ຂໍອະພັຍໂທດ ໃຫ້ນັກໂທດ ໃນໂອກາດ ວັນຊາດ
2021.11.11
ກອງປະຊຸມສມັຍສາມັນເທື່ອທີ 2 ຂອງສະພາແຫ່ງຊາດຊຸດ ທີ່ 9 ເມື່ອວັນທີ 6 ພຶສຈິກາ 2021
ຮູບພາບຈາກ ວິດີໂອ: LNTV
ໃນກອງປະຊຸມສມັຍສາມັນເທື່ອທີ 2 ຂອງສະພາແຫ່ງຊາດຊຸດ ທີ່ 9 ເມື່ອວັນທີ 6 ພຶສຈິກາ ທີ່ຜ່ານມາ ທ່ານ ໄຊຊະນະ ໂຄດພູທອນ ຫົວໜ້າອົງການອັຍການປະຊາຊົນສູງສຸດ ໄດ້ຄົ້ນຄວ້າສເນີຕໍ່ປະທານປະເທດ ໃຫ້ພິຈາຣະນາອະພັຍໂທດ ແກ່ນັກໂທດ ທີ່ປະພຶດໂຕດີໃນຄ້າຍຄຸມຂັງ ທັງໝົດ 1,992 ຄົນ ໃນປີນີ້, ດັ່ງທ່ານກ່າວ ໃນຕອນນຶ່ງວ່າ :
“ສຳລັບປີ 2021 ຄະນະກັມມະການອະພັຍໂທດຣະດັບຊາດ ໄດ້ຄົ້ນຄວ້າ ແລະສເນີຕໍ່ປະທານປະເທດ ເພື່ອພິຈາຣະນາ ອະພັຍໂທສ ຕາມຣະບຽບມີທັງໝົດຈຳນວນ 1,992 ຄົນ ພ້ອມກັນນັ້ນ ນັກໂທດ ທີ່ໄດ້ຮັບການສຶກສາອົບຮົມ ແລະຝຶກວິຊາອາຊີບຕ່າງໆ ເຮັດໃຫ້ນັກໂທດ ກາຍເປັນຜູ້ທີ່ໄດ້ຮັບການສຶກສາອົບຮົມ ແລະຝຶກວິຊາອາຊີບຕ່າງໆ ເຮັດໃຫ້ນັກໂທດການເປັນຜູ້ຕື່ນຕົວ ມີຄວາມກ້າວໜ້າ ໃນຄ້າຍຄຸມຂັງ-ດັດສ້າງ.”
ກ່ຽວກັບເຣື່ອງນີ້ ເຈົ້າໜ້າທີ່ລາວທ່ານນຶ່ງ ທີ່ຂໍສງວນຊື່ແລະຕໍາແໜ່ງ ກ່າວວ່າ ສໍາລັບການອະພັຍໂທດນັກໂທດ ເນື່ອງໃນໂອກາດວັນຊາດທີ 2 ທັນວາ ປີນີ້ ກໍຈະບໍ່ແຕກຕ່າງກັບປີຜ່ານໆມາ ຊຶ່ງນັກໂທດທີ່ໄດ້ຮັບການອະພັຍໂທດ ແລະໄດ້ຮັບການປ່ອຍໂຕ ສ່ວນຫຼາຍກໍຈະແມ່ນນັກໂທດຄະດີປະເພດຢາເສບຕິດ, ລັກຊັບ ແລະອື່ນໆ ສ່ວນນັກໂທດຄະດີການເມືອງ ກໍຍັງຈະບໍ່ໄດ້ຮັບການອະພັຍໂທດຢູ່ຄືເກົ່າ, ດັ່ງທ່ານກ່າວຕໍ່ວິທຍຸເອເຊັຽເສຣີ ໃນວັນທີ 10 ພຶສຈິການີ້ວ່າ:
“ສ່ວນຫຼາຍກະຊິແມ່ນຄະດີຢາເສບຕິດຫຼາຍແຫຼະ ຢາເສບຕິດ ລັກຊັບພົລເມືອງ ຫຼາຍກວ່າໝູ່ແທ້ ອັນດຽວນີ້ຫັ້ນແຫຼະ ອອກມາຈາກຢາເສບຕິດຫັ້ນແຫຼະ ໂອ ເຣື່ອງການເມືອງແທ້ໆ ບໍ່ທັນມີເທື່ອໃດ໋.”
