Әрдоғанниң қазақистанда “шәрқий түркистандин кәлгән хәвәрләр бизни әнсирәтмәктә” дегини немини чүшәндүриду?

Түркийә президенти рәҗәп таййип әрдоған өткән һәптә қазақистанға елип барған зиярити җәрянида 16-апрел күни қазақистанниң түркистан шәһиридики түркийә-қазақистан ортақ қурған әхмәт йәсәви университетини зиярәт қилип, түркийә селип бәргән мәсчит вә кутупханиниң ечилиш мурасимиға қатнашти. Арқидин университет тәрипидин өзигә берилгән пәхри докторлуқ унванини елиш мурасимиға қатнашти.

У, мурасимда қилған нутқида “шәрқий түркистан вә бирмадин кәлгән хәвәрләр бизни әнсирәтмәктә, биз түркийә болуш сүпитимиз билән тарихимиз вә земинимиз бизгә йүклигән мәсулийәтни чүшинип йетиглик” дегән сөзләрни тәкитлиди.

Түркийә җумһурийити дөләт рәиси рәҗәп таййип әрдоғанниң қазақистанниң түркистан шәһиридә қазақистан дөләт башлиқи нурсултан назарбайефниң йенида шәрқий түркистан мәсилисини тилға елишини қандақ чүшинишимиз керәк? бу сөзиниң қазақистанниң уйғур сияситигә тәсири боларму? дегән соалларни чөридигән һалда түркийә истратегийилик чүшәнчә институти түркийә-хитай мунасивәтлири мутәхәссиси доктор әркин әкрәм вә уйғур хәвәр вә тәтқиқат мәркизи тәтқиқатчиси һамут гөктүрк әпәндиләр билән сөһбәт елип бардуқ.

Др. Әркин әкрәм әпәнди, түркийә дөләт рәиси рәҗәп таййип әрдоғанниң шәрқий түркистанни тилға елиши түркийә һөкүмитиниң мәзлум вә езилгән хәлқләргә ярдәм қилиштин ибарәт қиммәт қаришиниң нәтиҗиси икәнликини баян қилди.

Һамут гөктүрк болса, түрк дунясиниң тарихий шәһири, әхмәт йәсивий һәзрәтлириниң қәбриси бар түркистанда түрк дунясида гепи өтидиған чоң дөләтләрдин бири болған түркийә җумһурийити рәиси рәҗәп таййип әрдоғанниң шәрқий түркистан мәсилисини тилға елишиниң зор әһмийәткә игә икәнликини баян қилди.