ປະຊາຊົນ ບໍ່ເຊື່ອໝັ້ນ ຕໍ່ລະບົບສານ

ຣັຖບານລາວ ເຄີຍຕັ້ງເປົ້າໝາຍວ່າ ຈະພັທນາປະເທດລາວ ໃຫ້ກາຍເປັນຣັຖແຫ່ງກົດໝາຍ, ແຕ່ວ່າ ໃນໂຕຈິງ ປະຊາຊົນ ຍັງບໍ່ເຊື່ອໝັ້ນ ຕໍ່ລະບົບກົດໝາຍ ແລະ ລະບົບຍຸຕິທັມ.

ປະຊາຊົນ ທ່ານນຶ່ງ ໄດ້ໃຫ້ສໍາພາດຕໍ່ວິທຍຸ ເອເຊັຽເສຣີ ວ່າ:

“ຖາມວ່າປະຊາຊົນເຊື່ອໝັ້ນບໍ່. ມັນກະບໍ່ເຊື່ອໝັ້ນ ໂຕມັນເຫັນແຈ້ງມາດຕຣາ 38 ກົດໝາຍ ການປະມົງນີ້ແຫຼະ. ໂຕມັນໜ້າກຽດແຮງແທ້ໆ ເຮົາເຮັດຕ້ອນເຮັດລີ່ ລວງປາໃສ່ມອງ. ບາດກົດໝາຍມາດຕຣາ 38 ອອກມາ ບໍ່ໃຫ້ປະຊາຊົນເຮັດວຽກ ວ່າມັນຜິດກົດໝາຍ. ປະຊາຊົນໃສ່ຕ້ອນໃສ່ລີ່ ວ່າມັນຜິດກົດໝາຍ.”

ປະຊາຊົນທ່ານນີ້ ກ່າວຕື່ມອີກວ່າ:

“ການປະຕິບັດໂຕອື່ນ ມັນກະຢາກຄ້າຍຄືກັນຫັ້ນແຫຼະ. ຄືດິນນີ້ເນາະ ວານນີ້ ເພິ່ນກະເວົ້າໝົດບ້ານ ເຂົາກະເວົ້າຖາມຫັ້ນແຫຼະ ເວົ້າເຣື່ອງກົດໝາຍເຮົານີ້. ໃຫ້ມັນເຂັດຢໍາຄືກົດໝາຍເຂົາແດ່ ເປັນຫຍັງ ອັນນີ້ຈີນມາ ສວນມັນກະດຸດຖິ້ມເລີຍ.”

ປະຊາຊົນອີກທ່ານນຶ່ງ ໄດ້ໃຫ້ສໍາພາດຕໍ່ວິທຍຸ ເອເຊັຽເສຣີ ວ່າ:

“ຂ້ອຍເຊື່ອໝັ້ນບໍ່ຮອດ 10 ເປີເຊັນ. ຄືນ້ອງພົວພັນຊ່ວຍຄະດີຂອງພີ່ນ້ອງ ເຂົາຕັດສິນແລ້ວ ຈົນນ້ອງມາຫາສານສູງ, ສານສູງອ່ານ. ໂອ້ມັນບໍ່ຖືກ ເຫດການທີ່ເກີດຂຶ້ນ ມັນບໍ່ໜ້າຕັດສິນ ໃຫ້ຝ່າຍໂຈດຊະນະ.​”

ນັກກົດໝາຍທ່ານນຶ່ງ ຜູ້ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ:

“ການປະຕິບັດໜ້າທີ່ ຂອງເຈົ້າໜ້າທີ່ໃນຂະແໜງສານ ແລະໄອຍະການ ໃນລາວ ຜ່ານມາເຫັນວ່າມີກະແສໂຈມຕີ ຈາກສັງຄົມ ຂ້ອນຂ້າງຫລາຍ ບໍ່ວ່າຈະເປັນການຈັດຕັ້ງ ປະຕິບັດກົດໝາຍ ທີ່ມີມາດຖານຕ່ຳ ມີການສວຍໃຊ້ໜ້າທີ່ ຕຳແໜ່ງ.”

