Sebiylik xiyallirini izdep: imran sada'iy bilen söhbet


2020-01-03
Share
Imran-Sadi-02.jpeg Yash sha'ir imran sada'ining türkiyede neshr qilin'ghan shé'irlar toplimi.
Photo: RFA

2003-Yili qeshqer shehirining yopurgha nahiyeside meripetperwer a'ilide dunyagha kelgen imran abdughéni sada'iy bashlan'ghuch we ottura mektep ma'aripini ürümchi shehiride alghandin kéyin qariliqini tamamlighan. U herxil sewebler bilen 2016-yili ana wetinidin ayrilishqa mejbur bolup, türkiyening istanbul shehirige kélip yerleshken.

U musapirliq hayatigha qedem qoyghandin kiyin edebiy ijadiyetni türk tilida élip bérishqa bashlighan. Imran sada'iyning türkche "Yurtum qaldi" namliq shé'iri türkiye döletlik shé'ir musabiqisining oqughuchilar türide mukapatqa érishken. Sha'irning bezi shé'irliri "Yéngi sen'et we edebiyat zhurnili", yash sha'irlar birliki "Altun", edebiyat zhurnili- "Yultuz" qatarliq bir qanche zhurnallarda élan qilin'ghan.

Sha'ir istanbulda yalghuz kishilik shé'ir kéchiliki ötküzüp qizghin alqishlargha érishken. 2019-Yili sha'irning "Tamche" namliq tunji türkche shé'irlar toplimi türkiyede "Dahiy neshriyati" teripidin neshr qilinip, her qaysi kitabxana hem tor béketlerde sétilishqa qoyulghan. 

Sha'ir imran sada'iy 2019-yili 13 qétimliq edérne, girétsiye, bulghariye qatarliq döletlerde dawam qilghan xelq'ara türkche shé'ir pa'aliyitige tunji qétim Uyghurlargha wakaliten qatniship, qizghin alqishqa érishken. U hazir istanbulda yene oqushini dawam qilmaqta.


Chillighaymen

Imran sada'iy


Bir késeldek chaplashti bu hijran janime,

Bir külüp sayrisam ném bolur bu epghan janime,

Qanche yildur küylisemmu bir nimjan janime,

Quyulup kelmidi jamgha shipa derman janime,

Chillighaymen sewrim bile el nishan janime.


Yashar idim menmu bir chagh gülzar makanimda, 

Gödekkine tay idim arzu uzar zamanimda,

Sözlisem emdi halimni ghem yatar janimda,

Méningdekni körmigenmen gül tozar hayatimda,

Chillighaymen sewrim bile el nishan janime.


Baghda dermish bulbul "Yandim gül derdide men", 

Yandingmu sen shamchilik turar jaying gül baghdisen,

Bir körelmey istek yüzini qan yutqini men,

Déyilse ne hal bu shu'an bir mung ghezelxanmen,

Chillighaymen sewrim bile el nishan janime.


Tökülgen kindik qinim shu güldiyar qaldiya,

Qizilgüller zep yarashqan leylizar qaldiya,

Égiz-égiz étiki baghliq taghlar qaldiya,

Yultuz izdep shad yatqan kengri saylar qaldiya,

Chillighaymen sewrim bile el nishan janime.


Pada-pada tagh baghrida botilaqlar qaldi ene,

Yéshil yaylaqlarda taychaqlar qaldi ene,

Beygilerde talmighan arghimaqlar qaldi ene,

Shu élimni bésip quyun chaqmaqlar qaldi ene,

Chillighaymen sewrim bile el nishan janime.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.