ພຍາທໄຂ້ເລືອດອອກ ແພ່ຣະບາດໃນ ແຂວງສາຣະວັນ

ສະຖານະກາຣ ແພ່ຣະບາດ ຂອງພຍາທ ໄຂ້ເລືອດອອກ ຢູ່ແຂວງ ສາຣະວັນ ໃນປີ 2010 ນີ້ ມີຄວາມຮຸນແຮງ ຫລາຍຂຶ້ນ.
ຫວາດ ສີມູນ
2010-08-25
ອີແມວລ໌
ຄໍາເຫັນ
Share
ພິມ

ພຍາທ ໄຂ້ເລືອດອອກ ເຮັດໃຫ້ມີ ຜູ້ປ່ວຍ ແລະ ເສັຽຊີວີຕ ໄປຫລາຍກວ່າ ທຸກໆປີ ອັນເປັນເຫຕ ໃຫ້ທາງ ເຈົ້າໜ້າທີ່ ຕ້ອງໄດ້ລົງ ຕິດຕາມ ຢ່າງໃກ້ຊິດ ເພື່ອຄວບຄຸມ ບໍ່ໃຫ້ມີ ກາຣຣະບາດ ຮ້າຍແຮງຕໍ່ໄປ ດັ່ງເຈົ້າໜ້າທີ່ ຜແນກ ສາທາຣະນະສຸຂ ປະຈຳແຂວງ ສາຣະວັນເວົ້າວ່າ:

“ໄຂ້ເລືອດອອກ ປີກາຍນີ້ ກໍບໍ່ຫລາຍ ແຕ່ປີນີ້ຫລາຍ ຮູ້ສຶກວ່າ ພາບຣວມຖືວ່າ ເພີ່ມຂຶ້ນ ເພີ່ມຂຶ້ນສຳ ຫລັບປີນີ້ ຖືວ່າ ໄຂ້ເລືອດອອກ ເພີ່ມຂຶ້ນ ຖືວ່າມັນ ຮຸນແຮງ ກວ່າເກົ່າ”.

ເຈົ້າໜ້າທີ່ ລາວດັ່ງກ່າວ ໃຫ້ກາຣຊີ້ ແຈງເພີ່ມວ່າ ແຕ່ເດືອນມົກກະຣາ 2010 ນີ້ມາ ໄຂ້ເລືອດອອກ ໄດ້ແພ່ຣະບາດ ໄປທົ່ວ 245 ໝູ່ບ້ານ ໃນ 8 ຕົວເມືອງ ໂດຽມີຜູ້ ເສັຽຊີວີຕ ໄປຍ້ອນບໍ່ ຕໍ່າກວ່າ 14 ຄົນ ໃນຈຳນວນ ຜູ້ປ່ວຍທັງໝົດ 1,200 ຄົນ.

ໃນຂະນະ ດຽວກັນນີ້ ທ່ານກໍວ່າ ເມືອງທີ່ມີ ປະຊາຊົນ ເປັນໄຂ້ເລືອດອອກ ຫລາຍທີ່ສຸດ ໃນປີນີ້ນັ້ນ ແມ່ນເມືອງລະຄອນ ເພັງທີ່ມີ ທັງໝົດ 370 ຄົນ ແຕ່ເມືອງ ສາຣະວັນ ເປັນເມືອງ ທີ່ມີຜູ້ ເສັຽຊີວີຕ ໄປຍ້ອນພຍາທ ດັ່ງກ່າວ ຫລາຍທີ່ສຸດ ໂດຽມີທັງໝົດ 8 ຄົນ.

ຢ່າງໃດກໍຕາມ ທາງໜ່ວຍງານ ກ່ຽວຂ້ອງ ກໍໄດ້ ພຍາຍາມ ກຳຈັດ ແລະຄວບຄຸມ ສະພາບກາຣ ເພື່ອໃຫ້ກາຣ ຣະບາດ ຫລຸດນ້ອຍລົງ ດ້ວຍກາຣຈັດສົ່ງ ເຈົ້າໜ້າທີ່ ໄປຊ່ວຍ ແນະນຳໃຫ້ ປະຊາຊົນ ຮູ້ຈັກ ວິທີປ້ອງກັນ ໂດຽສະເພາະ ກໍແມ່ນກາຣ ກຳຈັດ ແຫລ່ງກຳເນີດ ຂອງໜອນນ້ຳ ຢູ່ຕາມ ບໍຣິເວນ ບ້ານເຮືອນ ຕລອດຮອດ ກາຣຈັດສົ່ງ ເຈົ້າໜ້າທີ່ ໄປສີດຢາ ຂ້າຍຸງລາຍ ນຳດ້ວຍ.

ເຕັມຫນ້າ