ຂ.ພາກໃຕ້ຂອງລາວ ໃຫ້ຣະວັງນໍ້າຖ້ວມ

ກົມອຸຕຸນິຍົມ ວິທຍາ ໄດ້ອອກປະກາດ ເຕືອນ ປະຊາຊົນໃນ 3 ແຂວງພາກໃຕ້ ຂອງລາວ ໃຫ້ຣະມັດຣະວັງ ອາດເກີດເຫດ ນໍ້າຖ້ວມ ກະທັນຫັນ ຍ້ອນພາຍຸໃຕ້ ຝຸ່ນ ແກມີ ທີ່ຈະເຄື່ອນເຂົ້າ ເຖິງແຄມຝັ່ງ ທະເລ ໃນພາກກາງ ຂອງວຽດນາມ ໃນມື້ວັນທີ 5 ກັນຍາ 2012 ແລະ ເຖິງພາກໃຕ້ ຂອງລາວ ໃນຕອນແລງ ວັນທີ 6. ເຈົ້າໜ້າທີ່ຜແນກ ອຸຕຸນິຍົມ ວິທຍາ ນະຄອນຫລວງ ວຽງຈັນ ອະທິບາຍວ່າ:

"ພວກເຮົາໄດ້ ແຈ້ງເຕືອນ ໃຫ້ແຖວພາກໃຕ້ ຂອງລາວ ແຖວເຂດ ເມືອງອັດຕະປື ເຊກອງ ແລະ ຈໍາປາສັກ ແມ່ນຕອນແລງ ຂອງມື້ວັນທີ 6 ພາຍຸຫົວ ດັ່ງກ່າວນີ້ ຈະເຂົ້າ ວຽດນາມ ແຕ່ວ່າມັນ ຈະພັດຜ່ານຢູ່ ແຂວງ ຈໍາປາສັກ ເຊກອງ ແລະ ອັດຕະປື".

ເຈົ້າໜ້າທີ່ ເວົ້າຕໍ່ໄປວ່າ ທາງຜແນກອຸຕຸນິຍົມ ວິທຍາ ໄດ້ແຈ້ງເຕືອນ ໄປຍັງ ເຈົ້າໜ້າທີ່ ປົກຄອງບ້ານ ເມືອງ ແລະແຂວງ ໃນພາກໃຕ້ ໃຫ້ຫາວິທີປ້ອງກັນ ພັຍນໍ້າຖ້ວມ ກະທັນຫັນ ໂດຍສະເພາະ ຊີວິດຄົນ ທີ່ສໍາຄັນກວ່າ ເຄື່ອງໃຊ້ຂອງສອຍ. ເຈົ້າໜ້າທີ່ເວົ້າວ່າ:

"ມີສະຕິ ຣະມັດຣະວັງ ຖ້າວ່າມີ ຝົນຕົກແຮງ ຝົນຕົກໜັກ ເຮົາກໍຕ້ອງໄດ້ ກຽມພ້ອມ ທີ່ວ່າຫລົບ ເຮັດແນວໃດ ເພາະວ່າເຮົາເຕືອນ ກັນໄວ້ແລ້ວ ທີ່ວ່າຈະພັດຜ່ານ ຕ້ອງໄດ້ ປ້ອງກັນໄວ້ ແບບວ່າໃຫ້ ຣະມັດຣະວັງ ເຣື່ອງສັດລ້ຽງຕ່າງໆ ໃຫ້ເອົາຂຶ້ນໄວ້ ບ່ອນສູງ ຍ້ອນວ່າ ຝົນຕົກໜັກ ແລະ ມັນອາດຈະເຮັດໃຫ້ ນໍ້າຖ້ວມຊຸແຮງ".

ເຈົ້າໜ້າທີ່ ເວົ້າສລຸບວ່າ ອິດທິພົນ ຂອງພາຍຸ ຈະກໍ່ໃຫ້ເກີດ ຝົນຕົກໜັກ ລົມແຮງ ແລະ ນໍ້າຖ້ວມ ກະທັນຫັນ ຊຶ່ງຜູ້ທີ່ອາສັຍ ຢູ່ຕາມແຄມ ແມ່ນໍ້າ ຕ້ອງໄດ້ຣະວັງ ເປັນພິເສດ ໂດຍສະເພາະ ເຫດດິນເຈື່ອນ ແລະ ນໍ້າປ່າໄຫລ ເຊາະແຮງ.