ນັກກົດໝາຍ ທ່ານນີ້ ຍັງກ່າວຕື່ມອີກວ່າ:

“ມີການຊື້ຈ້າງ ແລະບໍ່ປະຕິບັດຕາມ ຫລັກການ ຂ້ອນຂ້າງຫລາຍ, ຫລັກໆແມ່ນຄວາມບໍ່ໂປ່ງໃສ ໃນຂະບວນການ ດຳເນີນຄະດີ,​ ຜ່ານມາຍັງເຫັນວ່າ ມີການຖ່ວງດຶງ ແລະແກ່ຍາວເວລາ, ບໍ່ໃຫ້ການຮ່ວມມືກັບຄູກໍຣະນີ ຝ່າຍໃດຝ່າຍນຶ່ງ ໂດຍນຳໃຊ້ຮູບ, ແບບການຖິ້ມຄວາມຮັບຜິດຊອບ ແລະ ເອົາຫົວໜ້າມາອ້າງ ຈົນເຮັດໃຫ້ມີຫາງສຽງ ຕໍ່ສະຖາບັນຕຸລາການ ໃນວົງກວ້າງ.”

ເຖິງຢ່າງໃດກໍຕາມ, ທ່ານ ບຸນທັນ ບຸນທະວິໄລ, ຮອງຫົວໜ້າ ອົງການໄອຍະການ ປະຊາຊົນສູງສຸດ ໄດ້ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນມານີ້ວ່າ:

“ວຽກງານໃຫ້ຄຳປຶກສາ ປະຊາຊົນ ໄດ້ເຮັດທົດລອງ ຢູ່ອົງການໄອຍະການ ປະຊາຊົນສູງສຸດ ເປັນຫ້ອງໃຫ້ຄໍາປຶກສາ ປະຊາຊົນ ໄດ້ປະມານ 1 ປີ ໃນແຕ່ລະເດືອນ ມີພໍ່ແມ່ປະຊາຊົນ ມາຂໍຄຳປຶກສາ ປະມານ 25 ຄົນ, ເຮັດໃຫ້ປະຊາຊົນ ມີຄວາມເຂົ້າໃຈ ລະບົບການເຮັດວຽກ ຂອງອົງການໄອຍະການ ປະຊາຊົນ ດີຂຶ້ນ ແລະ ເຂົ້າເຖິງຂະບວນຍຸຕິທັມງ່າຍຂຶ້ນ.”

ທ່ານ ບຸນທັນ ບຸນທະວີໄລ ກ່າວຕື່ມອີກວ່າ:

“ອົງການໄອຍະການ ປະຊາຊົນ ສືບຕໍ່ຈັດຕັ້ງປະຕິບັດ ຫ້ອງໃຫ້ຄໍາປຶກສາ ປະຊາຊົນ ເພື່ອໃຫ້ຄໍາປຶກສາທາງດ້ານກົດໝາຍ ໂດຍສະເພາະຂະບວນຍຸຕິທັມ ແລະ ລະບົບເຮັດວຽກ ຂອງອົງການໄອຍະການ ແຕ່ລະຂັ້ນ, ຈະໄດ້ແຈ້ງຕອບປະຊາຊົນ ເປັນລາຍລັກອັກສອນ ກ່ຽວກັບການແກ້ໄຂຄຳຮ້ອງ ຫລື ຄະດີທີ່ເຂົ້າມາອົງການໄອຍະການ ປະຊາຊົນ.”

ອີງຕາມຂໍ້ມູນ ຈາກສະພາແຫ່ງຊາຕ, ມາເຖິງປັດຈຸບັນ ສະພາແຫ່ງຊາຕ ໄດ້ອອກກົດໝາຍແລ້ວ ປະມານ 100 ປາຍສະບັບ.