ຄົນຈີນ ທີ່ນຳເອົາເດັກຍິງ ອາຍຸຕ່ຳກວ່າ 18 ເຕັ້ນໂຊ ຖືກຈັບ

ເມື່ອວັນທີ 26 ກໍຣະກະດາ ທີ່ຜ່ານມານີ້ເຈົ້າໜ້າທີ່ຕໍາຣວດສະກັດກັ້ນ ແລະ ຕ້ານການຄ້າມມະນຸສສົມທົບກັບເຈົ້າໜ້າທີ່ ຜແນກກົມຕຳຣວດສະກັດກັ້ນ ແລະ ຕ້ານການຄ້າມະນຸສ ແຂວງໄຊຍະບູຣີ ໄດ້ເຂົ້າກວດຄົ້ນເຮືອນເຊົ່າແຫ່ງນຶ່ງ ຢູ່ເມືອງ ແລະ ແຂວງໄຊຍະບູຣີ ໄດ້ພົບເຫັນຄົນຈີນ 2 ຄົນ ຊື່ທ້າວ ຕວນຈີເຫວີນ ອາຍຸ 33 ປີ ແລະ ທ້າວ ຫລີວຊີກົ່ວ ອາຍຸ 18 ປີ ແລະ ເດັກຍິງຊາວລາວອາຍຸ ຕໍ່າກ່ວາ 18 ປີ ຈໍານວນ 8 ຄົນ ພ້ອມທັງອຸປະກອນການຖ່າຍທອດສົດ ຜ່ານສື່ສັງຄົມອອນລາຍນ໌ ຈຶ່ງໄດ້ຄວບຄຸມໂຕຄົນຈີນ 2 ຄົນດັ່ງກ່າວ ນໍາໄປສືບສວນ-ສອບສວນ ຂຍາຍຜົລໃນຂໍ້ກ່າວຫາ ຈ້າງເດັກຍິງລາວເຕັ້ນໂຊຜ່ານສື່ສັງຄົມອ໋ອນລາຍນ໌.

ເຊິ່ງຄົນຈີນທັງ 2 ຄົນນັ້ນກໍຮັບສາລະພາບວ່າ ໄດ້ປະກາດຫາເດັກຍິງລາວ ມາພັກຢູ່ເຮືອນເຊົ່າ ເພື່ອຈ້າງໃຫ້ເດັກເຕັ້ນໂຊ ຜ່ານແອບພລິເຄຊັນ ຕິກຕ໋ອກໂດຍໃຫ້ເງິນຄ່າຈ້າງ ຂັ້ນຕໍ່າຕັ້ງ ແຕ່ 1-1.5 ລ້ານກີບຕໍ່ເດືອນ ແລະ ຈະໄດ້ຄ່າຕອບແທນຫຼາຍກ່ວານັ້ນ ຄັນຍອດຜູ້ເຂົ້າມາເບິ່ງ ການຖ່າຍທອດສົດ ມີຈຳນວນຫຼາຍ. ສ່ວນຄົນຈີນທີ່ເປັນຄົນຈ້າງ ແມ່ນໄດ້ຣາຍໄດ້ເດືອນ 100-150 ລ້ານກີບ. ອີງຕາມການຣາຍງານຂອງກົມຕຳຣວດ ສະກັດກັ້ນ ແລະ ຕ້ານການຄ້າມະນຸສ ໃນວັນທີ 13 ສິງຫາ ຜ່ານມານີ້.

ກ່ຽວກັບເຣື່ອງນີ້ ວິທຍຸເອເຊັຽເສຣີໄດ້ຕິດຕໍ່ໄປຍັງກົມຕໍາຣວດ ສະກັດກັ້ນ ແລະ ຕ້ານການຄ້າມະນຸສ ເພື່ອຂໍຮູ້ຣາຍລະອຽດ ແລະ ຄວາມຄືບໜ້າເພີ່ມ ແຕ່ເຈົ້າໜ້າທີ່ບໍ່ສະດວກໃຫ້ສັມພາດ ຜ່ານທາງໂທລະສັບ ແລະ ໃຫ້ເຮັດເອກະສານ ເຂົ້າໄປພົວພັນເອົາຂໍ້ມູນ.

