Бишкәктә уйғурларниң чәтәлләрдики паалийәтлири музакирә қилинди

Ихтиярий мухбиримиз ферузә
2018-11-28
Share
Rozimuhammet-Abdulbaqi-nutuq-sozide.jpg Дуня уйғур қурултийиниң қирғизистандики вакаләтчиси розимуһәммәт абдулбақи нутуқ сөзлимәктә. 2018-Йили 28-ноябир, бишкәк.
RFA/Féruze

28-Ноябир күни қирғизистан пайтәхти бишкәк шәһиридә дуня уйғур қурултийиниң қирғизистандики вакаләтчиси розимуһәммәт абдулбақиниң уюштуруши билән 6-ноябир күни җәнвә шәһиридә өткүзүлгән намайишниң роһини йәткүзүш чоң йиғини ечилди. Бу йиғинға явропадики паалийәтләргә қирғизистандин қатнашқан тоққуз вәкил вә бишкәк шәһири шундақла униң әтраплиридики йеза-шәһәрләрдики уйғур җамаәтчиликниң вәкиллири қатнашти. Мурасим розимуһәммәт абдулбақиниң риясәтчиликидә елип берилди.

Мурасим қирғиз җумһурийитиниң вә шәрқий түркистан миллий марши билән башланди, андин әркинлик йолида вапат болғанларға атап хәтмә-қуран қилинди.

Мурасим давамида вәкилләр өзлириниң һес-туйғулирини ейтип, көпчиликни вәтәнпәрвәрликкә чақиришти. Намайишқа қатнашқан уйғур тилидики "иттипақ" гезитиниң муавин муһәррири, сиясий пәнләрниң магистири абдурәһим һапизи, дуня уйғур қурултийиниң паалийәтлирини юқири баһалап, 2018-йилини уйғур тарихидики муһим йил сүпитидә йезиш керәкликини тәкитлиди

Абдурәһим әпәнди йәнә 21-әсирниң бешида уйғур мәсилиси хитайниң ички иши болған болса, бүгүнки күнләрдә дуня сәһнисидә уйғур мәсилиси көтүрүлүп, ғәрб дөләтлири уйғурларни етирап қиливатқанлиқини алаһидә тәкитлиди.

"иттипақ" җәмийитиниң сабиқ рәиси дилмурат әкбароф өз нутқида рабийә қадир ханимниң бу җәһәтләрдики иш-паалийәтлиридинму ғурурлиниватқанлиқини билдүрди.

Шундақла мурасим давамида дуня уйғур қурултийиниң рәиси долқун әйса қирғизистан вә қазақистанда яшаватқан уйғур җамаәтчиликигә өз мураҗитини йоллиди. Риясәтчи розимуһәммәт әпәнди уйғур җамаәтчиликни бирликкә чақирип, дуня уйғур қурултийиниң сиясий сәһнидә уйғурларниң парламенти орнида тонулғанлиқини тәкитләп өтти.

Мәзкур йиғинға қатнашқан "инсан һоқуқлирини қоғдаш" тәшкилатиниң рәиси турсун ислам әпәнди, радийо зияритимизни қобул қилип, мәзкур йиғинни әһмийити тоғрисида сөзләп өтти.

Мурасимға қатнашқан "иттипақ" җәмийитиниң аяллар кеңишиниң рәиси рашидәм әмәтханова д у қ рәһбәрлиригә, шундақла қирғизистандин қатнашқан 9 кишигә тәшәккүрлирини билдүрүп, долқун әйса әпәнди йоллиған мураҗәткә қарита өз миннәтдарлиқини билдүрүп, мәзкур йиғин арқилиқ д у қ елип барған паалийәтләр һәққидә толуқ мәлуматларни алғанлиқини алаһидә тәкитләп өтти.

2018 Йили қирғизистандики уйғур җамаәтчиликиниң елип барған паалийәтлири вә һәр хил йиғин-мурасимлириға көп санда кишиләрниң келип қатнишиватқанлиқи, бу дөләттә яшаватқан уйғурларниң өз миллитиниң тәқдиригә, җүмлидин уйғур дияридики сиясий вәзийәткә алаһидә диққәт бериватқанлиқини көрситидикән.

Уйғурлар асасән қирғизистанниң бишкәк шәһири вә униң әтрапидики йезиларға, шәһәрләргә маканлашқан болуп, көп сандики уйғур аһалиси 1955-1962-йиллири уйғур елидин көчүп кәлгәнләр вә уларниң әвладлиридур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт