ກວດພົບພະນັກງານຣັຖ ສໍ້ຣາສບັງຫຼວງ ຢູ່ເຊກອງ 2 ກໍຣະນີ

ອຸ່ນແກ້ວ
2022.04.05
Share on WhatsApp
Share on WhatsApp
ກວດພົບພະນັກງານຣັຖ ສໍ້ຣາສບັງຫຼວງ ຢູ່ເຊກອງ 2 ກໍຣະນີ ອົງການກວດສອບ ແຫ່ງຣັດ ທີ່ຕັ້ງຂຶ້ນ ເພື່ອກວດກາ ຫາທາງປາບປາມ ການສໍ້ໂກງ ຂອງ ພະນັກງານຣັຖກອນ
RFA

ຄະ​ນະ​ກວດ​ກາ​ພັກ​-ຣັ​ຖ ແຂວງ​ເຊກອງ ໄດ້​ດຳ​ເນີນ​ການສືບ​ສວນ-ສອບ​ສວນ ຄະ​ດີ​ສໍ້​ຣາສ​ບັງ​ຫລວງ 2 ກໍ​ຣະ​ນີ ຫຼື 2 ຄົນ ທີ່​ມີ​ມູນ​ຄ່າ​ເສັຽ​ຫາຍ 2 ຕື້ ກີບ ໃນ​ນັ້ນ ກໍ​ລະ​ນີ​ທີ 1 ໄດ້​ໄປ​ເຖິງ​ຂັ້ນ​ຕອນ​ສານ​ປະ​ຊາ​ຊົນ​ສູງ​ສຸດ​ແລ້ວ ສ່​ວນ​ວ່າ ກໍ​ລະ​ນີ​ທີ ​2 ກຳລັງ​ຢູ່​ໃນ​ຂັ້ນ​ຕອນ ສືບ​ສວນ-​ສອບ​ສວນ.

ຄະ​ດີສໍ້​ຣາສ​ບັງຫຼວງທັງ​ 2 ກໍ​ລະ​ນີ​ເກີດ​ຂຶ້ນ ໃນ​ປີ 2021, ອີງ​ຕາມ​ການ​ຣາຍ​ງານ​ຂອງ ທ່ານ ສົມ​ນິດ ສິ​ລິ​ບຸນ​ລ້ຽງ ປະ​ທານກວດ​ກາ​ພັກ-ຣັ​ຖ ແຂວງ​ເຊກອງ.

ເຈົ້າ​ໜ້າ​ທີ່​ສານ ໄດ້​ຢັ້ງ​ຢືນ ​ວິທຍຸຕໍ່​ເອ​ເຊັຽ​ເສ​ຣີ​ ວ່າໜ່ວຍ​ງານ​ທີ່​ກ່ຽວ​ຂ້ອງ ຢູ່ລະ​ຫວ່າງ ການກວດ​ສອບ​ກ່ຽວ​ກັບ​ການ​ກະ​ທໍາຄວາມ​ຜິດ​ດັ່ງ​ກ່າວ ແຕ່ ຜູ້​ກະ​ທຳ​ຜິດ ຈະ​ມີ​ຄວາມ​ຜິດ​ຕາມ​ປະ​ມວນ​ກົດ​ໝາຍ​ອາ​ຍາ​ ສະ​ບັບ​ປີ 2017 ວ່າ​ດ້ວຍການ​ສໍ້​ຣາສ​ບັງ​ຫລວງຢ່າງ​ຄັກ​ແນ່.

ເຈົ້າ​ໜ້າ​ທີ່​ກ່ຽວ​ຂ້ອງ​ຜູ້​ ທີ່ບໍ່​ປະ​ສົງ​ອອກ​ຊື່ ແລະ ຕຳ​ແໜ່ງ ໄດ້​ກ່າວ​ຕໍ່ວິທຍຸ​ເອ​ເຊັຽ​ເສ​ຣີ ໃນ​ວັນ​ທີ 5 ເມ​ສາ ວ່າ: 

ເພາະວ່າ ເພິ່ນດຳເນີນການມາຈັ່ງໃດ ແລ້ວ ເຮົາຈະຄົ້ນຄວ້າ ຕາມເອກສານວ່າ ການກຳທຳຂອລາວ ມັນຜິດໃນລະດັບໃດຫັ້ນນ່າ ແມ່ນ ການກະທຳຂອງລາວ ມັນເປັນມັນສ້າງຄວາມເສັຽຫາຍໃນລະດັບໃດຫັ້ນນ່າ ໜ້ອຍຫຼາຍຊ່ຳໃດຫັ້ນນ່າ ແລ້ວເຮົາ ກໍໄດ້ພິຈາລະນາເທົ່ານັ້ນອີກ ເພາະວ່າ ເຮົາມີໜ້າທີ່ແບບວ່າ ກວດກາທາງດ້ານເອກສານເນາະ ແຕ່ວ່າ ດຳເນີນເນີນໂຕຈິງ ກໍແມ່ນເຈົ້າໜ້າທີ່ຫັ້ນນ່າ ສືບສວນ-ສອບສວນ ຄະດີອາຍາຫັ້ນແຫຼະ.”

ການ​ດຳ​ເນີນ​ຄະ​ດີ ຕໍ່​ຜູ້​ກະ​ທຳ​ຜິດ ການ​ສໍ້​ຣາສ​ບັງ​ຫຼວງ ຢູ່​ແຂວງ​ເຊກອງ ໃນ​ປີ 2021 ໄດ້​ພຽງ​ແຕ່ 2 ຄົນ ເທົ່າ​ນັ້ນ ຖື​ວ່າ ໜ້ອຍ​ຫຼາຍ, ແຕ່​ໃນ​ສະ​ພາບ​ໂຕ​ຈິງແລ້ວ ຍັງ​ມີ​ເຈົ້າ​ໜ້າ​ທີ່​ພັກ-ຣັ​ຖ ອີກ​ຫຼາຍ​ຄົນ ພາຍ​ໃນ​ແຂວງ​ເຊກອງ ທີ່​ກະ​ທຳ​ຄວາມ​ຜິດໃນ​ສ​ຖາ​ນະ​ສໍ້​ຣາສ​ບັງ​ຫຼວງ ໂດຍ​ສະ​ເພາະ​ ເຈົ້າ​ໜ້າ​ທີ່​ລະ​ດັບ​ສູງ ແຕ່​ເຈົ້າ​ໜ້າ​ທີ່​ຜູ້​ນ້ອຍ ເຖິງວ່າ​ຈະ​ຮູ້​ເຫດ​ການ ພັດ​ບໍ່​ສາ​ມາດ​ແຈ້ງ​ຄວາມ ​ດຳ​ເນີນ​ການ​ເອົາ​ຜິດ​ໄດ້ ຍ້ອນບໍ່​ມີ​ຫຼັກ​ຖານ​ພຽງ​ພໍ ແລະ ຢ້ານ​ວ່າ ຈະ​ໄດ້​ຮັບ​ອັນ​ຕ​ລາຍ​ ໃນ​ການ​ດຳ​ເນີນ​ຊີ​ວິດ.

ເຈົ້າ​ໜ້າ​ທີ່​ຣັ​ຖກອນ ຜູ້ບໍ່​ປະ​ສົງ​ອອກ​ຊື່ ແລະ ຕຳ​ແໜ່ງ ທ່ານ ນຶ່ງ ຢູ່ ແຂວງ​ເຊກອງ ໄດ້​ກ່າວໍ່ວິທຍຸ​ເອ​ເຊັຽ​ເສ​ຣີ ໃນ​ວັນ​ທີ 5 ເມ​ສາ ວ່າ:

ອັນນີ້ ເຮົາກໍຮູ້ຢູ່ເນາະ ແຕ່ວ່າ ເຮົາບໍ່ມີຫຼັກຖານຫັ້ນນ່າເນາະ ເຮົາເວົ້າໄປມັນຜິເດ້ເນາະ ຄັນເຮົາມີຫຼັກຖານ ເຮົາເຫັນມີຮູບ ເປັນພາບ ເປັນຣາຍລັກອັກສອນລະກະ ເອີເຮົາສາມາດຣາຍງານໄດ້ ຂ້ອຍເວົ້າແບບລວມໆ ຂ້ອຍເວົ້າປີນີ້ ປີນັ້ນ ປີໃດກະບໍ່ຮູ້ ແຕ່ວ່າ ມັນຕຳຫຼາຍຄົນເນາະ ອັນນີ້ ຂ້ອຍຈະຜິດ ຂ້ອຍຈະຜິດແລ້ວ ມັນຈະເຂົ້າຄຸກກໍເປັນໄດ້ເດ້ເນາະ.”

