ນໍ້າຖ້ວມ ຂ.ຊຽງຂວາງ

ຫ້ອງການ ກວດກາ ຜູ້ເສັຽຫາຍ ຈາກເຫດ ພັຍພິບັດ ທີ່ ແຂວງຊຽງຂວາງ ເປີດເຜີຍວ່າ,  ຫລັງຈາກ ແຂວງຊຽງຂວາງ ປະເຊີນ ກັບ ລົມພະຍຸ 2 ຄັ້ງ ຕິດຕໍ່ກັນ ໃນຣະຍະ ນື່ງ ສັປດາ ເຮັດໃຫ້ ຊາວຊຽງຂວາງ ເສັຽ ຊີວີດ ແລ້ວ 8 ຄົນ, ພື້ນທີ່ ການກະເສດ ບ້ານເຮືອນ ຖືກທຳລາຍ ຢ່າງຫລວງຫລາຍ. ເຈົ້າຫນ້າທີ່ ກ່ຽວຂ້ອງ ເວົ້າວ່າ:

"ຝົນຕົກ ບໍ່ມີຍາມ ຈະຜ່ອນເລີຍ ເຮັດໃຫ້ດີນ ອີ່ມນ້ຳ ແລ້ວນ້ຳ ມັນຈະໄຫລ ທະລຸເຂົ້າມາ ເປັນລັກສນະ ນ້ຳປ່າ ເຮັດໃຫ້ ປະຊາຊົນ ຢູ່ລຽບຕາມ ສາຍນ້ຳ ຕ່າງໆ ຖືກຜົລ ກະທົບ ຢ່າງຫນັກ ຊຽງຂວາງ ໄດ້ຮັບ ຜົລກະທົບ ຈະມີ ຜູ້ເສັຽ ຊີວີດຢູ່ 8 ຄົນ".

ທ່ານກ່າວ ຕໍ່ໄປວ່າ ຄວາມເສັຽຫາຍ ຈາກລົມ ພະຍຸ ຄວາມກົດດັນ ອາກາດຮ້ອນ ລູກໃຫມ່ ນີ້ ເຮັດໃຫ້ ນ້ຳຖ້ວມ ແຮງກວ່າ ທີ່ຜ່ານມາ ມີຜູ້ເສັຽ ຊີວີດ ໃນທົ່ວ ປະເທດ 12 ຄົນ ທີ່ແຂວງຊຽງ 8 ຄົນ. ເຫດນ້ຳຖ້ວມ ເທື່ອນີ້ ຮ້າຍແຮງ ກວ່າໃນປີ 1966 ທີ່ຫລາຍແຂວງ ໃນລາວ ຖືກນ້ຳຖ້ວມ ໄປຫມົດ.

ພື້ນທີ່ໆ ຖືກນ້ຳຖ້ວມ ທີ່ແຂວງ ຊຽງຂວາງ ໃນເວລານີ້ ຂຍາຍວົງກວ້າງ ໄປຮອດ 8 ຫົວເມືອງ ແລະ ສ້າງຄວາມ ເສັຽຫາຍ ໃຫ້ແກ່ 176 ຫມູ່ບ້ານ ເມືອງທີ່ມີ ຄວາມເສັຽຫາຍ ຫລາຍກວ່າຫມູ່ ກໍ່ແມ່ນ ເມືອງຫມອກ ເມືອງຄູນ ໂດຍສະເພາະ ເມືອງຫມອກ ການຊ່ອຍເຫລືອ ເປັນໄປໄດ້ ຍາກລຳບາກ ເພາະຖນົນ ຫົນທາງ ຖືກຕັດຂາດ ຂົວຂ້າມແມ່ນ້ຳ 8 ແຫ່ງ ແລະ ຂົວນ້ອຍໆອີກ 12 ແຫ່ງ ໃຊ້ການ ບໍ່ໄດ້.

ປັດຈຸບັນ ນ້ຳໄດ້ລົດລົງ ແດ່ແລ້ວ ເຈົ້າຫນ້າທີ່ ໄດ້ເລີ້ມເຂົ້າ ໄປຊ່ອຍເຫລືອ ປະຊາຊົນ ຜູ້ທີ່ໄດ້ ຮັບຜົລກະທົບ ແຕ່ຍັງ ບໍ່ທົ່ວເຖິງ ເພາະມີ ຄວາມເສັຽຫາຍ ຫລາຍເກີນໄປ ທາງແຂວງ ຈື່ງໄດ້ຂໍ ຄວາມຊ່ອຍເຫລືອ ຈາກ ຣັຖບານກາງ ແລະ ອົງການ ຕ່າງຊາດ.