ກຸ່ມຕົ້ມຕຸ໋ນອອນລາຍນ໌ ຈີນ 280 ຄົນ ຖືກຈັບຢູ່ສາມຫຼ່ຽມຄຳ

ໃນມື້ວັນທີ 20 ມິຖຸນາ ທີ່ຜ່ານມານີ້, ເຈົ້າໜ້າທີ່ຕຳຫຼວດ ກອງບັນຊາການ ປກສ ເຂດເສດຖະກິດພິເສດ 3 ຫຼ່ຽມຄຳ ແຂວງບໍ່ແກ້ວ ສົມທົບກັບກຳລັງປ້ອງກັນ ປະຈຳເຂດ ແລະ ເຈົ້າໜ້າທີ່ຕຳຫຼວດ ຈາກປະເທດຈີນ ໄດ້ຈັບສະມາຊິກ ກຸ່ມຕົ້ມຕຸ໋ນທາງອອນລາຍນ໌ ແລະ ໂທລະຄົມ ຫຼືແກ໊ງຄອລເຊັນເຕີ້ ຊາວຈີນ ຈຳນວນ 280 ຄົນ ທີ່ເຄື່ອນໄຫວສໍ້ໂກງຊັບ ຜ່ານທາງລະບົບໂທລະຄົມ ຢູ່ໃນເຂດດັ່ງກ່າວ ແລະ ຫຼັງຈາກນັ້ນ ໃນວັນທີ 23 ມິຖຸນາ 2024 ກໍໄດ້ມີການສົ່ງຊາວຈີນ ຈຳນວນດັ່ງກ່າວ ພ້ອມຂອງກາງ ເປັນໂທລະສັບມືຖື ແລະ ຄອມພິວເຕີ້ ຈຳນວນຫຼາຍຊຸດ ມອບໃຫ້ເຈົ້າໜ້າທີ່ຕຳຫຼວດ ຈາກກິ່ງແຂວງສິບສອງປັນນາ ຢູ່ຊາຍແດນລາວ-ຈີນ ດ່ານບໍ່ເຕັນ-ບໍ່ຫານ ເພື່ອນຳໂຕ ໄປສືບສວນ-ສອບສວນ ແລະ ດຳເນີນຄະດີ ຢູ່ປະເທດຈີນ, ອີງຕາມການລາຍງານ ຂອງຂ່າວໜັງສືພິມ ຄວາມສະຫງົບ.

ກ່ຽວກັບເລື້ອງນີ້, ວິທຍຸເອເຊັຽເສຣີ ໄດ້ຕິດຕໍ່ໄປຫາ ກອງບັນຊາການ ປກສ ເຂດເສດຖະກິດພິເສດ 3 ຫຼ່ຽມຄຳ ແລະ ເຈົ້າໜ້າທີ່ ຢູ່ໃນເຂດດັ່ງກ່າວ ເພື່ອສອບຖາມ ລາຍລະອຽດເພີ່ມຕື່ມ, ແຕ່ເຈົ້າໜ້າທີ່ ຜູ້ຮັບຜິດຊອບ ບໍ່ສາມາດ ໃຫ້ລາຍລະອຽດ ຫຼາຍກວ່ານີ້ໄດ້.

ໃນຂະນະທີ່ຊາວລາວ ທີ່ເຮັດວຽກ ຢູ່ໃນເຂດເສດຖະກິດພິເສດ 3 ຫຼ່ຽມຄຳ ທ່ານໜຶ່ງ ກ່າວວ່າ ລາວເອງ ກໍຮູ້ວ່າ ມີການຈັບແກ໊ງຄົນຈີນ ກຸ່ມດັ່ງກ່າວ ພ້ອມກັບສົ່ງໂຕ ໄປປະເທດຈີນ, ແຕ່ບໍ່ຮູ້ລາຍລະອຽດຄັກແນ່ວ່າ ຈັບໄດ້ຢູ່ພາຍໃນຕຶກໃດ, ແຕ່ກໍເຊື່ອວ່າ ຈຳນວນ 280 ຄົນນີ້ ຈະຕ້ອງແມ່ນຜູ້ຕ້ອງຫາ ທີ່ທາງການຈີນ ອອກໝາຍຈັບ ຍ້ອນພວກກ່ຽວ ສໍ້ໂກງເງິນ ພົນລະເມືອງ ຢູ່ປະເທດຈີນ ຜ່ານລະບົບໂທລະຄົມ. ດັ່ງທ່ານກ່າວຕໍ່ ວິທຍຸເອເຊັຽເສຣີ ໃນວັນທີ 2 ກໍລະກົດ ນີ້ວ່າ:

