ຢູ່ກອງປະຊຸມ ຄະນະກໍາມະການ ໂອແລັມປິກລາວ ແລະ ວຽດນາມ ໃນກຸງຮ່າໂນ່ຍ ເມື່ອວັນອາທິດ ຜ່ານມາ ທ່ານ Giang ກ່າວວ່າ ວຽດນາມ ຈະເປັນຄູ່ພາຄີ ຮ່ວມກັບລາວ ໃນການຈັດຕັ້ງ ກິລາ ສີລປະ ປ້ອງກັນຕົວ martial art ເຊັ່ນ ກາຣາເຕ ເຕກອນໂດ ມວຍປໍ້າ ວູຊູ ຍີງປືນ ດໍານໍ້າ ເປັນຕົ້ນ.
ວຽດນາມ ຜູ້ເຄີຍເປັນເຈົ້າພາບ ຈັດການແຂ່ງຂັນ ກິລາ SEA GAMEs ຄັ້ງທີ 22 ໃນປີ 2003 ຜ່ານມານັ້ນ ຈະສົ່ງ ຄະນະ ຜູ້ຊ່ຽວຊານ ຂອງຕົນ ມາຊ່ວຍຝຶກແອບ ໃຫ້ແກ່ນັກກິລາ ລາວ. ທາງດ້ານ ທ່ານແສງພອນ ພົນອາມາດ ຮອງປະທານ ໂອແລັມປິກລາວ ບອກວ່າ ລາວ ຈະເປັນເຈົ້າພາບ ຈັດກິລາ 25 ປະເພດ ໃນການແຂ່ງຂັນ ກິລາຊີເກັມ ປີໜ້າ.
ກ່ອນໜ້ານີ້ ກໍມີ ຣາຍງານວ່າ ສະໂມສອນ Hoang Anh ໃນແຂວງ Gia Lai ຂອງວຽດນາມ ຊຶ່ງເປັນສະໂມສອນ ມືອາຊີບ ໄດ້ຮັບປາກວ່າ ຈະໃຫ້ການຝຶກ ນັກກິລາ ເຕະບານ ຂອງລາວ ພ້ອມທັງ ໃຫ້ສະຖານທີ່ ພັກ ເງິນ ສໍາລັບ ການຢູ່ການກິນ ໃນໄລຍະ ທີ່ຝຶກແອບ ແລະ ທາງສະໂມສອນ Hoang Anh ຊຶ່ງມີ ສາຍພົວພັນກັບ ສະໂມສອນກິລາ ເຕະບານ Arsenal ຂອງອັງກິດ ນັ້ນ ກໍຫວັງ ວ່າ ຈະສາມາດ ຊ່ວຍຍົກ ຄວາມສາມາດ ຂອງທີມລາວ ເພື່ອພ້ອມແຂ່ງຂັນ ກັບທີມ ຈາກປະເທດອຶ່ນ ໃນຊີເກັມຊ ຢູ່ລາວ.
ການແຂ່ງຂັນ ກິລາຊີເກັມຊ ຄັ້ງທີ 25 ຊຶ່ງລາວ ຈະເປັນເຈົ້າພາບ ຈະຈັດຂຶ້ນ ຣະຫວ່າງ ວັນທີ 3 ຫາ 12 ເດືອນທັນວາ ປີ 2009 ທີ່ສນາມກິລາ ແຫ່ງຊາດ ແຫ່ງໃໝ່ ທີ່ຈີນສ້າງໃຫ້ ໃນນະຄອນຫລວງວຽງຈັນ ຕາມຣາຍງານຂ່າວ ຈາກທ້ອງຖີ່ນ ກ່ອນໜ້ານີ້.