ທາງດ້ານເຈົ້າໜ້າທີ່ ກອງບັນຊາການ ແຂວງໄຊຍະບູຣີກ່າວວ່າ ສໍາລັບຄົນຈີນ 2 ຄົນດັ່ງກ່າວ ພ້ອມດ້ວຍເດັກຍິງລາວອີກ 8 ຄົນນັ້ນ ກຳລັງຖືກສືບສວນ-ສອບສວນ ໂດຍຄະນະເຈົ້າໜ້າທີ່ ທີ່ກ່ຽວຂ້ອງ ແລະຍັງບໍ່ສາມາດໃຫ້ຮູ້ຣາຍລະອຽດໄດ້ເທື່ອ.

ດັ່ງຍານາງ ກ່າວຕໍ່ວິທຍຸເອເຊັຽເສຣີ ໃນວັນທີ 14 ສິງຫານີ້ວ່່າ:

“ຍັງບໍ່ແນ່ໃຈອັນນີ້ ເຮົາກາບໍ່ຮູ້ຄືກັນ ມີແຕ່ວ່າຄະດີໂຕນີ້ ແມ່ນຂຶ້ນກັບຫ້ອງຕຳຣວດຫັ້ນນ່າ ບໍ່ຮູ້ວ່າເພິ່ນສົ່ງຮອດໃສແລ້ວ.”

ໃນຂະນະທີ່ຫຼາຍພາກສ່ວນ ຂອງແຂວງໄຊຍະບູຣີ ທີ່ຮັບຮູ້ຂ່າວດັ່ງກ່າວເປັນຕົ້ນ ຫ້ອງການສະຫະພັນແມ່ຍິງ ແລະ ຫ້ອງການຊາວໜຸ່ມ ມີຄວາມເປັນຫ່ວງ ຕໍ່ເຫດການດັ່ງກ່າວ ແລະ ກໍຕິດຕາມເຣື່ອງນີ້ຢ່າງໃກ້ຊິດ ເພື່ອປົກປ້ອງເດັກຍິງທີ່ຕົກເປັນເຫຍື່ອ ຂອງຄົນຈີນດັ່ງກ່າວເຊິ່ງທີ່ຜ່ານມາ ຫຼາຍໜ່ວຍງານໄດ້ໂຄສະນາ ໃຫ້ແກ່ກຸ່ມແມ່ຍິງບໍ່ໃຫ້ໄປເຮັດວຽກ ແນວດັ່ງກ່າວ ແຕ່ກໍຍັງມີຈຳນວນນຶ່ງທີ່ຫຼົງເຊື່ອການໂຄສະນາ ຂອງຄົນຈີນທີ່ວ່ານັ້ນຢູ່.

ດັ່ງເຈົ້າໜ້າທີ່ ແຂວງໄຊຍະບູຣີ ທີ່ຂໍສງວນຊື່ ແລະ ໜ່ວຍງານກ່າວວ່າ:

“ເຫັນຢູ່ເນາະໄດ້ລົງສຶກສາອົບຮົມ ຕລອດແຫຼະ ໂຕນີ້ໄດ້ເຮັດຕລອດຢູ່ວຽກໂຕນີ້ ຫັ້ນນ່າເວົ້າເຣື່ອງວຽກສຶກສາອົບຮົມ ໃຫ້ຊາວໜຸ່ມ ໄວໜຸ່ມ ຫັ້ນນ່າເນາະ ຊ່ວງນີ້ຊິິມີໂຄງການແບບ ໃຫ້ສະມາຊິກຊາວໜຸ່ມ ຜູ້ທີ່ຫວ່າງງານເພື່ອເຮັດໃຫ້ເຂົາເຈົ້າ ມີວຽກເຮັດງານທຳເນາະ ແຂວງໄຊຍະບູຣີເຮົາມີໂຄງການ.”

