ໄຂ້ເລືອດອອກ ຍັງເປັນພັຍທີ່ຮ້າຍແຮງ

ທາງອົງກາຣ ອະນາມັຍ ໂລກ ຫລື "WHO" ໄດ້ປະກາສ ທີ່ກອງປະຊຸມ ຢູ່ມາເລເຊັຽ ໃນມື້ວັນ ພຸທ ທີ່ 3 ພຶສຈິກາ ນີ້ວ່າ ພຍາດໄຂ້ເລືອດອອກ ຫລື Dengue fever ກາຍມາເປັນ ພັຍຂົ່ມຂູ່ ທີ່ຮ້າຍແຮງ ຕໍ່ສຸຂພາບ ຂອງປະຊາຊົນ ໃນທົ່ວໂລກ ໂດຽສະເພາະ ໃນພູມີພາຄ ປາຊີຟິກ ຕາເວັນຕົກ ຊຶ່ງບາງເຂຕ ບໍ່ເຄີຽພົບເຫັນ ມີບັນຫາ ມາກ່ອນ ແຕ່ປັຈຈຸບັນນີ້ ມີຄົນປ່ວຍເປັນ ໄຂ້ເລືອດອອກ ແລະແພ່ຂຍາຍ ຢ່າງວ່ອງໄວ.

Dr. Shin Young-soo ຜູ້ອຳນວຍກາຣ ຂອງອົງກາຣ ອະນາມັຍ ໂລກ ປະຈຳເຂຕ ປາຊີຟິກ ຕາເວັນຕົກ ໄດ້ກ່າວເນັ້ນວ່າ ໃນຣະຫວ່າງ 10 ປີ ຜ່ານມານີ້ ຈຳນວນຄົນ ປ່ວຍຍ້ອນເປັນ ໄຂ້ເລືອດອອກ ໃນເຂຕ ພູມີພາຄ ດັ່ງກ່າວ ໄດ້ເພີ່ມຂຶ້ນ ເຖິງສອງເທົ່າ ໂດຽສະເພາະ ຢູ່ເມືອງລາວ ແລະ ຟີລິປປິນ ທີ່ພົບເຫັນ ມີຄົນປ່ວຍ ຫລາຍກວ່າ ປະເທສອື່ນໆ.

ເຈົ້າໜ້າທີ່ ອົງກາຣ ອະນາມັຍ ໂລກດັ່ງກ່າວ ໄດ້ແຈ້ງເພີ່ມວ່າ ໃນຈໍານວນ ຜູ້ມີຄວາມສ່ຽງ ເປັນໄຂ້ເລືອດອອກ ທັງໝົດ 2.5 ລ້ານຄົນ ໃນທົ່ວໂລກ ນັ້ນ ບໍ່ຕໍ່າກວ່າ 70% ແມ່ນຢູ່ໃນ ເຂຕພູມີພາຄ ເອເຊັຽ ປາຊີຟິກ ຕາເວັນຕົກ, ຍ້ອນເປັນເຂຕ ທີ່ມີ ປະຊາຊົນ ອາສັຍຢູ່ ຢ່າງແອອັດ ພ້ອມກັບເປັນ ເຂຕທີ່ມີ ອາກາສຮ້ອນ ແລະໃນເມື່ອ ມີຝົນຕົກ ກໍມັກຈະມີ ນ້ຳຄ້າງຢູ່ຕາມ ບວກໜອງຄອງບຶງ ທີ່ສ້າງຄວາມ ສະດວກ ໃຫ້ຈຳພວກ ຍຸງລາຍ ວາງໄຂ່ໃສ່.

ສະນັ້ນ Dr. Shin Young-soo ຈຶ່ງໄດ້ຮຽກຮ້ອງ ໃຫ້ທາງກາຣ ກ່ຽວຂ້ອງ ໃນແຕ່ລະ ປະເທສ ໄດ້ເອົາໃຈໃສ່ ໃຫ້ຄວາມຮູ້ ແກ່ປະຊາຊົນ ໂດຽສະເພາະ ໃຫ້ທຳລາຍ ສະຖານທີ່ ວາງໄຂ່ ຂອງຈຳພວກ ຍຸງລາຍ ພ້ອມກັບໃຫ້ນຳສົ່ງ ຄົນປ່ວຍ ໄປຮັບກາຣ ຮັກສາປິ່ນປົວ ຢູ່ໂຮງພຍາບາລ ໃນເວລາ ອັນຄວນດ້ວຍ.