ໄຂ້ຫວັດໝູ ອາດຈະຣະບາດ ຂື້ນໃໝ່ໃນລາວ

ຕາມລາຍງານຈາກ ນະຄອນຫລວງ ວຽງຈັນ. ລາຍງານວ່າ ການຣະບາດ ທີ່ເກີດຂື້ນ ໃນປັດຈຸບັນ ພາຍໃນລາວ ມີລັກສນະ ກະຈັກກະຈາຍ ແຕ່ບໍ່ຮ້າຍແຮງ ເທື່ອ. ສ່ວນການຣະບາດ ຂື້ນຄັ້ງທໍາອິດນັ້ນ ໂດຍມາກແມ່ນເຊື້ອ ທີ່ຕິດມາຈາກ ຕ່າງປະເທດ. ກ່ຽວກັບການ ຮອງຮັບປິ່ນປົວ ຄົນປ່ວຍຕິດໂຣກ ໄຂ້ຫວັດໝູ ໃນປັດຈຸບັນນີ້ ລາຍງານວ່າ ຢູ່ຂັ້ນແຂວງ ກໍແມ່ນໂຮງໝໍແຂວງ ແລະ ເມືອງເປັນຜູ້ ຮັບຜິດຊອບ ຊົ່ວຄາວ. ສໍາລັບການ ຮອງຮັບຄົນປ່ວຍ ທີ່ຕິດເຊື້ອໂຣກ ຢູ່ໃນນະຄອນ ຫລວງວຽງຈັນ ນັ້ນໄດ້ແກ່ ໂຮງໝໍ4ແຫ່ງຄື: ໂຮງໝໍມະໂຫສົດ ໂຮງໝໍມິຕພາບ 250ຕຽງ ໂຮງໝໍທະຫານ 103ຕຽງ ແລະໂຮງໝໍ ເສດຖາທິຣາດ ແລະ ມີສູນວິຈັຍ ພຍາດແຫ່ງດຽວ ຄືສູນຣະບາດ ວິທຍາ.

ເຊື້ອໂຣກໄຂ້ຫັວດໝູ ໄດ້ຣະບາດຂື້ນ ໃນລາວ ມີຂື້ນເມືອ ວັນທີ 15 ມິຖຸນາ ປີ 2009 ມີຜູ້ຕິດ ເຊື້ອໂຣກ ທັງໝົດ297ຄົນ ເສັຽຊີວິດສອງຄົນ. ຢູ່ໃນນະຄອນ ຫລວງ ວຽງຈັນ ໃນລະຍະນັ້ນ ມີຜູ້ຕິດ ເຊື້ອໂຣກ180ຄົນ ແຂວງບໍຣິຄໍາໄຊ 44ຄົນ ເສັຽຊີວິດນຶ່ງຄົນ ແຂວງສວັນນະເຂດ ມີຫົກຄົນ ແຂວງຈໍາປາສັກ ມີສິບຫົກຄົນ ແຂວງອັຕປື ຫົກຄົນ ແຂວງວຽງຈັນຫ້າຄົນ ແຂວງເຊກອງຫ້າຄົນ. ແຂວງຫລວງພະບາງ ຄໍາມ່ວນ ບໍ່ແກ້ວ ຜົ້ງສາລີ ມີຜູ້ຕິດເຊື້ອໂຣກ ແຂວງລະສອງຄົນ ແຂວງຫລວງນໍ້າທາ ມີນຶ່ງຄົນ ແລະເສັຽຊີວິດນຶ່ງຄົນ.