ການດູດ ແຮ່-ຊາຍໃນລຳແມ່ນ້ຳຂອງກາຍເປັນທຸຣະກິດນຶ່ງທີ່ເຮັດໃຫ້ ເກີດມີຜົນກະທົບ ຕໍ່ສະພາບແວດລ້ອມເຊັ່ນທຳລາຍ ທີ່ຢູ່ອາໃສ ຂອງສັດນ້ຳເປັນຕົ້ນ ແມ່ນປານ້ຳຂອງ. ເຮັດໃຫ້ຣະບົບນິເວດມີການປ່ຽນແປງເຊັ່ນເຮັດໃຫ້ສາຍນ້ຳຂຸ່ນ, ຕື້ນຂື້ນ. ເຮັດໃຫ້ແຮ່-ຊາຍໄປກະທົບໃສ່ ເວີນວັງທີ່ເປັນບ່ອນຢູ່ອາໃສແລະ ບ່ອນຂະຫຍາຍພັນຂອງຝູງປາ ທັງຫລາຍແລະ ຖ້າຫາກວ່າແຫລ່ງສຳປະທານ ດູດແຮ່-ຊາຍນັ້ນຫາກຢູ່ໃກ້ຊຸມຊົນຫລືແປວນ້ຳ ທຳມາຫາກິນກໍຍິ່ງສ້າງຜົນກະທົບ ໃຫ້ປະຊາຊົນທີ່ຢູ່ສອງຟາກຝັ່ງແມ່ນ້ຳຂອງນັ້ນ - ຕາມການເປີດເຜີຍຂອງນັກວິຊາການຂອງຫ້ອງການ ຊັບພະຍາກອນ ແຫລ່ງນ້ຳຂອງລາວ ທ່ານນຶ່ງຕໍ່ສື່ມວນຊົນທ້ອງຖິ່ນ ເມືອສັບປະດາ ທີ່ຜ່ານມາ.
ແລະ ຈາກຂໍ້ມູນຂອງຫ້ອງການ ຊັບພະຍາກອນແຫລາງນ້ຳແລະ ສິ່ງແວດລ້ອມບອກໃຫ້ຮູ້ຕື່ມອີກວ່າຈາກການກວດກາແລະ ການປະເມີນຜົນໃນທຸກໆ ໂຄງການພໍສະຫລຸບໄດ້ວ່າການດູດແຮ່-ຊາຍໃນລຳແມ່ນ້ຳຂອງນັ້ນມີທັງອັນດີແລະ ອັນບໍ່ດີ.
ແຕ່ຖ້າຫາກວ່າແຫລ່ງສຳປະທານ ດູດແຮ່-ຊາຍນັ້ນຢູ່ໃກ້ຊຸມຊົນ ເກີນໄປແມ່ນມີທັງຜົນກະທົບ ຕໍ່ສະພາບແວດລ້ອມແລະ ຕໍ່ການດຳລົງຊີວິດ ຂອງປະຊາຊົນຫລາຍກວ່າ, ເຮັດໃຫ້ນ້ຳພັດເຊາະເຈາະໃຫ້ ຕາຝັ່ງເຈື່ອນເພພັງ, ແມ່ນ້ຳຂອງ ບາງແຫ່ງເຖິງຍາມແລ້ງກໍຕື້ນເຂີນຈົນສາມາດ ຍ່າງຂ້າມໄປ-ມາໄດ້. ຢູ່ຫລາຍບ່ອນກໍມີດອນຫາດຊາຍ ເລັກໆນ້ອຍໆປາກົດຂື້ນຊຶ່ງເຮັດໃຫ້ເກີດ ຜົນກະທົບ ຫລາຍຢ່າງຕໍ່ການດຳລົງຊີວິດ ຂອງປະຊາຊົນທີ່ອາໃສຢູ່ຕາມ ແຄມຝັ່ງແມ່ນ້ຳຂອງ.