ໃນຂະນະທີ່ ເຈົ້າໜ້າທີ່ຂັ້ນບ້ານ ທ່ານນຶ່ງ ຢູ່ນະຄອນຫຼວງວຽງຈັນ ກ່າວວ່າ ໃນແຕ່ລະປີ ກໍມີຜູ້ທີ່ໄດ້ຮັບການອະພັຍໂທດຈໍານວນນຶ່ງ ທີ່ຖືກປ່ອຍອອກມາຈາກຄ້າຍຄຸມຂັງ ແລ້ວກໍກັບຄືນມາສູ່ເຂດບ້ານທີ່ທ່ານຮັບຜິດຊອບ ແຕ່ໃນປີນີ້ ກໍຕ້ອງໃຫ້ຜູ້ທີ່ຖືກປ່ອຍອອກຈາກຄ້າຍຄຸມຂັງນັ້ນ ມີການກັກກັນໂຕຕາມມາຕການປ້ອງກັນໂຄວິດ-19 ກ່ອນ ຈຶ່ງຈະອະນຸຍາດໃຫ້ເຂົ້າມາເຂດບ້ານໄດ້, ດັ່ງທ່ານກ່າວ ໃນມື້ດຽວກັນນີ້ວ່າ:
“ອອກຈາກການຄຸມຂັງເຂົ້າມາພີ້ ເຮົາກໍພ້ອມກັນຈັດຕັ້ງປະຕິບັດຕາມຄຳແນະນຳ ຂອງສະເພາະກິຈຂັ້ນເທິງ ເພື່ອຫຼີກລ່ຽງບໍ່ມີການຣະບາດ ມາລະໃຫ້ຢູ່ ບໍ່ໃຫ້ໄປຫັ້ນໄປນີ້ ຢາກໃຫ້ລັກສະນະກັກກັນໂຕ ເພື່ອຄວາມປອດພັຍແນວນີ້ແຫຼະ.”
ທ່ານກ່າວຕື່ມອີກວ່າ ນອກຈາກນັ້ນແລ້ວ ທາງເຈົ້າໜ້າທີ່ຂັ້ນ ກໍຍັງມີເຈົ້າໜ້າທີ່ຕິດຕາມເບິ່ງຄວາມປະພຶດຂອງອະດີດນັກໂທດ ທີ່ໄດ້ຮັບການອະພັຍໂທດ ແລະຖືກປ່ອຍໂຕອອກມາສູ່ສັງຄົມ ເພື່ອຕິດຕາມເບິ່ງວ່າ ຂະເຈົ້າໄດ້ໄປເຮັດແນວບໍ່ດີຕື່ມອີກຫຼືບໍ່ ຊຶ່ງຫາກຜູ້ກ່ຽວຍັງມີຄວາມປະພຶດທີ່ບໍ່ດີຢູ່ຄືເກົ່າ ກໍຈໍາເປັນຕ້ອງໄດ້ຣາຍງານໃຫ້ພາກສ່ວນທີ່ກ່ຽວຂ້ອງ ຮັບຊາບຕາມຂັ້ນຕອນ.
ທາງດ້ານຊາວລາວຈໍານວນນຶ່ງ ກໍຢາກໃຫ້ພາກສ່ວນທີ່ກ່ຽວຂ້ອງ ມີການເລືອກເຟັ້ນນັກໂທດຜູ້ທີ່ຈະໄດ້ຮັບການອະພັຍໂທດ ເພື່ອຮັບປະກັນວ່າ ຜູ້ທີ່ໄດ້ຮັບການອະພັຍໂທດດັ່ງກ່າວ ຈະມີຄວາມປະພຶດທີ່ດີຂຶ້ນ ແລະບໍ່ເປັນອັນຕລາຍຕໍ່ສັງຄົມ, ດັ່ງຊາວລາວທ່ານນຶ່ງກ່າວວ່າ:
“ໂອ ກ່ອນຈະປ່ອຍເລືອກເຟັ້ນຕິດຕາມ ນັບຕັ້ງແຕ່ມື້ເຂົ້າມາພຸ້ນແຫຼ້ວ ໄດ້ມາດຖານໝົດແລ້ວຈຶ່ງປ່ອຍກໍ ບໍ່ໄດ້ມາດຖານບໍ່ປ່ອຍໄດ້ ຈຳນວນນຶ່ງເຂົາກໍຫາກເອົາອອກກ່ອນແລ້ວນ່າ ອອກກ່ອນຫຼາຍເຕີບແລ້ວໂອ.”
