ຣັຖບານຈີນ ຊ່ອຍເຫຼືອ ຝຶກອົບຮົມ ຄຣູ-ອາຈານລາວ ໃນເຂດຊົນນະບົດ

ໂຄງການຍົກສູງ ຂີດຄວາມສາມາດ ຄຣູອາຈານ ຊົນນະບົດ ສປປ ລາວ ພາຍໃຕ້ທືນຊ່ອຍເຫຼືອ ຈາກຣັຖບານຈີນຈຳນວນ 4 ຕື້ຢວນຈັດຂຶ້ນໃນວັນທີ 13 ຫາ 26 ພຶສຈິກາ 2023 ເປັນເວລາ 14 ວັນ ໂດຍມີຄຣູ ແລະ ຜູ້ບໍຣິຫານໂຮງຮຽນ ທົ່ວປະເທດ ເຂົ້າຮ່ວມອົບຮົມທັງໝົດ 3,000 ຄົນ ໃນນັ້ນໄດ້ເຂົ້າຮ່ວມຝຶກອົບຮົມ ຢູ່ປະເທດຈີນ 2,000 ຄົນ ແລະໄດ້ເຂົ້າຮ່ວມຝຶກອົບຮົມ ຢູ່ພາຍໃນທີ່ສະຖາບັນ ພັທນາຜູ້ບໍຣິຫານການສຶກສາ 1,000 ຄົນ.

ກ່ຽວກັບເຣື່ອງນີ້ ວິທຍຸເອເຊັຽ ເສຣີ ໄດ້ສັມພາດຄຣູ ສະເພາະຜູ້ທີ່ເຂົ້າຮ່ວມຝຶກອົບຮົມ ຢູ່ພາຍໃນເທົ່ານັ້ນຈຳນວນທັງໝົດ 3 ທ່ານ ເຊິ່ງພວກເຂົາເຈົ້າ ກ່າວຄືກັນວ່າ ຄຣູຈຳນວນ 1,000 ຄົນ ການໂຮງຮຽນອີກທັງຄຣູ ຜູ້ຝຶກອົບຮົມ ໃຫ້ກັບຄຣູລາວ ມາຈາກປະເທດຈີນ ເປັນຄົນຈີນ ແລະຕລອດ 4 ວັນ ທີ່ຜ່ານຂອງການຝຶກອົບຮົມ ຈະມີນາຍແປພາສາ ໂດຍຄຣູຝຶກອົບຮົມຈີນ ຈະເໜັ້ນຖ່າຍທອດເຕັກນິກ ວິທີການສອນນັກຮຽນ ແກ່ຄຣູລາວ ເປັນຕົ້ນການສອນນັກຮຽນລາວ ດ້ານຄຸນນະສົມບັດ, ວັທນະທັມ ແລະ ຄວາມເປັນລະບຽບຮຽບຮ້ອຍ.

ດັ່ງນາຍຄຣູທີ່ເຂົ້າຝຶກອົບຮົມ ຢູ່ສະຖາບັນພັທນາ ຜູ້ບໍຣິຫານການສຶກສາ ກ່າວຕໍ່ວິທຍຸເອເຊັຽເສຣີ ໃນວັນທີ 16 ພຶສຈິການີ້ວ່າ:

“ເອື້ອຍກໍແບບວ່າ ຟັງເພິ່ນ ບັນຍາຍແລ້ວ ກໍຈົດໄປນໍາ ແບບເອົາແຕ່ວ່າ ໂຕທີ່ສຳຄັນ. ຜູ້ບັນຍາຍແມ່ນຄົນຈີນ ແຕ່ວ່າມີພາສາແປ. ເພິ່ນແປ ຄືປະເທດຈີນເນາະ ເພິ່ນເວົ້າເຣື່ອງການສອນ ການສອນເພິ່ນ ຈະສອນແບບວ່າ ເນັ້ນຄຸນນະສົມບັດ, ວັທນະທັມ, ການອ່ອນນ້ອມຖ້ອມຕົນບໍ່, ການປະຕິບັດກັບພໍ່ກັບແມ່ ກັບຄຣູອາຈານ ແນວໃດຫັ້ນນ່າ ແລ້ວກໍຄວາມເປັນລະບຽບຮຽບຮ້ອຍ ຂອງນັກຮຽນ ຂອງເພິ່ນ ເຮົາກໍຊິເອົາໄປນຳໃຊ້ ວ່າມັນຊິໄດ້ສໍ່າໃດ ສໍ່າເພິ່ນ ຫຼືບໍ່ ກໍບໍ່ໄດ້ຮູ້ ໂຕຢ່າງວ່າເຄົາຄຣູ ອາຈານ ບໍ່ ຫຼື ພໍ່ແມ່. ເຮົາຍັງເຮັດບໍ່ທັນໄດ້ ສໍ່າປະເທດເພິ່ນຫັ້ນນ່າ. ເຮົາກໍຊິເໜັ້ນຄຸນນະສົມບັດ ເໜັ້ນດ້ານວັທນະທັມ ການນຸ່ງຖືການປາກເວົ້າຕໍ່ກັນ.”

ຄຣູຜູ້ເຂົ້າຝຶກອົບຮົມ ຄົນທີສອງກ່າວວ່າ ມີຄວາມປະທັບໃຈຫຼາຍ ທີ່ສຸດ ພາຍຫຼັງທີ່ເຂົ້າຝຶກອົບຮົມ 4 ວັນທີ່ຜ່ານມາ ຄືໂຕເອງໄດ້ເຕັກນິກການສອນ ວິຊາຄະນິດສາດ ຈາກການແລກປ່ຽນ ບົດຮຽນກັບຜູ້ຊ່ຽວຊານ ດ້ານການສອນຫຼາຍໆທ່ານ ເປັນຕົ້ນກ່ອນຈະເປີດບົດຮຽນ ຕ້ອງໄດ້ມີການສ້າງແບບສອບຖາມ ໃຫ້ນັກຮຽນເພື່ອປະເມີນຄວາມຮູ້-ຄວາມເຂົ້າໃຈ ນັກຮຽນກ່ອນຮຽນ ແລະຫວັງວ່າ ເດັກນ້ອຍຈະຮຽນແບບມີຄຸນນະພາບຫຼາຍຂຶ້ນ ແລະບໍ່ປະລະການຮຽນ.

ດັ່ງຍານາງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ພໍດີເຮົາໄດ້ດໍາເນີນການຝຶກມາ ພໍດີມື້ນີ້ເປັນມື້ທີ 4 ເນາະ ເຮົາໄດ້ແລກປ່ຽນບົດຮຽນ ກັບຊ່ຽວຊານຫຼາຍໆ ທ່ານຫັ້ນນ່າ. ສົມທຽບກ່ຽວກັບການສຶກສາ ຢູ່ໃນບ້ານເຮົາ ກັບບ້ານເພິ່ນ ການປະລະການຮຽນເນາະ ການສຶກສາ ບ້ານເຮົາໃນທຸກມື້ນີ້ ມັນກໍຄ້າຍຄືກັບ 40 ປີຫຼັງ ຂອງບ້ານເພິ່ນ. ເຮົາກັບໄປທ້ອງຖິ່ນຂອງເຮົາ, ເຮົາກໍຊິນຳໄປໃຊ້. ປະທັບໃຈຫຼາຍກໍຄືວິຊາຄະນິດສາດເນາະ. ເຮົາໄດ້ມີເຕັກນິກການປະເມີນເນາະ ການປະເມີນຄືບ້ານເຮົາ ບໍ່ໄດ້ເຮັດຫັ້ນນ່າ ເຮັດການປະເມີນ ຄືຕ້ອງໄດ້ສ້າງແບບສອບຖາມ ກ່ອນເນາະ ແລ້ວກໍເບິ່ງຜົລການຮຽນເນາະ ແລ້ວກໍການຊອກຫາບັນຫາ.”

