ປະທານປະເທດ ຫວຽດນາມ ຢ້ຽມຢາມ ສປປ ລາວ ລົງນາມເອກະສານ 7 ສະບັບ

ທ່ານ ໂຕ ເລິມ ປະທານປະເທດ ສສ ຫວຽດນາມ ໄດ້ເດີນທາງມາຢ້ຽມຢາມລັດຖະກິດ ສປປ ລາວ ໃນລະຫວ່າງວັນທີ 11-12 ກໍລະກົດ 2024 ຜ່ານມາ. ສຳລັບການຢ້ຽມຢາມ ເທື່ອນີ້ ທ່ານ ທອງລຸນ ສີສຸລິດ ປະທານປະເທດ ສປປ ລາວ ໄດ້ຕີລາຄາຕໍ່ຄວາມໝາຍຄວາມສຳຄັນ ຂອງການຢ້ຽມຢາມຕ່າງປະເທດ ຄັ້ງທຳອິດຂອງ ທ່ານ ໂຕເລີມ ນັບຕັ້ງແຕ່ຂຶ້ນດຳລົງຕຳແໜ່ງ ປະທານປະເທດຄົນໃໝ່. ພ້ອມທັງໄດ້ເໜັ້ນຢໍ້າວ່າການເດີນທາງມາຢ້ຽມຢາມລັດຖະກິດ ເປັນການສະແດງໃຫ້ເຫັນເຖິງຄວາມສາມັກຄີແບບພິເສດແລະການຮ່ວມມືໃນທຸກດ້ານຂອງທັງສອງປະເທດ. ດັ່ງເຈົ້າໜ້າທີ່ຫ້ອງວ່າການສຳນັກງານ ປະທານປະເທດ ກ່າວຕໍ່ວິທຍຸເອເຊັຽເສຣີ ໃນວັນທີ 15 ກໍລະກົດ 2024 ວ່າ:

“ວັນທີ 11 ຫາວັນທີ 11 ກໍລະກົດ 2024 ກາມີແຕ່ມາຢ້ຽມຢາມລັດຖະກິດທໍາມະດານີ້ແຫຼະ ມາຢ້ຽມຢາມລັດຖະກິດສື່ໆ”

ການຢ້ຽມຢາມລັດຖະກິດ ຄັ້ງນີ້ແມ່ນຕອບສະໜອງຕາມຄໍາເຊີນ ຂອງ ທ່ານ ທອງລຸນ ສີສຸລິດ ປະທານປະເທດລາວ ເປັນໄລຍະສອງມື້. ໂດຍໂອກາດນີ້ ທ່ານ ໂຕເລີມ ໄດ້ພົບປະຫາລືກັບບັນດາການນໍາຂັ້ນສູງຂອງປະເທດລາວ ເປັນຕົ້ນ ທ່ານ ທອງລຸນ ສີສຸລິດ ປະທານປະເທດລາວ, ທ່ານ ສອນໄຊ ສີພັນດອນ ນາຍົກລັດຖະມົນຕີລາວ ແລະ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ.

ໃນການພົບປະສອງຝ່າຍ ເຫັນດີຈະຮ່ວມມືກັນຮອບດ້ານລະຫວ່າງ ລາວ-ຫວຽດນາມ, ຫວຽດນາມ-ລາວ ໃນການຈັດຕັ້ງປະຕິບັດໂຄງການ ຮ່ວມມືແລະຂໍ້ຕົກລົງຮ່ວມມືສອງຝ່າຍ ໃນທຸກດ້ານຄືໃນໄລຍະຜ່ານມາເປັນຕົ້ນການຮ່ວມມືດ້ານເສດຖະກິດ, ການຄ້າ, ການລົງທຶນ, ເຕັກໂນໂລຢີ, ວັດທະນາທຳ-ສັງຄົມ, ການສຶກສາ, ການທ່ອງທ່ຽວແລະອື່ນໆ. ທັງສອງຝ່າຍໄດ້ຮ່ວມກັນເປັນສັກຂີພະຍານ ການລົງນາມເອກະສານຈຳນວນ 7 ສະບັບໂດຍຈະແຍກອອກເປັນສອງສ່ວນ ຄືສັນຍາລະຫວ່າງລັດຖະບານຈຳນວນ 3 ສະບັບ ແລະ ສັນຍາພາກທຸລະກິດ 4 ສະບັບ ຂອງພາສ່ວນຕ່າງໆ. ດັ່ງເຈົ້າໜ້າທີ່ ກະຊວງການຕ່າງປະເທດ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ເອີ ໂຕນັ້ນແມ່ນກະຊວງກ່ຽວຂ້ອງ ທີ່ເພິ່ນເຊັນລົງນາມກັນເຈົ້າຄື ມັນມີສັນຍາຂອງກະຊວງຍຸຕິທຳ ກັບຍຸຕິທຳ ຫວຽດນາມ.”