“ແມ່ນ, ເຂົາເຈົ້າໜ້າຈະສົ່ງກັບຈີນ, ກະບໍ່ຮູ້ຄືກັນ. ຜູ້ທີ່ເຂົາເຈົ້າຈັບ ເຂົາເຈົ້າມີໝາຍຈັບ ມາແຕ່ຈີນແລ້ວ.​ ໜ້າຈະຢູ່ຈີນຕີ້. ເຈົ້າໜ້າທີ່ ເພິ່ນກະກວດຊ່ວງນີ້.”

ທາງດ້ານນັກກົດໝາຍລາວ ທ່ານໜຶ່ງ ກໍເຫັນວ່າ ເປັນເລື້ອງປົກກະຕິ ທີ່ມີການຈັບຊາວຈີນ ຢູ່ໃນເຂດເສດຖະກິດພິເສດ 3 ຫຼ່ຽມຄຳ ແລ້ວສົ່ງໂຕ ໃຫ້ທາງການຈີນ ໄປດຳເນີນຄະດີ ຍ້ອນ ລາວ ແລະ ຈີນ ມີສົນທິສັນຍາ ວ່າດ້ວຍການແລກປ່ຽນ ຜູ້ຮ້າຍຂ້າມແດນ ແລະ ທາງການຈີນ ກໍສາມາດຂໍ ຜູ້ຕ້ອງຫາຊາວຈີນ ກັບໄປດຳເນີນຄະດີ ທີ່ສ້າງຄວາມເສຍຫາຍ ຕໍ່ພົນລະເມືອງຈີນ. ດັ່ງທ່ານກ່າວວ່າ:

“ໂຕນີ້ມັນເປັນຄະດີ ໂຕທີ່ວ່າ ຢູ່ 3 ຫຼ່ຽມຄຳ ເຂົາເຈົ້າຈະມີສົນທິສັນຍາ ກ່ຽວກັບການຄຸ້ມຄອງ ຢູ່ໃນເຂດພິເສດນີ້. ການທີ່ເພິ່ນຈັບນີ້ ມັນກະມີລະບຽບ ລະຫວ່າງລາວ-ຈີນ ເນາະ, ສາມາດກັກໂຕໄດ້ ຜູ້ທີ່ວ່າກະທຳຜິດ ຢູ່ໃນລາວນີ້, ຫັ້ນນ່າ. ແລ້ວກໍຕ້ອງສົ່ງຄືນ ໃຫ້ແກ່ຝ່າຍຈີນ.”

ໃນຂະນະດຽວກັນ, ນັກວິຊາການ ທີ່ຮູ້ຈັກກ່ຽວກັບ ກົດໝາຍລາວ-ຈີນ ນາງໜຶ່ງ ກ່າວວ່າ ເປັນເລື້ອງປົກກະຕິ ທີ່ທາງການຈີນ ສາມາດຂໍຜູ້ຕ້ອງຫາ ສັນຊາດຈີນ ທີ່ຖືກຈັບຢູ່ລາວ ນຳກັບໄປດຳເນີນຄະດີ ຢູ່ປະເທດຈີນ ເນື່ອງຈາກ ອີງຕາມສົນທິສັນຍາ ວ່າດ້ວຍການແລກປ່ຽນ ຜູ້ຮ້າຍຂ້າມແດນ ແລະ ຜູ້ເສຍຫາຍ ຫຼືເຫຍື່ອ ທີ່ຖືກແກ໊ງຄົນຈີນດັ່ງກ່າວ ສໍ້ໂກງເອົາເງິນນັ້ນ ກໍແມ່ນພົນລະເມືອງ ຢູ່ປະເທດຈີນ. ດັ່ງຍານາງກ່າວວ່າ:

“ມັນຂຶ້ນນຳລັດຖະບານຈີນ ຂໍເອົາ ເພາະວ່າ ລາວເຮົາມີສົນທິສັນຍາ ວ່າດ້ວຍການແລກປ່ຽນ ຜູ້ຮ້າຍຂ້າມແດນ, ເຮົາກະໄດ້ສົ່ງ ເພາະວ່າ ເຮົາມີສົນທິສັນຍານຳກັນເດ້. ເຂົາເອີ້ນອາດຊະຍາກັມຂ້າມຊາດ, ຈີນ ຂໍແລ້ວ ມີຄະດີ ກໍໄດ້ສົ່ງ ຄັນເຮົາກັກໂຕ ເພາະວ່າ ເຮົາມີສົນທິສັນຍານຳກັນເດ້.”

