ຄົນລາວແລະເຈົ້າໜ້າທີ່ຕິດຕາມການເລືອກຕັ້ງອາເມຣິກາ

ການເລືອກຕັ້ງປະທານາທິບໍດີ ຂອງສະຫະລັດ ອາເມຣິກາ ໄດ້ດຳເນີນມາເຖິງໂຄ້ງສຸດທ້າຍໃນວັນທີ 5 ພະຈິກ ປີ 2024 ທີ່ຜ່ານມານີ້ເຊິ່ງນອກຈາກຊາວອາເມຣິກາທີ່ໃຫ້ຄວາມສົນໃຈແລ້ວພົນລະເມືອງຈາກຫຼາຍປະເທດທົ່ວໂລກກໍຕິດຕາມການເລືອກຕັ້ງຄັ້ງນີ້ຢ່າງໃກ້ຊິດເຊັ່ນດຽວກັນ. ລວມເຖິງປະຊາຊົນລາວນຳຍ້ອນການເລືອກຕັ້ງຜູ້ນຳອາເມຣິກາຄັ້ງນີ້ອາດສົ່ງຜົນກະທົບທັງທາງກົງ ແລະ ທາງອ້ອມຕໍ່ຫຼາຍປະເທດທົ່ວໂລກ.

ຊາວລາວ ຢູ່ນະຄອນຫຼວງວຽງຈັນ ທ່ານໜຶ່ງ ກ່າວຕໍ່ ວິທະຍຸເອເຊຍເສລີ ໃນມື້ວັນທີ 6 ພະຈິກ 2024 ນີ້ ວ່າ ລາວຄາດວ່າ ທ່ານ Donald Trump ອາດີດປະທານາທິບໍດີອາດຈະຊະນະການເລືອກຕັ້ງຄັ້ງນີ້ຍ້ອນຊາວອາເມຣິກັນສ່ວນຫຼາຍຕ້ອງການນະໂຍບາຍທີ່ເນັ້ນໃສ່ການຟື້ນຟູເສດຖະກິດໃນປະເທດບໍ່ຢາກໃຫ້ລັດຖະບານນຳເງິນໄປຊ່ວຍເຫຼືອດ້ານສົງຄາມ. ຫາກທ່ານ Trump ໄດ້ຕຳແໜ່ງໃນຄັ້ງນີ້ບົດບາດຂອງອາມຣິກາໃນອົງການ NATO ກໍຈະຫຼຸດລົງຄ່າໃຊ້ຈ່າຍພາຍນອກກໍ່ຈະຫຼຸດລົງນໍາດ້ວຍ.

ໃນຂະນະທີ່ນະໂຍບາຍຕ່າງປະເທດຂອງທ່ານ Trump ເປັນຕົ້ນນະໂຍບາຍກີດກັ້ນການຄ້າກໍອາດຖືກນຳມາໃຊ້ອີກເທື່ອໜຶ່ງ ແລະ ອາດສົ່ງຜົນກະທົບທາງອ້ອມຕໍ່ປະເທດຂະໜາດນ້ອຍຢ່າງປະເທດລາວທີ່ຕ້ອງເພີ່ງພາເສດຖະກິດຂອງປະເທດອື່ນເປັນຕົ້ນປະເທດສະຫະລັດອາເມຣິກາ ແລະ ຈີນ.

"ອີງໃສ່ຂໍ້ມູນທີ່ວິເຄາະມັນກໍບໍ່ແນ່ນອນເນາະແຕ່ວ່າສ່ວນຕົວກໍແມ່ນທຣັມອີງໃສ່ນະໂຍບາຍຂອງລາວມັນຈະແຈ້ງເນາະເລື່ອງການຟື້ນຟູອາເມຣິກາແລ້ວກໍປະຊາຊົນອາເມຣິກາກໍເບື່ອໜ່າຍກັບເລື່ອງສົງຄາມແດ່ເຂົາກໍຫັນມາສະໜັບສະໜູນລາວຫຼາຍຂຶ້ນ"

ຂະນະທີ່ຊາວລາວໜຸ່ມລາວຢູ່ແຂວງວຽງຈັນ ທ່ານໜຶ່ງ ຢາກໃຫ້ທ່ານນາງ Kamala Harris ຊະນະການເລືອກຕັ້ງຄັ້ງນີ້ຍ້ອນຈະສືບຕໍ່ນະໂຍບາຍຂອງລັດຖະບານອາເມຣິກາທີ່ໃຫ້ການຊ່ວຍເຫຼືອ ແລະ ສະໜັບສະໜູນປະເທດລາວໃນດ້ານຕ່າງໆເປັນຕົ້ນການຊ່ວຍເຫຼືອດ້ານການສຶກສາ ແລະ ການພັດທະນາ ໃນດ້ານອື່ນໆ.

"ໂອ ຢູ່ໃນກຸ່ມທາງກຸ່ມການຄ້າເຊຍທາງແຮຣິສຫຼາຍເບິ່ງນະໂຍບາຍຂ້າເຈົ້າມັກຄວາມເປັນເສລີແລ້ວກໍເອກະພາບກັນຫັ້ນນາມັນບໍ່ຢາກໃຫ້ມີການປ່ຽນແປງ"

ທາງດ້ານເຈົ້າໜ້າທີ່ກະຊວງຊັບພະຍາກອນ ທຳມະຊາດ ແລະ ສິ່ງແວດລ້ອມທ່ານໜຶ່ງສະແດງທັດສະນະວ່າການເລືອກຕັ້ງຂອງອາເມຣິກາເທື່ອນີ້ບໍ່ໄດ້ຮັບຄວາມສົນໃຈຈາກໜ່ວຍງານຂອງລາວປານໃດຍ້ອນໃນກຸ່ມພະນັກງານ-ລັດຖະກອນບໍ່ຄ່ອຍໄດ້ມີການເວົ້າເຖິງການເລືອກຕັ້ງຂອງອາເມຣິກາ ແລະ ອີກຫຼາຍກະຊວງກໍບໍ່ໄດ້ສົນໃຈຕິດຕາມຜົນການເລືອກຕັ້ງຄັ້ງນີ້ຍ້ອນຮູ້ສຶກວ່າບໍ່ໄດ້ມີຜົນໄດ້ຜົນເສຍນຳດ້ວຍ.

"ທີ່ຕິດພັນກັບເວົ້າເລື່ອງຜົນຂອງການເລືອກຕັ້ງໂຕນີ້ບໍ່ມີໃຜເວົ້າເຖິງບໍ່ມີໃຜກະຕືລືລົ້ນຂະແໜງການຂອງເຮົາກໍບໍ່ເຫັນຈະຍົກມາເປັນຫົວຂໍ້ສົນທະນາຈັກເທື່ອຂະແໜງການອື່ນກໍບໍ່ຍິນໃຜເວົ້າ"

ອີງຕາມການລາຍງານຂອງສື່ຕ່າງປະເທດ ລາຍງານແບບບໍ່ເປັນທາງການວ່າ ທ່ານ Donald Trump ໄດ້ຮັບຄະແນນໂຫວດ ຫຼາຍກວ່າທ່ານນາງ Kamala Harris ຂ້ອນຂ້າງຫຼາຍສົມຄວນ ແລະ ມີທ່າອ່ຽງວ່າທ່ານ Donald Trump ຈະຊະນະເລືອກຕັ້ງ ແລະ ໄດ້ຮັບຕຳແໜ່ງປະທານາທິບໍດີ ອີກສະໄໝ.