ສປຊ ທວງຖາມ ລາວ-ໄທ ເຣື່ອງ ອອດ ໄຊຍະວົງ

ໄຊຍາ
2019-11-26
ອີແມວລ໌
ຄໍາເຫັນ
Share
ພິມ
ທ້າວ ອ໊ອດ ໄຊຍະວົງ ພ້ອມໝູ່ຄນະ ແລະ ຜູ້ສນັບສນູນ ຢາກໃຫ້ມີ ສິດທິມະນຸດ ແລະ ສິດເສຣິພາບ ຢ່າງແທ້ຈິງ ຢູ່ ສປປ ລາວ
ທ້າວ ອ໊ອດ ໄຊຍະວົງ ພ້ອມໝູ່ຄນະ ແລະ ຜູ້ສນັບສນູນ ຢາກໃຫ້ມີ ສິດທິມະນຸດ ແລະ ສິດເສຣິພາບ ຢ່າງແທ້ຈິງ ຢູ່ ສປປ ລາວ
ນັກຂ່າວພົລເມືອງ

ຄະນະຜູ້ຣາຍງານພິເສດ UN  ສົ່ງເອກກະສານ ທາງການເຖິງຣັຖບານ ລາວແລະໄທ ຂໍໃຫ້ຊີ້ແຈງເພີ່ມຕື່ມ ກ່ຽວກັບການຫາຍໂຕໄປຂອງ ທ້າວ ອອດ ໄຊຍະວົງ ເມື່ອເດືອນ ກັນຍາ ຜ່ານມາ. ຢ້ານວ່າຖືກສົ່ງກັບໄປລາວ ອາດຈະມີການປະຕິບັດ ທີ່ບໍ່ດີ ຊຶ່ງ ເປັນການຣະເມີດ ກົດໝາຍ ຣະຫວ່າງປະເທດ. ຕໍ່ກໍຣະນີດັ່ງກ່າວຜ່ານມາ ເຈົ້າໜ້າທີ່ຕຳຣວດ ທີ່ຮັບຜິດຊອບຄະດີ ການຫາຍສາບສູນຂອງ ທ້າວອອດ ໄຊຍະວົງ ກໍ່ໄດ້ໃຫ້ສຳພາດ ຕໍ່ນັກຂ່າວ ເອເຊັຽເສຣີ ໃນວັນທີ 18 ພືສຈິກາວ່າ:

"ກຳລັງດຳເນີນການຢູ່ ຄືເຮັດທຸກຂັ້ນຕອນ ຂອງຂະບວນການສືບສວນສອບສວນ ລະ, ແລ້ວກໍໄດ້ດຳເນີນການປະສານກັບ UN, ມື້ນັ້ນ UN ເຂົາກໍມາຕາມເຣື່ອງນີ້ ສ່ວນຕຳຣວດກໍປະສານກັບ UN ເປັນແຕ່ລະໄລຍະ."

ເອກກະສານ ດັ່ງກ່າວໄປເຜີຍແຜ່ ໃນວັນທີ 25 ກັນຍາ ຜ່ານມາໂດຍມີຣາຍລະອຽດ ຂໍ້ມູນ ຂອງ ອອດ ໄຊຍະວົງ ເຊິ່ງເປັນສະມາຊິກ ຂອງກຸ່ມ Free Lao ກຸ່ມກິຈກັມ ດ້ານສິດທິມະນຸດ ແລະ ປະຊາທິປະໄຕໃນລາວ ທີ່ມີຖານຢູ່ປະເທດໄທ. ຕໍ່ບັນຫາ ດັ່ງກ່າວ ທ່ານ ສຸໄນ ຜາສຸກ ນັກວິຈັຍ ແລະ ທີ່ປຶກສາອາວຸໂສ ຂອງອົງການສິດທິມະນຸດ ປະເທດໄທ ໃຫ້ສຳພາດ ຕໍ່ນັກຂ່າວເອເຊັຽເສຣີວ່າ ຂໍຮຽກຮ້ອງໃຫ້ ທາງການໄທ ເລັ່ງຕິດຕາມສືບສວນສອບສວນ ການຫາຍສາບສູນ ຂອງ ທ້າວ ອອດ ໄຊຍະວົງ.