ສ່ວນສັນຍາລັດຖະບານ 3 ສະບັບມີ ບົດບັນທຶກຄວາມຊ່ວຍຈໍາ ສອງກະຊວງປ້ອງກັນຄວາມສະຫງົບລາວ-ຫວຽດນາມ ກ່ຽວກັບການກໍ່ສ້າງແລະຜັນຂະຫຍາຍ ລະບົບການຄຸ້ມຄອງ ພົນລະເມືອງ ແລະບັດປະຈຳຕົວຢູ່ ສປປ ລາວ. ສົນທິສັນຍາວ່າດ້ວຍການສົ່ງຜູ້ຮ້າຍ ຂ້າມແດນລາວ-ຫວຽດນາມ ແລະ ສັນຍາແຜນການຮ່ວມມື 2024 ລະຫວ່າງກະຊວງຍຸຕິທຳ ລາວ-ຫວຽດນາມ. ສໍາລັບສັນຍາພາກທຸລະກິດ 4 ສະບັບປະກອບມີ ບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມືດ້ານການບິນພົນລະເຮືອນ ລະຫວ່າງກະຊວງໂຍທາທິການ ແລະຂົນສົ່ງຂອງລາວແລະບໍລິສັດ ຫວຽດເຈັດ. ສັນຍາສຳະທານສະບັບດັດແກ້ ຂອງໂຄງການເຂື່ອນໄຟຟ້າ ເຊກະໝານ 3 ລະຫວ່າງລັດຖະບານລາວ ແລະບໍລິສັດໄຟຟ້າ ເຊກະໝານ 3 ຂອງກຸ່ມບໍລິສັດ Song Da Corporation. ສັນຍາດັດແກ້ເພີ່ມເຕີມ ຄັ້ງທີ 1 ຂອງສັນຍາວ່າດ້ວຍການຂຸດຄົ້ນ ແລະປຸງແຕ່ງແຮ່ບົກຊິດ ແລະສ້າງຕັ້ງໂຮງງານຜະລິດ ອາລູມີນາຢູ່ເຂດເມືອງດາກຈຶງ ແຂວງເຊ ກອງລະຫວ່າງລັດຖະບານ ແລະບໍລິສັດຮຸ້ນສ່ວນກຸ່ມລົງທຶນຫວຽດ ເຟືອງ. ສັນຍາດັດແກ້ແລະເພີ່ມຕື່ມຄັ້ງທີ 1 ຂອງສັນຍາວ່າດ້ວຍການຊອກຄົ້ນ ແລະສຳຫຼວດແຮ່ອັງຕີມອນລະຫວ່າງລັດ ຖະບານລາວ ແລະບໍລິສັດຮຸ້ນສ່ວນສັນຕິພາບ ຂຽວຂອງຫວຽດນາມ.

ເຈົ້າໜ້າທີ່ ກະຊວງອຸດສາຫະກໍາ ແລະການຄ້າກ່າວຕໍ່ວິທຍຸເອເຊັຽເສຣີ ວ່າໄລຍະຫຼັງມານີ້ສາຍພົວພັນ ລາວ-ຫວຽດນາມ ຂ້ອນຂ້າງມີໜ້ອຍເພາະໄດ້ຮັບອິດທິພົນ ຈາກຈີນຈະເຫັນໄດ້ຈາກການເຂົ້າມາລົງທຶນຂອງຈີນ ເປັນຈຳນວນຫຼາຍແລະໂຄງການເລົ່ານັ້ນ ກາຕ້ອງການຄົນງານລາວຈຳນວນຫຼາຍ ເຊັ່ນດຽວກັນຖ້າເວົ້າພາສາຈີນ ບໍ່ໄດ້ຈີນກໍ່ຈະສອນໃຫ້ ຫຼືສົ່ງໄປຮຽນພາສາຢູ່ຈີນ. ສ່ວນຄວາມສຳພັນລາວ-ຫວຽດນາມໃນປະຈຸບັນສ່ວນຫຼາຍ ຈະເປັນເລື່ອງຂອງທຸລະກິດ-ການຄ້າການລົງທຶນ ຫຼາຍກ່ວາ ແລະເຫັນວ່າປະຊາຊົນລາວ ກາບໍ່ໄດ້ຮັບຜົນປະໂຫຍດ ຈາກການລົງທຶນເລົ່ານັ້ນເທົ່າທີ່ຄວນ.