ຄຣູຜູ້ເຂົ້າຝຶກອົບຮົມ ຄົນທີສາມກ່າວວ່າ ຄຣູຝືກອົບຮົມຈີນ ໄດ້ບັນຍາຍກ່ຽວກັບເຕັກນິກການສອນ ວິຊາພາສາລາວນຳດ້ວຍ ເຮັດໃຫ້ໂຕເອງເຊິ່ງເປັນຄຣູສອນ ຊັ້ນປະຖົມສຶກສາ ໄດ້ຮູ້ວ່າການສອນນັກຮຽນ ວິຊາພາສາລາວ ຕ້ອງອີງຕາມສະພາບໂຕຈິງຂອງຊີວິດປະຈຳວັນ ນັກຮຽນ. ນັກຮຽນຈຶ່ງຈະອ່ານ, ຂຽນ, ເວົ້າ ພາສາລາວໄດ້ ຢ່າງມີຄຸນນະພາບ.

ດັ່ງຍານາງ ໄດ້ກ່າວ ໃນມື້ດຽວກັນວ່າ:

“ຄັນວ່າພາສາລາວເຮົາ ກໍແມ່ນເໜັ້ນການອ່ານ ຄັນວ່າເຮົາຊິສອນໃຫ້ນັກຮຽນອ່ານໄດ້ ແນວໃດ ເຮົາກໍຕ້ອງໃຫ້ນັກຮຽນນີ້ ໄດ້ເຫັນພາບໂຕຈິງນຳແດ່ຫັ້ນນ່າ ໃຫ້ເຂົາໄດ້ສຳພັດໂຕຈິງຫຼາຍໆ ຫັ້ນນ່າ. ນີ້ບໍ່ແມ່ນທີ່ວ່າອ່ານໄດ້ແຕ່ ກ.ໄກ່ໃນໂຕ ກ. ນີ້ເນາະມີຫຍັງແດ່ ທີ່ກ່ຽວພັນກັບໂຕ ກ. ນ່າ ໂຕຢ່າງວ່າ ກ.ໄກ່ ກ.ກົບຕ້ອງຍົກມາໃຫ້ເຂົາເບິ່ງ ຕ້ອງມີຮູບພາບປະກອບຫັ້ນນ່າ ສຳລັບ ປ.1 ເນາະ.”

ຍານາງກ່າວຕື່ມວ່າ ຄຣູຝຶກອົບຮົມຈີນ ຍັງໄດ້ສອນເຕັກນິກການຮັບມື ກັບນັກຮຽນ ທີ່ບໍ່ສົນໃຈຮຽນ ໃນຫ້ອງຮຽນນຳດ້ວຍ.

ດັ່ງຍານາງກ່າວວ່າ:

“ໂຕຢ່າງວ່າ ມັນບໍ່ສົນໃຈເວລາຮຽນ ເຮົາຈະເບິ່ງວ່າ ເອີ ຜູ້ນີ້ມັນມັກແບບໃດ. ເຮົາຈະໃຫ້ເຂົາຫັ້ນຕິດຕາມໄປຕາມໃຈ ຂອງເຂົາຫັ້ນນ່າ ໂດຍທີ່ການບໍ່ໄດ້ບັງຄັບເຂົາຫັ້ນນ່າ ເພາະວ່າຜ່ານມາເນາະ ເຄີຍສອນແບບບັງຄັບຫັ້ນແຫຼະ ມາຝຶກໃນຄັ້ງນີ້ ເອື້ອຍກໍມີປະສົບການຫຼາຍ ຊິເອົາເມືອພັທນາສຳລັບ ໂຮງຮຽນຂອງເອື້ອຍຫັ້ນນ່າ.”

ທ່ານ ສຸລິອຸດົງ ສູນດາລາ ຮອງຣັຖມົນຕຣີ ກະຊວງສຶກສາທິການ ແລະ ກິລາ ໄດ້ກ່າວວ່າ ເພື່ອເຮັດໃຫ້ການຈັດຕັ້ງປະຕິບັດ ໂຄງການນີ້ສາມາດບັນລຸໄດ້ຕາມແຜນ ທີ່ວາງໄວ້ຮຽກຮ້ອງໃຫ້ສຳມະນາກອນ ຄືຄຣູ-ອາຈານ ທີ່ເຂົ້າຝຶກອົບຮົມ ນຳເອົາຄວາມຮູ້ໄປຈັດຕັ້ງປະຕິບັດ ເຂົ້າໃນວຽກງານຮັບຜິດຊອບໂຕຈິງ.