ທ່ານກ່າວອີກວ່າ ໃນໄລຍະທີ່ຜ່ານມາ ກໍມີອະດີດນັກໂທດຈໍານວນບໍ່ໜ້ອຍ ທີ່ກັບຄືນສູ່ສັງຄົມແລ້ວບໍ່ມີວຽກເຮັດງານທໍາ ສຸດທ້າຍແລ້ວກໍຕ້ອງໄປກໍເຫດລັກຊັບພົລເມືອງ ເພື່ອຫາເງິນລ້ຽງໂຕເອງ ຈົນຖືກຈັບເຂົ້າຄ້າຍຄຸມຂັງຕື່ມອີກຮອບ ດັ່ງນັ້ນຈຶ່ງຢ້ານວ່າ ຫາກພາກສ່ວນທີ່ກ່ຽວຂ້ອງ ມີການພິຈາຣະນາການໃຫ້ອະພັຍໂທດແບບບໍ່ຮອບຄອບ ອາຈເຮັດໃຫ້ເກີດບັນຫາດັ່ງກ່າວຂຶ້ນອີກ ຊຶ່ງຈະເຮັດໃຫ້ເກີດປະກົດການຍໍ້ທໍ້ ຕາມມາໃນຫຼາຍຮູບແບບ.
ໃນຂະນະດຽວກັນ ກໍມີຊາວລາວອີກຈໍານວນນຶ່ງ ໄດ້ເກີດຄວາມກັງວົນ ພາຍຫຼັງຈາກຮູ້ຂ່າວວ່າ ມີການສເນີໃຫ້ອະພັຍໂທດດນັກໂທດຈໍານວນດັ່ງກ່່າວ ຢາກໃຫ້ພາກສ່ວນກ່ຽວຂ້ອງ ມີກັກໂຕຜູ້ທີ່ຖືກປ່ອຍໂຕອອກຈາກຄ້າຍຄຸມຂັງນັ້ນກ່ອນ ເພື່ອປະຕິບັດຕາມມາຕການປ້ອງກັນໂຄວິດ-19 ກ່ອນທີ່ຈະໃຫ້ພວກເຂົາເຈົ້າກັບບ້ານເກີດຂອງແຕ່ລະຄົນ ເນື່ອງຈາກໃນຄ້າຍຄຸມຂັງຫຼາຍແຫ່ງເອງ ກໍມີການແຜ່ຣະບາດຂອງໂຄວິດ-19 ໃນກ່ອນໜ້ານີ້, ດັ່ງຊາວລາວນາງນຶ່ງ ກ່າວວ່າ:
“ຈັ່ງວ່າ ເພິ່ນກໍມີຂ່າວວ່າແນວນັ້ນ ແຕ່ກະຍັງບໍ່ທັນຮູ້ໂຕຈິງ ວ່າແນວໃດກັນແທ້ ຄຸກກໍຕິດຄືກັນ ໂຄວິດຫຼາຍ.”
ຢ່າງໃດກໍຕາມວິທຍຸເອເຊັຽເສຣີ ໄດ້ຕິດຕໍ່ໄປຫາກົມຕໍາຣວດຄຸມຂັງ-ດັດສ້າງ ກະຊວງປ້ອງກັນຄວາມສງົບ ເພື່ອຖາມລາຍຣະອຽດເພີ່ມຕື່ມ ກ່ຽວກັບການກະຕຽມອະພັຍໂທດ ແກ່ນັກໂທດໃນປີນີ້ ແຕ່ເຈົ້າໜ້າທີ່ ທີ່ກ່ຽວຂ້ອງ ຍັງບໍ່ສະດວກໃຫ້ສັມພາດ.
ເນື່ອງໃນໂອກາດວັນຊາດ ທີ 2 ທັນວາ ປີ 2020 ທີ່ຜ່ານມາ ທາງການລາວໄດ້ອະພັຍໂທດ ແລະປ່ອຍໂຕນັກໂທດອອກຈາກຄ້າຍຄຸມຂັງ ໃນທົ່ວປະເທດທັງໝົດ 970 ຄົນ ສ່ວນໃຫຍ່ແມ່ນນັກໂທດຄະດີຢາເສບຕິດ ແລະລັກຊັບພົລເມືອງ ສ່ວນນັກໂທດຄະດີທີ່ກ່ຽວກັບການເມືອງ ເປັນຕົ້ນ ຍານາງ ຮວ້າຍເຮືອງ ໄຊຍະບູລີ ຫຼືໝວຍ ຮວມທັງກຸ່ມຄົນງານລາວ ທີ່ເຄີຍປະທ້ວງຢູ່ຕໍ່ໜ້າສະຖານທູດລາວ ປະຈໍາປະເທດໄທຍນັ້ນ ແມ່ນບໍ່ໄດ້ຮັບອະພັຍໂທດແຕ່ຢ່າງໃດ ເຖິງແມ່ນວ່າ ຫຼາຍອົງກອນສາກົລດ້ານສິດທິມະນຸດ ຈະພຍາຍາມຮຽກຮ້ອງໃຫ້ປ່ອຍໂຕແລ້ວກໍຕາມ.
ເລື່ອງທີ່ອ່ານຫຼາຍ
RFA
