Alte xil “Tarix” we alte xil kazzapliq

Mustemlikichi xitaylarning yéngi nezeriye dégini, zadi néme dégini? bu nezeriye mustemlike Uyghuristan'gha xitay köchmenlirini téximu köplep yerleshtürüsh nezeriyisi dégenliktur. Yéngi ijadiyet dégini Uyghur, qazaqning iknzarlirini we yaylaqlirini tartip élip xitay köchmenlirige tarqitip bérish ijadiyiti dégenliktur. Yéngi tejribe dégini, mustemlike Uyghuristanni yéngiche 19 ölkige mustemlike qilip bérish dégenliktur. Yéngi netije dégini, mustemlike Uyghuristanning yer asti bayliqini jümlidin néfit bayliqini tiz échish, tiz yötkesh dégenliktur. Qeshqer shehirini tiz yoqitish dégenliktur.

Tengritagh torining xewirige: “Aptonom rayonimizning alte tarixni, 10 ming kishige léksiye qilip sözlesh pa'aliyitining bashlinish murasimi ötküzüldi” dep mawzu qoyuldi. Teshwiqat mudiri xu wi yuqiriqidek sözlep bolghandin kéyin yene mundaq dédi:
-“Alte tarixni sözlishimiz kérek”. Mustemlikichi xitaylarning “Alte tarix” dégini néme dégini? bular, partiye rehberlikidiki xelqning küresh tarixi, igilik tiklesh tarixi, islahat, ishikni échiwétish tarixi, shinjang tarixi, milletler tereqqiyat tarixi, dinning özgirish tarixi qatarliq tarixlar iken.

Partiye rehberlikidiki xelqning küresh tarixi dégenlik, xitay kommunistik partiyisi we uning armiyisi Uyghuristan'gha tajawuz qilip kirgendin kéyin, partiye rehberlikide Uyghuristanni mustemlike qilish tarixi dégenliktur. Igilik tiklesh tarixi dégenlik, bingtu'en xitayliri we köchmen xitaylarning mustemlike Uyghuristanda igilik tiklesh tarixi dégenliktur. Islahat, ishikni échiwétish tarixi dégenlik, bu tarixni eslide amérikiliqlar yézishi kérek idi. Chünki békinme we qalaq halette turghan xitayning derwazisini amérikiliqlar échiwétip, xitayni bügünkidek islahat qilalaydighan, dunyada akang qarighay ikkinchi déyeleydighan haletke keltürüp qoyghan dölet amérika bolghanliqtin, xitayning islahat, échiwétish tarixni amérikiliqlarning yézishi toghra bolatti.

Shunglashqa bu yerde mustemlike xitaylar üchün islahat, ishikni échiwétish tarixi deydighan tarix bolmaydu.

Shinjang tarixi dégini néme dégenlik, xitay mustemlikichiliri aldirap-ténep deyduki, “Shinjang xen dewridin tartip xitayning zémini idi.” emma, emeliyette shinjang tarixi dégenlik, mongghullarning, manjularning Uyghuristanni mustemlike qilish tarixi dégenliktur. Bu zémin'gha héchqachan, 20-esirning 40-yilliridin burun, xitayning qedimi yetken emes dégenliktur.

Atalmish milletlerning tereqqiyat tarixi dégenlik, néme dégenlik? Uyghurlarni hoquqtin ayrip tashlash, xitay köchmenliri hakimiyitini Uyghuristanda yerleshtürüsh, Uyghurlarni pilanliq tughut arqiliq öltürüsh dégenliktur.

Altinchisi dinning özgirish tarixi dégenliki néme dégenlik, késip éytimenki, islam dini, xristi'an dini, budda dini qatarliq dinlarni xitay mustemlikichiliri hergiz özgertelmeydu hem marksizmni, xitayche buddizmni, maw zédungizmni islam dinining we xristi'an dinining ornigha dessitelmeydu.

Yuqiriqi alte xil tarix, emeliyettiki alte xil kazzapliq, 10ming kishilik léksiye sözlesh pa'aliyitining mezmuni hésablinidiken.

Xitay üchün qandaq qilghuluq, qarighanda xitay mustemlikichiliri mustemlikisi Uyghuristanda bashqurushning idé'ologiyilik asaslirini tapalmighan gep. Tapqandimu yalghanchiliq bilen kazzapliq chénip qalghan gep. Shunga alte xil tarix dégenni oydurup chiqqan bolushi mumkin.