ຜ່ານ​ມາ​ ເຈົ້າ​ໜ້າ​ທີ່​ພັກ-ຣັ​ຖ ຈຳ​ນວນ​ນຶ່ງ ເຫັນ​ຄວາມບໍ່​ຖືກ​ຕ້ອງ ກ່ຽວ​ກັບ​ການ​ສໍ້ຣາສ​ບັງ​ຫຼວງ ທີ່​ເກີດ​ຂຶ້ນ ພາຍ​ໃນ​ແຂວງ ແຕ່ບໍ່​ສາ​ມາດ​ຮຽກ​ຮ້ອງ ໃຫ້​ໜ່ວຍ​ງານ​ທີ່​ກ່ຽວ​ຂ້ອງ ດຳ​ເນີນ​ການກວດ​ສອບໄດ້ ໃນ​ຂ​ະ​ນະ​ທີ່ ພ​ນັກງານ​ພັກ-ຣັ​ຖ ສ່ວນ​ຫຼາຍ ບໍ່​ຕ້ອງ​ການ​ເຂົ້າ​ມາ​ກ່ຽວ​ຂ້ອງ ຫຼື ອອກ​ຄຳ​ເຫັນ​ແນວ​ໃດ ກ່ຽວ​ກັບ​ເຣື່ອງນີ້.

ເຈົ້າ​ໜ້າ​ທີ່​ຣັ​ຖກອນ ຜູ້ບໍ່​ປະ​ສົງ​ອອກ​ຊື່ ແລະ ຕຳ​ແໜ່ງ ທ່ານ​ນຶ່ງ ຢູ່​ແຂວງ​ພາກ​ໃຕ້ ໄດ້​ກ່າວ​ວ່າ:

ເຮົາອອກຄວາມຄິດເຫັນບໍ່ໄດ້ຫຼາຍປານໃດ ມັນມີກົດໝາຍນ່າ ເຮົາບໍ່ໃຫເວົ້າຫຼາຍ ເພາະວ່າ ເວົ້າຫຼາຍ ກໍຕາມ ກໍຕາມລະບອບ ມັນກໍເຂົ້າຂ່າຍ ກະບົດ ເວົ້າງ່າຍໆ ວ່າ ຊັ້ນສາ ແລ້ວ ມັນຈະມີແນວໃສ່ ຂໍ້ກ່າວຫາ ແລ້ວ ກໍເຂົ້າຄຸກ ກໍຢາກໃຫ້ແກ້ໄຂຢູ່ ແຕ່ວ່າ ເຮົາເວົ້າ ຫຼາຍ ບໍໄດ້ດອກ ເຮົາມັນສຽງສ່ວນໜ້ອຍ ມີແຕ່ຖ້າໃຫ້ເພິ່ນເຮັດເອງສາ ແຕ່ ໃຫ້ເອີ້ນ ນີ້ ກໍຢາກໃຫ້ປ່ຽນແປງຢູ່ດອກ ລະບົບການປົກຄອງ ການບໍຣິຫານ.”

ທີ່​ຜ່ານ​ມາ ຄ​ະ​ນະ​ກວດ​ກາ​ພັກ-ຣັ​ຖ ແຂວງ​ເຊກອງ ໄດ້​ເຄື່ອນ​ໄຫວກວດ​ກາ​  ຣັ​ຖວິ​ສາ​ຫະ​ກິດ ນໍ້າ​ປະ​ປາ​ແຂວງ, ​ອົງ​ການ​ກາ​ແດງແຂວງ, ກາ​ນ​ປ່ອຍ​ເງິນ​ກູ້, ໂຄງ​ການ​ລົງ​ທຶນ​ຂອງຣັ​ຖ ແລະ ອື່ນໆ. ນອກ​ຈາກນີ້ ຄະ​ນະ​ກວດ​ກາ​ພັກ-ຣັ​ຖ ຍັງ​ລົງ​ກວດ​ກາ ການ​ຄຸ້ມ​ຄອງການ​ຂຸດ​ຄົ້ນ​ໄມ້, ການ​ເຄື່ອນ​ຍ້າຍ​ໄມ້ ຈົນ​ສາ​ມາດ​ຢຶດ​ໄມ້​ຜິດ​ກົດ​ໝາຍ​ໄດ້ 7,000 ແມັດ​ກ້ອນ, ຢຶດ ແລະປັບ​ໃໝ ພາ​ຫະ​ນະ 15 ຄັນ ພ້ອມ​ທັງ​ຕັກ​ເຕືອນ​ເຈົ້າ​ໜ້າ​ທີ່​ຈຳ​ນວນ​ນຶ່ງ, ກວດ​ກາ​ໂຄງ​ການ​ລົງ​ທຶນ​ຂອງຣັຖ ແລະ ພົບ​ການ​ນຳ​ສເນີ ຫັກ​ລົບ​ມູນ​ຄ່າໂຄງ​ການ ທີ່​ຄິດ​ໄລ່ບໍ່​ຖືກ​ຕາມ​ຣະ​ບຽບ​ການ ​ຂອງ​ທາງ​ການ​ຈຳ​ນວນ 3 ໂຄງ​ການ ໂດຍມີ​ພ​ະ​ນັກ​ງານ ແລະ ສ​ມາ​ຊິກ​ພັກ​ກ່ຽວ​ຂ້ອງ ​ຈຳ​ນວນ 15 ຄົ​ນ ເຊິ່ງ​ສ້າງ​ຜົ​ລ​ເສັຽ​ຫາຍ ປະ​ມານ 7 ຕື້ ກີບ.   

