ຊາວລາວຍັງລັກລອບ ເຂົ້າໄທຢ່າງຕໍ່ເນື່ອງ

ເຈົ້າໜ້າທີ່ ຣັກສາ ຄວາມສງົບ ຕາມແມ່ນໍ້າຂອງ ແຂວງອຸບົນ ຣາຊທານີ ຂອງໄທ ເປີດເຜີຽວ່າ ປາກົດການ ປະຊາຊົນ ລາວ ຢູ່ຕາມຊາຍແດນ ລັກລອບ ເຂົ້າມາໃນ ປະເທດໄທ ເພື່ອສະແຫວງຫາ ວຽກເຮັດງານທໍາ ນັ້ນມີຫລາຍ ຂື້ນເລື້ອຍໆ ຈົນວ່າຫນ່ວຍງານ ກ່ຽວຂ້ອງ ບໍ່ສາມາດ ຄວບຄຸມໄດ້. ທ່ານວ່າ ຈັບໄດ້ແລ້ວ ສົ່ງກັບຄືນ ປະເທດ ເຂົາກໍເຂົ້າມາ ຢູ່ຄືເກົ່າ ດັ່ງເຈົ້າໜ້າທີ່ ຣັກສາຄວາມ ສງົບຕາມ ຊາຍແດນ ໄດ້ກ່າວ:

"ທ່ານວ່າ   ເປັນຫຍັງ ແຮງງານ ຈື່ງຫລາຍແທ້ ເພາະວ່າຫລັງ ຈາກຈັບມາ ຟ້ອງສານ ແລະສົ່ງຄືນ ປະເທດແລ້ວ ພວກເຂົາ ກໍພາກັນ ເຂົ້າມາໃໝ່. ຖ້າບອກໃຫ້ ໄປຂ້າມໃນ ຈຸດທີ່ທາງການ ອະນຸຍາດ ໃຫ້ຂ້າມ ເຂົາເຈົ້າ ກໍບໍ່ຂ້າມ ເຂົາກໍຍັງ ຂ້າມບ່ອນທີ່ ທາງການບໍ່ ອະນຸຍາດ ແລະກໍອ້າງວ່າ ຂ້າມມາ ຢ້ຽມຢາມ ຍາດພີ່ນ້ອງ ເຮັດໃຫ້ ຄວບຄຸມຍາກ".

ຄົນງານລາວ ຜິດກົດໝາຍ ທີ່ ຂ້າມມາຫາ ເຮັດວຽກ ໃນພາກອິສານ ນີ້ ຈໍານວນນື່ງ ມາຕາມສາຍ ຍາດພີ່ນ້ອງ, ຄົນໄທ ກໍມີຍາດ ພີ່ນ້ອງ ຢູ່ຝັ່ງລາວ ຄົນລາວ ກໍມີຍາດ ພີ່ນ້ອງ ຢູ່ຝັ່ງໄທ, ຄົນໄທ ກໍເຄີຽໄປ ຫາຢູ່ຫາກິນ ຢູ່ຝັ່ງລາວ ໂດຍສະເພາະ ຄົນຢູ່ຕາມ ຊາຍແດນ ພາກອິສານ ນີ້ມັນມີ ຄວາມຜູກພັນ ກັນມາ ຕັ້ງແຕ່ ປວັດສາດພຸ້ນ.

ສິ່ງສໍາຄັນ ອີກປະການນື່ງ ຄ່າຈ້າງ ແຮງງານກໍຖືກ ຜູ້ຈ້າງ ກໍຢາກຈ້າງ ແຕ່ແຮງງານ ຣາຄາຖືກ ແລະຝັ່ງໄທ ກໍຂາດເຂີນ ແຮງງານ. ເຈົ້າໜ້າທີ່ ໄທວ່າ ສະເພາະໃນ ແຂວງອຸບົນ ຣາຊທານີ ແຂວງ ອໍານາດຈະເຣີນ ແລະ ມຸກດາຫານ ມີຄົນງານ ລາວ ລັກລອບເຂົ້າມາ ເຮັດວຽກ ໃນປະເທດໄທ ປະມານ 2 ແສນ ກ່ວາຄົນ.

ສ່ວນຫລາຍຜ່ານ ຂະບວນການ ຄ້າແຮງງານ ເຖື່ອນ ທີ່ີສົ່ງຕໍ່ ໃຫ້ກັນ. ມີທັງນາຍໜ້າ ຄົນລາວ ແລະ ນາຍໜ້າຄົນໄທ. ເຂົາເຈົ້າເສັຽ ໃຫ້ຄ່ານາຍໜ້າ ຫົວນື່ງ ປະມານ 5,000 ບາດ. ຖ້າທຽບໃສ່ກັບ ການມາຢ່າງ ຖືກຕ້ອງຕາມ ທາງການແລ້ວ ເຂົາເຈົ້າເຫັນວ່າ ຖືກກ່ວາ. ແຕ່ຄວາມຈິງນັ້ນ ຖ້າຈະຄິດໄລ່ ແທ້ໆ ຄົນທີ່ເຂົ້າໄປ ເຮັດວຽກແບບ ຜິດກົດໝາຍ ເສັຽຜົນປໂຍດ ຫລາຍກ່ວາ ຜ່ານທາງການ.