ເຂົ້ານາແຊງແຂວງ ຜົ້ງສາລີປີນີ້ໄດ້ໜ້ອຍ

ການປູກເຂົ້າ ນາແຊງ ໃນແຂວງ ຜົ້ງສາລີ ບໍ່ໄດ້ຕາມ ແຜນການ ທີ່ວາງໄວ້ ຍ້ອນ ບັນຫາເສຖກິດ ແລະ ຄວາມຕ້ອງການ ຂອງຕລາດ
ມະນີຈັນ
2010-05-27
ອີແມວລ໌
ຄໍາເຫັນ
Share
ພິມ

ການປູກເຂົ້ານາແຊງ ໃນແຂວງ ຜົ້ງສາລີ ປີນີ້ ມີຈໍານວນເພີ່ມຂຶ້ນ ເມື່ອປຽບທຽບ ໃສ່ປີທີ່ຜ່ານມາ  ແຕ່ເມື່ອທຽບໃສ່ ກັບແຜນການ ທີ່ວາງໄວ້ 600 ເອັກຕາຣນັ້ນ ແມ່ນບໍ່ບັນລຸ ຕາມແຜນທີ່ວາງໄວ້. ທັງນີ້ກໍຍ້ອນ ບັນຫາເສຖກິດ ແລະຄວາມຕ້ອງການ ຂອງຕລາດ ທີ່ຫລຸດລົງ  ແລະ ການເຮັດນາແຊງ ໃນປັຈຈຸບັນນີ້ ກໍບໍ່ໄດ້ເຮັດ ຕາມຣະດູການ ເນື່ອງຈາກ ສະພາບອາກາດ ທີ່ໜາວເຢັນ. ຕາມຄໍາເວົ້າຂອງ ທ່ານທອງສະຫວັນ ທັມມະວົງ ຫົວໜ້າຜແນກ ກະສິກັມ-ປ່າໄມ້ ແຂວງຜົ້ງສາລີ:

"ແຜນການວາງໄວ້ ກໍແມ່ນສູ້ຊົນເອົາ 600 ແຕ່ວ່າ ເຮັດຕົວຈິງແຕ່ 353 ເອັກຕາຣ ເຫດຜົລອັນນີ້ກໍ ອັນທີນຶ່ງກໍຍ້ອນວ່າ ເລື່ອງການ ໃນວຽກເສຖກິດ ອີກອັນນຶ່ງ ກໍທາງຕລາດຈີນ ນັ້ນມີຄວາມ ຕ້ອງການອັນໃດ ຫລາຍກວ່າ ຂະເຈົ້າກໍໄປປູກ ອັນນັ້ນ".

ປັຈຈຸບັນນີ້ ປະຊາຊົນ ໄດ້ຫັນໄປປູກພືດ ຜັກຕ່າງໆແທນ ເຊັ່ນ ໝາກຖົ່ວ ໝາກເຜັດໃຫຍ່ ໝາກໂມ ສາລີ ມັນຝຣັ່ງ ເປັນຕົ້ນ ເພາະເປັນປະເພດ ພືດຜັກ ທີ່ຕ້ອງການ ຫລາຍຂອງຕລາດ ທາງຈີນ ແລະກໍສາມາດ ສ້າງຣາຍໄດ້ ຫລາຍກວ່າ ການຂາຍເຂົ້ານາແຊງ. ນອກຈາກການ ປ່ຽນໄປປູກພືດ ຊນິດອື່ນ ຫລາຍກວ່າການປູກ ເຂົ້ານາແຊງແລ້ວ ການປູກເຂົ້ານາແຊງ ໃນປັຈຈຸບັນ ກໍບໍ່ໄດ້ເຮັດໄປ ຕາມຣະດູການ ເນື່ອງຈາກ ສະພາບອາກາດ ທີ່ບໍ່ເປັນຜົລດີ ຕໍ່ການປູກເຂົ້າ ນາແຊງ ຊຶ່ງນັ້ນກໍເປັນ ອີກສາເຫດນຶ່ງ ທີ່ເຮັດໃຫ້ການປູກ ເຂົ້ານາແຊງ ບໍ່ເປັນໄປຕາມ ແຜນການ ທີ່ໄດ້ວາງໄວ້. ທ່ານ ທອງສະຫວັນ ທັມມະວົງ ກ່າວຕໍ່ໄປວ່າ:

"ສໍາລັບນາແຊງນີ້ ຖືວ່າ ຢູ່ນີ້ພວກເຮົາ ບໍ່ໄດ້ເຮັດໄປ ຕາມຣະດູການ ປົກກະຕິ ເພາະວ່າ ອາກາດຂ້ອນຂ້າງເຢັນ ຄາດວ່າຢູ່ໃນ ກາງເດືອນ ທ້າຍເດືອນພົ້ນພຸ້ນ ຈະໄດ້ເກັບກ່ຽວ".

ທ່ານກ່າວຢໍ້າຕື່ມວ່າ ການປູກເຂົ້າ ນາແຊງ ທີ່ບໍ່ເປັນໄປ ຕາມແຜນການ ທີ່ຄາດໝາຍນັ້ນ ກ່ຽວຂ້ອງກັບຄວາມ ຕ້ອງການຂອງຕລາດ ທີ່ກ່ຽວເນື່ອງໄປຮອດ ຣາຍໄດ້ ຂອງປະຊາຊົນ. ການປູກພືດ ຊນິດອື່ນ ສາມາດເຮັດໃຫ້ ມີຣາຍໄດ້ເພີ່ມ  ການປູກເຂົ້ານາແຊງ ຈຶ່ງບໍ່ເປັນທີ່ ນິຍົມກັນເຮັດ.  ອີກຢ່າງນຶ່ງ ແຂວງຜົ້ງສາລີ ເປັນເຂດທີ່ມີ ອາກາດໜາວ ສົ່ງຜົລໃຫ້ການປູກ ເຂົ້ານາແຊງ ລ່າຊ້າກວ່າ ໃນເຂດ ອື່ນໆຂອງລາວ.

ເຕັມຫນ້າ