ຫຼາຍແຂວງ ບໍ່ອະນຸຍາດ ໃຫ້ຈັດງານໃຫຍ່ ປີໃໝ່ສາກົລ

ທາງການນະຄອນຫຼວງວຽງຈັນ ອອກແຈ້ງການໃນວັນທີ່ 27 ທັນວາ 2021 ນີ້ວ່າ ຫ້າມບໍ່ໃຫ້ມີຫົວໜ່ວຍທຸຣະກິຈ ສວຍໂອກາດບໍຣິການ ຂາຍເຄື່ອງດື່ມທີ່ມີທາດເຫຼົ້າເດັດຂາດ ຖ້າຫາກຫົວໜ່ວຍທຸຣະກິຈໃດລະເມີດຄໍາສັ່ງ ແມ່ນຈະໃຫ້ປິດກິຈການ ຖືກຖອນໃບອະນຸຍາດ ແລະປັບໃໝ ພ້ອມກັບຖືກສຶກສາອົບຮົມ ແລະ ຍັງຫ້າມບໍ່ໃຫ້ປະຊາຊົນ ມີການເຕົ້າໂຮມກັນຈັດງານສັງສັນຊຸມແຊວ ທຸກຮູບແບບ ເນື່ອງຈາກນະຄອນຫຼວງວຽງຈັນ ຍັງເປັນຈຸດສ່ຽງ ທີ່ຈະເກີດການແຜ່ຣະບາດຂອງເຊື້ອໂຄວິດ-19 ຢູ່, ດັ່ງເຈົ້າໜ້າທີ່ຕໍາຣວດ ໃນນະຄອນຫຼວງວຽງຈັນ ທ່ານນຶ່ງ ຜູ້ຂໍສງວນຊື່ແລະຕໍາແໜ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 28 ທັນວາ ນີ້ວ່າ:

“ກະມີຈຸດສ່ຽງຫັ້ນແຫຼະ ກໍເພື່ອປ້ອງກັນພຍາດໂຄວິດນີ້ແຫຼະ ເຂັ້ມງວດຫັ້ນແຫຼະ ເຮົາໄປກວດກາພົບພໍ້ ຄັນຜິດກົດໝາຍ ລະກະຜແນກກະຊວງທີ່ກ່ຽວຂ້ອງ ເປັນຜູ້ແກ້ໄຂ ເຈົ້າໜ້າທີ່ຕໍາຣວດເຮົາ ກໍເຮັດໜ້າທີ່ສຶກສາອົບຮົມ ແຈ້ງໃຫ້ພາກສ່ວນທີ່ກ່ຽວຂ້ອງ ເປັນຜູ້ຖອນໃບອະນຸຍາດ.”

ສ່ວນສາເຫດ ທີ່ມີການແຈ້ງການດັ່ງກ່າວອອກໄປ ກໍເພື່ອເປັນການສະກັດກັ້ນ ບໍ່ໃຫ້ເຊື້ອໂຄວິດ-19 ກັບມາຣະບາດໜັກ ເນື່ອງຈາກໃນໄລຍະທີ່ຜ່ານມາ ບໍ່ແມ່ນຊ່ວງເທສການງານບຸນ ກໍຍັງມີຮ້ານອາຫານ ແລະຮ້ານບັນເທີງຈໍານວນນຶ່ງ ລະເມີດຄໍາສັ່ງ ມີການລັກຈັດງານສັງສັນຊຸມແຊວກັນ ເຊິ່ງກໍພົບວ່າມີຜູ້ຕິດເຊື້ອໂຄວິດ-19 ນໍາດ້ວຍ ເຈົ້າໜ້າທີ່ກ່ຽວຂ້ອງກໍໄດ້ນໍາໄປປິ່ນປົົວ ແລະກັກໂຕກັນທຸກຄົນ ພ້ອມທັງໄດ້ດໍາເນີນການປັບໃໝຕາມຣະບຽບການ, ດັ່ງເຈົ້າໜ້າທີ່ຕໍາຣວດ ໃນນະຄອນຫຼວງວຽງຈັນ ອີກທ່ານນຶ່ງ ທີ່ຂໍສງວນຊື່ ແລະຕໍາແໜ່ງກ່າວວ່າ:

“ສະເພາະຜ່ານມາແລ້ວໂດຍລວມ ສ່ວນໃຫຍ່ບັນດາຮ້ານບັນເທີງຕ່າງໆ ເພິ່ນກະຮ່ວມໄມ້ຮ່ວມມືດີ ແຕ່ວ່າມີບາງຮ້ານພັດອາຈລັກເປີດແບບວ່າລັກສະນະປິດປະຕູ ແລ້ວເປີດຢູ່ທາງໃນ ຜ່ານມາກໍເຄີຍມີ ພວກເຮົາກໍເຫັນ ໂຕນີ້ຄິດວ່າອາຈມີ ແນວນັ້ນພວກເຮົາໄດ້ມີມາຕການ ສະກັດກັ້ນຫັ້ນແຫຼະ.”

