ນັກຮຽນຢູ່ເມືອງຫຼວງນ້ຳທາ ຍັງບໍ່ໄດ້ເຂົ້າໂຮງຮຽນ ພາຍຫຼັງຖືກນ້ຳຖ້ວມ

ຮອດປັດຈຸບັນ ເປັນເວລາ 17 ມື້ແລ້ວ ທີ່ນັກຮຽນຕັ້ງແຕ່ຊັ້ນອະນຸບານ ຮອດຊັ້ນມັດທະຍົມຕອນຕົ້ນ ໃນຈໍານວນທັງໝົດ 5,611 ຄົນ ຍັງບໍ່ໄດ້ເຂົ້າໂຮງຮຽນ ພາຍຫຼັງປະສົບໄພນໍ້າຖ້ວມ ຢູ່ເມືອງຫຼວງນໍ້າທາ ແຂວງຫຼວງນໍ້າທາ ເຮັດໃຫ້ພໍ່ແມ່ຜູ້ປົກຄອງຂອງນັກຮຽນ ຢາກໃຫ້ພາກສ່ວນທີ່ກ່ຽວຂ້ອງ ເລັ່ງຟື້ນຟູພື້ນຖານໂຄງຮ່າງ ແລະອຸປະກອນດ້ານການສຶກສາ ເພື່ອໃຫ້ລູກ-ຫຼານ ກັບມາຮຽນໄດ້ຕາມປົກກະຕິ ພາຍຫຼັງນໍ້າບົກແຫ້ງ, ຕາມຄວາມເວົ້າ ຂອງຜູ້ປົກຄອງນັກຮຽນ ບ້ານຫຼວງ ນາງໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 27 ກັນຍາ ນີ້ວ່າ:

“ຍັງບໍ່ມີໂຮງຮຽນໃດເປີດເທື່ອ ເຂົາເຈົ້າຫຼີ້ນເປື້ອນ ຫຼີ້ນນໍ້າ ຫຼີ້ນຫຍັງເນາະ ເດັກນ້ອຍເວົ້າກໍ່ບໍ່ຟັງ ຢາກໃຫ້ໂຮງຮຽນ ຢາກໃຫ້ເປີດໂຮງຮຽນໄວໆ ໃຫ້ເຂົາເຈ້າໄປໂຮງຮຽນມິຫຍັງຫັ້ນນ່າ ບ້ານຫຼວງນີ້ແມ່ນ ໂຕ໊ະຕັ່ງໄຫຼນໍານໍ້າ ໄດ້ເປ່ເພແດ່ ເຂົາເຈົ້າໄປຮຽນ ກໍ່ບໍ່ມີໂຕ໊ະຕັ່ງທີ່ຈະໄປນັ່ງຮຽນ ຕາມອາຈານຢູ່ໂຮງຮຽຫັ້ນ ກໍ່ບໍ່ຮູ້ວ່າ ສິເປີດມື້ໃດເທື່ອ ກໍານົດບໍ່ໄດ້ເທືື່ອ.”

ຂະນະທີ່ ຜູ້ປົກຄອງນັກຮຽນ ບ້ານດອນສໍາພັນ ກ່າວຄືກັນວ່າ ໂຮງຮຽນຢູ່ບ້ານຕົນເອງ ຍັງບໍ່ທັນໄດ້ເປີດການຮຽນ-ການສອນ ຄືກັນ ແລະຕົນເອງ ຢາກໃຫ້ພາກສ່ວນທີ່ກ່ຽວຂ້ອງ ເລັ່ງແກ້ໄຂ ເສັ້ນທາງທີ່ຖືກຕັດຂາດ, ລະບົບນໍ້າປະປາ, ໄຟຟ້າ ແລະສັນຍານອິນເຕີເນັດ ໃຫ້ກັບຄືນມານໍາໃຊ້ໄດ້ໂດຍໄວທີ່ສຸດ ເພື່ອໃຫ້ລູກ-ຫຼານ ກັບໄປໂຮງຮຽນໄດ້ຕາມປົກກະຕິ, ດັ່ງທ່ານກ່າວວ່າ:

