ພະນັກງານ, ນັກສຶກສາລາວ ທີ່ອິສຣາແອລ ຍັງບໍ່ໄດ້ກັບຄືນປະເທດ

ວັນທີ 17 ຕຸລາ 2023 ທີ່ຜ່ານມາ ທ່ານ ສຸລິອຸດົງ ສູນດາລາ, ຮອງຣັຖມົນຕຣີ ກະຊວງສຶກສາທິການ ແລະ ກິລາ ໄດ້ເຜີຍແຜ່ຜ່ານເຟສບຸກຄ໌ ສ່ວນໂຕວ່າ ປັດຈຸບັນພະນັກງານ ແລະ ນັກສຶກສາລາວ ຈຳນວນ 119 ຄົນ ໃນນັ້ນຂແນງການກະສິກັມ ແລະ ປ່າໄມ້ 70 ຄົນ ແລະ ມະຫາວິທຍາໄລແຫ່ງຊາຕລາວ 49 ຄົນ ຢູ່ປະເທດອິສຣາແອລ ມີຄວາມປອດໄພດີ.

ຂະນະທີ່ນັກສຶກສາລາວ ຂແນງການກະສິກັມ ແລະ ປ່າໄມ້ ຜູ້ນຶ່ງທີ່ປັດຈຸບັນນີ້ ຍັງຢູ່ທາງພາກເໜືອຂອງປະເທດອິສຣາແອລ ກ່າວຕໍ່ວິທຍຸເອເຊັຽເສຣີ ໃນວັນທີ 18 ຕຸລາ ນີ້ວ່າ ຍັງປອດໄພດີ ສ່ວນເຣື່ອງມີຄວາມປະສົງ ຢາກກັບປະເທດລາວ ຫຼືບໍ່ ນັ້ນ ແມ່ນຂຶ້ນກັບມະຫາວິທຍາໄລແຫ່ງຊາຕ ແລະ ພາກສ່ວນທີ່ກ່ຽວຂ້ອງ ຈະໃຫ້ກັບປະເທດລາວ ຫຼືບໍ່.

ດັ່ງທ່ານກ່າວວ່າ:

“ຕອນນີ້ກໍໄຄແດ່ແລ້ວ ເອື້ອບ່ອນນ້ອງຢູ່ນີ້ນ່າ ບ່ອນປອດໄພແນ່ມາຝຶກງານນີ້ນ່າ ປີນຶ່ງເອື້ອຍໝູ່ ກໍຍັງປອດໄພຢູ່ເອື້ອຍ ແຕ່ວ່າເຣື່ອງກັບນີ້ບໍ່ຮູ້ເພິ່ນ ຄັນເພິ່ນຊິກັບເພິ່ນກໍຊິແຈ້ງຕິເນາະ ເພິ່ນວ່າໃຫ້ກັບນ່ານັກສຶກສາລາວ.”

ດ້ານເຈົ້າໜ້າທີ່ ທີ່ກ່ຽວຂ້ອງ ເຊິ່ງເປັນຜູ້ທີ່ຈັດນັກສຶກສາ ຈໍານວນ 20 ຄົນ ຈາກແຂວງຈໍາປາສັກ ໄປຝຶກງານຂແນງການ ກະສິກັມ ແລະ ປ່າໄມ້ ຢູ່ປະເທດອິສຣາແອລ ກ່າວວ່າ ທາງເຈົ້າໜ້າທີ່ ມີຄວາມເປັນຫ່ວງຄວາມປອດໄພ ຂອງນັກສຶກສາ ຍ້ອນທາງຄຣູອາຈານ ພາຍໃນປະເທດລາວ ຈະບໍ່ຮູ້ໄດ້ເລີຍວ່າ ທາງປະເທດອິສຣາແອລ ຈະໃຫ້ຄວາມຮ່ວມມືຮັບປະກັນ ຄວາມປອດໄພຂອງນັກສຶກສາລາວ ໄດ້ສໍ່າໃດ.

ສ່ວນເຣື່ອງນັກສຶກສາລາວ ມີຄວາມປະສົງຈະກັບປະເທດລາວ ຫຼື ບໍ່ນັ້ນແມ່ນຍັງບໍ່ທັນມີຜູ້ໃດ ແຈ້ງຄວາມປະສົງນັ້ນມາຫາຄຣູອາຈານເທື່ອ ແຕ່ວ່າດ້ານຄຣູອາຈານ ໄດ້ຕິດຕາມ ແລະ ສື່ສານກັບນັກສຶກສາ ທຸກຄົນຢ່າງຕໍ່ເນື່ອງ.