ກ່ຽວກັບເຣື້ອງແຈ້ງການກດັ່ງກ່າວນີ້ ຊາວບ້ານໃນນະຄອນຫຼວງວຽງຈັນ ຫຼາຍຄົນກໍໃຫ້ຄວາມເຫັນວ່າ ໃນໄລຍະງານບຸນປີໃໝ່ສາກົລ ປີ 2022 ນີ້ ເປັນເຣື່ອງທີ່ເປັນໄປໄດ້ຍາກ ທີ່ຈະບໍ່ໃຫ້ປະຊາຊົນຈັດງານສັງສັນກັນ ຫຼືບໍ່ໃຫ້ຜູ້ປະກອບການທຸຣະກິຈ ຂາຍເຫຼົ້າຂາຍເບັຍ ເນື່ອງຈາກວ່າເປັນເທສການ ທີ່ປີ 1 ຈະມີ 1 ຄັ້ງເທົ່ານັ້ນ ຫຼາຍຄົນກໍໄດ້ມີໂອກາດພົບຍາດພີ່ນ້ອງ ກໍຕ້ອງໄດ້ມີການສັງສັນກັນເປັນເຣື່ອງປົກກະຕິ ເຊິ່ງປະຊາຊົນກໍເຂົ້າໃຈວ່າ ໃນປັດຈຸບັນຍັງມີເຊື້ອໂຄວິດ-19 ຣະບາດຢູ່ ແຕ່ຫຼາຍຄົນກໍຮຽນຮູ້ທີ່ຈະຢູ່ກັບເຊື້ອໂຄວິດ-19 ໄດ້ແລ້ວ ແລະກໍຮູ້ຈັກປ້ອງກັນໂຕເອງ ແລະຫຼາຍຄົນກໍຢາກໃຫ້ມີການສັງສັນຕາມປະສາຄອບຄົວ, ດັ່ງຊາວບ້້ານໃນນະຄອນຫຼວງວຽງຈັນ ທ່ານນຶ່ງກ່າວວ່າ:

“ບໍ່ໃຫ້ຂາຍເຫຼົ້າຂາຍເບັຍ ແນ່ນອນມັນກະຕ້ອງກະທົບຫັ້ນແຫຼະ ຖ້າວ່າບໍ່ໃຫ້ຊຸມແຊວຫັ້ນ ມັນກໍເປັນໄປບໍ່ໄດ້ເດ້ ເພາະວ່າປີໃໝ່ຫັ້ນ ປີນຶ່ງຫັ້ນມີເທື່ອດຽວເນາະ.”

ຊາວບ້້ານໃນນະຄອນຫຼວງວຽງຈັນ ອີກທ່ານນຶ່ງກໍກ່າວວ່າ ເຣື່ອງດັ່ງກ່າວນີ້ ແນ່ນອນວ່າ ຫົວໜ່ວຍທຸຣະກິຈໃຫຍ່ໆ ທາງການກໍຍັງຄວບຄຸມໄດ້ຢູ່ ແຕ່ສໍາລັບຄົນທົ່ວໄປ ກໍເປັນໄປໄດ້ຍາກ ແລະຊາວບ້ານກໍລັກດີື່ມເຫຼົ້າດື່ມເບັຍຄືເກົ່າ:

“ໃຫຍ່ໆ ເຂົາຄວບຄຸມໄດ້ ບໍ່ຈັດງານຣາຕີໃຫຍ່ໆຫັ້ນ ບ້ານນອກແຈ້ງໄປ ເຂົາກໍກິນຄືເກົ່າ ເຂົາເຄີຍກິນເນາະ ພີ່ນ້ອງກັນຫັ້ນແຫຼະ 3-4-5 ຄົນ 6-7 ຄົນ.”