“ໂຮງຮຽນກໍ່ຍັງບໍ່ທັນໄດ້ເປີດເທື່ອ ຄືສິໄດ້ຖ້າກ່ອນແຫຼະ ອາທິດສິມານີ້ ມັນສິໄດ້ເປີດແລ້ວບໍ່ ກໍ່ຍັງໄດ້ລໍຖ້າຢູ່ ເສັ້ນທາງກໍ່ຖືວ່າ ມັນເປັນຂີ້ດິນຂີ້ຕົມນີ້ແຫຼະ ແຕ່ວ່າເຂົາມາຊ່ວຍ 2 ມື້ແລ້ວ ຢູ່ບ້ານນີ້ ເອົາລົດຈົກມາຕັກ ພວກເຮົາກໍ່ຢາກໃຫ້ມາຊ່ວຍເຫຼືອ ເລື່ອງເຄື່ອງໃຊ້ ເຄື່ອງສອຍຂອງໂຮງຮຽນຫັ້ນ ປຶ້ມ ບິກສໍເນາະ ອັນໜຶ່ງກໍ່ສ້ອມແຊມໂຮງຮຽນຫັ້ນ.”

ສ່ວນຜູ້ປົກຄອງນັກຮຽນ ຢູ່ບ້ານນາເຕີຍ ກໍ່ກ່າວວ່າ ຫໍພັກນັກຮຽນທີ່ໄຫຼໄປກັບນໍ້າ ແລະສະພາບໂຮງຮຽນໃນເຂດບ້ານ ຍັງເປິະເປື້ອນຍ້ອນຂີ້ຕົມຢູ່ ຈຶ່ງຢາກໃຫ້ພາກສ່ວນທີ່ກ່ຽວຂ້ອງ ເລັ່ງແກ້ໄຂບັນຫານີ້ ເພື່ອໃຫ້ລູກ-ຫຼານ ກັບຄືນໄປຮຽນໄດ້ຕາມປົກກະຕິ ຄືກັນ, ດັ່ງທ່ານກ່າວວ່າ:

“ຍັງອະນາໄມຢູ່ ຍັງບໍ່ທັນແລ້ວ ບໍ່ໄດ້ເປີດ ຄິດວ່າອາທິດໜ້າ ສິທັນຫຼືບໍ່ທັນ ຂີ້ຕົມຫຼາຍສຸດລະ ເອົາໄມ້ເຮັດຂົວກ່າຍໄປ ນັກຮຽນມາຢູ່ຫໍພັກ ພໍ່ແມ່ຜູ້ປົກຄອງ ກໍ່ມາເຮັດຫໍພັກໃຫ້ ນໍ້າກໍ່ພັດໄຫຼເໝິດກໍ່ມີ ມາບໍ່ໄດ້ ສະພາບຍັງເປິະເປື້ອນ ເປັນຂີ້ຕົມບໍ່ ນໍ້າມັນຍັງບໍ່ແຫ້ງດີ ເປັນຂີ້ຕົມ ມັນຍັງປຽກ ລະບົບເສັ້ນທາງຕ່າງໆນັ້ນ ມັນເປັນຂີ້ຕົມ ມັນຍັງເປິະເປື້ອນຫຼາຍ.”

ຫຼ້າສຸດນີ້ ກະຊວງສຶກສາທິການ ແລະກິລາ ແລະອົງການຢູນິເຊບ ປະຈໍາປະເທດລາວ ໄດ້ມອບອຸປະກອນດ້ານການຮຽນ, ເຄື່ອງຢູ່ເຄື່ອງກິນ ແລະເຄື່ອງໃຊ້ສອຍທີ່ຈໍາເປັນ ດ້ານສຸຂະພິບານ ແລະສຸຂະອະນາໄມ ໃຫ້ແກ່ບັນດາໂຮງຮຽນ ທີ່ໄດ້ຮັບຜົນກະທົບຈາກນໍ້າຖ້ວມ ເພື່ອສ້າງເງື່ອນໄຂ ທີ່ຮັບປະກັນວ່າ ນັກຮຽນທີ່ໄດ້ຮັບຜົນກະທົບນັ້ນ ຈະສາມາດມາສືບຕໍ່ການຮຽນໄດ້ ເຊິ່ງມັນກໍ່ຍັງບໍ່ພຽງພໍ ຕໍ່ຄວາມຕ້ອງການການຊ່ອຍເຫຼືອ ຂອງພວກນັກຮຽນ 5 ພັນປາຍຄົນ, ດັ່ງເຈົ້າໜ້າທີ່ ແຂວງຫຼວງນໍ້າທາ ກ່າວວ່າ:

