ຊາວບ້ານຍັງຖືກຕັດຂາດ ຈາກການຊ່ວຍເຫລືອ

ເຈົ້າຫນ້າທີ່ ລາວ ຍັງບໍ່ ສາມາດ ເຂົ້າໄປ ຊ່ອຍເຫລືອ ປະຊາຊົນ ຜູ້ທີ່ໄດ້ ຜົລກະທົບ ຈາກ ລົມພະຍຸ ໄຮມາ ໄດ້ ໃນບາງເຂດ ຍ້ອນຖນົນ ຖືກຕັດຂາດ.
ສິດນີ
2011-06-30
ອີແມວລ໌
ຄໍາເຫັນ
Share
ພິມ
ສະພາບນໍ້າຖ້ວມ ທີ່ເມືອງທຸຣະຄົມ ໃນຄາວກ່ອນ ຫົນທາງ ຖືກຕັດຂາດ ຫລາຍສາຍ
ສະພາບນໍ້າຖ້ວມ ທີ່ເມືອງທຸຣະຄົມ ໃນຄາວກ່ອນ ຫົນທາງ ຖືກຕັດຂາດ ຫລາຍສາຍ
RFA

ກົດຟັງສຽງ

ສະຖານະການ ນ້ຳຖ້ວມ ຈາກ ລົມພະຍຸ ໄຮມາ ໃນຫລາຍ ແຂວງ ຂອງລາວ ທີ່ເຮັດ ໃຫ້ຄົນ ເສັຽຊີວິດ ແລ້ວ 7 ຄົນ ແລະ ບ້ານເຮືອນ ຫລາຍຫລັງ ຖືກທຳລາຍ. ຈົນເຖີງ ປັດຈຸບັນ ໃນບາງເຂດ ເຈົ້າຫນ້າ ກູ້ພັຍ ຍັງບໍ່ສາມາດ ເຂົ້າໄປໃຫ້ ການ ຊ່ວຍເຫລືອໄດ້ ຍ້ອນຖນົນ ຫົນທາງ ຖຶກຕັດຂາດ ດັ່ງເຈົ້າຫນ້າທີ່ ເມືອງ ບໍຣິຄຳໄຊ ກ່າວວ່າ:

"ໄຮ່ນາ ປະຊາຊົນ ຊື່ງ ກຳລັງ ປັກດຳ ສອງພັນ ກວ່າ ເຮັກຕາ ກວມເອົາ 55% ຂອງພື້ນທີ່ນາ ໃນທົ່ວແຂວງ ຖືກນ້ຳ ຖ້ວມຫມົດ ບໍ່ສາມາດ ເຮັດນາໄດ້ ໂດຍສະເພາະ ທາງເຂດ ກາສີ ຊຽງລື້".

ທ່ານວ່າ ຜົລກະທົບ ເຮັດໃຫ້ ປະຊາຊົນ ໃນ 24 ຫມູ່ບ້ານ ທີ່ແຂວງ ບໍຣິຄຳໄຊ ໄດ້ຮັບ ຄວາມເສັຽຫາຍ ແລະ ຖນົນຫົນທາງ ກໍ່ຖືກ ຕັດຂາດ ຫລາຍສາຍ ການສັນຈອນ ໄປມາ ຕ້ອງຢຸດສງັກ, ບ້ານທີ່ໄດ້ຮັບ ຜົລເສັຽຫາຍ ຫລາຍ ກໍ່ແມ່ນ ບ້ານ ກົກໂພ ບ້ານປາງເຮືອງ ແກ້ງຍາງ ແລະອີກ 8 ຫມູ່ບ້ານ ໃນເຂດ ເທສບານ ນອກຈາກ ໄຮ່ນາ ທີ່ເສັຍຫາຍ ແລ້ວຍັງມີ ສວນມັນຕົ້ນ ແລະ ສວນຫມາກໄມ້ ຊນີດຕ່າງໆ ເສັຽຫາຍ ນຳອີກ.

ຖນົນເລກ 1D ຖືກຕັດຂາດ ແລະ ຖນົນ 4B ກໍ່ຖືກດີນ ເຈື່ອນລົງໃສ່ ຫລາຍຈຸດ ເຮັດໃຫ້ການ ເຂົ້າໄປ ຊ່ອຍເຫລືອ ປະຊາຊົນ ມີຄວາມ ລຳບາກ ແລະ ບາງແຫ່ງ ເຂົ້າໄປ ບໍ່ໄດ້ເລີຍ ຣະບົບ ໄຟຟ້າ ກໍ່ຢຸດທໍາງານ. ທ່ານກ່າວເພີ້ມ ອີກວ່າ:

"ແລະ ກໍ່ເຂດຫ້ວຍ ກໍ່ມີນ້ຳ ໄຫລພັດ ເຮຶອນ ປະຊາຊົນ ມາຕ້ານໃສ່ ເສົາໄຟຟ້າ ເຮັດໃຫ້ເສົາ ໄຟຟ້າຫັກ ແຕ່ມາຮອດ ປັດຈຸບັນ ພນັກງານ ໄຟຟ້າ ກໍ່ກໍາລັງ ແກ້ໄຂ".

ທາງການ ກ່ຽວຂ້ອງ ທຸກພາກສ່ວນ ໃນແຂວງ ກໍ່ກຳລັງ ຣະດົມ ກຳລັງ ໃນການ ຊ່ອຍເຫລືອ ຜູ້ທີ່ໄດ້ຮັບ ເຄາະຮ້າຍ ໃນຫລາຍວິທິ ເຊັ່ນການ ປັບປຸງຖນົນ ໃຫ້ໃຊ້ໄດ້ ຊົ່ວຄາວ ເພື່ອຈະນຳ ສີ່ງຂອງ ທີ່ຈຳເປັນ ໄປຊ່ອຍ ປະຊາຊົນ ເຊັ່ນ ອາຫານ ການກີນ ຢາຮັກສາໂຣຄ ເຄື່ອງນຸ່ງຫົ່ມ ແລະ ນ້ຳສະອາດ.

ເຕັມຫນ້າ