ດັ່ງຍານາງກ່າວ ໃນມືດຽວກັນີ້ວ່າ:

“ເຮົາກໍເປັນຫ່ວງຢູ່ບ່ອນວ່າ ຈັກເຂົາຊິຮັບປະກັນກັບນັກຮຽນ ເຮົາສໍ່າໃດຫັ້ນນ່າ ເຮົາບໍ່ຮູ້ວ່າຢູ່ທາງນັ້ນເຂົາຊິໃຫ້ການຮ່ວມມືກັບເຮົາ ຊໍ່າເພາະວ່າຄືສົງຄາມຫັ້ນແຫຼະເນາະ ຍັງມີຄວາມຮຸນ ແຮງຢູ່ຫັ້ນນ່າໃດມີແຕ່ວ່າເຂົາວ່າມັນຍັງບໍ່ທັນມາຮອດພີ້ ເຂົາກໍໃຫ້ຄວາມຮ່ວມືຢູ່ເຂົາກໍຍັງບໍ່ທັນໄດ້ເວົ້າວ່າ ຊິກັບມາປະເທດຊິຫັ້ນນ່າແຕ່ວ່າເຮົາກໍສື່ສານ ກັບເຂົາເຈົ້າຢູ່ວ່າມີຄວາມປອດໄພ ໃຫ້ຫາຍຫ່ວງເຂົາກໍເວົ້າຈັ່ງຊັ້ນແຫຼະ.”

ຍານາງກ່າວຕື່ມ ວ່ານັກສຶກສາລາວຈາກແຂວງຈໍາປາສັກ ທີ່ໄປຝຶກງານຢູ່ປະເທດອິສຣາແອລ ຈຳນວນ 20 ຄົນນັ້ນແມ່ນໄປຝຶກງານໄດ້ 1 ເດືອນປາຍແລ້ວ ໃນນັ້ນມີນັກສຶກສາລາວ ຈາກແຂວງຈຳປາສັກ ໄປຝຶກງານຢູ່ເຂດທີ່ມີສົງຄວາມຈຳນວນ 2 ຄົນ ແລະ ທັງໝົດ ປອດໄພດີ ຍ້ອນພວກເຂົາເຈົ້າມາອາໄສຢູ່ປະເທດອິສຣາແອລ ໃນນາມຂອງນັກສຶກສາ.

ດ້ານພໍ່ຂອງນັກສຶກສາລາວ ທີຝຶກງານຢູ່ປະເທດອິສຣາແອລ ກ່າວວ່າໂຕເອງມີຄວາມເຂົ້າໃຈວ່າ ລູກຂອງໂຕເອງໄດ້ຮັບທຶນໃຫ້ໄປຝຶກງານ ຢູ່ປະເທດອິສຣາແອລ ເຊິ່ງການຝຶກງານເປັນຮູບແບບ ທີ່ເຮັດວຽກ ແລະ ຮຽນໄປພ້ອມກັນ ໂດຍຜ່ານການເຫັນດີ ຂອງມະຫາວິທາໄລແຫ່ງຊາຕລາວ. ຫຼ້າສຸດສູນກາງການຝຶກອົບຮົມກະສິກັມສາກົລ ໄດ້ສົ່ງໜັງສືເຖີງພໍ່-ແມ່ ຂອງນັກສຶກສາລາວ ທີ່ໄປຝຶກງານຂແນງການ ກະສິກັມ ແລະ ປ່າໄມ້ວ່າ ລູກຫຼານຂອງໂຕເອງ ຢູ່ຫ່າງໄກຈາກພື້ນທີ່ ສົງຄາມ ແລະ ຢູ່ໃນພື້ນທີ່ຖືວ່າ ເປັນນຶ່ງໃນສະຖານທີ່ປອດໄພ ຂອງອິສຣາແອລ ໂດຍພໍ່ຂອງນັກສຶກສາລາວ ຜູ້ນີ້ໄດ້ອ່ານໜັງສືສະບັບນັ້ນ ໃຫ້ວິທຍຸເອເຊັຽເສຣີ ໂດຍມີໃຈຄວາມສຳຄັນ ກ່ຽວກັບການຮັບປະກັນ ຄວາມປອດໄພຂອງນັກສຶກສາລາວວ່າ:

“ພວກເຮົາໄດ້ພົບປະກັບນັກຮຽນທັງໝົດ ເປັນສ່ວນກັບເຂົາເຈົ້າເພື່ອເວົ້າກ່ຽວກັບ ສະຖານະການ ແລະ ຕອບຄຳຖາມ ຫຼື ຄວາມກັງວົນ ທີ່ພວກເຂົາມີພວກເຮົາຍັງໄດ້ແບ່ງປັນ ຄວາມສຸຂກັບພວກເຂົາ ເພື່ອຮັບປະກັນວ່າ ນັກຮຽນມີຄວາມປອດໄພ. ເຮົາໄດ້ຕິດຕໍ່ພົວພັນກັບເຈົ້າໜ້າທີ່ ອິສຣາແອລ ຢູ່ສເມີ ແລະ ເຮັດຕາມຂໍ້ແນະນໍາ ທີ່ເຂົາເຈົ້າມີໃຫ້ພວກເຮົາ ເຊື່ອວ່າພວກເຮົາ ສາມາດກັບຄືນໄປຮຽນໃນໄວໆນີ້. ໂຕນີ້ແມ່ນໜັງສື ອຳນວຍການຂອງສູນກາງ ການຝຶກອົບຮົມ ກະສິກັມສາກົລ.”