ແຕ່ເຖິງຢ່າງໃດກໍຕາມ, ຊາວລາວ ທ່ານໜຶ່ງ ກໍເຫັນວ່າ ກາກວາດລ້າງ ແກ໊ງຄອລເຊັນເຕີ້ ຊາວຈີນ ທີ່ເຄື່ອນໄຫວ ຢູ່ໃນເຂດດັ່ງກ່າວ ແມ່ນເລື້ອງຍາກ ທີ່ຈະແກ້ໄຂໄດ້ໝົດ ຍ້ອນວ່າ ຖ້າຫາກທາງຕຳຫຼວດຈີນ ບໍ່ປະສານມາ ໃຫ້ທາງເຈົ້າໜ້າທີ່ລາວ ໄປຈັບໂຕ ກໍບໍ່ໄດ້ມີການໄປຈັບໂຕ ເກີດຂຶ້ນ ແລະ ບາງເທື່ອ ກໍອາດມີເຈົ້າໜ້າທີ່ລາວ ບາງຄົນ ທີ່ຮັບຜົນປະໂຫຍດ ຈາກກຸ່ມແກ໊ງດັ່ງກ່າວເອງ. ດັ່ງທ່ານກ່າວວ່າ:

“ກວາດລ້າງມັນບໍ່ໄດ້ດອກ ເລື້ອງເຈົ້າໜ້າທີ່ ມັນກໍຂຶ້ນກັບນາຍແຫຼະເນາະ, ຄັນນາຍສັ່ງ ມັນກໍຊິຍາກອີ່ສັງ. ກະເບິ່ງແຕ່ພວກມັນມາຫັ້ນເດ້ ຈັກແມ່ນພວກຮ້າຍ-ພວກດີ ມາ. ມັນຢູ່ ກະບໍ່ໄດ້ເຂົ້າໄປກວດເນາະ ບໍ່ໝົດດອກ, ຜູ້ມານຳ ຜູ້ໄປນຳ.”

ກ່ອນໜ້ານີ້, ກໍເຄີຍມີການຈັບ ສະມາຊິກ ແກ໊ງຄອລເຊັນເຕີ້ ຢູ່ໃນເຂດດັ່ງກ່າວ ເປັນຈຳນວນຫຼາຍຄົນ ພ້ອມກັບໄດ້ສົ່ງໂຕ ໃຫ້ເຈົ້າໜ້າທີ່ຈີນ ຮັບໄປດຳເນີນຄະດີ ທີ່ປະເທດຈີນ ເປັນຕົ້ນ ເມື່ອວັນທີ 28 ພະຈິກ ປີກາຍນີ້, ເຈົ້າໜ້າທີ່ຕຳຫຼວດລາວ ສົມທົບກັບ ເຈົ້າໜ້າທີ່ຕຳຫຼວດຈີນ ໄດ້ເຂົ້າຈັບ ສະມາຊິກ ກຸ່ມຄອລເຊັນເຕີ້ ຊາວຈີນ ຈຳນວນ 432 ຄົນ ຢູ່ພາຍໃນ ເຂດເສດຖະກິດພິເສດ 3 ຫຼ່ຽມຄຳ ແລະ ຫຼັງຈາກນັ້ນ ໃນວັນທີ 29 ພະຈິກ ປີດຽວກັນ ທາງເຈົ້າໜ້າທີ່ລາວ ກໍໄດ້ສົ່ງມອບ ຜູ້ຕ້ອງຫາຊາວຈີນ ຈຳນວນດັ່ງກ່າວ ໃຫ້ແກ່ເຈົ້າໜ້າທີ່ຈີນ ຜ່ານດ່ານບໍ່ເຕັນ-ບໍ່ຫານ ເພື່ອນຳໂຕ ໄປດຳເນີນຄະດີ ຢູ່ປະເທດຈີນ.