ານຈຳນວນນຶ່ງ ບໍ່ຍອມຮັບເອົາຄ່າຊົດເຊີຍ.

ທ່ານ ພູຂົງ ສີສຸລາດ ຫົວໜ້າ ກົມສົນທິສັນຍາ ແລະກົດໝາຍ ກະຊວງການຕ່າງປະເທດ, ໄດ້ຣາຍງານ ຕໍ່ຄນະກັມມະການ ສິດທິມະນຸດ ຂອງອົງການ ສະຫະປະຊາຊາດ ໃນ ເດືອນກໍຣະກະດາ ປີ 2018 ທີ່ຜ່ານມາວ່າ:

ຊາວບ້ານປະມານ 100 ຄອບຄົວ ຍອມຮັບເອົາທີ່ດິນຕອນໃໝ່, [ທີ່ທາງການຊົດເຊີຍໃຫ້] ແລະມີພຽງແຕ່ຊາວບ້ານ ບໍ່ພໍເທົ່າໃດຄົນ ບໍ່ຍອມຮັບເອົາ, ສະນັ້ນ ຂ້າພະເຈົ້າຄິດວ່າ, (ໝາຍເຖິງ ທ່ານພູຂົງ) ອັນນີ້ ບໍ່ແມ່ນເລື້ອງປົກປ້ອງທີ່ດິນ ແລະ ມັນເປັນຄວາມຕັ້ງໃຈ ຂອງກຸ່ມຄົນນ້ອຍໆນຶ່ງ ເທົ່ານັ້ນ ທີ່ຂັດຂວາງ ການພັທນາປະເທດຊາດ.

ເຖິງຢ່າງໃດກໍຕາມ, ໃນການຈັບກຸມຊາວບ້ານຄັ້ງນີ້ ທາງການແຂວງເຊກອງ ຍັງບໍ່ໄດ້ຕັ້ງຂໍ້ກ່າວຫາເຂົາເຈົ້າ, ຢ່າງເປັນທາງການ ແລະ ຊາວບ້ານທີ່ຖືກຈັບກຸມນັ້ນ, ບໍ່ສາມາດເຂົ້າເຖິງ ທະນາຍຄວາມໄດ້. ຣາຍຊື່ຂອງຊາວບ້ານທີ່ຖືກຈັບ ລວມມີ:

1- ທ. ສົມສະຫວັນ (ເສັຽຊີວິດຢູ່ໃນຄຸກ)

2- ທ. ວິຫານ (ຖືກປ່ອຍຕົວ)

3- ນ. ນີ ອາຍຸຕ່ຳກວ່າ 18 ປີ (ຖືກປ່ອຍຕົວ)

4- ທ. ນາກ ອາຍຸຕ່ຳກວ່າ 18 ປີ (ຖືກປ່ອຍຕົວ)

5- ທ. ພອນສະໄຫວ (ຖືກປ່ອຍຕົວ)

6- ທ. ສຸວັນ (ຍັງຖືກຂັງຄຸກຢູ່)

7- ທ. ບຸນແທ່ນ (ຍັງຖືກຂັງຄຸກຢູ່)

8- ທ. ໂປະ (ຍັງຖືກຂັງຄຸກຢູ່)

9- ທ. ໄນ (ຍັງຖືກຂັງຄຸກ)

10- ທ. ສົນ (ຍັງຖືກຂັງຄຸກ)

11- ທ. ບຸນສົດ (ຍັງຖືກຂັງຄຸກ)

12- ທ. ວິຄຳ (ຍັງຖືກຂັງຄຸກ)

13- ທ. ບຸນແລງ (ຍັງຖືກຂັງຄຸກ)

14- ທ. ບຸນໂປກ (ຍັງຖືກຂັງຄຸກ)

15- ທ. ບຸນເຕັ້ຽ (ຍັງຖືກຂັງຄຸກ)

ເຕັມຫນ້າ