"ຄືຕອນນີ້ເຮົາກໍຍັງເປັນ ໃນສ່ວນທີ່ວ່າເຮົາກໍຍັງຮຽກຮ້ອງ ຝັ່ນໄທ ໂດຍສະເພາະ ແມ່ນຕຳຣວດກໍທຳການສືບສວນ ຕໍ່ໄປວ່າເກີດຫຍັງຂຶ້ນກັບ ທ້າວ ອອດ ຣັຖບານໄທ ກໍຄວນສະແດງທ່າທີ່ ທີ່ຊັດເຈັນ ໃນການທີ່ຈະຢຶດໝັ້ນພັນທະ ກ່ຽວກັບ ການຄຸ້ມຄອງ ຜູ້ລີ້ພັຍ."

ກ່ອນ ອອດ ໄຊຍະວົງ ຈະຫາຍສາບສູນໄປ ຕົ້ນເດືອນສິງຫາ 2019 ມີຂ່າວລືໃນກຸ່ມຂອງ ນັກປົກປ້ອງສິດທິມະນຸດຊາວລາວວ່າ ຣັຖບານລາວກຳລັງ ນຳຫາໂຕນັກປົກປ້ອງ ສິດທິມະນຸດ ຈຳນວນ 6 ຄົນ ທີ່ຢູ່ໃນກຸ່ມປະທ້ວງ ເມື່ອກໍຣະກະດາ ທີ່ ບາງກອກ ນໍາໂດຍ ອອດໄຊຍະວົງ ຂໍຮຽກຮ້ອງ ໃນການປະທ້ວງ ນັ້ນແມ່ນໃຫ້ຣັຖບານລາວ ປ່ອຍໂຕ ສະມາຊິກ ກຸ່ມ Free Lao ສາມຄົນ ທີ່ຖືກກັກຂັງ ໃນລາວ.

ໃນສ່ວນຂອງຂໍ້ຮຽກຮ້ອງ ໃນເອກກະສານ ຂອງ ຄະນະຜູ້ຣາຍງານ ພິເສດ UN ໃຫ້ທາງການລາວ ແລະ ໄທ ຊີ້ແຈງມີ 7 ປະເດັນ ໃນນັ້ນທີ່ສຳຄັນ ແມ່ນໃຫ້ຊີ້ແຈງຂໍ້ມູນ ຫຼື ຄວາມຄິດເຫັນເພີ່ມຕື່ມ ກ່ຽວກັບຕຳແໜ່ງ ທີ່ອອດຢູ່ ໃນປັດຈຸບັນ ແລະ ຂັ້ນຕອນ ການສືບສວນ ໃນກໍຣະນີ ການຫາຍໂຕໄປ ແລະ ຂໍໃຫ້ມີການໃຫ້ຂໍ້ມູນ ເຣື່ອງມາຕການ ທີ່ຊັດເຈັນຂອງຣັຖບານ ໃນການຫາໂຕ ອອດ ໄຊຍະວົງ ແລະ ຮັບປະກັນວ່າ ເຂົາຍັງມີພາວະສຸຂພາບກາຍ ແລະຈິດ ທີ່ດີຢູ່.

ນອກຈາກນັ້ນຂໍ້ຮຽກຮ້ອງຂອງ UN ໂດຍລວມ ກໍແມ່ນເວົ້າເຖິງ ໃຫ້ທາງການຊ່ອຍຊີ້ແຈງວ່າ ທາງການໄທໄດ້ສົ່ງ ທ້າວ ອອດໄຊຍະວົງ ກັບລາວ ຫຼືບໍ່, ມາຕການທີ່ຮັບປະກັນປ້ອງກັນ ສິດທິມະນຸດເປັນຕົ້ນ.

ທ້າວອອດ ໄຊຍະວົງ ພົບເຫັນເປັນຄັ້ງສຸດທ້າຍ ໂດຍໝູ່ຂອງເຂົາ ເມື່ອເວລາ 17:30 ນາທີ ໃນວັນທີ 26 ສິງຫາ 2019 ຂນະທີ່ກຳລັງ ອອກຈາກບ້ານໃນເຂດບືງກຸ່ມ ບາງກອກ ເພື່ອໄປພົບໝູ່ອີກສອງຄົນ ໃນເວລາ 18:34 ນາທີ. ໃນບັນຊີເຟສບຸກ ຂອງ ອອດ ໄຊຍະວົງ ສົ່ງໃຫ້ເພື່ອນກຽມຕົ້ມເຂົ້າ ໄວ້ລໍຖ້າ ທີ່ຮ້ານອາຫານ ທີ່ເຂົາເຮັດວຽກຢູ່ ຈາກນັ້ນບໍ່ມີໃຜຮູ້ວ່າ ອອດຫາຍສາບສູນໄປ ທາງໃດ.

ເຕັມຫນ້າ