ເຈົ້າໜ້າທີ່ ທີ່ກ່ຽວຂ້ອງແຂວງສາຣະວັນກ່າວວ່າ ໂຄງການຍົກສູງຄວາມສາມາດ ຄຣູ-ອາຈານ ຈະເຮັດໃຫ້ຄຣູ ທີ່ເຂົ້າຝຶກອົບຮົມ ໄດ້ຖອດຖອນບົດຮຽນໃໝ່ ແລ້ວຈະໄດ້ນຳເອົາມາຜັນຂຍາຍ ຢູ່ໃນໂຮງຮຽນໃຫ້ການຮຽນ-ການສອນ ໃນຊົນນະບົດດີຂຶ້ນ.

ດັ່ງທ່ານໄດ້ກ່າວ ໃນມື້ດຽວກັນວ່າ:

“ເອີ. ຄັນວ່າດ້ານດີກໍດີ ເພື່ອໃຫ້ຄຣູເຮົາ ໄດ້ຖອດຖອນບົດຮຽນໃໝ່ຫັ້ນນ່າ ກໍຄືຄືກັນຄັນວ່າຄຣູເຮົາ ໄປຝຶກອົບຮົມກໍຊິມາຜັນຂຍາຍ ຢູ່ໂຮງຮຽນຂອງພວກເຂົາຫັ້ນແຫຼະ ໃຫ້ດີຂຶ້ນຫັ້ນນ່າ.”

ຄຣູສະເພາະ ຜູ້ທີ່ເຂົ້າຮ່ວມຝຶກອົບຮົມ ຢູ່ພາຍໃນເທົ່ານັ້ນຈໍານວນ 3 ທ່ານຍັງໄດ້ກ່າວວ່າອີກ 10 ວັນຂ້າງໜ້າ ຍັງບໍ່ຮູ້ວ່າຈະໄດ້ຝຶກອົບຮົມ ນໍາຄຣູຈີນຕື່ມເຣື່ອງໃດແດ່. ພ້ອມກ່າວວ່າ ໂຄງການຍົກສູງ ຂີດຄວາມສາມາດຄຣູ-ອາຈານ ນີ້ ມິີຄວາມໝາຍຄວາມສຳຄັນ ໃນການພັທນາ ຊັພຍາກອນມະນຸສ ກໍຄືນັກຮຽນແລະຄຣູ.

ນອກຈາກນີ້ ໂຄງການນີ້ເປັນມູນເຊື້ອ ເປັນຄູ່ຮ່ວມຍຸດທະສາດ ຮອບດ້ານຄວາມໝັ້ນຄົງ ຍາວນານ ລະຫວ່າງສອງພັກ, ສອງຣັຖ ແລະ ປະຊາຊົນສອງຊາຕ ລາວ-ຈີນ ຕາມທິດ 4 ດີ ຄືເປັນເພື່ອນບ້ານທີ່ດີ, ເປັນເພື່ອນມິຕທີ່ດີ, ເປັນສະຫາຍທີ່ດີິ ແລະ ເປັນຄູ່ຮ່ວມງານທີ່ດີ ເຮັດໃຫ້ການເປັນຄູ່ຮ່ວມສະຕາກັມສັງຄົມນິຍົມ ລາວ-ຈີນ, ຈີນ-ລາວ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທັມຍິ່ງຂຶ້ນ. ອີງຕາມ ທ່ານ ຮອງຣັຖມົນຕຣີ ກະຊວງສຶກສາທິການ ແລະ ກິລາ ໄດ້ກ່າວໃນພິທີປິດຊຸດອົບຮົມ ຄຣູໂຄງການຍົກສູງ ຂີດຄວາມສາມາດ ຄຣູ-ອາຈານ ຊົນນະບົດ ສປປ ລາວ ໃນວັນທີ 13 ພຶສຈິກາ 2023.