“ຄັນຖືວ່າ ພຽງພໍແທ້ ກະວ່າບໍ່ປານໃດແຫຼະເນາະ ດຽວນີ້ ໄທເຮົາຂາດຫັ້ນ ແມ່ນປຶ້ມແບບຮຽນນີ້ຫຼາຍທີ່ສຸດເນາະ ຄອມພິວເຕີ້ຈໍາພວກນີ້ນີ້ນ່າ ໃນບັນດາໂຮງຮຽນ ເພາະວ່າ ນໍ້າຖ້ວມໄດ້ລົມນໍາທາງລັດຖະມົນຕີ ມິຫຍັງໝົດແລ້ວເນາະ ເພິ່ນກໍ່ວ່າສິຊ່ວຍເຫຼືອ ເປັນຕົ້ນແມ່ນ ການກໍ່ສ້າງໂຮງຮຽນ ທີ່ວ່າເປ່ເພເນາະ ຈາກໄພນໍ້າຖ້ວມຫັ້ນ ມີຫຼາຍແຫ່ງເຕີບເນາະ ບໍ່ສາມາດນໍາໃຊ້ໄດ້ຫັ້ນນ່າ ຈໍາເປັນຕ້ອງໄດ້ສ້າງ ພື້ນຖານໂຄງລ່າງຄືນໃໝ່ເນາະ ໄທເຮົາກໍ່ພ້ອມພາກັນເລັ່ງ ໂຕໃດທີ່ສາມາດສ້ອມແຊມ ສິພະຍາຍາມ ເລັ່ງໃຫ້ໄດ້ເຂົ້າຮຽນຫັ້ນແຫຼະເນາະ.”

ເຖິງຢ່າງໃດກໍ່ຕາມ ທ່ານ ພຸດ ສິມມະລາວົງ ລັດຖະມົນຕີ ກະຊວງສຶກສາທິການ ແລະກິລາ ກ່າວເມື່ອວັນທີ 23 ເດືອນກັນຍາ 2024 ຂະນະຢ້ຽມຢາມ ບັນດາໂຮງຮຽນ ທີ່ຖືກນໍ້າຖ້ວມ ຢູ່ແຂວງຫຼວງນໍ້າທາ ວ່າ “ການສຶກສາ ແມ່ນມີຄວາມສໍາຄັນຫຼາຍ ໃນການປົດລ໊ອກທ່າແຮງຂອງເດັກນ້ອຍລາວ ຂອງພວກເຮົາ ດັ່ງນັ້ນ ພວກເຮົາບໍ່ອາດສາມາດປ່ອຍໃຫ້ເຫດການສຸກເສີນໃດໆ ເຮັດໃຫ້ການສຶກສາ ຂອງພວກເຂົາ ຢຸດສະງັກໄດ້.”

ເມື່ອອາທິດທີ່ຜ່ານມາ ພະແນກສຶກສາທິການ ແລະກິລາ ແຂວງຫຼວງນໍ້າທາ ກໍ່ໄດ້ລາຍງານວ່າ ມີໂຮງຮຽນໃນແຂວງ ຖືກນໍ້າຖ້ວມເສຍຫາຍ ທັງອາຄານຮຽນ ແລະອຸປະກອນການຮຽນ ຢ່າງໜ້ອຍ 50 ແຫ່ງ ອັນໄດ້ສົ່ງຜົນເຮັດໃຫ້ ໂຮງຮຽນຫຼາຍແຫ່ງ ຍັງບໍ່ສາມາດກັບມາເປີດການຮຽນໄດ້ຄືເກົ່າເທືື່ອ ແລະຕ້ອງໃຊ້ເວລາ ໃນການຟື້ນຟູ.