ຂະນະທີ່ແມ່ຂອງນັກສຶກສາລາວ ກ່າວວ່າລູກຂອງທ່ານ ທີ່ເປັນນັກສຶກສາຝືກງານ ຂແນງກະສິກັມ ແລະ ປ່າໄມ້ ຍັງຄົງເຮັດວຽກປົກກະຕິ ຢູ່ທາງພາກເໜືອ ຂອງປະເທດອິສຣາແອລ ແລະ ຍັງສາມາດຕິດຕໍ່ລູກໄດ້ ແລະ ປອດໄພດີຢູ່ ແຕ່ເປັນຫ່ວງ ບໍ່ຮູ້ວ່າທະຫານ ຈະເຂົ້າມາບຸກທາງເໜືອ ບ່ອນທີ່ລູກອາໄສຢູ່ມື້ໃດ.

ດັ່ງຍານາງກ່າວ ໃນມື້ດຽວກັນວວ່າ:

“ເພິ່ນກໍເວົ້າວ່າ ທາງການຢູ່ຫັ້ນເບິ່ງແຍງ ກໍຍັງເຮັດວຽກປົກກະຕິ ພາກເໜືອ ມັນຈະບໍ່ທັນໄດ້ສົງຄາມ ແຕ່ວ່າ ອັນເຮັດແບບລະວັງ ຢ້ານມັນມາແບບໃໝ່ບາດນີ້ ຄັນເຂົາມາຊ່ວງທີ່ທາງພາກເໜືອ ເຮົາກໍຕ້ອງເປັນຫ່ວງ ເຂົາເຈົ້າເພາະວ່າ ດຽວນີ້ຫັ້ນເພິ່ນໄປລີ້ຊ້ອນຢູ່.”

ປະຊາຊົນລາວ ທີ່ຕິດຕາມຂ່າວສົງຄາມ ອິສຣາແອລ-ຮາມາສ ຜ່ານສື່ສັງຄົມອອນລາຍນ໌ ກ່າວວ່າເປັນຫ່ວງນຳນັກສຶກສາລາວ ແລະ ພົລເມືອງລາວ ທີ່ຢູ່ປະເທດອິຣລາແອລ ເນື່ອງຈາກເຫັນ ປະເທດໄທຍ ອອກຂ່າວ ກ່ຽວກັບສົງຄາມນີ້ ທຸກມື້ ຂະນະທີ່ປະເທດລາວ ບໍ່ຄ່ອຍມີຂ່າວຫຼາຍ ຈຶ່ງຢາກໃຫ້ປະເທດລາວຣາຍງານຂ່າວ ຄວາມຄືບໜ້າ ກ່ຽວກັບຄົນລາວ ໃນປະເທດອິສຣາແອລ ທຸກມື້ ຄືປະເທດໄທຍ ພ້ອມຄາດວ່າ ຄົນລາວທີ່ຢູ່ປະເທດອິສຣາແອລ ຕອນນີ້ຄົງຍັງບໍ່ທັນໄດ້ກັບຄືນປະເທດລາວເທື່ອ ຍ້ອນປະເທດລາວ ບໍ່ມີການຂົນສົ່ງຄົນລາວ ກັບປະເທດຄືປະເທດໄທຍ.

ດັ່ງຍານາງກ່າວ ໃນມື້ດຽວກັນນີ້ວ່າ:

“ກໍເປັນຫ່ວງຢູ່ ເພາະວ່າເປັນຕາຢ້ານຫຼາຍ ອອກທຸກມື້ໄທຍ ແຕ່ວ່າລາວກໍບໍ່ອັບເດດ ທຸກມື້. ສ່ວນຫຼາຍເຮົາເບິ່ງແຕ່ເຟສບຸກຄ໌, ຕິກຕອກ ເຂົ້າເຟສ ເອົາບໍ່ທັນໄດ້ຂຶ້ນເຮືອບິນມາຕິ ເພາະວ່າກໍຄືວ່າຫັ້ນແຫຼະ ມັນບໍ່ໄດ້ທຶນ ມັນບໍ່ມີທຶນ ຄືຄົນໄທຍຕິເບາະ.”

ຫຼ້າສຸດ ທ່ານ ສຸລິອຸດົງ ສຸນດາລາ, ຮອງຣັຖມົນຕຣີ ກະຊວງສຶກສາທິການ ແລະ ກິລາ ກໍໄດ້ເປີດເຜີຍຕື່ມຜ່ານເຟສບຸກຄ໌ສ່ວນໂຕ ໃນວັນທີ 17 ຕຸລາ 2023 ທີ່ຜ່ານມາວ່າ ກອງປະຊຸມຄະນະປະຈຳພັກ ແລະ ຄະນະຣັຖມົນຕຣີ ກະຊວງສຶກສາທິການ ແລະ ກິລາ ເຫັນດີເລື່ອນ ການເດີນທາງ ຂອງນັກສຶກສາລາວຈາກມະຫາວິທຍາໄລ ແຫ່ຊາຕລາວ ຈຳນວນ 38 ຄົນໄປປະເທດອິສລາແອລ ຍ້ອນສົງຄາມ ໄດ້ເພີ່ມທະວີຄວາມຮຸນແຮງຂຶ້ນ.