“ດຽວນີ້ກາຄົນຫວຽດນາມຢູ່ລາວແທ້ ມັນກໍ່ຈໍານວນໜ້ອຍດອກເວົ້າເລື່ອງການພົວ ພັນທາງສັງຄົມເສດຖະກິດ ສ່ວນຫຼາຍຂະເຈົ້າແມ່ນເລື່ອງ ເຮັດທຸລະກິດປະກອບການ ຫຼືວ່າເຮັດໂຮງຈັກໂຮງງານ.”

ອາຈານ ອະດິສອນ ເສມແຍ້ມ ຜູ້ຊ່ຽວຊານການເມືອງການປົກຄອງ ໃນພາກພື້ນຈາກສະຖາບັນເອເຊັຍສຶກສາ ຈຸລາລົງກອນ ມະຫາວິທະຍາໄລ ກ່າວຕໍ່ວິທະຍຸເອເຊັຽເສຣີ ວ່າ ການເດີນທາງມາຢ້ຽມຢາມ ແລະພົບປະຫາລືຂອງພັກຄອມມູນິດ ຫວຽດນາມ ແລະພັກປະຊາຊົນປະຕິວັດລາວ ແມ່ນເກີດຈາກສັນຍາມິດຕະພາບ ແລະສາຍພົວພັນລະຫວ່າງ ຂອງພັກເມື່ອອະດີດທີ່ຜ່ານມາ ໂດຍສະເພາະກຸ່ມຜູ້ນໍາລະດັບສູງ. ພາຍໃຕ້ ສັນຍາມິດຕະພາບກໍ່ຈະມີເລື່ອງຂອງທຸລະກິດ, ການຄ້າ, ການລົງທຶນ ເຂົ້າມາພົວພັນເຊິງຈະເຫັນໄດ້ຈາກການລົງນາມ ລະຫວ່າງສອງປະເທດເປັນຕົ້ນ ດ້ານພະລັງງານໄຟຟ້າ ແລະ ແຮ່ທາດຕ່າງໆ.

“ລາວກັບຫວຽດນາມ ມັນມີລັກສະນາຄວາມສໍາພັນ ລະຫວ່າງພັກຄອມມູນິດຫວຽດນາມ ກັບພັກປະຊາຊົນປະຕິວັດລາວ ມັນຈະເປັນລັກສະນະທີ່ເຂົາເອີ້ນວ່າ ເປັນພິທີກຳລະຫວ່າງພັກກັບພັກຄວາມສຳພັນ ລະຫວ່າງແມ່ນຫຍັງຕ່າງໆ ຂ້ອຍຄິດວ່າຢູ່ໃນເກນທີ່ດີ. ພາຍໃຕ້ຄວາມສຳພັນບ່ອນ ນີ້ເລິກໆ ມັນກໍ່ຄືເລື່ອງຂອງຄວາມຮ່ວມມື ດ້ານອື່ນ ບໍ່ວ່າຈະເປັນດ້ານເສດຖະກິດ ສັງຄົມ ແມ່ນບໍ່.”

ສໍາລັບແນວທາງ ແລະມາດຕະການສົ່ງເສີມຄວາມຮ່ວມມື ໃນດ້ານຕ່າງໆ ສໍານັກຂ່າວ ວີໂອວີເວີນລາຍງານວ່າ ທັງສອງຝ່າຍ ລາວ-ຫວຽດນາມໄດ້ສົ່ງເສີມ ແນວທາງແລະມາດຕະການການຮ່ວມມື ໃນດ້ານຕ່າງໆ. ຜູ້ນຳທັງສອງຝ່າຍໄດ້ຢືນຢັນ ເຖິງນະໂຍບາຍທີ່ສະເໝີຕົ້ນສະເໝີປາຍ ພ້ອມທັງໃຫ້ຄວາມສຳຄັນໃນການເສີມສ້າງສາຍພົວພັນ ແລະມິດຕະພາບອັນຫຍິ່ງໃຫຍ່. ເໜັ້ນໜັກການປະຕິບັດຂໍ້ຕົກລົງ ລະດັບສູງລະຫວ່າງສອງປະເທດ. ຜັກດັນການໃຫ້ຄຳປຶກສາກ່ຽວກັບ ບັນຫາທາງຍຸດທະສາດ, ການແລກປ່ຽນທຸກລະດັບຂອງຄະນະຜູ້ແທນ, ກວດສອບແລະຍົກລະດັບປະສິດທິພາບ ກົນໄກການຮ່ວມມື, ສົ່ງເສີມການປະຊາສຳພັນທັງສອງປະເທດ ໂດຍສະເພາະຄົນລຸ້ນໃໝ່. ນໍາເນຶ້ອໃນຂອງຊຸດໜັງສືປະຫວັດສາດ ຄວາມສຳພັນພິເສດ ລາວ-ຫວຽດນາມມາສອນໃນໂຮງຮຽນຕ່າງໆ ຂອງແຕ່ລະປະເທດ, ປະສານງານໃນການກໍ່ສ້າງກິດຈະການ ແລະບູຮານສະຖານທາງປະຫວັດສາດ ກ່ຽວກັບຄວາມສຳພັນ ລາວ-ຫວຽດນາມ ລວມທັງສວນສາທາລະນະມິດຕະພາບ ລາວ-ຫວຽດນາມ.