ຕໍ່ເຫດການດັ່ງກ່າວນີ້ ກໍຍັງບໍ່ມີການເປີດເຜີຍເຖິງຄົນຈີນ ທີ່ເຂົ້າມາກໍ່ເຫດດັ່ງກ່າວນັ້ນວ່າ ໄດ້ເຊົ່າເຮືອນຢູ່ບ່ອນໃດ ເພື່ອເປັນບ່ອນສຳລັບຖ່າຍທອດສົດ ເດັກຍິງລາວ ແຕ່ກໍເຮັດໃຫ້ຫຼາຍພາກສ່ວນ ທາງດ້ານສັງຄົມຢູ່ແຂວງໄຊຍະບູຣີ ມີການຕື່ນໂຕ ແລະ ຕິດຕາມການເຄື່ອນໄຫວ ຂອງຄົນຈີນທີ່ເຂົ້າມາເຮັດລັກສະນະດັ່ງກ່າວ ເພື່ອນຳຂໍ້ມູນຣາຍງານ ຕໍ່ເຈົ້າໜ້າທີ່ຕຳຣວດ.

ດັ່ງຜູ້ປະກອບການ ນຳທ່ຽວຢູ່ແຂວງໄຊຍະບູຣີ ກ່າວວ່າ:

“ບໍ່ຮູ້ຢູ່ໃນໄດ້ຍີນຂ່າວວ່າ ຈັບຢູ່ໄຊຍະນີ້ແຫຼະ ເພິ່ນກໍໃຫ້ຕິດຕາມຄົນຈີນ ມາພັກເພິ່ນກໍໃຫ້ຕິດຕາມ ເບິ່ງການໄປການມາ ຂອງຄົນຈີນນັ້ນຫັ້ນຈີນ ມາທ່ຽວແທ້ກໍບໍ່ຄ່ອຍປານໃດ ແຕ່ວ່າຈີນມາເຮັດທຸຣະກິຈ ມາຫຍັງຫຼາຍຢູ່.”

ໃນຂະນະທີ່ເຮືອນພັກ ແລະ ໂຮງແຮມຫຼາຍແຫ່ງ ໃນແຂວງໄຊຍະບູຣີ ພາກັນລະມັດລະວັງ ຄົນຈີນກຸ່ມດັ່ງກ່າວ ເພາະຢ້ານວ່າຈະມາໃຊ້ຫ້ອງພັກ ໃຫ້ເຮືອນພັກ ແລະ ໂຮງແຮມເປັນບ່ອນຖ່າຍທອດສົດ ເດັກຍິງລາວດັ່ງກ່າວ ເຊິ່ງຫຼາຍຄົນບໍ່ອະນຸຍາດ ໃຫ້ເຮັດລັກສະນະນີ້ ຢູ່ເຮືອນພັກ ຫຼື ໂຮງແຮມຢ່າງເດັດຂາດ.

ດັ່ງເຈົ້າຂອງເຮືອນພັກ ນາງນຶ່ງກ່າວວ່າ:

“ບໍ່ມີເດີ້ຢູ່ນີ້ບໍ່ມີຄົນຈີນ ມາເຊົ່າເລີຍແຫຼະເຂົາເຈົ້າ ບໍ່ມັກມັນເຮືອນຕໍ່ານ່າ ເຊົ່າແຕ່ບ່ອນໃຫຍ່ ພຸ້ນແຫຼະທາງພີ້ເພິ່ນບໍ່ໃຫ້ເຮັດແຫຼະ ດຽວນີ້ຫັ້ນນ່າ.”

