ຄົນຕິດເຊື້ອ hiv ຢູ່ລາວມີເພີ້ມຂື້ນ

ຈໍານວນ ຄົນ ຕິດ ເຊື້ອໂຣຄ HIV ທີ່ພາໃຫ້ ເປັນ ໂຣຄເອດສ໌ ເພິ້ມຂື້ນ ເຖິງສິບເທົ່າ ຢູ່ລາວ.
ສິດນີ
2011.07.13
F-nurse2 ນາງໝໍ ທີ່ ໂຮງໝໍ ມະໂຫສົດ
Tyler Chapman

ກົດຟັງສຽງ

ໃນຣະຍະ ສາມປີ ທີ່ ຜ່ານມາ ປາກົດວ່າ ຊາວລາວ ທີ່ຕິດ ເຊື້ອໂຣຄ hiv ແມ່ນຄົນງານ ທີ່ກັບ ມາຈາກ ເຮັດວຽກ ໃນ ປະເທດໄທ ແຕ່ ປັດຈຸບັນ ຄົນລາວ ທັມມະດາ ສາມັນ ທີ່ບໍ່ໄດ້ ອອກໄປ ປະເທດ ໃດ ກໍຕິດ ເຊື້ອໂຣຄ ນີ້ ຫລາຍຂື້ນ. ດັ່ງເຈົ້າ ໜ້າທີ່ ສູນຕ້ານ ໂຣຄເອດສ໌ ກະຊວງ ສາທາຣະນະສຸຂ ກ່າວຕອນ ນຶ່ງວ່າ:

“ການ ຣະບາດ ເນາະ ຣະຍະ ເລິ້ມທຳອິດ ທີ່ເຮົາພົບ ຜູ້ຕິດເຊື້ອ ນີ້ ສ່ວນຫລາຍ ຈະເປັນ ປະຊາກອນ ເຄື່ອນຍ້າຍ ເນາະ ຂ້າເຈົ້າ ຈະອອກໄປ ຂາຍແຮງງານ ຢູ່ຕ່າງ ປະເທດ ກັບມາ ແລ້ວ ກໍຕິດເຊື້ອ HIV ມາ ແຕ່ວ່າ ໃນ Wave ທີ່ສອງ ຂອງການ ແຜ່ຣະບາດ ດຽວນີ່ ຕອນນີ້ ນີ່ກໍຄື ຈະສ່ວນໃຫຍ່ ຈະບໍ່ແມ່ນ ຄົນທີ່ ເຄື່ອນຍ້ານ ແລ້ວ ກໍຈະໄປ ໃນສ່ວນຄົນ ທົ່ວໄປ.”

ເຈົ້າໜ້າທີ່ ກ່າວອີກວ່າ ປັດຈຸບັນ ກະຊວງ ສາທາຣະນະສຸຂ ໄດ້ເພິ້ມ ການເອົາໃສ່ ຊ່ວຍປິ່ນປົວ ໃຫ້ຄວາມຮູ້ ແລະ ຄວາມເຂົ້າໃຈ ໃຫ້ແກ່ ຜູ້ຕິດ ເຊື້ອໂຣຄເອດສ໌ ຫລາຍຂື້ນ ໂດຍໄດ້ສ້າງ ສູນຕ້ານ ໂຣຄເອດສ໌ ຂື້ນຕື່ມ. ໃນຂນະນີ້ ໃນທົ່ວ ປະເທດລາວ ມີຄົນ ຕິດ ເຊື້ອໂຣຄ HIV ທັງໝົດ ເຖິງ 4,272 ຄົນ ໃນນັ້ນ ມີຜູ້ປ່ວຍ ເປັນ ໂຣຄເອດສ໌ແລ້ວ 2,736 ຄົນ ແລະ ຜ່ານມາ ໄດ້ເສັຍ ຊີວິດ ໄປແລ້ວ 1,170 ຄົນ.

ເຈົ້າໜ້າທີ່ ກະຊວງ ສາທາຣະນະສຸຂ ອະທິບາຍ ວ່າ ສາເຫດ ທີ່ພາໃຫ້ ຈຳນວນ ຄົນລາວ ຕິດເຊື້ອໂຣຄ HIV ຫລາຍຂື້ນ ກໍເພາະວ່າ ປັດຈຸບັນ ຢູ່ລາວ ມີສະຖານທີ່ ບັນເທີງ ຫລາຍ ແລະ ສະຖານທີ່ ເຫລົ່ານີ້ ຫລາຍ ບ່ອນເປັນ ໂຮງໂສເພນີ ທີ່ຜູ້ ບໍຣິການ ທາງເພດ ຫລາຍຄົນ ບໍ່ໃຊ້ ຖົງອະນາໄມ ປ້ອງກັນ.

ໃນປີຜ່ານມາ ໂຮງໝໍ ບາງແຫ່ງ ຢູ່ ນະຄອນຫລວງ ວຽງຈັນ ໄດ້ກວດເລືອດ ຄົນງານລາວ ທີ່ກັບ ມາຈາກ ປະເທດໄທ; ຜົນປະກົດ ວ່າ ຄົນງານ ເຫລົ່ານັ້ນ ຫລາຍຄົນ ຕິດເຊື້ອໂຣກ HIV.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.