ສໍາລັບແຜນການຮ່ວມມືໃນປີ 2024 ທັງສອງປະເທດກໍ່ມີຫຼາຍໜ້າວຽກທີ່ສໍາຄັນ ທີ່ກໍາລັງດຳເນີນຢູ່ເປັນຕົ້ນກະຊວງອຸດສາຫະກຳ ແລະການຄ້າ ລາວ-ຫວຽດນາມຈະເພີ່ມມູນຄ່າການຄ້າທັງສອງຝ່າຍ ໃຫ້ບັນລຸ 10-15% ຕໍ່ປີ ຈະສົ່ງເສີມການຄ້າ ແລະການຜະລິດເພື່ອສົ່ງອອກ.

ຕ້ານ ແລະ ສະກັດກັ້ນການຄ້າຊາຍແດນ ນອກລະບົບຫຼືຄ້າຂາຍຂອງເຖື່ອນ ຕາມຊາຍແດນ, ປັບປຸງພື້ນຖານໂຄງຮ່າງການຄ້າ ຊາຍແດນ, ຄົ້ນຄ້ວາເພື່ອທົດລອງສ້າງເຂດເສດຖະກິດ ແລະນິຄົມອຸດສາຫະກຳຢູ່ສະຖານທີ່ທີ່ເໝາະສົມ ໂດຍສະເພາະແຂວງທີ່ມີຊາຍແດນ ຕິດຈອດກັນໂດຍຝ່າຍລາວ ຂໍໃຫ້ຊ່ຽວຊານຈາກຫວຽດນາມ ເປັນຜູ້ສຶກວາ ແລະຄົ້ນຄ້ວາຄວາມເປັນໄປໄດ.

ຄົ້ນຄ້ວາທີ່ຈະສ້າງສາງນໍ້າມັນເຊື້ອໄຟ ຢູ່ປະເທດລາວ ເພື່ອຮອງຮັບການນໍາເຂົ້ານໍ້າມັນ ຈາກຫວຽດນາມເນື່ອງຈາກລາວ ມີປະລິມານການນໍາເຂົ້ານໍ້າມັນ ໃນໄລຍະຜ່ານມານ 150-160 ລ້ານລິດ ຕໍ່ເດືອນແຕ່ການນໍາເຂົ້ານໍ້າມັນ ຈາກຫວຽດນາມມີພຽງແຕ່ 10% ເທົ່ານັ້ນຖ້າການນໍາເຂົ້ານໍ້າມັນເຊື້ອໄຟ ຈາກຫວຽດນາມຂອງລາວ ເພີ່ມຂຶ້ນກໍ່ຈະເຮັດໃຫ້ມູນຄ່າຂອງທັງສອງຝ່າຍເພີ່ມຂຶ້ນໃນຕໍ່ໜ້າ.

 ປີ 2023 ຜ່ານມາການລົງທຶນສອງຝ່າຍ ລາວ-ຫວຽດນາມສາມາດບັນລຸໄດ້ປະມານ 1,521 ລ້ານໂດລ້າສະຫະລັດ ຫຼຸດລົງປະມານ 2% ເມື່ອທຽບໃສ່ປີ 2022. ມູນຄ່າການລົງທຶນ ທັງໝົດຂອງຫວຽດນາມຢູ່ໃນປະເທດລາວປະຕິບັດໄດ້ ປະມານ 166 ລ້ານໂດລ້າ, ເພີ່ມຂຶ້ນ 63,3% ເມື່ອທຽບໃສ່ປີ 2022. ປະຈຸບັນການລົງທຶນຫວຽດນາມ ໄດ້ມາຈົດທະບຽນລົງທຶນ ຢູ່ປະເທດລາວຈຳນວນ 245 ໂຄງການ, ມີມູນຄ່າການລົງທຶນສະສົມປະມານ 5,5 ຕື້ໂດລ້າ. ໃນຂະນະທີ່ການລົງທຶນ ຂອງລາວໃນປະເທດຫວຽດນາມ ມີ 18 ໂຄງການມູນຄ່າ ການລົງທຶນສະສົມ 110 ລ້ານໂດລ້າ.