ປະ​ຊາ​ຊົນ ກໍ​ເຫັນ​ດີ​ນຳ ທາ​ງ​ໜ່ວຍ​ງານ​ທີ່​ກ່ຽວ​ຂ້ອງ ພະ​ຍາ​ຍາມ​ແກ້​ໄຂ ແລະ ຫຼຸດຜ່ອນ​ບັນ​ຫາ​ການ​ສໍ້​ຣາສ​ບັງ​ຫຼວງ.

ຊາວ​ບ້ານ​ຢູ່​ເມືອງ​ດາກ​ຈຶງ ທ່ານ ນຶ່ງ ໄດ້​ກ່າວ​ວ່າ:

ເອີ ກວດກາ ກໍຢາກໃຫ້ກວດກາຫັ້ນແຫຼະເນາະ ມີການສໍ້ຣາສບັງຫລວງແລ້ວ ມັນກໍມີຜົກະທົບບໍ່ດີຫັ້ນແຫຼະເນາະ ທັງຍັງບໍ່ດີ ຕໍ່ເສກິອງປະເທດ ຕໍ່ຄົນພາຍໃນປະເທດ ຄືວ່າ ແນວນັ້ນເນາະ.”

ອີງ​ຕາມຂໍ້​ມູນ​ຈາກ ທ່ານ ຄຳ​ພັນ ພົມ​ມະ​ທັດ ປະທ່ານ​ອົງ​ການກວດ​ກາ​ແຫ່ງ​ຣັ​ຖ ຢູ່​ໃນ​ກອງ​ປະ​ຊຸມ​ສະ​ພາ​ແຫ່ງ​ຊາດ ຊຸດ​ທີ 9 ໃນ​ວັນ​ທີ 25 ມີ​ນາ 2021 ວ່າ, ໃນ​ໄລ​ຍະ​ປີ 2016-2020 ອົງ​ການກວດ​ກາ​ແຫ່ງ​ຣັ​ຖ ໄດ້​ດຳ​ເນີນ​ການກວດ​ກາ 4,000 ກວ່າ​ເປົ້າ​ໝາຍ ພົບ​ເຫັນ​ຄວາມ​ເສັຽ​ຫາຍເກືອບ 5,700 ຕື້ ກີບ, ເງິນ​ໂດ​ລາຣ໌ ປະ​ມານ 30 ລ້ານ​ໂດ​ລາຣ໌, 36 ລ້ານ ບາດ, ຣົ​ຖ​ໃຫຍ່ 5 ຄັນ.

ທ່ານ ຄຳ​ພັນ ພົມ​ມະ​ທັດ ຍັງ​ຣາຍ​ງານ​ອີກ​ວ່າ: ໄດ້​ມີ​ການ​ສືບ​ສວນ-ສອບ​ສວນ ຜູ້​ທີ່​ມີ​ພຶດ​ຕິ​ກັ​ມ​ສໍ້​ຣາສ​ບັງ​ຫຼວງ ​ທັງ​ໝົດ 762 ປາຍ​ຄົນ ລວມ​ມີ​ພະ​ນັກ​ງານ​ຂອງ​ຣັ​ຖ, ພະ​ນັກ​ງານຣັ​ຖວິ​ສາ​ຫະ​ກິ​ຈ, ພະ​ນັກ​ງານ​ບໍ​ຣິ​ສັດ ແລະ ປະ​ຊາ​ຊົນ, ສາ​ມາດ​ເກັບ​ກູ້​ເງິນ​ຄືນ​ມາ​ໄດ້​ໄດ້​ທັງ​ໝົດ 1,000 ຕື້ ກີບ, ເງິນ​ໂດ​ລາຣ໌ ເກືອບ 3 ລ້ານ ໂດ​ລາຣ໌, 11 ລ້ານ ບາດ ແລະ ຣົ​ຖ​ຈຳ​ນວນ 4 ຄັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