ນອກຈາກນີ້ ບັນດາຄິວຣົຖໂດຍສານສາຍໃຕ້-ສາຍເໜືອ ກໍມີຄວາມພ້ອມ ທີ່ຈະບໍຣິການໃຫ້ປະຊາຊົນລາວ ທີ່ຈະເດີນທາງກັບພູມລໍາເນົາຢູ່ແລ້ວ ແຕ່ຜູ້ໂດຍສານທຸກຄົນ ຈະຕ້ອງມີໃບສັກວັກຊິນປ້ອງກັນເຊື້ອໂຄວິດ-19 ຄົບໂດສ ແລະກໍຕ້ອງຮູ້ຈັກປ້ອງກັນໂຕເອງນໍາດ້ວຍ ເນື່ອງຈາກວ່າ ບັນດາຣົຖຂົນສົ່ງໂດຍສານ ບໍ່ໄດ້ກໍານົດວ່າ ຄັນນຶ່ງຈະນັ່ງໄດ້ຈັກຄົນ ຖ້າຫາກຄັນນຶ່ງໃນມື້ນັ້ນເວລານັ້ນ ມີຄົນຫຼາຍເຕັມຄັນຣົຖ ກໍບໍ່ສາມາດເວັ້ນໄລຍະຫ່າງໄດ້, ດັ່ງຜູ້ປະກອບການຂົນສົ່ງໂດຍສານ ຄິວຣົຖສາຍໃຕ້ ທ່ານນຶ່ງກ່າວວ່າ:

“ໂຕນັ້ນເຮົາຮອງຮັບຢູ່ແລ້ວ ຜູ້ໂດຍສານສັກຢາສອງເຂັມ ແລະຊື້ປີ້ ແຕ່ວ່າເຣື່ອງການນັ່ງຫັ້ນນ່າ ຄັນເຈົ້າບໍ່ຢາກນັ່ງກັບຄົນອື່ນ ເຈົ້າກໍເໝົາຕຽງເລີຍເໝົາຕັ່ງເລີຍ ຄັນຊື້ປີ້ດຽວ ໃນກໍຣະນີວ່າແຂກຫຼາຍ ກໍໄດ້ນັ່ງນໍາເຂົາເຈົ້າແລ້ວ ຖ້າວ່າແຂກບໍ່ຫຼາຍ ກໍໄດ້ນັ່ງຄົນດຽວ.”

ສ່ວນຄິວຣົຖໂດຍສານສາຍເໜືອ ກໍພ້ອມທີ່ຈະໃຫ້ບໍຣິການເຊັ່ນກັນ ຄືກັບຄິວຣົຖສາຍໃຕ້ ໂດຍຜູ້ໂດຍສານທຸກຄົນ ຈະຕ້ອງມີໃບຢັ້ງຢືນສັກວັກຊິນປ້ອງກັນໂຄວິດຄົບໂດສ ກໍສາມາດໃຊ້ບໍຣິການໄດ້ ແຕ່ຖ້າຄົນຫຼາຍກໍບໍ່ສາມາດຮັກສາໄລຍະຫ່າງໄດ້ເຊັ່ນກັນ, ດັ່ງເຈົ້າໜ້າທີ່ຄິວຣົຖສາຍເໜືອ ທ່ານນຶ່ງກ່າວວ່າ:

“ກະອີງຕາມເພິ່ນແຈ້ງການລົງມາ ເຮົາກໍເຮັດຕາມກົດຣະບຽບເພິ່ນເນາະ ມີໃບສັກຢາຄົບສອງເຂັມ ມັນກະມີເປັນຖ້ຽວ ຂອງໂມງຂອງມັນຢູ່ໃນຫັ້ນເດ້.”

ຢ່າງໃດກໍຕາມ ປະຊາຊົນທີ່ຈະເດີນທາງກັບພູມລໍາເນົາ ຫຼືກັບບ້ານເກີດ ຕ້ອງຮູ້ຈັກປ້ອງກັນໂຕເອງ ຕ້ອງໃສ່ຖ້າປິດປາກປິດດັງ ເອົາເຈວລ້າງມືໄປນໍາ ຍ້ອນຣົຖໂດຍສານ ບໍ່ມີການເວັ້ນໄລຍະຫ່າງບ່ອນນັ່ງ ຖ້າຫາກເວລານັ້ນມີຜູ້ໂດຍສານຫຼາຍຄົນ ກໍຕ້ອງຈໍາເປັນຕ້ອງໄດ້ນັ່ງໃກ້ຊິດກັນ.

ໃນຂະນະດຽວກັນ ທາງການແຂວງບໍ່ແກ້ວ ກໍໄດ້ແຈ້ງການ ເມື່ອວັນທີ່ 23 ທັນວາ 2021 ນີ້ວ່າ ຫ້າມປະຊາຊົນຈັດງານລ້ຽງສັງສັນຕ່າງໆ ຫຼືການຈັດງານອວຍພອນຕ່າງໆໃຫ້ກັນແລະກັນ ໃນໄລຍະບຸນປີໃໝ່ສາກົລ ປີ 2022 ທີ່ຈະມາເຖິງນີ້ ໃນລັກສະນະແບບໃຫຍ່ໂຕ ຍ້ອນຍັງມີເຊື້ອໂຄວິດ-19 ຣະບາດຢູ່ ຊຶ່ງທາງການເອງກໍເປັນກັງວົນວ່າ ເຊື້ອໂຄວິດ-19 ຈະຣະບາດໜັກ.