ສ່ວນຊາວລາວທ່ານນຶ່ງ ຮູ້ຂ່າວດັ່ງກ່າວກໍຢາກໃຫ້ເຈົ້າໜ້າທີ່ ທີ່ກ່ຽວຂ້ອງມີການດຳເນີນຄະດີ ຕໍ່ຄົນຈີນຢ່າງເດັດຂາດ ເພາະວ່າໄດ້ເຮັດຜິດກົດໝາຍ ກ່ຽວກັບການນຳໃຊ້ສື່ສັງຄົມອອນລາຍນ໌ ໃນລາວ ແລະ ກໍເຂົ້າຄ່າຍການຄ້າມະນຸສ ນຳດ້ວຍ ອີກທັງຍັງເຮັດໃຫ້ເກີດຄວາມເສື່ອມເສັຍ ຕໍ່ສັງຄົມລາວ.

ດັ່ງທ່ານກ່າວວ່າ:

“ເຜີຍແຜ່ ອັນນັ້ນອັນນີ້ສື່ໆ ມັນຫຍັງໜັກ ຍິ່ງມັນເຮັດໃຫ້ເສື່ອມເສັຍ ອິຫຍັງຕ່າງໆ ຄືຫຼາຍໆ ຢ່າງທີ່ເຮົາເບິ່ງມັນບໍ່ເໝາະສົມ ບ້ານເຮົາມັນເປັນບ້ານສງົບ ໃນເມືອງມີເຫດການອັນໃດອັນນຶ່ງ ຂຶ້ນມັນກາມັກດັງປະມານນີ້ຫັ້ນນ່າ.”

ກ່ອນໜ້ານີ້ວັນທີ 19 ກໍຣະກະດາ 2023 ມີຣາຍງານແບບ ບໍ່ເປັນທາງການວ່າຊາຍຊາວຈີນ ບໍ່ຮູ້ຈຳນວນຄັກແນ່ ທີ່ຈ້າງເດັກຍິງລາວກຸ່ມນຶ່ງ ເຕັ້ນໂຊຜ່ານທາງແອບພລິເຄຊັນ ຕິກຕ໋ອກ ໄດ້ຖືກເຈົ້າໜ້າທີ່ຕຳຣວດລາວ ຈັບໄດ້ແລ້ວ, ແຕ່ຍັງບໍ່ທັນເປີດເຜີຍ ຢ່າງເປັນທາງການ ແລະ ຍັງບໍ່ສາມາດເປີດຣາຍລະອຽດການກັກໂຕ ດັ່ງກ່າວເທື່ອ ແລະ ກໍບໍ່ມີຂໍ້ມູນການຈັບຄົນຈີນທັງ 2 ກໍຣະນີວ່າແມ່ນເຄືອຂ່າຍດຽວກັນ ຫຼື ບໍ່.

ນອກຈາກການຖ່າຍທອດສົດ ຍິງສາວເຕັ້ນໂຊຜ່ານສື່ສັງຄົມອອນລານ໌ແລ້ວ ກ່ອນໜ້ານີ້ຄົນຈີນຈຳນວນນຶ່ງໄດ້ຖ່າຍວິດີໂອ ກ່ຽວກັບເດັກຍິງລາວ ພ້ອມທັງເຜີຍແຜ່ ລົງສື່ສັງຄົມອອນລາຍ໌ ຈຳນວນຫຼາຍເທື່ອເປັນຕົ້ນໃຫ້ກຸ່ມເດັກຍິງລາວ ມາຢືນລຽນແຖວກັນ ແລ້ວຖາມວ່າ ຢາກໄດ້ຜົວຈີນ ນິດໄສແບບໃດ ລວມທັງວິດີໂອທີ່ຄົນຈີນ ພາກຸ່ມເດັກຍິງລາວ ໄປເລືອກຊື້ໂທຣະສັບມືຖື ຢູ່ຮ້ານໂທຣະສັບແຫ່ງນຶ່ງ ໃນເມືອງວັງວຽງ ແຂວງວຽງຈັນ ແລະ ຫຼ້າສຸດກໍມີວີດີໂອ ກ່ຽວກັບຄົນຈີນ ໃຫ້ເດັກຍິງລາວ 2 ຄົນ ຫ້ອມແກ້ມໃນລັກສະນະຊູ້ສາວ.